Génesis

27 Índo̱ Isaac nikhi̱i̱ má wéñuuʼ ga̱jma̱a̱ nánguá eyejxi̱ májánʼ, ikhú nindxa̱ʼóo Esaú a̱ʼdióo bi̱ giʼnii ga̱jma̱a̱ niʼthúu̱n: “¡A̱ʼdióʼ!”. Ikhaa niriʼña: “¡Gi̱i̱ xtáá!”. 2 Ikhú Isaac niʼthí: “Nikhiu̱u̱n má ga̱jma̱a̱ na̱nguá e̱yo̱o̱ xóó nguáthá mba̱yu̱u̱ʼ maxtáá. 3 Ikha jngóo, mbá péñu,* ada rí najmaaʼ, xkámidaaʼ, flecha ndrígáaʼ ayuʼ xanáá gátaʼyáaʼ mbáa xujkhúʼ miʼkhúú. 4 Nda̱wa̱á atani̱ májáánʼ mbá ganitsu miʼtsí xó má nanigu̱ʼ, ayi̱ jcháaʼ mu miʼkhu. Ikhú ma̱ni̱ tsajkurámáánʼ nákhá xóó tsékáñúnʼ”.

5 Rebeca niʼdxawuun dí Isaac niʼthúu̱n Esaú bi̱ nindxu̱u̱ a̱ʼdióo. Ga̱jma̱a̱ Esaú ni̱jkha̱ xanáá gáyáaʼ xujkhúʼ ma̱ʼkha̱a̱ kayáa. 6 Ikhú Rebeca niʼthúu̱n Jacob: “Nángii nidxawun ana̱a̱ʼ* dí niʼthúu̱n ndxájuaaʼ Esaú: 7 ‹Ayuʼ gátaʼyáaʼ mbáa xujkhúʼ ga̱jma̱a̱ nda̱wa̱á atani̱ májáánʼ mbá ganitsu miʼtsí. Ayi̱ jcháaʼ mu miʼkhu, nda̱wa̱á ma̱ni̱ tsajkurámááʼ náa inuu Jeobá nákhá xóó tsékáñúnʼ›. 8 Ikha jngóo a̱ʼdióʼ, atadxawíín ga̱jma̱a̱ atani̱ rí ma̱tha̱a̱nʼ. 9 Mbá péñu, ayuʼ náa gíinʼ xujkhúʼ ga̱jma̱a̱ ayi̱ xtiin a̱jmi̱i̱n e̱jín tsújtuunʼ bi̱ itháan míjíinʼ gátaxkamii, mu ikhúún ma̱ni̱ mújúunʼ mbá ganitsu miʼtsí mi̱khu̱ ana̱a̱ʼ xó má ikhaa nanigu̱u̱ʼ. 10 Nda̱wa̱á mi̱dxu̱ʼ jcháaʼ mi̱khu̱ ana̱a̱ʼ, mu xúʼko̱ maʼni tsajkurámáánʼ ikháán nákhá xóó tsékháñuu”.

11 Mú Jacob niʼthúu̱n ru̱dúu̱,* Rebeca: “Ndxájuʼ Esaú gíʼdoo wéñuuʼ tátsiu̱u̱n, ikhúún na̱nguá. 12 Tia̱a̱ xí á mu anu̱ʼ* naxkajmúú rá. Maku̱mu̱u̱ rí nandoʼ matsijmáan ga̱jma̱a̱ maʼtátsrígúún raʼkháa maʼni tsajkurámúúnʼ”. 13 Índo̱ niʼdxawun rígi̱, ru̱dúu̱ niʼthúu̱n: “Gambanúu náa ikhúún rí gajuiʼtátsríguíín a̱ʼdióʼ. Atani̱ rí natha̱a̱nʼ. Ayuʼ gídíinʼ e̱jín tsújtuunʼ”. 14 Ikhú ni̱jkha̱ gáñíiʼ ga̱jma̱a̱ ni̱ʼkha̱ kagui̱i̱n. Ru̱dúu̱ niʼni mújúunʼ mbá ganitsu miʼtsí xó má rí anu̱u̱ nanigu̱u̱ʼ. 15 Nda̱wa̱á, Rebeca niriyaʼ xtíñuu Esaú a̱ʼdióo bi̱ giʼnii mbá rí itháan májánʼ dí gíʼdoo náa guʼwá, nixnúu magúwúunʼ Jacob a̱ʼdióo gi̱ʼta̱. 16 Nda̱wa̱á nixtajma xthúún e̱jín tsújtuunʼ náa ñawúunʼ ga̱jma̱a̱ náa aphuu náa na̱nguá gíʼdoo tátsu̱u̱n. 17 Ikhú nixnúu Jacob ganitsu rí miʼtsí ga̱jma̱a̱ pan rí niʼni mújúunʼ.

