Ezequiel

2 Ikhú ikhaa niʼthúnʼ: “A̱ʼdióo xa̱biya̱,* ariejún mu muʼtámíjná”. 2 Ikhú ikhaa niʼthúnʼ, espíritu ndrígóo Dios nirígá náa ikhúún ga̱jma̱a̱ niʼni rí magújun mu madxawun bi̱ xtáa raʼthúnʼ.

3 Ikhaa niʼthúnʼ: “A̱ʼdióo xa̱biya̱, nakuʼmáán mi̱dxu̱ʼ náa xuajin Israel, xuajin dí nikujximínáʼ náa ikhúún. Ikhiin gajmiún wajin xiʼñúúnʼ ninújngurámúúnʼ xtángoo ndrígóʼ asndu rí mbiʼi xúgi̱. 4 Nakuʼmáán mi̱dxu̱ʼ náa e̱ji̱n bi̱ nuxujximíjna̱* ga̱jma̱a̱ bi̱ gújkhúʼ a̱jkiu̱ún. Arathún: ‹Rígi̱ dí naʼthí Tátá Jeobá bi̱ itháán mba̱a̱›. 5 Tséʼniuu á mu nudxawaanʼ o na̱nguá, numuu rí ikhiin tsénimbu̱u̱n, mú gajkhun mbuyáá dí nixtáa mbáa profeta* náa ikhiin.

6 Mú ikháán a̱ʼdióo xa̱biya̱, xámíñáaʼ gúni̱ ni má xámíñáaʼ gáʼni ajngún maski ajndu xtaa náa majñuuʼ iná xtáʼdu̱u̱ ga̱jma̱a̱ náa tsuwanʼ,* ma̱ngaa xtaa náa majñu̱únʼ xi̱yúʼ. Xámíñáaʼ gáʼni̱ ajngún ni má xáguáʼáán gáʼni inún, numuu rí ikhiin tsénimbu̱u̱n. 7 Arathún ajngóʼ, tséʼniuu má nudxawíín o na̱nguá numuu rí nindxu̱ún mbá xuajin dí tséʼnimbo̱o̱.

8 Mú ikháán a̱ʼdióo xa̱biya̱, atadxawíín rí natha̱a̱nʼ. Xátani̱ ikháán xóo eni̱ xa̱bu̱ bugi̱ bi̱ tsénimbu̱u̱n. Ataxuájan rawaanʼ ga̱jma̱a̱ atsu rí naxna̱a̱ʼ”.

9 Índo̱ niyejxi̱, ndi̱yo̱o̱ dí fríya̱ʼ ñawúunʼ náa inuʼ ga̱jma̱a̱ kayá mbá rollo dí nigumarámáʼ.* 10 Ikhaa nimbríya̱ʼ rollo náa inuʼ ga̱jma̱a̱ náa rollo mbá nájma̱ níʼkhóo kiʼnirámáʼ. Ikhí nigumarámáʼ ajmúú rí ngíná, rí numbi̱ya̱ʼ ga̱jma̱a̱ rí nundxa̱ʼwa̱ ngínún.