Isaías
2 Rígi̱ rí ndiʼyoo Isaías a̱ʼdióo Amoz ga̱jma̱a̱ numuu Judá ma̱ngaa Jerusalén:
2 Náa iwáá mbiʼi,
kúbá ndrígóo goʼwóo Jeobá
mawi̱ji̱ gújkhúʼ náa inuu kúbá
ga̱jma̱a̱ mawi̱ji̱ mitsídánʼ náa inuu bíjní,
ikhí magún xa̱bu̱ bi̱ kúwá náa xúgíʼ xuajin mba̱ʼu̱.
3 Xa̱bu̱ bi̱ kúwá náa mbaʼa xuajin magún ga̱jma̱a̱ muthi:
“Gu̱ʼgua̱, gu̱tsimulú náa kúbá ndrígóo Jeobá,
náa goʼwóo Dios ndrígóo Jacob.
Ikhaa masngájmulú kambo̱o̱,
ga̱jma̱a̱ ikháánʼlú majngruigulú náa kambo̱o̱”.
Numuu dí xtángoo* magajnúu náa Sion,
ga̱jma̱a̱ ajngóo Jeobá ma̱ʼkha̱ náa Jerusalén.
4 Ikhaa nindxu̱u̱ bi̱ maʼnimbánuu xkujndu ndrígu̱ún xa̱bu̱ xuajin
ga̱jma̱a̱ maʼnimbánuu numún xa̱bu̱ bi̱ kúwá náa mbaʼa xuajin.
Xa̱bu̱ xuajin ni xúxujxi̱ espada mu muxmijná ga̱jma̱a̱
ni má xájmañún muni̱ itháan guerra.
5 Goʼwóo Jacob, gu̱ʼgua̱,
gajngruigulú náa nambiʼi agiuuʼ Jeobá.
6 Numuu dí ikháán nitatsíñáánʼ xuajñaanʼ, goʼwóo Jacob,
ikhiin nuni̱ xó má eni̱ xa̱bu̱ bi̱ kúwá xígií náa nagájnuu a̱jkha̱ʼ,*
nuni̱ magia xó má eni̱ filisteos
ga̱jma̱a̱ náa ikhiin kúwá mbaʼin e̱jñu̱ún xa̱bu̱ bi̱ naguwaáʼ.
7 Náa xuajñuu kajtííʼ plata ga̱jma̱a̱ oro,
ra̱ʼkhá tháán guáʼdáá dí gíʼdoo numuu.
Náa xuajñuu gajtíin wáyú
ga̱jma̱a̱ ra̱ʼkhá tháán guáʼdáá cárru.
8 Náa xuajñuu gajtíin dioses bi̱ nda̱a̱ rí ejmiin.
Nusmbati̱gu̱u̱n náa inuu dí ikhiin má nini̱ ga̱jma̱a̱ ñawúúnʼ,
ma̱ngaa náa dí nini̱ ga̱jma̱a̱ e̱ji̱i̱n ñawúúnʼ.
9 Xa̱bekha nusmbati̱gu̱u̱n, nuxruigúmíjná,
rakáʼnii dí matani̱ mba̱a̱ a̱jkia̱a̱nʼ xtañún.
10 Gata̱ʼa̱la náa tsíñu, gurkaʼwumijná náa yujndaʼ
ga̱jma̱a̱ numuu dí nakásga̱ñu̱u̱nʼ Jeobá,
ma̱ngaa ga̱jma̱a̱ tsiaki̱i̱ mba̱a̱ rí gíʼdoo.
11 Bi̱ nuni̱ mbaʼumíjna̱ muxruigú edxu̱ún
ga̱jma̱a̱ xa̱bekha bi̱ nuni̱ mbaʼumíjna̱ maguma majti̱i̱nʼ.
I̱ndó Jeobá gáguma mba̱a̱ mbiʼi rúʼko̱.
12 Numuu dí nindxu̱u̱ mbiʼi ndrígóo Jeobá bi̱ naʼtáñajúúnʼ ángeles.
Ma̱ʼkha̱ náa mbá xúgíinʼ bi̱ nuni̱ mbaʼumi̱jna̱ ga̱jma̱a̱ bi̱ naguma mbaʼwi̱i̱n,
náa mbá xúgíinʼ, tséʼniuu á mu guáʼdáá numún o na̱nguá,
13 ma̱ʼkha̱ náa mbá xúgíʼ ixi̱ cedro dí rígá náa Líbano, dí mbi̱jua̱ ga̱jma̱a̱ dí mitsídánʼ,
ma̱ngaa náa mbá xúgíʼ ixi̱ roble dí rígá náa Basán,
14 náa mbá xúgíʼ kúbá rí mitsídánʼ
ga̱jma̱a̱ náa mbá xúgíʼ bíjní rí mitsídánʼ,
15 náa mbá xúgíʼ torre rí mitsídánʼ ga̱jma̱a̱ náa mbá xúgíʼ xtájtsí dí wájun gújkhúʼ,
16 náa mbá xúgíʼ barcos dí na̱ʼkha̱ náa Tarsis
ga̱jma̱a̱ náa mbá xúgíʼ barcos rí mitsaanʼ.*
17 Rí naʼnimbamínáʼ xa̱bu̱ magajtaa,
ga̱jma̱a̱ xa̱bekha bi̱ nuni̱ mbaʼumíjna̱ maguma majti̱i̱nʼ.
I̱ndó Jeobá gáguma mba̱a̱ mbiʼi rúʼko̱.
18 Dioses bi̱ nda̱a̱ rí ejmiin mambíin mbá kayuuʼ.
19 Xa̱bu̱ matu̱ʼu̱u̱n náa iñúuʼ tsíñu
ga̱jma̱a̱ náa iñúuʼ ku̱ba̱ʼ,
ga̱jma̱a̱ numuu rí nakásngañu̱u̱ʼ Jeobá,
ma̱ngaa ga̱jma̱a̱ tsiaki̱i̱ mba̱a̱ dí gíʼdoo,
índo̱ ikhaa gátujxu̱u̱ mu maʼba̱a̱n ku̱ba̱ʼ ga̱jma̱a̱ gamíi.
20 Mbiʼi rúʼko̱ xa̱bu̱ murugui̱i̱n xándiu̱ún bi̱ nda̱a̱ dí ejmiin bi̱ nigumiin ga̱jma̱a̱ plata ma̱ngaa oro,
bi̱ nini̱i̱ mu musmbati̱gu̱u̱n inún,
mudi̱i̱nʼ náa gajchún musarañas* ga̱jma̱a̱ xtíʼkhú,*
21 mu xúʼko̱ ma̱ndoo matu̱ʼu̱u̱n náa iñúuʼ tsíñu
ga̱jma̱a̱ náa iñúuʼ pátsí dí gíʼdoo tsúwáʼ,
ga̱jma̱a̱ numuu rí nakásngañu̱u̱ʼ Jeobá,
ma̱ngaa ga̱jma̱a̱ tsiaki̱i̱ mba̱a̱ dí gíʼdoo,
índo̱ ikhaa gátujxu̱u̱ mu maʼba̱a̱n ku̱ba̱ʼ ga̱jma̱a̱ gamíi.
22 Májánla má ikháanʼ á mu nuniʼñáánʼ raku̱mala ku̱ñu̱u̱n xa̱bu̱ú,
bi̱ guabiinʼ bi̱ ndañúunʼ xi̱ʼ mu makuwá ga̱jma̱a̱.
Náá numuu dí maku̱ma̱la kuñu̱u̱n xá.