Ezequiel

7 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, rígi̱ dí Tátá Jeobá bi̱ itháán mba̱a̱ naʼthúu̱n ku̱ba̱ʼ Israel: ‹¡Nitumuu mbiʼi ndrígáaʼ! Ni̱ʼkha̱nú náa xúgíʼ tsu̱du̱u̱ ku̱ba̱ʼ rígi̱. 3 Dí xúgi̱ nitumuu mbiʼi ndrígáaʼ, ga̱jma̱a̱ maxidirámuuʼ mbá xúgíʼ dí nakásngañu̱ʼ náa ikháán, manimbánuu numaaʼ xó má dí natani̱ ma̱ngaa manda̱ʼa̱a̱ʼ cuenta ga̱jma̱a̱ numuu xúgíʼ rí tsaga dí natani̱. 4 Xágáwíinʼ a̱jkiu̱nʼ ka̱ya̱a̱ʼ ni má xáxmiéjúnʼ ka̱ya̱a̱ʼ, numuu rí ma̱ni̱ dí ma̱ʼkha̱ náa ikháán ga̱jma̱a̱ numuu xúgíʼ dí nitani̱, ma̱ni̱ dí matamíniiʼ ga̱jma̱a̱ numuu rí tsaga dí nitani̱. Ikháanʼla mu̱ʼgua̱nú mbu̱ya̱a̱ dí ikhúún nindxu̱ʼ Jeobá›.

5 Rígi̱ dí naʼthí Tátá Jeobá bi̱ itháán mba̱a̱: ‹¡Atayáá! Ma̱ni̱ rí ma̱ʼkha̱ mbá gamiéjunʼ, mbá gamiéjunʼ rí nimbá miʼtsú xóó tárígá. 6 Nartumuu mbiʼi ndrígáaʼ. Mbiʼi ndrígáaʼ ma̱ʼkha̱nú ga̱jma̱a̱ maʼni ngínáá. ¡Atayáá! Na̱ʼkha̱ má. 7 Ni̱ʼkha̱nú má mbiʼyala,* xa̱bu̱ xuajin. Nitumuu má, mbiʼi rígá mijngii. I̱ndó dí gamíi rígá náa kúbá, nándáa dí gagi.

8 Gítháán má maxidirámuuʼ dí nakásngañu̱ʼ náa ikháán, maxidirámuuʼ mbá xúgíʼ dí nakásngañu̱ʼ náa ikháán, manimbánuu numaaʼ xó má dí natani̱ ma̱ngaa manda̱ʼa̱a̱ʼ cuenta ga̱jma̱a̱ numuu xúgíʼ rí tsaga dí natani̱. 9 Xágáwíinʼ a̱jkiu̱nʼ ka̱ya̱a̱ʼ ni má xáxmiéjúnʼ ka̱ya̱a̱ʼ, numuu rí ma̱ni̱ dí ma̱ʼkha̱ náa ikháán ga̱jma̱a̱ numuu xúgíʼ dí nitani̱, ma̱ni̱ dí matamíniiʼ ga̱jma̱a̱ numuu rí tsaga dí nitani̱. Ikháanʼla mu̱ʼgua̱nú mbu̱ya̱a̱ dí ikhúún nindxu̱ʼ Jeobá, bi̱ xtáa raxnála.

10 ¡Atayáá, na̱ʼkha̱nú má mbiʼi! ¡Na̱ʼkha̱ má mijngii! Ni̱ʼkha̱nú má mbiʼi ndrígáaʼ,* nijmi̱di̱ riʼyu̱u̱ xkuíyá ga̱jma̱a̱ nikráʼáan dí naʼnimbamínáʼ xa̱bu̱ sia̱nʼ. 11 Ndi̱ja̱a̱ dí ra̱májánʼ rí asndu ni̱jkha̱nú ninindxu̱u̱ xóo xkuíyá dí naʼni dí ra̱májánʼ. Xákáwíinʼ ikhiin, ni má xákríya̱a̱ʼ dí guáʼdáá, ni má xa̱bu̱ mbaʼin bi̱ kúwá náa ikhiin ga̱jma̱a̱ dí guáʼdáá numún. 12 Martumuu, ma̱ʼkha̱nú mbiʼi. Bi̱ na̱ʼtsi̱ xáʼdxuun ga̱jma̱a̱ bi̱ nagujua̱ xágáwíinʼ a̱jkiu̱u̱n, numuu dí náa xa̱bu̱ mbaʼin* buʼko̱ rígá dí nakásngañu̱ʼ. 13 Numuu rí bi̱ nagujua̱ xátanga̱a̱ náa mbaaʼ rí nigujua̱ maski ajndu makríya̱a̱ʼ, numuu dí nikujmaa náa niwasngájma* maguáʼníí mbá xúgíinʼ xa̱bu̱. Nimbáa ni xátanga̱a̱. Ga̱jma̱a̱ numuu aʼkhúún,* nimbáa xáʼni kríyamínáʼ.

