Ezequiel

5 Ikháán a̱ʼdióo xa̱biya̱, ayá mbá espada rí mixíníʼ gajmaaʼ xóo mbá navaja rí nuda ga̱jma̱a̱. Atada̱ edxa̱a̱ʼ ga̱jma̱a̱ stawaanʼ, nda̱wa̱á atagiéwan náa mbá balanza tásiáanʼ rí nithu ga̱jma̱a̱ atruiʼta̱a̱ mbá ajtsú. 2 Índo̱ gárámuuʼ mbiʼi dí nixtuguamaʼán, matasikha̱ mbá chíʼgíiʼ* tásiáanʼ náa awúu̱n xuajin. Nda̱wa̱á marajtun i̱mbá chíʼgíiʼ mu matrujtu ga̱jma̱a̱ mbá espada náa rawuunʼ mbá xúgíʼ xuajin.* Nda̱wa̱á kayuuʼ, tásiáanʼ rí niguanáa mataxidiráʼa náa giñánʼ ga̱jma̱a̱ ikhúún maríya̱ʼ mbá espada náa xtóo mu maʼga̱ raxkoo.

3 Ayá mbá chíʼgíiʼ tásiáanʼ ga̱jma̱a̱ atambráʼáá náa rawuunʼ xtíñaaʼ. 4 Ga̱jma̱a̱ ayá i̱mbá chíʼgíiʼ, atadríyáʼ náa aguʼ mi̱kha. Aguʼ rúʼko̱ maʼga̱nú náa mbá xúgíʼ goʼwóo Israel.

5 Rígi̱ dí naʼthí Tátá Jeobá bi̱ itháán mba̱a̱: ‹Rígi̱ nindxu̱u̱ Jerusalén. Niʼgíʼ náa majñu̱únʼ xa̱bu̱ xuajin, rí gíwánʼ náa tapo̱o̱ mbaʼa país. 6 Mú ikhaa na̱nguá niʼnimbo̱o̱ kiʼtáñajunʼ ni má xtángoo ndrígóʼ, niʼni itháán dí ra̱májánʼ ki xóo dí nuni̱ xa̱bu̱ xuajin ga̱jma̱a̱ países dí tri̱ga̱ rawuunʼ. Numuu rí xa̱bu̱ bi̱ kúwá ikhí na̱nguá ninimbaníí kiʼtáñajunʼ ndrígóʼ ni má xtángoo ndrígóʼ›.

7 Ikha jngóo rígi̱ dí naʼthí Tátá Jeobá bi̱ itháán mba̱a̱: ‹Numuu rí ikháanʼ ni̱ni̱ marigá itháan xkujndu ki xóo xa̱bu̱ xuajin bi̱ kúwá mbájndi náa ikháanʼla ga̱jma̱a̱ túnimbaníí kiʼtáñajunʼ ndrígóʼ, ni má túnimbaníí xtángoo ndrígóʼ, ni̱nila xó má eʼthí náa xtángoo ndrígu̱ún xa̱bu̱ xuajin bi̱ kúwá mijngii náa ikháanʼla, 8 rígi̱ dí naʼthí Tátá Jeobá bi̱ itháán mba̱a̱: “Xuajin, gi̱i̱ xtáá mu muxmijná ga̱jma̱a̱ ikhúún ma̱ni̱ rí matamíniiʼ mu mbuyáá xúgíinʼ xa̱bu̱ xuajin. 9 Ga̱jma̱a̱ numuu mbá xúgíʼ tsaga dí natani̱, mania̱a̱ʼ mbá rí nimbá miʼtsú táni ga̱jma̱a̱ ni xátangu̱ún ma̱ni̱ mbu̱júu̱.

10 Náa majñala makuwíin xabuanii bi̱ muphu̱u̱n e̱jñu̱ún ga̱jma̱a̱ e̱ji̱n muphu̱u̱n anu̱ún ga̱jma̱a̱ rudún,* ma̱ni̱ rí mumíniiʼla ga̱jma̱a̱ ma̱ni̱ majuadríʼiin asndu náá* bi̱ gáguanún”›.

