Oseas
1 Rígi̱ nindxu̱u̱ ajngóo Jeobá rí nigruigú Oseas* a̱ʼdióo Beerí índo̱ nixtáa raʼtáñajunʼ Uzías, Jotán, Acaz ga̱jma̱a̱ Ezequías, bi̱ ninindxu̱ún reyes náa Judá, ma̱ngaa nákha mbiʼi rí nixtáa Jeroboán a̱ʼdióo Joás, rey ndrígóo Israel. 2 Índo̱ Jeobá nigíʼdu̱u̱ nijmiuu Oseas mu maʼthí ajngóo, Jeobá niʼthúu̱n Oseas: “Ayuʼ ga̱jma̱a̱ ayáa mbáa a̱ʼgu̱ bi̱ nagujuamínáʼ ga̱jma̱a̱ ikhaa magiʼdiin e̱jñu̱ún eʼwíinʼ xa̱bu̱, numuu rí nuxudamíjna̱ aʼkhá gajmiún eʼwíinʼ, xa̱bu̱ xuajin niniña̱a̱nʼ mbá kayuuʼ runimbu̱ún kuyáá Jeobá”.
3 Ikha jngóo, ikhaa ni̱jkha̱ ga̱jma̱a̱ ndiyáa Gómer wáxióo Diblaim, ikhaa niguewáan ada̱* ga̱jma̱a̱ nigiʼdaa mbá dxámá.
4 Ikhú Jeobá niʼthúu̱n: “Araxná mbiʼíí Jezreel,* numuu rí inu má mandi̱ʼi̱i̱n cuenta bi̱ kúwá náa goʼwóo Jehú ga̱jma̱a̱ numuu eʼdi rí nixídíí Jezreel rí nigudíin xa̱bu̱, ma̱ngaa manimbáti̱ga̱a̱ xúgíʼ náa kúwá xa̱bu̱ Israel. 5 Mbiʼi má rúʼko̱ maxpígaʼ xkamídóo Israel náa mata* ndrígóo Jezreel”.
6 Gómer mbu̱júu̱ niguewáan imba̱a̱ ada̱, ga̱jma̱a̱ nigiʼdaa mbáa dxáʼgú. Ikhú Dios niʼthúu̱n Oseas: “Araxná mbiʼíí Lo-Ruhamá,* numuu rí ikhúún maxkawíin ni xátangu̱ún magáwíinʼ a̱jkiu̱nʼ ka̱ñu̱u̱n bi̱ kúwá náa goʼwóo Israel. 7 Mú magáwíinʼ a̱jkiu̱nʼ ka̱ñu̱u̱n bi̱ kúwá náa goʼwóo Judá ga̱jma̱a̱ ikhúún bi̱ nindxu̱ʼ Jeobá Dios ndrígu̱ún ma̱ni̱ káwíin, xájmuʼ xkamídá mu ma̱ni̱ káwíin, ni má espada, ni má mbá guerra, ni má wáyú, ni má bi̱ kudrúwíin wáyú”.
8 Nda̱wa̱á rí niniñuuʼ raʼxúuʼ Lo-Ruhamá, Gómer niguewáan imba̱a̱ ada̱ ga̱jma̱a̱ nigiʼdaa mbáa ndxáma. 9 Ikhú Dios niʼthúu̱n: “Araxná mbiʼíí Lo-Ammí,* numuu rí ikháanʼ na̱nguá nindxa̱la xuajñunʼ ni má ikhúún xánindxu̱ʼ Dios ndrígala.
10 Rí xóo mbaʼin e̱ji̱i̱n Israel mani̱ndxu̱ún xóo jui̱ʼi̱ dí rígá náa lamáa* rí xándoo maxtie̱wan ni má magixnuu. Náa mbaaʼ rí nijuiʼtála ‹Ikháanʼ na̱nguá nindxa̱la xuajñunʼ› majuiʼtála ‹E̱ji̱i̱n Dios bi̱ ndaʼya›. 11 E̱ji̱i̱n Judá ga̱jma̱a̱ e̱ji̱i̱n Israel magimbíin mu makuwá mbóó, ga̱jma̱a̱ mbuyáaʼ mbáa bi̱ mayéʼga edxu̱u̱ náa ikhiin mu magajnún náa xuajin numuu rí mbiʼi ndrígóo Jezreel mani̱ndxu̱u̱ mba̱a̱.