Oseas
2 Guthu̱u̱nla a̱ngia̱la xa̱bekha ‹¡Nindxa̱la xa̱bu̱ xuajñunʼ!›*
ga̱jma̱a̱ a̱ngia̱la gu̱ʼu̱ guthu̱u̱n ‹¡Ikháán a̱ʼgu̱, bi̱ nigáwíinʼ a̱jkiu̱ún kuyáá!›.*
2 Guxruíga̱a̱ rudála,* guxruígala,
numuu dí ikhaa na̱nguá nindxu̱u̱ a̱ʼgiu̱ʼ ni má ikhúún na̱nguá nindxu̱ʼ ajmbio̱o̱.*
Ganiñuuʼ ragujuamínáʼ
ga̱jma̱a̱ ganiñuuʼ raʼni nduwúúnʼ,
3 raʼkháa gáʼni dí maríyáʼ xtíñúu ga̱jma̱a̱ maniʼñúuʼ xóo mbiʼi rí nigumaa,
maniʼñúuʼ xó mbá ku̱ba̱ʼ mijxooʼ,*
ma̱ni̱ rí maguajta̱a̱ mbá ku̱ba̱ʼ rí nda̱a̱ iyaʼ
ga̱jma̱a̱ ma̱ni̱ rí makhañúu kandáwúuʼ.
4 Xágáwíinʼ a̱jkiu̱nʼ ka̱ñu̱u̱n e̱ji̱i̱n,
numuu rí ikhiin nigumiin náa nigujuamínáʼ.
5 Numuu dí ru̱du̱ún nigujuamínáʼ.
Bi̱ niguewíin ra̱ʼkhá tháán ma̱jti̱ʼ rí niʼni, ikhaa niʼthí:
‹Maʼgá kidxu̱únʼ ñawinʼ,
bi̱ nuxnuʼ ganitsu ga̱jma̱a̱ iyaʼ,
mugu̱, lino, aceite ga̱jma̱a̱ rí naga̱nʼ›.
6 Marugóo kambo̱o̱ ga̱jma̱a̱ mbá gúláa rí tsuwanʼ,
makujxí mbá xtájtsí mu xáxnu̱u̱ manújngoo,
mu xúʼko̱ xáʼngo̱o̱ gáxkama̱a̱ kambo̱o̱.
7 Magayúu maʼga kidxu̱únʼ ñawiin, mú xáʼngo̱o̱ gáxkamiin,
mbañíinʼ, mú ndawi̱i̱n gáʼyoo.
Nda̱wa̱á maʼthí: ‹Matangu̱ún náa a̱jmbio̱ʼ,
numuu rí nákhá ikhú nixtáá itháán májánʼ ki xóo xúgi̱›.
8 Ikhaa na̱nguá ndiʼyoo dí ikhúún nindxu̱ʼ bi̱ ni̱xnu̱u̱ tsígáʼ, vino ga̱jma̱a̱ aceite,
bi̱ nixnúu magiʼdoo wéñuuʼ plata
xúʼko̱ má oro, rí nijmuu náa Baal.
9 ‹Ikha jngóo matangu̱ún ga̱jma̱a̱ maʼgáaʼ ka̱gu̱ʼ tsígoʼ índo̱ gáxtagijxi̱i̱
xúʼko̱ má vino ndrígóʼ rí nuxi̱ʼ dí gágájna̱a̱ índo̱ gúxujmbi̱i̱ uva,
marígú káyúuʼ mugu̱ ga̱jma̱a̱ lino ndrígóʼ rí nájmuu marugoo dí tsaʼtsaaʼ.
10 Dí xúgi̱ ma̱ni̱ dí makujmaa pa̱jnu tsáʼkhúun náa inún ñawiin,
nimbáa xa̱bu̱ xáʼngo̱o̱ gáʼni kríyaaʼ náa ñawúnʼ.
11 Ma̱ni̱ gámbóʼ xúgíʼ rí naʼni maxtáa gagi,
ndxa̱a̱ ndrígóo, índo̱ nagi̱ʼi̱ gu̱nʼ rudiiʼ, sábado ga̱jma̱a̱ xúgíʼ mbiʼi rí naʼni riya̱a̱ʼ ndxa̱a̱.
