Ezequiel
28 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, aratháán ajngáa rígi̱ bi̱ kayá edxu̱u̱ náa Tiro: ‹Rígi̱ dí naʼthí Tátá Jeobá bi̱ itháán mba̱a̱:
“A̱jkia̱a̱nʼ niʼnimbamínáʼ, ikha jngóo tsétatsíñáánʼ raratá ‹Nindxu̱ʼ mbáa dios.
Gúnʼ náa xílí* rí nutañajunʼ xóo mbáa dios náa tapo̱o̱ lamáa›.*
Mú nindxa̱a̱ʼ mbáa xa̱bu̱ú, raʼkháa mbáa dios,
maski ajndu náa a̱jkia̱a̱nʼ naku̱ma̱a̱ʼ dí nindxa̱a̱ʼ mbáa dios.
3 Naku̱ma̱a̱ʼ dí najmañaaʼ itháan ki xóo Daniel.
Nda̱a̱ nimbá dí ngu̱ʼwa̱ tayáá ikháán.
4 Ni̱dxu̱ʼnú niraʼdáá numuu dí xtaʼdáá ku̱ma̱ ga̱jma̱a̱ najmañaaʼ,
ma̱ngaa natagímbóó má xúʼko̱ oro ga̱jma̱a̱ plata náa xtaʼdáá dí gíʼdoo numuu.
5 Ga̱jma̱a̱ numuu dí najmañaaʼ natagujua̱, rúʼko̱ niʼni dí maraʼdáá itháan,
a̱jkia̱a̱nʼ niʼnimbamínáʼ ga̱jma̱a̱ numuu dí ra̱ʼkhá tháán xtaʼdáá”›.
6 ‹Ikha jngóo, rígi̱ dí naʼthí Tátá Jeobá bi̱ itháán mba̱a̱:
“Numuu dí náa a̱jkia̱a̱nʼ niku̱ma̱a̱ʼ dí nindxa̱a̱ʼ mbáa dios,
7 ma̱ʼkhá kagui̱i̱n náa ikháán xa̱bu̱ bi̱ naguwaáʼ, bi̱ itháan xkawi̱i̱nʼ bi̱ kúwá náa majñu̱únʼ xa̱bu̱ xuajin,
ikhiin murawíi espádu̱ún mu muni̱ gámbáa ku̱ma̱ ndrígáaʼ dí mitsiʼyá
ga̱jma̱a̱ muni̱ gachíí dí naʼni maxpíbíínʼ.
8 Muni̱ dí midxu̱u̱ʼ náa iñá wajinʼ,
ga̱jma̱a̱ muxiñáán náa tapo̱o̱ lamáa.
9 Lá maratha̱a̱n ajngáa rígi̱ bi̱ gáxíña̱a̱n ráʼ. ‹Nindxu̱ʼ mbáa dios›.
Náa bi̱ tséyamajkuaaʼ mani̱ndxa̱a̱ʼ mbáa xa̱bu̱ú, raʼkháa mbáa dios”›.
10 ‹Makhañáaʼ xóo mbáa bi̱ túthu xtóo xuyuuʼ tsáʼkhúun náa ñawúúnʼ xa̱bu̱ bi̱ naguwaáʼ,
numuu dí ikhúún ni̱tha̱›, eʼthí Tátá Jeobá bi̱ itháán mba̱a̱”.
11 Nigruígú mbu̱júu̱ ajngóo Jeobá. Niʼthúnʼ: 12 “A̱ʼdióo xa̱biya̱, atani̱ mbá ajmúú ngíná ga̱jma̱a̱ numuu rey bi̱ xtáa náa Tiro. Maratha̱a̱n: ‹Rígi̱ dí naʼthí Tátá Jeobá bi̱ itháán mba̱a̱:
“Ikháán nindxa̱a̱ʼ mbá xkri̱da,
numuu dí xtaʼdáá ku̱ma̱ ga̱jma̱a̱ mitsiʼñán.
Dí nindxu̱u̱ rubí, topacio, jaspe, crisólito, ónice, jade, zafiro, turquesa ga̱jma̱a̱ esmeralda,
xúgíʼ itsí rígi̱ tuaʼán náa dí niguma ga̱jma̱a̱ oro.
Xúgíʼ rígi̱ niguma ratháá mbiʼi dí nigumán.
14 Ikhúún niʼgíínʼ xóo mbáa querubín bi̱ juáʼwíi xpíjpiúu, bi̱ niraʼwi̱i̱.
Niraxtaa náa kúbá kaʼwu ndrígóo Dios ga̱jma̱a̱ nijngruámaaʼ náa itsí dí nakha.
15 Asndu nákha mbiʼi dí nigumán xúgíʼ dí natani̱ nindxu̱u̱ májánʼ,
mú nda̱wa̱á nikujmaa dí natani̱ nindxu̱u̱ ra̱májánʼ.
