Amós

7 Rígi̱ nindxu̱u̱ rí nisngájmuʼ Tátá Jeobá bi̱ tháán mba̱a̱. Índo̱ nikráʼáan tsígáʼ rí nidu nda̱wa̱á.* Ikhaa nikuʼmiin mbaʼin wéñuuʼ tsíʼbu.* Nindxu̱u̱ rí nijuiʼdu nda̱wa̱á rí nirujtu rajxo̱o̱ rey. 2 Índo̱ tsíʼbu niguámbu̱u̱n ni̱ʼphu̱ xúgíʼ iná dí rígá náa xuajin, ni̱tha̱: “¡Tátá Jeobá bi̱ itháán mba̱a̱, mbá péñu atani̱ mba̱a̱ a̱jkia̱a̱nʼ xtañún! Xú káʼnii gáʼngo̱o̱ gákríya̱a̱ʼ* Jacob rá. ¡Ikhaa ragíʼdoo tsiaki̱i̱!”.

3 Ikha jngóo Jeobá nigáwíinʼ a̱jkiu̱u̱n. Ga̱jma̱a̱ Jeobá niʼthí, “xárigá rígi̱”.

4 Rígi̱ nindxu̱u̱ rí nisngájmuʼ Tátá Jeobá bi̱ itháán mba̱a̱. Ndi̱yo̱o̱ rí Tátá Jeobá bi̱ tháán mba̱a̱ niʼtáñajunʼ rí ku̱ba̱ʼ mikha̱a̱ ga̱jma̱a̱ aguʼ, aguʼ rígi̱ nirgujndo̱o̱ʼ iyaʼ mi̱jnu̱ʼ ga̱jma̱a̱ nitsikháa mbá chíʼgíiʼ* xuajin. 5 Ikhú ni̱tha̱: “Tátá Jeobá bi̱ itháán mba̱a̱, mbá péñu* atatsi̱ji̱i̱ rígi̱. Xú káʼnii gáʼngo̱o̱ gákríya̱a̱ʼ* Jacob rá. ¡Ikhaa ragíʼdoo tsiaki̱i̱!”.

6 Ikha jngóo Jeobá nigáwíinʼ a̱jkiu̱u̱n mbu̱júu̱. “Ní ma xárígá rígi̱”, niʼthí Tátá Jeobá bi̱ tháán mba̱a̱.

7 Rígi̱ nindxu̱u̱ rí nisngájmuʼ. Ndi̱yo̱o̱ rí Jeobá frígu náa tsu̱du̱u̱ xtájtsí rí niguma, náa nijmaa plomo mu mawi̱ji̱ jmbu ga̱jma̱a̱ ikhaa kayá plomo. 8 Ikhú Jeobá nirajxu̱ʼ: “Amós ndiéjunʼ tayáá rá.” Ikhú niriʼñuu, “mbá plomo”. Ikhú Jeobá niʼthí: “Marájkha mbá plomo náa majñu̱u̱ʼ xuajñunʼ Israel. Ni xátangu̱ún ma̱ni̱ mba̱a̱ a̱jkiu̱ún kañún. 9 Náa mbaaʼ mitsídánʼ ndrígóo Isaac maguanáa ga̱jma̱a̱ náa mbaaʼ mikaʼwu ndrígóo Israel maguma gámbáa, ikhúún ma̱ni̱ gámbáa goʼwóo Jeroboán ga̱jma̱a̱ espada”.

10 Amasías, ndxajkun bi̱ nañajunʼ náa Betel, nikuʼma mbá ajngáa náa Jeroboán rey ndrígóo Israel, niʼthúu̱n: “Amós xtáa raríya̱ʼ awan rí maʼniaaʼ dí ra’khí náa majñu̱u̱ʼ goʼwóo Israel. Xa̱bu̱ bi̱ kúwá náa ku̱ba̱ʼ rígi̱, tséʼngu̱u̱n gudxawíín xúgíʼ ajngáa rí naʼthí. 11 Numuu dí rígi̱ rí Amós naʼthí: ‹Jeroboán makhañúu ga̱jma̱a̱ espada ga̱jma̱a̱ xa̱bu̱ Israel gajkhun dí murawíin náa ku̱bu̱únʼ ga̱jma̱a̱ maʼga kiʼdiin›”.

12 Ikhú Amasías niʼthúu̱n Amós: “Ikháán xa̱bu̱ bi̱ ndaʼyoo rí nawasngájmáá,* ayuʼ, atagáyáaʼ náa ku̱ba̱ʼ ndrígóo Judá ikhí gatiejunʼ mu mataʼyáʼ rí miʼtsu.* Ga̱jma̱a̱ ikhí gárataríya̱ʼ rí natayáá. 13 Mú xátangaán marataríya̱ʼ náa Betel dí marigá, numuu rí ikhí nindxu̱u̱ mbaaʼ mikaʼwu ndrígóo mbáa rey ga̱jma̱a̱ guʼwá náa nduyamajkuíí Dios náa nagímbíin mbaʼin xa̱bu̱”.

14 Ikhú Amós niriʼñuu Amasías: “Ikhúún nákha ginii na̱nguá nindxu̱ʼ profeta* ní ma a̱ʼdióo mbáa profeta. Nindxu̱ʼ mbáa baxtúu ga̱jma̱a̱ mbáa bi̱ nañewu̱u̱n sicómoros.* 15 Mú Jeobá nindxa̱ʼóʼ índo̱ ikhúún xtáá rañewu̱u̱n mugu̱, ga̱jma̱a̱ Jeobá niʼthúnʼ: ‹Ayuʼ ga̱jma̱a̱ aratáríya̱ʼ dí magíʼnuu xuajñunʼ Israel›. 16 Ikha jngóo rí xúgi̱ atadxawíín ajngóo Jeobá: ‹Ikháán naratá: “Xárataríyaʼ dí magíʼnuu Israel ní ma xárata rí magíʼnuu goʼwóo Isaac”. 17 Mú rígi̱ nindxu̱u̱ rí Jeobá naʼthí: “A̱ʼgia̱a̱ʼ mani̱ndxu̱u̱ mbáa bi̱ nagujuamínáʼ náa xuajin, jiámiáaʼ ga̱jma̱a̱ waʼxiaaʼ makhañún ga̱jma̱a̱ espada. Majmún ñuñuu rí naxtiewa̱n ga̱jma̱a̱ mu muxuiʼtha̱a̱ mbayaaʼ, ikháán makhañáaʼ náa ku̱ba̱ʼ mitsaga, ga̱jma̱a̱ xa̱bu̱ Israel gajkhun rí maʼga kiʼdiin”›”.