Ezequiel

14 Tikhuun bi̱ kuya̱ edxu̱u̱ bi̱ kúwá náa Israel niguwáʼ ga̱jma̱a̱ nitri̱gi̱i̱n náa inuʼ. 2 Ikhú nigruígú ajngóo Jeobá. Niʼthúnʼ: 3 “A̱ʼdióo xa̱biya̱, xa̱bekha bugi̱ nuni̱ kiejuunʼ dí mbuyamajkún xándiu̱ún bi̱ xkawi̱i̱nʼ ga̱jma̱a̱ nigi̱ʼ mbá dí maʼni majngrádiinʼ xa̱bu̱ xuajin mu muni̱ aʼkhá. Lá gíʼmaa maniʼñáminaʼ dí murajxuʼ xáʼ. 4 Ikha jngóo aratamíjná gajmiáanʼ ga̱jma̱a̱ arathún: ‹Rígi̱ dí naʼthí Tátá Jeobá bi̱ itháán mba̱a̱: “Á mu mbáa israelita naʼni kiejuunʼ dí mbaʼyamajkún xándú bi̱ xkawi̱i̱nʼ ga̱jma̱a̱ nagíʼ mbá tsáʼkhá náa xa̱bu̱ dí naʼni muni̱ aʼkhá ga̱jma̱a̱ nda̱wa̱á na̱jkha̱ gárajxu̱u̱ mbáa profeta,* ikhúún mínuuʼ Jeobá, mathu̱u̱n dí kaʼyoo maʼdxuun ga̱jma̱a̱ numuu rí ndiʼyamajkhún mbaʼin xándú bi̱ xkawi̱i̱nʼ. 5 Ma̱ni̱ dí marigá gamíi náa a̱jkiu̱ún bi̱ kúwá náa goʼwóo Israel,* numuu rí xúgíinʼ nini̱ tsíngumi̱jna̱ náa ikhúún ga̱jma̱a̱ nigún kidxúúnʼ xándiu̱ún bi̱ xkawi̱i̱nʼ”›.

6 Ikha jngóo aratháán goʼwóo Israel: ‹Rígi̱ dí naʼthí Tátá Jeobá bi̱ itháán mba̱a̱: “Atangáanʼla náa ikhúún, gu̱ni̱ tsíngumijnála náa xándiala bi̱ xkawi̱i̱nʼ ga̱jma̱a̱ guyejxíngaa inala náa xúgíʼ enii tsaga rí nuni̱la. 7 Numuu rí á mu mbáa israelita, o mbáa xa̱bu̱ na̱ʼkha̱á bi̱ gáxtáa náa Israel, naʼni tsínguminaʼ náa ikhúún, ga̱jma̱a̱ naʼni kiejuunʼ rí mbaʼyamajkún xándú bi̱ xkawi̱i̱nʼ ga̱jma̱a̱ nagíʼ mbá dí majngrádiinʼ xa̱bu̱ mu muni̱ aʼkhá ga̱jma̱a̱ nda̱wa̱á na̱jkha̱ gárajxu̱u̱ profeta ndrígóʼ, ikhúún Jeobá mínuuʼ gáriʼñuu. 8 Xáʼndoʼ gáyóo xa̱bu̱ buʼko̱, ma̱ni̱ rí mani̱ndxu̱u̱ mbá tsinaʼ dí maʼtámuʼúún xa̱bu̱ ga̱jma̱a̱ mbá rí mbayá edxu̱u̱ proverbio ga̱jma̱a̱ ma̱ni̱ gámbáa náa xuajñunʼ. Ga̱jma̱a̱ ikháanʼ mbu̱ya̱a̱la dí ikhúún nindxu̱ʼ Jeobá”›.

9 ‹Mú, á mu mbáa profeta niguma nduwaaʼ ga̱jma̱a̱ nariʼñuu xa̱bu̱, ikhúún Jeobá, nindxu̱ʼ bi̱ niʼni nduwaaʼ profeta buʼko̱. Ikhú makruíya̱ʼ ñawúnʼ náa ikhaa ga̱jma̱a̱ ma̱ni̱ gámbáa náa xuajñunʼ Israel. 10 Mbaʼyóoʼ muni̱ numa̱a̱ aʼkhúún, xó má aʼkhúun bi̱ narajxi̱ mani̱ndxu̱u̱ ikháá má xóo aʼkhúun profeta, 11 mu bi̱ kúwá náa goʼwóo Israel, xájngruigu̱u̱n mbaʼ majngruigu̱ún, muni̱ tsíngumijná náa ikhúún, ni má xúni̱ tsaga mijna ga̱jma̱a̱ dí raʼkhí dí nuni̱. Ga̱jma̱a̱ ikhiin mani̱ndxu̱ún xuajñunʼ ga̱jma̱a̱ ikhúún mani̱ndxu̱ʼ Dios ndrígu̱ún›, eʼthí Tátá Jeobá bi̱ itháán mba̱a̱”.