16 Ga̱jma̱a̱ numuu dí ra̱ʼkhá tháán mba̱a̱ dí nitagujua̱,
ni̱dxu̱ʼnú nitani̱ dí ra̱májánʼ ga̱jma̱a̱ nitaxúdaminaʼ aʼkhá.
Ikha jngóo maxkriña̱a̱nʼ náa kúbá ndrígóo Dios xóo mbáa bi̱ nda̱a̱ gamajkuu
ga̱jma̱a̱ maxíña̱a̱n mitsínguánʼ náa rígá itsí dí nakha, ikháán, querubín bi̱ juáʼwíi xpíjpiúu.
17 Niʼnimbamínáʼ a̱jkia̱a̱nʼ ga̱jma̱a̱ numuu rí mitsiʼñán.
Ga̱jma̱a̱ numuu rí naxpíbíínʼ, niʼni gachúu ku̱ma̱ ndrígáaʼ.
Mada̱a̱nʼ náa ku̱ba̱ʼ.
Ma̱ni̱ dí ma̱nindxa̱a̱ʼ mbá dí mumindííʼ reyes.
18 Nitani̱ gachíí náa rí natayamajkún xándiáaʼ ga̱jma̱a̱ numuu dí ra̱ʼkhá tháán nikiéʼkháanʼ, ma̱ngaa xóo tsaga nitani̱ índo̱ nitagujua̱.
Ma̱ni̱ dí mikamuu aguʼ náa tapo̱o̱ ikháán, ga̱jma̱a̱ rúʼko̱ gáʼni dí mikháánʼ.
Ma̱ni̱ maguanúu i̱ndó idiaaʼ náa tsu̱du̱u̱ ku̱ba̱ʼ náa inún mbá xúgíinʼ bi̱ kúwá ruyaaʼ.
19 Mbá xúgíinʼ bi̱ nuniʼnííʼ bi̱ kúwá náa mbaʼa xuajin maguanún tsiánguá índo̱ gúyaaʼ.
Mbá nacha̱ gáguma gámbáanʼ ga̱jma̱a̱ maʼni gamíi.
Matatsiʼñáánʼ raraxtaa asndu kámuu”›”.
20 Nigruígú mbu̱júu̱ ajngóo Jeobá. Niʼthúnʼ: 21 “A̱ʼdióo xa̱biya̱, atanga̱án matiejxi̱ náa Sidón ga̱jma̱a̱ aratáríya̱ʼ dí magíʼnuu. 22 Marata̱: ‹Rígi̱ dí naʼthí Tátá Jeobá bi̱ itháán mba̱a̱:
“Ikháán, Sidón, gi̱i̱ xtáá mu maxmína̱ʼ ga̱jma̱á nindxa̱a̱ʼ, ga̱jma̱a̱ maguma mbu̱u̱n náa majña̱a̱ʼ.
Xa̱bu̱ maguánú mbuyáá dí ikhúún nindxu̱ʼ Jeobá índo̱ gáni̱ dí mamínuuʼ ga̱jma̱a̱ maguma kaʼwu̱ún náa majñuuʼ ikhaa.
23 Makuʼmá nandii náa ikhaa ga̱jma̱a̱ náa kambo̱o̱ maʼga kruígo̱o̱ eʼdi.
Mbaʼin gákháñún náa ikhaa índo̱ gáʼkha̱ espada asndu náá,
ga̱jma̱a̱ ikhiin maguánú mbuyáá dí ikhúún nindxu̱ʼ Jeobá.
24 Ikhú bi̱ kúwá náa goʼwóo Israel ni xáruguamiʼíin iná xtáʼdu̱u̱ rí xkawiʼ ga̱jma̱a̱ iná tsuwanʼ dí mbiiʼ, rí nditháan tsíyoo gáʼñúún, ikhú xa̱bu̱ maguánú mbuyáá dí ikhúún nindxu̱ʼ Tátá Jeobá bi̱ itháán mba̱a̱”›.
25 ‹Rígi̱ dí naʼthí Tátá Jeobá bi̱ itháán mba̱a̱: “Índo̱ gátangu̱ún magímbíin mbu̱júu̱ bi̱ kúwá náa goʼwóo Israel náa mbaʼa xuajin dí nijuadríʼiin, maguma kaʼwu̱ún náa majñu̱únʼ ikhiin náa inún mbá xúgíinʼ xa̱bu̱ xuajin. Ikhiin maguánú makuwá náa ku̱ba̱ʼ dí ni̱xnu̱u̱ xa̱bi̱ʼ Jacob. 26 Ikhí makuwá májánʼ, muni̱ guʼwún ga̱jma̱a̱ mudu ixi̱ uva, makuwá májánʼ índo̱ ikhúún gáni̱ dí mumíniiʼ xa̱bu̱ bi̱ kúwá mijngii náa ikhiin bi̱ tsíñún gúñún, maguánú mbuyáá dí ikhúún nindxu̱ʼ Jeobá Dios ndrígu̱ún”›”.