18 Ikhaa nito̱ʼo̱o̱ náa xtáa anu̱u̱ ga̱jma̱a̱ niʼthúu̱n: “¡Anu̱ʼ!”. Ikhaa niriʼña: “¡Gi̱i̱ xtáá, a̱ʼdióʼ! Tsáá dí a̱ʼdióʼ nindxa̱a̱ʼ rá.” 19 Jacob niriʼñuu anu̱u̱: “Nindxu̱ʼ Esaú, a̱ʼdá giʼniaaʼ. Ni̱ni̱ xúgíʼ dí nirathúnʼ. Mbá péñu, araʼwún miʼtsíí xujkhúʼ bi̱ nijkhá gáyáaʼ ga̱jma̱a̱ atani̱ tsajkurámúúnʼ”. 20 Mú Isaac nirajxu̱u̱ a̱ʼdióo: “Xú káʼnii nitani̱ rí niʼnga̱a̱ʼ nitaxkamaa nacha̱ wéñuuʼ xá a̱ʼdióʼ.” Ikhaa niriʼñuu: “Numuu rí Jeobá Dios ndrígáaʼ nimbáyuʼ maxkamaa”. 21 Ikhú Isaac niʼthúu̱n Jacob: “Mbá péñu a̱ʼdióʼ, ayi̱ kanuu ga̱jma̱a̱ atatsíñuʼ maxkajmáá mu mba̱yo̱o̱ á mu nindxa̱a̱ʼ a̱ʼdióʼ Esaú o na̱nguá”. 22 Ikhú Jacob ni̱ʼkha̱ kanuu náa anu̱u̱. Ikhú Isaac nixkajmaa ga̱jma̱a̱ niʼthí: “Aʼwóo nindxu̱u̱ ndrígóo Jacob mú ñawúunʼ nindxu̱u̱ ndrígóo Esaú”. 23 Isaac na̱nguá niʼngo̱o̱ gáʼyoo dí nindxu̱u̱ Jacob numuu rí ñawúunʼ nindxu̱u̱ xóo ñawúunʼ Esaú. Ikha jngóo niʼni tsajkurámáanʼ.

24 Nda̱wa̱á nirajxu̱u̱: “Gajkhun dí nindxa̱a̱ʼ a̱ʼdióʼ Esaú ráʼ.” Ikhaa niriʼñuu: “Aan, ikhúún nindxu̱ʼ”. 25 Ikhú, ikhaa niʼthí: “Ayi̱ jcháa xujkhúʼ bi̱ niraxnáá mu miʼkhúú a̱ʼdióʼ, nda̱wa̱á ma̱ni̱ tsajkurámááʼ”. Ikha jngóo Jacob nirajkuáa ganitsu ga̱jma̱a̱ niguxiʼñáʼ vino, anu̱u̱ nikuiʼtsu ga̱jma̱a̱ niʼga̱a̱n. 26 Nda̱wa̱á Isaac niʼthúu̱n: “Mbá péñu a̱ʼdióʼ, ayi̱ kanuu, araxnúʼ mbá beso”. 27 Ikhaa ni̱ʼkha̱ kanuu ga̱jma̱a̱ nixnúu mbá beso, anu̱u̱ nindoo niníju xtíñuu. Ikhú niʼni tsajkurámáanʼ ga̱jma̱a̱ niʼthí:

