Isaías
44 Dí xúgi̱ rá, atadxawíín, Jacob, xa̱bi̱ʼ,
ga̱jma̱a̱ ikháán Israel, bi̱ niraʼwíi.
‹Xámíñáaʼ, xa̱bi̱ʼ Jacob,
ni má ikháán Jesurún,* bi̱ niraʼwi̱i̱.
3 Numuu dí maxidíri̱ga̱ iyaʼ náa ku̱ba̱ʼ rí nda̱a̱ iyaʼ,*
ma̱ni̱ dí marigá mañu náa ku̱ba̱ʼ mijxooʼ.
Maxidírámuuʼ tsiaki̱i̱ ndrígóʼ náa bi̱ gáʼkha̱ náa ikháán,
ga̱jma̱a̱ ma̱ni̱ tsajkurámiinʼ bi̱ gáguwáʼ náa ikháán.
4 Ga̱jma̱a̱ makráʼáan náa majñu̱u̱ʼ iná maxaʼ,
xóo ixi̱ álamo dí nakráʼáan náa rawuunʼ iyaʼ.
5 Mbáa maʼthí: “Ikhúún kaʼyoʼ náa Jeobá”.
I̱mba̱a̱ maxná mbiʼiminaʼ Jacob,
ga̱jma̱a̱ imba̱a̱ maʼnirámáʼ náa ñawúunʼ: “Ikhúún kaʼyoʼ náa Jeobá”.
Ga̱jma̱a̱ mbayá mbiʼyuu Israel›.
6 Rígi̱ dí naʼthí Jeobá,
Rey ndrígóo Israel ga̱jma̱a̱ bi̱ ni̱ʼtsi̱ríya̱a̱ʼ, Jeobá bi̱ naʼtáñajúúnʼ ángeles:
‹Ikhúún nindxu̱ʼ bi̱ ginii ga̱jma̱a̱ bi̱ iwáá kayuuʼ.
Mbáwún nindxu̱ʼ Dios, ga̱jma̱a̱ ndawa̱a̱ i̱mba̱a̱.
7 Tsáá i̱mba̱a̱ xóo ikhúún rá.
¡Gaʼthí ga̱jma̱a̱ gasngájmuʼ mu mba̱yo̱o̱!
Guthi ndiéjunʼ dí inu marigá
ga̱jma̱a̱ ndiéjunʼ dí gárígá itháan nda̱wa̱á,
xó má ni̱ni̱ ikhúún nákhá ni̱ʼgíʼ xuajin nákhá wájyúuʼ.
8 Xáguáʼáanʼla,
xárikhala dí gamíi.
Lá na̱nguá ni̱thu̱u̱n wapháá mámbáa dí ikháanʼla ráʼ. Na̱nguá ni̱tha̱ ráʼ.
Ikháanʼ nindxa̱la testigos ndrígóʼ.
Lá xtáa i̱mba̱a̱ Dios xóo ikhúún ráʼ.
Na̱nguá, nda̱a̱ i̱mba̱ Itsí mba̱a̱, na̱nguá e̱yo̱o̱ á mu rígá i̱mba̱›”.
9 Bi̱ nuniwíin xándú, mbá xúgíinʼ ikhiin nda̱a̱ numún,
ga̱jma̱a̱ dí ra̱ʼkhá tháán enigu̱u̱nʼ, nda̱a̱ rí gáyambáá.
Ikhiin* xándoo mani̱ndxu̱ún testigo, numuu rí nda̱a̱ dí eyáá,
ikha jngóo bi̱ nuni̱i̱, maguma majti̱i̱nʼ.
10 Bi̱ naʼnii mbáa dios o mbá xtiʼkhuu dí naguma ga̱jma̱a̱ ajua̱nʼ,*
nda̱a̱ rí gámbáyúu.
11 ¡Gu̱ya̱a̱la! ¡Xúgíinʼ a̱ngiu̱ún maguma majti̱i̱nʼ!
Bi̱ najmañún nuñajunʼ májánʼ xa̱bu̱ú nindxu̱ún.
Gagimbíin xúgíinʼ ga̱jma̱a̱ guni̱ ñajunʼ ndrígu̱ún.
Maguíʼiin ga̱jma̱a̱ mbá xúgíinʼ maguma majti̱i̱nʼ.
12 Xa̱bu̱ bi̱ nañajunʼ ga̱jma̱a̱ ajua̱nʼ, natsikhá ajua̱nʼ náa chámbuʼ.
Narujtsi̱ ga̱jma̱a̱ martillo mu magajnúu ajua̱nʼ,
narujtsi̱ ga̱jma̱a̱ tsiaki̱i̱ rí gíʼdoo ñawúunʼ.