14 Nindiyííʼ trompeta ga̱jma̱a̱ mbá xúgíinʼ kúwá xawii, mú nimbáa tséjkha̱ gáxmína̱ʼ, numuu rí nakásngañu̱ʼ nakha náa xa̱bu̱ bi̱ mbaʼin buʼko̱. 15 Espada rígá rexa̱a̱, nandii ga̱jma̱a̱ ewiʼ rígá awúu̱n. Xúgíinʼ bi̱ kúwá xanáá makhañún ga̱jma̱a̱ espada, ga̱jma̱a̱ xúgíinʼ bi̱ kúwá náa xuajin makhañún gáʼni ewiʼ ga̱jma̱a̱ nandii. 16 Bi̱ gáʼngu̱u̱n gákáwíin magún náa kúbá xóo paloma bi̱ gíwi̱i̱nʼ náa mata,* mámbáa mamínuuʼ ga̱jma̱a̱ numuu rí nikiéʼkúun. 17 Mbá xúgíʼ ñawúúnʼ xa̱bu̱ ni xágiʼdoo tsiaki̱i̱ ga̱jma̱a̱ mbá xúgíʼ ragómiu̱ún xa̱bu̱ magajtaa iyaʼ.* 18 Nigi̱ʼ xtíin rí mi̱du̱,* ga̱jma̱a̱ mbá xúgíinʼ naguíʼiin. Mbá xúgíinʼ mati̱ñu̱u̱nʼ ga̱jma̱a̱ maʼni tsaʼtsaʼ edxu̱ún.*

19 Muxidíí plata ndrígu̱ún náa kamba̱a̱ ga̱jma̱a̱ mawiñu̱u̱nʼ gáʼni oro ndrígu̱ún. Ni má plata ni má oro ndrígu̱ún xáʼngo̱o̱ gáʼni káwíin náa mbiʼi dí gákásngáñu̱u̱ʼ Jeobá. Xágiʼmún ni má xáʼni jxa̱ʼ awúún, numuu dí plata ga̱jma̱a̱ oro dí guáʼdáá ninindxu̱u̱ mbá dí maʼni majngrádíinʼ dí ni̱jkha̱ kagui̱i̱n muxudamíjna̱ aʼkhá. 20 Nini̱ mbaʼumíjna̱ ga̱jma̱a̱ numuu xóo mitsiʼñíin, ma̱ngaa dí nuniratamijná ga̱jma̱a̱, rúʼko̱ nijmún mu muni̱i̱ xándú bi̱ tsagiin ga̱jma̱a̱ xándú bi̱ xkawi̱i̱nʼ. Ikha jngóo ma̱ni̱ rí mawiñu̱u̱nʼ gáʼni plata ga̱jma̱a̱ oro ndrígu̱ún. 21 Rígi̱ maxnu̱u̱n xa̱bu̱ bi̱ naguwaáʼ xóo rí naguanáa ga̱jma̱a̱ xóo rí niʼngu̱u̱n xa̱bu̱ ra̱míjíinʼ bi̱ kúwá náa tsu̱du̱u̱ ku̱ba̱ʼ ga̱jma̱a̱ ikhiin muni̱ gachíí.

22 Ma̱ni̱ tsínguminaʼ* náa ikhiin ga̱jma̱a̱ náa rí mitsúʼkháan* maguma gachíí, ikhí matu̱ʼu̱u̱n kuʼwáʼ ga̱jma̱a̱ mu̱ni̱ gachíí.

23 Atani̱ ratháá cadena,* numuu dí náa mbá xúgíʼ tsu̱du̱u̱ ku̱ba̱ʼ, kúwá rakháñún xa̱bu̱, numuu dí támbánúu májánʼ numún ga̱jma̱a̱ náa xuajin kajnííʼ dí ra̱májánʼ. 24 Ma̱ʼkhá kagui̱i̱n xa̱bu̱ xuajin bi̱ ra̱míjíinʼ ga̱jma̱a̱ ikhiin makuwá náa guʼwála. Ma̱ni̱ gámbáa dí nuni̱ mbaʼumíjna̱ bi̱ guáʼdáá tsiaki̱i̱, ga̱jma̱a̱ guʼwá náa nduyamajkhuʼ maguma gachíí. 25 Índo̱ gáʼkha̱ rí maʼni mumíniiʼ, mbuyáʼ rí tsímáá mú xárígá. 26 I̱mba̱ má i̱mba̱ gamiéjunʼ gáʼkha̱ ga̱jma̱a̱ i̱mba̱ má i̱mba̱ gúdxawíín dí narígá. Xa̱bu̱ mbuyáʼ rí nawasngájmáá mbaʼyoo mbáa profeta,* mú xtángoo ndrígu̱ún ndxajkun ga̱jma̱a̱ consejo dí nuxna bi̱ kuya̱ edxu̱u̱ ni xárígá. 27 Rey maxtáa ngíná ga̱jma̱a̱ bi̱ kayá edxu̱u̱ xáʼngo̱o̱ a̱jkiu̱u̱n gágiʼthu̱u̱n, ñawúúnʼ xa̱bu̱ xuajin maguáʼáan numuu dí namíñúún. Maniu̱u̱ xó má ikhiin nini̱ ga̱jma̱a̱ manimbánuu numún xó má ikhiin ninimbaníí numún eʼwíinʼ. Ga̱jma̱a̱ mbuyáá dí ikhúún nindxu̱ʼ Jeobá›”.