“Tiáá xóo tawiin a̱ʼdióʼ, nindxu̱u̱ xóo taun mbaaʼ rí Jeobá niʼni tsájkurámúuʼ. 28 Dios bi̱ gajkhun gáxnáa xuájyaʼ dí nagajtaa mekhuíí, ku̱ba̱ʼ rí itháán májánʼ, maʼni rí ma̱jma̱a̱ wéñuuʼ rí matadu ga̱jma̱a̱ maʼni dí maraʼdáá wéñuuʼ vino. 29 Xuajin mani̱ndxu̱ún ñumbáá ndrígáaʼ, xuajin mba̱ʼu̱ musmbati̱gu̱u̱n náa inaaʼ. Aratañájúúnʼ a̱ngia̱a̱nʼ ga̱jma̱a̱ e̱ji̱i̱n ru̱dáaʼ musmbati̱gu̱u̱n náa ikháán. Majuiʼthá tsríguíin asndu tsáa bi̱ gáʼtá tsriguíín ga̱jma̱a̱ maguma tsajkurámáanʼ asndu tsáa bi̱ gáʼni tsajkurámáánʼ”.

30 Inu má rí Isaac niguámbóo niʼni tsajkurámáanʼ Jacob ga̱jma̱a̱ Jacob nigájnáa má náa kraʼaa anu̱u̱, Isaac, ikhú ni̱ʼkha̱núu̱ Esaú bi̱ nindxu̱u̱ ndxájuu náa ni̱jkha̱ gáñiinʼ xujkhúʼ. 31 Ikhaa ma̱ngaa niʼni mújúunʼ mbá ganitsu miʼtsí, ni̱jkha̱ kayóo mi̱khu̱ anu̱u̱ ga̱jma̱a̱ niʼthúu̱n: “Atujxa̱a̱ʼ anu̱ʼ. Atsíí xujkhúʼ bi̱ ni̱jkhá gáyáaʼ ga̱jma̱a̱ atani̱ tsajkurámúúnʼ”. 32 Ikhú Isaac bi̱ nindxu̱u̱ anu̱u̱ niʼthúu̱n: “Tsáá nindxa̱a̱ʼ ikháán rá.” Ikhaa niriʼñuu: “Nindxu̱ʼ a̱ʼdiáaʼ Esaú, a̱ʼdá giʼniaaʼ”. 33 Ikhú Isaac nigíʼdu̱u̱ niguáʼaan wéñuuʼ ga̱jma̱a̱ niʼthí: “Tsáá nindxu̱u̱ bi̱ ni̱jkha̱ gáyáaʼ xujkhúʼ ga̱jma̱a̱ ni̱ʼkha̱ kayóo xuwiʼ mi̱ʼkhu̱ rá. Nikhu nákhá ikháán xóó tsédxaʼnúuʼ ga̱jma̱a̱ ikhaa ni̱ni̱ tsajkurámáanʼ. ¡Ikhaa nindxu̱u̱ bi̱ maguma tsajkurámáanʼ!”.

34 Índo̱ niʼdxawuun rí niʼthí anu̱u̱, Esaú nigíʼdu̱u̱ nindxaʼwá xtambiyaʼ ga̱jma̱a̱ niʼtákáñuu anu̱u̱: “¡Atani̱ tsajkurámúúnʼ mangúún anu̱ʼ!”. 35 Mú anu̱u̱ niʼthúu̱n: “Gi̱ʼtia̱a̱ʼ ni̱ʼkha̱ ga̱jma̱a̱ niʼni ndu̱wúúnʼ, ikhaa niguma tsajkurámáanʼ dí kaʼyaaʼ ikháán”. 36 Ikhú Esaú niʼthí: “Ikha jngóo mbiʼyuu Jacob, numuu rí a̱jma̱ nuthu nigruigú rí kaʼyoʼ. Ginii nirígú káyúʼ dí kaʼyoʼ xóo a̱ʼdá giʼnii. ¡Xúgi̱ narígú káyúʼ dí kaʼyoʼ maguma tsajkurámúúnʼ!”. Nda̱wa̱á nirajxi̱: “Lá na̱nguá nitiéjxi̱i̱ mbá rí matani̱ tsajkurámúúnʼ mangúún ráʼ.” 37 Mú Isaac niʼthúu̱n Esaú: “Ni̱thu̱u̱n rí ikhaa maʼtá ñajuaanʼ ga̱jma̱a̱ rí xúgíinʼ a̱ngui̱i̱n mani̱ndxu̱ún ñumbáá ndrígóo, ma̱ngaa rí ma̱jma̱a̱ dí maʼdu ga̱jma̱a̱ magiʼdoo wéñuuʼ vino. Ndiéjunʼ lá xóó guanúu maxnáaʼ rá a̱ʼdióʼ.”

