Amós
3 “Xa̱bu̱ xuajin Israel, gudxawíínla ajngáa rígi̱ rí Jeobá niʼthí ga̱jma̱a̱ numala, ga̱jma̱a̱ numún xúgíinʼ xa̱bu̱ bi̱ nigúwíin náa ku̱ba̱ʼ ndrígóo Egipto:
2 ‹Náa xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ, i̱ndó niniʼniáanʼla ikháanʼ.
Ikha numuu rúʼko̱ rí manda̱ʼa̱a̱la cuenta ga̱jma̱a̱ numuu xúgíʼ rí nikiéʼkala.
3 Lá ragájkhun rí ma̱ndoo magún a̱jmi̱i̱n xa̱bu̱ á mu niri̱ya̱ʼ awan náa mbuyamijná ráʼ.
4 Lá mandxa̱ʼwá mbáa león náa xaxi̱ á mu na̱nguá niguguaa mbáa xujkhúʼ mikhu̱u̱ ráʼ.
Lá mandxa̱ʼwá mbáa león gújkuiiʼ* asndu náa xtáa á mu taguguaa nimbáa bi̱ mikhu̱u̱ ráʼ.
5 Lá mbáa ma̱ndoo maguguaa mbáa ñu̱ʼu̱ á mu na̱nguá nigíʼ tsáʼkhá ráʼ.
Lá maguguáa mbá tsáʼkhá á mu nimbáa táyóo ráʼ.*
6 Á mu nawáán chi̱ji̱ʼ náa mbá xuajin, lá raʼkháa mamíñún xa̱bu̱ rí asndu maguíʼiin ráʼ.
Á mu narígá mbá gamiéjunʼ náa xuajin, lá raʼkháa Jeobá eʼni marigá rígi̱ ráʼ.
7 Numuu rí Tátá Jeobá bi̱ itháán mba̱a̱ xáʼni nimbá
á mu na̱nguá niʼthún ngu̱ʼwa̱ rígi̱ xa̱bi̱i̱ bi̱ nindxu̱ún profetas.*
8 ¡León nindxa̱ʼwá má! Tsáa lá xámíñuu rá.
¡Tátá Jeobá bi̱ itháán mba̱a̱ niʼthí má! Tsáa lá xáʼtáriyaʼ rá.›
9 ‹Guta̱la rígi̱ náa torres rí wájun gújkhúʼ náa Asdod
ga̱jma̱a̱ náa torres rí wájun gújkhúʼ náa ku̱ba̱ʼ ndrígóo Egipto.
Gu̱tha̱: “Gúgimbáanʼ mu muxmíjná gajmiála kúbá ndrígóo Samaria,
gu̱ya̱a̱ xkujndu dí narígá ikhí
ga̱jma̱a̱ nduwaʼ dí naguma ikhí.
10 Ikhiin tséjmiin guni̱ rí májánʼ, eʼthí Jeobá,
rí nindrigú ga̱jma̱a̱ tsiaki̱i̱ nini̱ majtíí náa torres rí wájun gújkhúʼ ndrígu̱ún”›.
11 Ikha jngóo, rígi̱ rí naʼthí Tátá Jeobá bi̱ itháán mba̱a̱:
‹Mbáa xa̱bu̱ sia̱nʼ maruguamaʼán xuajin,
maríya̱ʼ kaʼyáaʼ tsiaki̱i̱ ndrígáaʼ,
ga̱jma̱a̱ rí kajti náa torres ndrígáaʼ rí wájun gújkhúʼ maguwíi káʼyáaʼ›.
12 Rígi̱ rí naʼthí Jeobá:
‹Xó má mbáa baxtúu naxmátriyaa náa rawuunʼ león a̱jma̱ rajkhúu xujkhúʼ o mbá xuíʼtóo cháʼwuun,
xúʼko̱ kaʼnii gaguma kríya̱a̱ʼ xuajin Israel,
bi̱ xúgi̱ náa Samaria natri̱gi̱i̱n náa xiyoo rí mitsaanʼ* ga̱jma̱a̱ náa xílí rí itháán májánʼ›.
13 ‹Gudxawíín ga̱jma̱a̱ guthu̱u̱n bi̱ kúwá náa goʼwóo Jacob›, eʼthí Tátá Jeobá bi̱ itháán mba̱a̱, Dios bi̱ naʼtáñajúúnʼ ángeles.
14 ‹Numuu rí mbiʼi dí manda̱ʼa̱a̱ cuenta Israel ga̱jma̱a̱ numuu xúgíʼ nuthu rí nikujximínáʼ,
ma̱ngaa manda̱ʼa̱a̱ cuenta náa nakarámáʼ tsigijñaʼ ndrígóo Betel.
Chi̱jyu̱u̱ʼ náa nakarámáʼ tsigijñaʼ muturígú ga̱jma̱a̱ majngutígú mbayííʼ.
15 Ma̱ni̱ ngajxi̱i̱ guʼwá náa nakúwá índo̱ naʼni migúwán ma̱ngaa guʼwá náa nakúwá índo̱ naʼni mijkha›.