Isaías

18 ¡Ngínáa lá ku̱ba̱ʼ náa nawáán xniúúʼ xujkhúʼ majkhiinʼ,

mbaaʼ náa rígá mañu dí rígá náa Etiopía!

 2 Ku̱ba̱ʼ Etiopía nakuʼmiin bi̱ magún kuñu̱u̱n ajngáa xígií náa lamáa,*

náa barcos dí niguma ga̱jma̱a̱ papiro mu magún náa inuu iyaʼ, ikhaa naʼthí:

“Aʼguala, ikháanʼ bi̱ na̱jkua̱ ku̱ya̱la ajngáa mbá nacha̱,

aʼgua náa xuajin náa kúwá xa̱bu̱ mbijui̱i̱n ga̱jma̱a̱ bi̱ gua̱ba̱ʼ xuñúúnʼ,

mbá xuajin dí namíñúún kuyáá asndu náá,

xuajin dí gíʼdoo tsiaki̱i̱ ga̱jma̱a̱ nagruigúu i̱ʼwáʼ xuajin,

náa mbá ku̱ba̱ʼ dí rígá wéñuuʼ mañu”.

 3 Xúgiáanʼ ikháanʼla xa̱bu̱ numbaaʼ bi̱ kuwáanʼla ikhí,

dí gúyáá mani̱ndxu̱u̱ xóo mbá tsinaʼ* dí nafri̱gu náa inuu kúbá,

ga̱jma̱a̱ mudxawíín aʼwóo xóo mbá aʼwóo chi̱ji̱ʼ.

“Maxtáá wíí ga̱jma̱a̱ mayejxi̱ náa* niraʼwi̱i̱ maxtáá,

xóo índo̱ agiuuʼ a̱jkha̱ʼ naʼni mijkha,

xóo du̱u̱n dí nagajtaa xuájyooʼ índo̱ naʼni mijkha mbiʼi dí nurajxi̱i̱ rí nudu.

 5 Numuu dí nákha xóó tségi̱jxi̱i̱ dí nijuiʼdu,

índo̱ niguámbá nijmi̱di̱ riʼyu̱u̱ ga̱jma̱a̱ índo̱ uva na̱jkha̱ raʼgo̱o̱,

miʼda rudiuuʼ ga̱jma̱a̱ ajua̱nʼ

ga̱jma̱a̱ ñawúunʼ dí juáʼwíi miʼda ga̱jma̱a̱ muthu.

 6 Xúgíʼ rúʼko̱ maguanáa mu̱phu̱ xujkhú xnaʼ bi̱ naʼphu̱ xuwiʼ bi̱ kúwá náa kúbá

ga̱jma̱a̱ xujkhúʼ bi̱ kúwá náa tsu̱du̱u̱ ku̱ba̱ʼ.

Xujkhú xnaʼ bi̱ naʼphu̱ xuwiʼ mu̱phu̱ kañiiʼ ruʼphu,

ga̱jma̱a̱ mbá xúgíinʼ xujkhúʼ bi̱ kúwá náa tsu̱du̱u̱ ku̱ba̱ʼ mu̱phu̱ xúgíʼ dí gájma̱a̱.

 7 Mbiʼi rúʼko̱, ma̱ʼkha̱ kiʼyá mbá regalo náa Jeobá bi̱ naʼtáñajúúnʼ ángeles,

dí na̱ʼkha̱ náa xuajin náa kúwá xa̱bu̱ mbijui̱i̱n ga̱jma̱a̱ bi̱ gua̱ba̱ʼ xuñúúnʼ,

mbá xuajin dí namíñúún kuyáá asndu náá,

xuajin dí gíʼdoo tsiaki̱i̱ ga̱jma̱a̱ nagruigúu i̱ʼwáʼ xuajin,

náa mbá ku̱ba̱ʼ dí rígá wéñuuʼ mañu,

náa mbaaʼ dí kayá mbiʼyuu Jeobá bi̱ naʼtáñajúúnʼ ángeles, náa kúbá Sion”.