12 Ma̱ni̱ gámbóʼ ixi̱ uva ga̱jma̱a̱ ixi̱ higo ndrígóo, rí ikhaa niʼthí ga̱jma̱a̱ numuu,
“rígi̱ nindxu̱u̱ rí niguma numuʼ, rí nixnuʼ ñawinʼ”.
Ma̱ni̱ rí mani̱ndxu̱u̱ mbá xtáʼdu̱u̱ iná,
xujkhú xáná muni̱ gámbu̱u̱n.
13 Manda̱ʼa̱a̱ cuenta ga̱jma̱a̱ numuu mbiʼi nákhá nixnajxi̱ tsigijñaʼ náa inuu xtiʼkhuu Baal,
índo̱ ikhaa niʼni tsiʼyáminaʼ ga̱jma̱a̱ anillo ndrígóo ma̱ngaa xábiúu ga̱jma̱a̱ ni̱jkha̱ ragáyúu kidxu̱únʼ ñawiin,
mú ikhaa nimbumuu kaʼyoʼ›, eʼthí Jeobá.
14 ‹Ma̱ni̱ rí mandxaʼwáminaʼ,
maʼgá ka̱ya̱a̱ náa ku̱ba̱ʼ mijxooʼ,
ga̱jma̱a̱ mathu̱u̱n ajngáa rí maʼni mandxaʼwáminaʼ.
15 Asndu nákhá mbiʼi rúʼko̱ martanga̱a̱ mbayuuʼ náa kiʼdu uva,
maxnu̱u̱ mata* ndrígóo Acor mu ikhí magruigúu dí ikhaa gíʼthu̱u̱n,
ikhí mariʼña xó má niriʼña nákhá nindxu̱u̱ ndxáʼgú,
xó má nákhá mbiʼi rí nigájnuu náa ku̱ba̱ʼ ndrígóo Egipto.
16 Mbiʼi rúʼko̱, eʼthí Jeobá,
marathu̱nʼ, A̱jmbio̱ʼ nindxa̱a̱ʼ, ni xárathu̱nʼ, Tátioʼ nindxa̱a̱ʼ›.*
17 ‹Ma̱ni̱ dí náa rawuunʼ xágájnuu mbiʼyuu xtiʼkuu Baal,
ga̱jma̱a̱ nimbáa xármáʼáan a̱jkiu̱u̱n kaʼyoo mbiʼñún.
18 Mbiʼi rúʼko̱, mambánuminaʼ gajmíʼ xujkhú xáná,
xujkhú xnaʼ bi̱ jngruigu̱u̱n rijma̱a̱ ga̱jma̱a̱ xujkhúʼ bi̱ nuxmajtamijná,
náa xuajin ma̱ni̱ gámbóʼ guerra, xkamídá ga̱jma̱a̱ espada,
ma̱ni̱ rígi̱ mu mambáñún xa̱bu̱ xuajñunʼ mu makuwá tsímáá.
19 Ikhúún magruiguíín mu mani̱ndxa̱a̱ʼ a̱ʼgiu̱ʼ asndu kámuu,
makuʼdáminaʼ ma̱ni̱ xó má kaʼyoo ga̱jma̱a̱ ma̱ni̱ rí jmbu,
ma̱ngaa rí masngajmáanʼ ngajua rí tsétumuu* ga̱jma̱a̱ magáwíinʼ a̱jkiu̱nʼ ka̱ya̱a̱ʼ.
20 Makuʼdáminaʼ dí xáni̱ ndúwáánʼ,
ikháán gajkhun rí mataninuwiinʼ Jeobá›.
21 ‹Mbiʼi rúʼko̱ eʼthí Jeobá,
maxnu̱u̱ dí ndayóoʼ mekhu,
xúʼko̱ má mekhu maxnúu rí ndayóoʼ ku̱ba̱ʼ,
22 xúʼko̱ má ku̱ba̱ʼ maxnúu rí ndayóoʼ tsígáʼ, vino nuxiʼ ga̱jma̱a̱ aceite,
ga̱jma̱a̱ ikhiin muxnáá rí ndayóoʼ Jezreel.*