Isaías
22 Rígi̱ dí nijuiʼthá magíʼnuu Mata náa nduyáá rí Nawasngájmún:*
Ndiéjunʼ niguáʼníí ikháanʼla dí nitsimala mbá xúgiáanʼ náa tsu̱du̱u̱ guʼwá rá.
2 Ra̱ʼkhá tháán rígá gitsaʼwá* náa ikháán,
nindxa̱a̱ʼ mbá xuajin náa kúwá jxa̱ʼ xa̱bu̱, mbá xuajin dí nadxuu.
Bi̱ nikháñún náa ikháán na̱nguá niradíin ga̱jma̱a̱ espada,
ni má na̱nguá nikháñún náa nixmijná.
3 Mbá xúgíinʼ xa̱bu̱ ñajunʼ ra̱míjíinʼ bi̱ kúwá náa ikháán mbóó nigáñún.
Nirugui̱i̱n xa̱bu̱ ga̱jma̱a̱ nixudi̱i̱nʼ náa guʼwá ejua̱a̱nʼ rí asndu táʼyóoʼ majmúún xkamídá.
Mbá xúgíinʼ bi̱ nixkamiin nigún kudiin náa guʼwá e̱jua̱nʼ,
maski ajndu mitsínguánʼ nigáñún.
4 Ikha jngóo nitha̱: “Guniʼñááʼ ru̱yo̱ʼ,
mambiya ngínúʼ.
Xúʼyáʼ dí muni̱i̱ a̱jkiu̱nʼ
ga̱jma̱a̱ numuu dí niguma gámbáa wáxióo* xuajñunʼ.
5 Numuu dí nindxu̱u̱ mbá mbiʼi dí najngawi̱i̱n, nandáti̱gu̱u̱n náa nuxmijná ga̱jma̱a̱ narígá gamíi
dí na̱ʼkha̱ náa Tátá bi̱ itháán mba̱a̱, Jeobá bi̱ naʼtáñajúúnʼ ángeles,
náa Mata náa nduyáá rí Nawasngájmún.
Na̱jkha̱ rajngudiri̱ga̱a̱ xtájtsí
ga̱jma̱a̱ nawáán dí nundxa̱ʼwa̱ náa kúbá.
6 Elam naguajtuun náa najti flecha,
na̱ʼkha̱ gajmíi̱n xa̱bekha náa carro ga̱jma̱a̱ wáyú,*
Quir naʼniratoo* escudo.
7 Xkua̱ dí itháan májánʼ dí rígá náa ikháán
majtíí carro dí nuxmijná ga̱jma̱a̱,
bi̱ nudrúwíin wáyú* muguajún náa kaʼñún náa mijngii xkrugua
8 ga̱jma̱a̱ maguma gámbáa dí nañewu̱u̱n* Judá.
Mbiʼi rúʼko̱ matiejxi̱ náa kajti ajua̱nʼ náa Guʼwá Xaxi̱, 9 ikháanʼla mbu̱ya̱a̱ dí náa Xuajñuu David rígá mbaʼa náa nixkudiri̱ya̱ʼ. Ga̱jma̱a̱ mudala iyaʼ rí kajni̱ʼ náa tanque dí rígá mbayííʼ. 10 Muraxnuula guʼwá dí rígá náa Jerusalén ga̱jma̱a̱ mu̱ni̱ gámbáa mu majmala muni̱i̱ ga̱jma̱a̱ xtájtsí. 11 Náa tapo̱o̱ mbá nájma̱ xtájtsí ma̱jnu̱ʼ iyaʼ dí rígá náa tanque wayuu, mú xúyáá bi̱ phú Mba̱a̱ bi̱ niʼni mújúunʼ rígi̱, ga̱jma̱a̱ bi̱ asndu nákha wajyúuʼ niʼni.
12 Mbiʼi rúʼko̱, Tátá bi̱ itháán mba̱a̱, Jeobá bi̱ naʼtáñajúúnʼ ángeles,
maʼthúu̱n rí numbi̱ya̱ʼ ga̱jma̱a̱ dí ngíná,
dí muda̱ edxu̱ún ga̱jma̱a̱ dí mugíʼ xtíin mi̱du̱.*
13 Mú túni̱ rúʼko̱, ikhiin nini̱ ndxa̱a̱ ga̱jma̱a̱ nini̱ gagimijná,
niradíin xedi̱ ga̱jma̱a̱ mugu̱,
ni̱ʼphu̱ xuwiʼ ga̱jma̱a̱ niʼwa̱a̱n vino.