11 ‹Ikha jngóo xó má ikhúún gajkhun xtáá, eʼthí Tátá Jeobá bi̱ itháán mba̱a̱, numuu rí nitani̱ tsagáá goʼwóʼ rí kaʼwu índo̱ nitaxúdiinʼ xándú bi̱ xkawi̱i̱nʼ ga̱jma̱a̱ mbá xúgíʼ tsaga rí nitani̱, ikhúún mangúún naniʼñáánʼ, xágáwíinʼ a̱jkiu̱nʼ ka̱ya̱a̱ʼ ni má xáxmiéjúnʼ ka̱ya̱a̱ʼ. 12 Mbá grupo xa̱bu̱ bi̱ kúwá náa xuajin makhañún ga̱jma̱a̱ nandii o makhañún gáʼni ewiʼ náa majña̱a̱ʼ ikháán. Ga̱jma̱a̱ i̱mba̱ grupo, makhañún ga̱jma̱a̱ espada náa mbájndi xtaa. Ga̱jma̱a̱ bi̱ iwáá grupo maxidíríʼiin asndu náá ga̱jma̱a̱ maríya̱ʼ mbá espada mu maʼga raxkhúún. 13 Ikhú rí nakásngañu̱ʼ mambáa ga̱jma̱a̱ rí nakiʼnún mandáti̱ga̱a̱ náa ikhiin, ikhú maxtáá tsímáá. Ga̱jma̱a̱ índo̱ gámbóʼ rakiʼnún ka̱ñu̱u̱n, ikhú mbuyáá rí ikhúún Jeobá, nindxu̱ʼ bi̱ ni̱tha̱ numuu rí ninda̱ʼa̱ má xúʼko̱ rí i̱ndó ikhúún kaʼyoʼ magruígú gamajkhu.

14 Ma̱ni̱ rí mani̱ndxa̱a̱ʼ mbá xuajin rí niguma gámbáa ga̱jma̱a̱ ma̱ni̱ rí mani̱ndxa̱a̱ʼ mbá rí mutsijmaa xuajin dí tri̱ga̱ mijngii ga̱jma̱a̱ mbá xúgíinʼ xa̱bu̱ bi̱ gánújngún ikhí. 15 Índo̱ gáni̱ rí matamíniiʼ ga̱jma̱a̱ numuu rí nakásngañu̱ʼ ma̱ngaa rí nakiʼnún, ga̱jma̱a̱ ra̱ʼkhá tháán gáni̱ rí matamíniiʼ, mi̱dxu̱ʼnú mani̱ndxa̱a̱ʼ mbá rí mutsijmaa ga̱jma̱a̱ mbá rí xáʼndúún gúyáá, mani̱ndxa̱a̱ʼ mbá rí maʼtámúʼúún ga̱jma̱a̱ rí maʼni mamiñún xa̱bu̱ xuajin bi̱ kúwá náa mijngii xtaa. Ikhúún Jeobá, nindxu̱ʼ bi̱ ni̱tha̱ rígi̱.

16 Ma̱ni̱ rí ma̱ʼkha̱ náa ikhiin mbá ewiʼ rí nindxu̱u̱ xóo mbá flecha dí maʼni gámbíin ga̱jma̱a̱. Flecha rí mada̱ʼ maʼni gámbíin. Ma̱ni̱ dí xárígá ganitsu,* mu xúʼko̱ maʼni itháán gakhi̱i̱ ewiʼ. 17 Makuʼmá náa ikháanʼla ewiʼ ga̱jma̱a̱ xujkhú xáná bi̱ muphu̱u̱n xúgíinʼ e̱jña̱la. Nandii ga̱jma̱a̱ rí makhañún xa̱bu̱, ngínáá gáguánáaʼ ga̱jma̱a̱ makuʼmá mbá espada náa ikháán. Ikhúún Jeobá, nindxu̱ʼ bi̱ ni̱tha̱ rígi̱›”.