38 Ikhú Esaú niʼthí: “Anu̱ʼ, lá mbóó kayuuʼ xtaʼdáá ráʼ. ¡Atani tsajkurámúúnʼ mangúún anu̱ʼ!”. Ikhú Esaú nigíʼdu̱u̱ nidxaʼwá ga̱jma̱a̱ nimbiyaʼ. 39 Ikhú Isaac niriʼñuu:

“Natayáá ráʼ. Maraxtaa mitsínguánʼ náa rígá ku̱ba̱ʼ dí májánʼ ga̱jma̱a̱ mitsínguánʼ náa xuájyaʼ dí nagajtaa mekhuíí. 40 Majmaaʼ espada ndrígáaʼ mu maraxtaa ga̱jma̱a̱ matani̱ ñajuunʼ gi̱ʼtia̱a̱ʼ. Mú índo̱ xáʼngo̱o̱ a̱jkia̱a̱nʼ gáʼni matani kríyaminaʼ náa naʼthá ñajuaanʼ”.*

41 Asndu nákhá ikhú, Esaú niyéjxi̱i̱ sia̱nʼ kaʼyoo Jacob ga̱jma̱a̱ numuu dí ikhaa niʼni tsajkurámáanʼ anu̱u̱. Esaú niʼtáminaʼ náa awúu̱n a̱jkiu̱u̱n: “Inu má makhañúu anu̱ʼ. Índo̱ gájngoo mbiʼi rí makuwáanʼxu̱ ngíná, maxíyáa gi̱ʼtio̱ʼ Jacob”. 42 Índo̱ nitháán Rebeca awan dí naríyaʼ Esaú, a̱ʼdióo bi̱ giʼnii, ikhaa mbá nacha̱ nidxaʼwóo Jacob a̱ʼdióo bi̱ gi̱ʼta̱ ga̱jma̱a̱ niʼthúu̱n: “¡Atadxawíín! Ndxájuaaʼ Esaú naríyaʼ awan dí maxíñáa ga̱jma̱a̱ dí nitani̱. 43 Ikha jngóo atani̱ rí ma̱tha̱a̱nʼ, a̱ʼdióʼ. Atagáyáaʼ, ayuʼ náa Harán náa xtáa ndxájuʼ Labán. 44 Aguanáaʼ ikhí mbá nguáthá tiempo, asndu índo̱ gáwi̱ji̱i̱ rakasngáñu̱u̱n ndxájuaaʼ, 45 asndu índo̱ gániñuuʼ rakiʼnáa ga̱jma̱a̱ gámbumuu rí nitani̱. Ikhú makuʼmá ajngáa mu matanga̱án. Náá numuu rí ma̱ni̱ mbátigáanʼ mbá nájmáanʼla ikháá má mbiʼi rá.”

46 Nda̱wa̱á, Rebeca niʼthúu̱n Isaac: “Waʼxiinʼ Het nuni̱ rí ni xándoʼ maxtáá. Á mu mbóoʼ mbiʼi Jacob gáyáa mbáa wáxióo Het, o mbáa wáxá bi̱ xtáa náa xuajin rígi̱, nándáa má numuu maxtáá xóó”.