12 Nigruígú mbu̱júu̱ ajngóo Jeobá. Niʼthúnʼ: 13 “A̱ʼdióo xa̱biya̱, á mu mbá xuajin dí rígá mitsínguánʼ nakiéʼkúun náa ikhúún ga̱jma̱a̱ naʼni dí raʼkhí. Makruíya̱ʼ ñawúnʼ náa ikhaa ga̱jma̱a̱ ma̱ni̱ dí xárígá ganitsu,* ma̱ni̱ dí marigá ewiʼ náa xuajin rúʼko̱, ga̱jma̱a̱ ma̱ni̱ gámbíin xa̱bekha ga̱jma̱a̱ xujkhúʼ bi̱ kúwá ikhí. 14 ‹Maski ajndu ajtsíin xa̱bekha bugi̱, Noé, Daniel ga̱jma̱a̱ Job gákúwá náa xuajin rúʼko̱, ga̱jma̱a̱ rí májánʼ dí ikhiin nuni̱, i̱ndó muni̱ káwumíjná má ikhiin›, eʼthí Tátá Jeobá bi̱ itháán mba̱a̱”.

15 “‹O á mu dí ikhúún gáni̱ dí manújngún náa xuajin xujkhú xáná bi̱ xkawi̱i̱nʼ mu muphu̱u̱n xa̱bu̱* ga̱jma̱a̱ muni̱ rí mani̱ndxu̱u̱ mbá ku̱ba̱ʼ mijxooʼ,* rí nimbáa xáʼni a̱jkiu̱u̱n manújngoo ga̱jma̱a̱ numuu rí mamiñúu gúni̱ xujkhúʼ. 16 Xó má ikhúún gajkhun xtáá, eʼthí Tátá Jeobá bi̱ itháán mba̱a̱, maski ajndu ajtsíin xa̱bekha bugi̱ gákúwá ikhí, xáʼngu̱u̱n gúni̱ káwíin e̱jñu̱ún jiámá ga̱jma̱a̱ wa̱ʼxiúnʼ, i̱ndó muni̱ káwumíjná ikhiin ga̱jma̱a̱ xuajin maguanáa›”.

17 “‹O á mu dí nakuʼmá mbá espada náa xuajin rúʼko̱ ga̱jma̱a̱ ma̱ta̱ “Ganújngoo mbá espada náa xuajin” ga̱jma̱a̱ magudíin xa̱bekha ga̱jma̱a̱ xujkhúʼ bi̱ kúwá ikhí. 18 Xó má ikhúún gajkhun xtáá, eʼthí Tátá Jeobá bi̱ itháán mba̱a̱, maski ajndu ajtsíin xa̱bekha bugi̱ gákúwá ikhí, xáʼngu̱u̱n gúni̱ káwíin e̱jñu̱ún jiámá ga̱jma̱a̱ wa̱ʼxiúnʼ, i̱ndó muni̱ káwumíjná ikhiin ga̱jma̱a̱ xuajin maguanáa›”.

19 “‹O á mu nakuʼmá mbá nandii náa xuajin rúʼko̱ ga̱jma̱a̱ índo̱ gáxidirámuuʼ dí nakásngañu̱ʼ ga̱jma̱a̱ maxidíí eʼdi índo̱ gágúdíin xa̱bekha ga̱jma̱a̱ xujkhúʼ bi̱ kúwá ikhí. 20 Xó má ikhúún gajkhun xtáá, eʼthí Tátá Jeobá bi̱ itháán mba̱a̱, á mu dí Noé, Daniel ga̱jma̱a̱ Job gákúwá ikhí, xáʼngu̱u̱n gúni̱ káwíin e̱jñu̱ún jiámá ni má wa̱ʼxiúnʼ, ga̱jma̱a̱ numuu dí májánʼ nuni̱ i̱ndó ikhiin gúni̱ káwumíjná›”.

21 “Numuu dí rígi̱ dí naʼthí Tátá Jeobá bi̱ itháán mba̱a̱: ‹Xígi̱ kaʼnii gáʼni índo̱ gákuʼmá náa Jerusalén mbá a̱jkhu̱ rí maʼni mamínuuʼ, espada, ewiʼ, xujkhú xáná bi̱ xkawi̱i̱nʼ ga̱jma̱a̱ nandii, mu magúdíin xa̱bu̱ ga̱jma̱a̱ xujkhúʼ bi̱ kúwá ikhí. 22 Mú tikhuun bi̱ gáguanún ikhí, xó má e̱jñu̱ún jiámá ga̱jma̱a̱ wa̱ʼxiúnʼ, makáwíin ga̱jma̱a̱ maʼga kiʼdiin rexa̱a̱. Maguwáʼ náa ikháanʼla, ga̱jma̱a̱ índo̱ ikháanʼla gúya̱a̱ xóo nindxu̱ún ga̱jma̱a̱ dí nuni̱, gajkhun dí muxkamaa dí maʼni̱i̱ a̱jkia̱la ga̱jma̱a̱ numuu gamiéjunʼ dí ni̱ʼkhá ka̱yo̱ʼ náa Jerusalén, ga̱jma̱a̱ xúgíʼ dí niniu̱u̱n›”.

23 “‹Ikhiin muni̱ rí maʼni̱i̱ a̱jkia̱la, índo̱ gúya̱a̱la xóo nindxu̱ún ga̱jma̱a̱ xóo nuni̱ ga̱jma̱a̱ ikháanʼla mbu̱ya̱a̱ dí rígá mbaʼa numuu dí xúʼko̱ kaʼnii niniu̱u̱n›, eʼthí Tátá Jeobá bi̱ itháán mba̱a̱”.