Isaías

61 Tsiaki̱i̱ ndrígóo Tátá Jeobá bi̱ itháán mba̱a̱ rígá náa ikhúún,

numuu dí Jeobá niraʼwúún mu mathu̱u̱n ajngáa rí májánʼ bi̱ guabiinʼ.

Nikuʼmún mu ma̱ni̱ thanún bi̱ nigawúunʼ a̱jkiu̱ún,

mu ma̱ta̱ rí makáwíin bi̱ ni̱jkha̱ kiʼdiin

ga̱jma̱a̱ mu ma̱ta̱ rí mambaʼta̱a̱ mbá kayuuʼ idún bi̱ gajchún náa guʼwá e̱jua̱nʼ,

 2 mu ma̱ta̱ dí ni̱jkha̱nú mbiʼi dí Jeobá magáwíinʼ a̱jkiu̱u̱n

ga̱jma̱a̱ ni̱jkha̱nú mbiʼi rí Dios ndrígulú maʼni dí mumíniiʼ,

ma̱ngaa rí maʼni̱i̱ a̱jkiu̱ún mbá xúgíinʼ bi̱ kúwá ngíná,

 3 mu mañewu̱u̱n bi̱ numbi̱ya̱ʼ ga̱jma̱a̱ numuu Sion,

mu maxnún mbá rí mugi̱wa̱nʼ edxu̱ún dí maʼni mitsiʼñíin, raʼkháa idiʼ,

aceite rí maʼni makuwá gagi raʼkháa dí makuwá ngíná,

xtíin dí gamajkhu raʼkháa dí makáguabiinʼ.

Ga̱jma̱a̱ magumbiʼñúún ixi̱ mba̱ʼu̱ rí naʼni dí májánʼ,

dí niʼdu̱u̱ Jeobá mu xúʼko̱ maguma mba̱a̱.

 4 Ikhiin muni̱i̱ xuajin rí niguma gámbáa,

ga̱jma̱a̱ muni̱i̱ xuajin náa dí nánguá kúwá xa̱bu̱ asndu nákha wajyúuʼ

ga̱jma̱a̱ muni̱ májáanʼ xuajin rí niguma gámbáa,

muni̱i̱ mbá xúgíʼ xuajin náa nánguá kúwá xa̱bu̱ asndu nákha wajyúuʼ.

 5 “Xa̱bu̱ bi̱ tséniʼnúunʼla maguwáʼ ga̱jma̱a̱ muñewu̱u̱n mugiala,

ga̱jma̱a̱ xa̱bu̱ bi̱ naguwaáʼ mudu náa mbayala ga̱jma̱a̱ náa kiʼdu uva.

 6 Ikháanʼ magumbiʼyala ndxajkiun Jeobá,

muxna mbiʼyala xa̱bi̱i̱ Dios ndrígulú.

Ikháanʼla mu̱phu dí rígá náa xuajin mba̱ʼu̱,

asndu gagi gútala ga̱jma̱a̱ numuu dí guáʼdáá ikhiin.

 7 Ikhaa dí mati̱ya̱la, ikháanʼ maguma tsajkurámáanʼla a̱jma̱ nuthu itháan,

ikhaa dí maguma majti̱i̱nʼ, xa̱bu̱ xuajñunʼ mundxa̱ʼwa̱ gagi ga̱jma̱a̱ numuu dí nikhánún.

 8 Numuu dí ikhúún Jeobá, nanigu̱ʼ maguma dí májánʼ,

tsénigu̱ʼ dí nuni̱ kuʼwáʼ ga̱jma̱a̱ dí tséguma rí májánʼ.

Mbájndi̱í gáni̱ numi̱ín

ga̱jma̱a̱ dí mambanúʼ gajmíʼ ikhiin mbajyúuʼ asndu kámuu.

 9 Bi̱ gáguwáʼ náa ikhiin majmaʼniúnʼ náa xa̱bu̱ bi̱ kúwá náa xuajin mba̱ʼu̱,

ga̱jma̱a̱ bi̱ gáguwáʼ náa ikhiin majmaʼniúnʼ náa xa̱bu̱ bi̱ kúwá náa xuajin majkhaʼ.

Mbuyáá rí nindxu̱ún bi̱ naguwáʼ náa ikhiin,

bi̱ Jeobá niʼni tsajkurámiinʼ”.

Numuu dí ikhaa nixnúʼ maguʼwúnʼ xtíin dí maʼni kríñu̱u̱nʼ,

nimbrúʼún xtíin dí mbi̱jua̱* dí naʼni rí májánʼ,

xó má bi̱ manigúnʼ gíwánʼ xtíin náa edxu̱u̱ xóo xtíin dí najmuu ndxajkun,

ga̱jma̱a̱ xó má bi̱ manújúnʼ bi̱ naʼni tsiʼyámina̱a̱ʼ ga̱jma̱a̱ dí najmuu.

11 Numuu dí xó má náa ku̱ba̱ʼ nakráʼáan tsígáʼ dí najuiʼdu

ga̱jma̱a̱ xó má náa jardín* nakráʼáan tsígáʼ dí najuiʼdu ikhí,

Tátá Jeobá bi̱ itháán mba̱a̱

maʼni dí makráʼáan dí májánʼ ga̱jma̱a̱ gamajkhu náa inún mbá xúgíinʼ xa̱bu̱ bi̱ kúwá náa xuajin mba̱ʼu̱.