Nda̱wa̱á naxkidxu̱u̱ ga̱jma̱a̱ naʼni néʼngo̱o̱,
tséʼga̱a̱n iyaʼ ga̱jma̱a̱ nagaaʼ.
13 Bi̱ naʼtóo ixi̱ natámáʼ ñuñuu dí nagiéwun ga̱jma̱a̱, naxnúu tsinuuʼ ga̱jma̱a̱ gis maña̱ʼ.
Na̱jkha̱ raríya̱ʼ tsinuuʼ ga̱jma̱a̱ mbá cincel,* nda̱wa̱á naxnúu tsinuuʼ ga̱jma̱a̱ compás.
14 Xtáa mbáa xa̱bu̱ bi̱ narujtu ixi̱ cedros. Ikhaa naraʼwíí mbá ixi̱, ixi̱ roble,
ga̱jma̱a̱ nañewu̱u̱n asndu índo̱ naʼni mba̱a̱
ga̱jma̱a̱ naʼni itháan gújkhúʼ ki xóo i̱ʼwáʼ ixi̱ dí rígá náa xaxi̱.
Na̱ʼdu̱u̱ mbá ixi̱ laurel ga̱jma̱a̱ ruʼwa naʼni rí mba̱ja̱a̱.
15 Ikhú mbáa xa̱bu̱ najmuu ixi̱ mu magíʼ aguʼ.
Mbá xuíʼtóo natsikhá mu matsígámina̱a̱ʼ,
nagíʼ mbá aguʼ ga̱jma̱a̱ nakúmbúʼ pan.
Mú nda̱wa̱á naʼnii mbáa dios ga̱jma̱a̱ ndaʼyamajkhuu.
Naʼni mbáa xándú ga̱jma̱a̱ ixi̱ ga̱jma̱a̱ nasmbáti̱go̱o̱ náa inuu.
16 Mbá xuíʼtóo ixi̱ nagíʼ ga̱jma̱a̱ aguʼ,
ikháá má xuíʼtóo ixi̱ rúʼko̱ nakumbúʼ ga̱jma̱a̱ xuwiʼ rí mi̱khu̱, ga̱jma̱a̱ nagiʼmuu.
Ma̱ngaa natsígámina̱a̱ʼ, ikhú naʼthí:
“¡Májánʼ rá! Nagigu̱ún índo̱ nda̱yo̱o̱ aguʼ”.
17 Mú i̱mbá xuíʼtóo naʼnii ga̱jma̱a̱ mbáa dios, mbáa xándú.
Nasmbáti̱go̱o̱ náa inuu ga̱jma̱a̱ ndaʼyamajkuu.
Índo̱ naʼtákáñuu, naʼthúu̱n:
“Atani̱ kríñu̱u̱nʼ, numuu dí ikháán nindxa̱a̱ʼ dios ndrígóʼ”.
18 Ikhiin nda̱a̱ rí eyáá, ni má tsékru̱ʼu̱u̱n,
numuu rí idún kúgoo ga̱jma̱a̱ tsíyoo gúyejxi̱,
ga̱jma̱a̱ nda̱a̱ dí ekru̱ʼu̱u̱n.*
19 Nimbáa tséndxaʼwáminaʼ,
ragíʼdoo ku̱ma̱, ni má tsékro̱ʼo̱o̱ mu maʼthí:
“Mbá xuíʼtóo ixi̱* ni̱ʼgíʼ ga̱jma̱a̱ aguʼ,
ga̱jma̱a̱ náa chámbiúuʼ nikuʼmbúʼ pan ga̱jma̱a̱ xuwiʼ mu miʼkhu.
Ikha jngóo, lá májánʼ gáʼni dí i̱mbá xuíʼtóo ma̱ni̱ ga̱jma̱a̱ mbá rí xkawiʼ ráʼ.
Lá májánʼ gáʼni rí mbayamajkuu mbá xuíʼtóo ixi̱ ráʼ.”
20 Bi̱ naʼnii mbáa xándú nindxu̱u̱ xóo mbáa bi̱ na̱ʼkhu̱ idiʼ.
A̱jkiu̱u̱n dí niguma nduwaaʼ naʼni dí magajnúri̱yo̱o̱ʼ.
