Isaías
58 “¡Atatsaʼwá xígu, xátatsiʼñááʼ dí nimbá marikha̱a̱ʼ!
Ataxújxi̱ aʼwáaʼ xóo ewán mbá chi̱ji̱ʼ.
Arathún xa̱bu̱ xuajñunʼ náa rí nixujximíjna̱,
ga̱jma̱a̱ bi̱ kúwá náa goʼwóo Jacob aʼkhá rí nu̱ni̱.
2 Nduñúunʼ tsejtsíí mbiʼi, ga̱jma̱a̱ nuthi rí nanigu̱u̱nʼ muniʼnuuʼ kambo̱ʼ,
rí asndu xóo nindxu̱ún mbá xuajin mba̱a̱ bi̱ nuni̱ rí májánʼ
ga̱jma̱a̱ rí xóo túniña̱a̱ʼ xtángoo ndrígóo Dios ndrígu̱ún.
Rí asndu xóo nanigu̱u̱nʼ magún kanuu náa Dios ndrígu̱ún,
ga̱jma̱a̱ nundo̱ʼo̱ʼ rí maniu̱u̱ dí májánʼ:
3 Nuthi: ‹Índo̱ nurkuéyimijnaxu̱,* náá numuu rí tsétayáá rá.
Ga̱jma̱a̱ índo̱ nuxruígúmíjnáxu, náá numuu rí tsétayáá rá.›
Numuu rí mbiʼi dí ikháanʼla nurkuéyimijná,
i̱ndó nduʼyáʼ rí ikháanʼ nandala ga̱jma̱a̱ nu̱ni̱ ngíníi bi̱ nuñajunʼ.
4 Dí nurkuéyimijná naʼni rí muxmíjná ga̱jma̱a̱ magiʼdala,
ikháanʼ nuxmíjná ga̱jma̱a̱ puñete.*
Tséʼnga̱la murkuéyimijná xó má nu̱ni̱ xúgi̱ ga̱jma̱a̱ tséʼngala gúgua̱ʼthi̱i̱n dí aʼwála mawáán asndu mekhuíí.
5 Lá dí nurkuéyimijná rígi̱ nindxu̱u̱ xóo dí ikhúún nandoʼ,
ga̱jma̱a̱ xóo mbá mbiʼi rí nuxruigúmíjná,
ma̱ngaa rí nuxruígú e̱dxa̱laʼ xóo ra̱jxa̱ mbi̱jua̱ rí naguʼmi̱i̱,
ga̱jma̱a̱ rí nu̱bala náa xtíin mi̱du̱* ga̱jma̱a̱ náa idiʼ ráʼ.
Lá rígi̱ dí ikháán erathán rí natarkuéyimináʼ ga̱jma̱a̱ mbá mbiʼi rí maʼdxuu Jeobá ráʼ.
6 Na̱nguá. Xígi̱ eyoʼ dí murkuéyimijná:
Dí matríya̱a̱ʼ cadena rí natani̱ dí ra̱májánʼ,
rí matatsiʼñáánʼ rí naxtoʼóo ga̱jma̱a̱ yugo,
rí matatsiʼñúúnʼ bi̱ numíniiʼ ga̱jma̱a̱ rí mataxpígá jngaa xúgíʼ yugo,
7 araxnún ganitsu ndrígáaʼ mu̱phu̱ bi̱ naxkidxu̱u̱n,
atatsijiin náa guʼwáaʼ bi̱ ngíníi ga̱jma̱a̱ bi̱ na̱nguá guáʼdáá guʼwún,
araxnún rí maguʼwúnʼ bi̱ nda̱a̱ xtiñúún
ga̱jma̱a̱ xátatsiʼñúnʼ bi̱ xtañún.*
8 Á mu xúʼko̱, agiaaʼ mambiʼi xóo índo̱ na̱jkha̱ rajtsiriga̱
ga̱jma̱a̱ nacha̱ gáʼni̱i̱ a̱jkia̱a̱nʼ.
Rí májánʼ dí natani̱ maʼga̱ inaaʼ
ga̱jma̱a̱ tsiaki̱i̱ ndrígóo Jeobá maʼga̱ kidxaaʼ mu mañewa̱a̱n.
9 Ikhú maratha̱a̱n Jeobá ga̱jma̱a̱ ikhaa mariʼñaaʼ,
matatsa̱ʼwa̱ rí mixtambáyáaʼ ga̱jma̱a̱ ikhaa maʼtháanʼ: ‹¡Gi̱i̱ xtáá!›.
Á mu natrígúu náa ikháán yugo,
ga̱jma̱a̱ á mu natatsíñááʼ ratani̱ ñawáanʼ náa eʼwíinʼ
ma̱ngaa matatsiʼñáánʼ raratá ajngáa rí tséjmaa.
10 Á mu naraxnún rí mu̱phu̱ bi̱ naxkidxu̱u̱n dí ikháán nandaaʼ
ga̱jma̱a̱ naraxnún rí nda̱ñúunʼ bi̱ ngíníi,
ikhú agiaaʼ mambiʼi náa mikína
xóo nambiʼi rí ta̱pha̱ mbiʼi.
11 Jeobá maxná ikhaaʼ má xúʼko̱,
ga̱jma̱a̱ maxnáaʼ iyaʼ migi̱i̱n asndu náa ku̱ba̱ʼ rí nda̱a̱ iyaʼ,
maʼni rí itsa̱a̱ʼ maʼni gújkhúʼ,
ga̱jma̱a̱ mani̱ndxa̱a̱ʼ xóo mbá jardín* dí naxtagíyááʼ májánʼ
ga̱jma̱a̱ xóo mbá iduu iyaʼ náa nditháan tsétumuu iyaʼ.
12 Ga̱jma̱a̱ numaaʼ ikháán maguma̱a̱ xuajin dí niguámbáa nákha wajyúuʼ
ga̱jma̱a̱ ikháán matani̱i̱ rajkhúu dí niguámbáa nákha wajyúuʼ.
Magumbiʼyaaʼ bi̱ naʼni̱i̱ xtájtsí rí niguámbáa,
bi̱ naʼni̱i̱ kamba̱a̱ mu makuwá xa̱bu̱ náa rawuunʼ.
13 Á mu ikháán ga̱jma̱a̱ numuu rí natayamajkuíí mbiʼi sábado, tsétayáʼ rí nandaaʼ ikháán,
mbá mbiʼi rí kaʼwu ga̱jma̱a̱ naratá dí mbiʼi sábado ra̱ʼkhá tháán edxaaʼ,
xóo dí nadxaaʼ wéñuuʼ, mbá mbiʼi kaʼwu ndrígóo Jeobá, mbá mbiʼi rí maguma mba̱a̱,
ikhaa rí mataʼyáʼ rí nandaaʼ ikháán ga̱jma̱a̱ marata dí nda̱a̱ numuu, natani̱ mba̱a̱,
14 ikhú Jeobá maʼga̱nú mani̱ndxu̱u̱ dí ra̱ʼkhá tháán gáʼdxaaʼ
ga̱jma̱a̱ maʼni rí madruwán náa itháán mitsídánʼ náa tsu̱du̱u̱ ku̱ba̱ʼ.
Maʼni rí matatsiʼtsu* náa rí nigruigúu wajin xiʼñáaʼ Jacob,
numuu rí Jeobá niʼthí maguma rígi̱”.