Nithi: ‹Guphi̱ʼtsu ga̱jma̱a̱ guʼwa̱a̱n, numuu dí gájtsíí makañúlú›”.
14 Ikhú Jeobá bi̱ naʼtáñajúúnʼ ángeles niʼthúnʼ rígi̱: “‹Aʼkhála rígi̱ xáguma kaʼwi̱i̱ asndu índo̱ gákáñala›, xúʼko̱ eʼthí Tátá bi̱ itháán mba̱a̱, Jeobá bi̱ naʼtáñajúúnʼ ángeles”.
15 Rígi̱ dí naʼthí Tátá bi̱ itháán mba̱a̱, Jeobá bi̱ naʼtáñajúúnʼ ángeles: “Ayuʼ gáta̱ya̱a̱ Sebná, bi̱ kajkuáa ñawúunʼ mañewu̱u̱n guʼwá,* aratháán: 16 ‹Ndiéjunʼ xtaʼdáá gi̱i̱ ga̱jma̱a̱ tsáa xtaʼdaa gi̱i̱, mu matandii mbá iñá wajinʼ rá.› Ikhaa xtáa raʼndii mbá iñá wajinʼ náa mitsídánʼ, xtáa raʼndii mbá iñá wajinʼ* náa pátsí. 17 ‹¡Atayáá! Jeobá madatiguíín mbayííʼ numuu dí nakásngañu̱u̱ʼ, ma̱ngaa magujtuwíín ga̱jma̱a̱ tsiaki̱i̱. 18 Mambújxi̱i̱n jxa̱ʼ, xóo mbá pelota, ga̱jma̱a̱ mada̱a̱nʼ náa ku̱ba̱ʼ ma̱ja̱nʼ. Ikhí gákáñáanʼ ga̱jma̱a̱ maguma gámbáa cárria̱a̱ rí mitsaanʼ* dí mba̱ʼu̱, mani̱ndxu̱u̱ mbá ma̱jti̱ʼ náa goʼwóo bi̱ natambáyíí. 19 Marígúu ñajunʼ dí xtaʼdáá ga̱jma̱a̱ maríña̱ánʼ náa natiejunʼ.
20 Mbiʼi rúʼko̱, mandxa̱ʼo̱o̱ xa̱bi̱ʼ Eliaquim a̱ʼdióo Hilquías, 21 maxnu̱u̱ magíʼ xtíñaaʼ mbaʼ rí mitsaanʼ ga̱jma̱a̱ maro̱ʼo̱o̱ náa smídúu xtíin dí kua̱ʼa̱n náa smídaaʼ, ga̱jma̱a̱ ñajunʼ dí niraʼdáá* marajkuáa náa ñawúunʼ. Ikhaa mani̱ndxu̱u̱ anu̱ún xa̱bu̱ Jerusalén ga̱jma̱a̱ bi̱ kúwá náa goʼwóo Judá. 22 Marájkha lláviu̱u̱ goʼwóo David náa xpajpoo. Ikhaa mambáʼtoo ga̱jma̱a̱ nimbáa xáru̱gua̱a̱, ikhaa marugua̱a̱ ga̱jma̱a̱ nimbáa xámbáʼtoo. 23 Ma̱dujmaa xóo mbá clavo* náa dí wíji̱ gújkhúʼ, ga̱jma̱a̱ ikhaa maʼga̱nú mani̱ndxu̱u̱ xílí* dí nagruigú gamajkhu náa mbá xúgíinʼ bi̱ kaʼñún anu̱u̱.* 24 Majngrígú náa ikhaa xúgíʼ gamajkhu* dí gárígá náa mbá xúgíinʼ bi̱ kaʼñún anu̱u̱, bi̱ naguwáʼ náa ikhaa, xua̱a̱ majkhaʼ ga̱jma̱a̱ xua̱a̱ mi̱jni̱i̱ʼ, ma̱ngaa mbá xúgíʼ daan rayaʼ mba̱ʼu̱.
25 Mbiʼi rúʼko̱, eʼthí Jeobá bi̱ naʼtáñajúúnʼ ángeles, clavo* wayuu dí nijuiʼdaraʼa náa mbá rí wíji̱ gújkhúʼ magajnáa, muturígú ga̱jma̱a̱ maxpátrígú, dí jngrígú ikhí majmigu, numuu dí xúʼko̱ má niʼthí Jeobá marigá›”.