Tséʼngo̱o̱ gáʼni kríyamínáʼ, ni má tsérajxi̱mínáʼ:
“Lá raʼkháa nduwaʼ nindxu̱u̱ dí ka̱ya̱ náa ñawún mújúnʼ ráʼ.”
21 “Garmáʼáan a̱jkia̱a̱nʼ rígi̱ Jacob, ga̱jma̱a̱ ikháán Israel,
numuu dí xa̱bi̱ʼ nindxa̱a̱ʼ.
Ikhúún nini̱i̱n ga̱jma̱a̱ xa̱bi̱ʼ nindxa̱a̱ʼ.
Israel, xámbumuʼ ka̱ya̱a̱ʼ.
22 Ma̱ni̱ rí mandáti̱ga̱a̱ xúgíʼ dí raʼkhí rí nitani̱, xóo dí magugóo ga̱jma̱a̱ du̱u̱n,
ga̱jma̱a̱ aʼkhá ndrígáaʼ xóo dí magugóo ga̱jma̱a̱ du̱u̱n skuniʼ.
Atanga̱án náa ikhúún, numuu dí ikhúún ma̱tsi̱ríña̱ánʼ.
23 ¡Mekhu, gundxa̱ʼwa̱ ga̱jma̱a̱ gagi,
numuu dí Jeobá niʼni dí niʼthí!
¡Gundxa̱ʼwa̱ dí niʼngala, ikháanʼ ku̱ba̱ʼ bi̱ itháán mi̱jnu̱ʼ!
¡Gundxa̱ʼwa̱ ga̱jma̱a̱ gagi kúbá,
xúʼko̱ má mangáán xaxi̱, ga̱jma̱a̱ xúgíʼ ixi̱ dí rígá náa ikháán!
Numuu dí Jeobá ni̱ʼtsi̱ ríya̱a̱ʼ Jacob
ga̱jma̱a̱ nasngájma dí xóo mitsiʼyáa náa Israel”.
24 Rígi̱ dí naʼthí Jeobá, bi̱ ni̱ʼtsi̱ ríña̱ánʼ,
Bi̱ niʼníín nákhá kaʼníí kua̱ʼa̱a̱n náa awúun ru̱dáaʼ:*
“Ikhúún nindxu̱ʼ Jeobá, bi̱ niʼni xúgíʼ.
Mbáwún ni̱ni̱ mekhu,
ga̱jma̱a̱ ikhúún ni̱ʼgíʼ ku̱ba̱ʼ.
Tsáá nixtáa ga̱jma̱á nindxu̱ʼ rá.
25 Ikhúún na̱ni̱ rí xágájnuu májánʼ tsinaʼ rí nusngajma bi̱ mbaʼ nuthíí,*
ga̱jma̱a̱ ikhúún na̱ni̱ rí xa̱bu̱ xawan muni̱ xóo eni̱ skágunʼ,
na̱ni̱ jnga̱wi̱i̱n bi̱ najmañún
ga̱jma̱a̱ na̱ni̱ rí ku̱ma̱ ndrígu̱ún mani̱ndxu̱u̱ xóo skágu̱nʼ,
26 ikhúún na̱ni̱ rí ajngóo xa̱bi̱i̱ maʼga̱nú marigá
ga̱jma̱a̱ dí mambanúu xúgíʼ dí nutari̱ya̱ʼ bi̱ nagún kuñu̱u̱n ajngóo,
bi̱ naʼthí dí náa Jerusalén ‹Matanga̱a̱ makuwá xa̱bu̱›,
ga̱jma̱a̱ dí náa xuajin dí rígá náa Judá ‹Maguma̱a̱,
ga̱jma̱a̱ maguma̱a̱ dí niguma gámbáa›,
27 ikhúún nindxu̱ʼ bi̱ naʼthúu̱n iyaʼ dí mi̱jnu̱ʼ ‹Gaʼni i̱yu̱u̱ iyala.
Ma̱ni̱ dí mujndo̱o̱ʼ mbá xúgíʼ mañu ndrígala›,
28 ikhúún nindxu̱ʼ bi̱ naʼthí ga̱jma̱a̱ numuu Ciro ‹Ikhaa nindxu̱u̱ baxtúu ndrígóʼ
ga̱jma̱a̱ kájxi̱ gáʼnimbánúu rí nandoʼ›,
bi̱ naʼthí ga̱jma̱a̱ numuu Jerusalén ‹Maguma̱a̱›,
ga̱jma̱a̱ dí guʼwá náa rí nduyamajkhuʼ ‹Maguajúu̱n rajkhúu›”.