Isaías
42 ¡Gu̱ya̱a̱, bugi̱ nindxu̱u̱ xa̱bi̱ʼ, bi̱ nambáyúu!
¡Bi̱ niraʼwi̱i̱, bi̱ naʼni rí maʼdxuu a̱jkiu̱nʼ!
Ni̱ni̱ dí marigá tsiaki̱i̱ ndrígóʼ náa ikhaa,
ga̱jma̱a̱ ikhaa ma̱ʼkha̱ kayóo rí májánʼ náa xa̱bu̱ xuajin.
2 Xándxaʼwá ni má xákujxi̱ aʼwóo,
xáwáán aʼwóo náa kamba̱a̱.
3 Xáxpigawóo e̱ʼi̱n* rí na̱jkha̱ rajmigaʼ
ni má xándijyúuʼ ndélá rí na̱jkha̱ rajuíyuuʼ.
Ga̱jma̱a̱ numuu rí jmbu ikhaa ma̱ʼkha̱ kayóo rí májánʼ.
4 Xáʼni wabaʼ ni má xájmigaʼ asndu índo̱ gárígá dí májánʼ náa tsu̱du̱u̱ ku̱ba̱ʼ.
Xa̱bu̱ bi̱ kúwá náa islas* kúwíin ruguáʼthi̱i̱n xtángoo* ndrígóo.
5 Rígi̱ dí naʼthí Jeobá, Dios bi̱ gajkhun,
bi̱ Niʼni mekhu, Dios bi̱ ra̱ʼkhá tháán mba̱a̱ bi̱ niʼni xúgíʼ dí rígá ikhí,
bi̱ niʼni ku̱ba̱ʼ ga̱jma̱a̱ dí najma̱a̱ ikhí,
bi̱ naʼni dí mbu̱ya̱ jxu̱ún xa̱bu̱ bi̱ kúwá ikhí
ga̱jma̱a̱ bi̱ naxnún xi̱ʼ* mu makuwá bi̱ jngruigu̱u̱n ikhí:
6 “Ikhúún Jeobá, nindxa̱ʼwa̱a̱ʼ mu matani̱ dí májánʼ,
niguajtúun ñawáanʼ.
Mañewa̱a̱n ga̱jma̱a̱ mani̱ndxa̱a̱ʼ xóo mbá dí nambánuʼ gajmíʼ xa̱bu̱ xuajin
ga̱jma̱a̱ mani̱ndxa̱a̱ʼ xóo mbá aguʼ náa xa̱bu̱ xuajin,
7 mu matambáʼta̱a̱ idún bi̱ tsékruigu̱u̱n,
matríya̱a̱ʼ bi̱ kraʼaa náa guʼwá e̱jua̱nʼ bi̱ juádáʼ rajkhúu náa ixi̱
ga̱jma̱a̱ matrawíín bi̱ gajchún náa guʼwá e̱jua̱nʼ bi̱ tri̱gi̱i̱n náa mikína.
8 Ikhúún nindxu̱ʼ Jeobá. Xúʼko̱ kaʼnii mbiʼyuʼ,
xániʼñúuʼ dí mbuyamajkuíí imba̱a̱ dí gíʼmaa mbiʼyamajkhuʼ ikhúún
ni má xániʼñúuʼ dí gamajkhu dí nagruígú mudrigú xándú bi̱ nigumawíin.
9 Gu̱ya̱a̱, dí ginii nirígá má,
dí xúgi̱ na̱tala dí nuxi̱ʼ.
Nákha xóó tségi̱ʼdu̱u̱ marigá nasngajmála mbu̱ya̱a̱”.
10 Gu̱ni̱ mbá ajmúú nuxi̱ʼ náa Jeobá,
gu̱ni̱ mba̱a̱ asndu náa naguámbári̱go̱o̱ ku̱ba̱ʼ,
ikháanʼla bi̱ na̱jkua̱ náa lamáa* ga̱jma̱a̱ mbá xúgíʼ dí rígá ikhí,
ikháanʼla islas ga̱jma̱a̱ mbá xúgíinʼ bi̱ kúwá ikhí.
11 Guxujxi̱ aʼwún mbá xúgíinʼ bi̱ kúwá náa ku̱ba̱ʼ mijxooʼ* ga̱jma̱a̱ xuajin dí rígá ikhí,
mangiin bi̱ kúwá náa Quedar.
Asndu nadxún gúndxa̱ʼwa̱ bi̱ kúwá náa tsíñu,
mundxa̱ʼwa̱ asndu náa inuu kúbá.
12 Guxnáá gamajkhu Jeobá
ga̱jma̱a̱ ga̱wáán xóo eni̱ mba̱a̱ náa islas.
13 Jeobá magajnúu xóo mbáa soldado xkujiiʼ.
Xóo mbáa soldado bi̱ ra̱ʼkhá tháán eyoo maʼga gáxmína̱ʼ.
Mandxa̱ʼwá, xúʼko̱, mandxa̱ʼwá dí na̱jkha̱ gáxmína̱ʼ,
masngájma dí ikhaa gíʼdoo itháan tsiaki̱i̱ ki xóo xa̱bu̱ sia̱nʼ ndrígio̱o̱.
14 “Mba̱yu̱u̱ʼ nixtáá wíí.
Wíí nixtáá ga̱jma̱a̱ niʼngo̱o̱ a̱jkiu̱nʼ.
Mú dí xúgi̱, naguwa̱nʼ, tséʼngo̱ʼ gáya xi̱ʼ ga̱jma̱a̱ nandxa̱ʼwa̱,
xóo eʼni mbáa a̱ʼgu̱ bi̱ nagiʼdaa a̱ʼdióo.
15 Ma̱ni̱ gámbáa kúbá ga̱jma̱a̱ bíjní,
margujndooʼ mbá xúgíʼ iná maxaʼ.
Ma̱ni̱ dí mañu maʼni̱i̱ islas*
ga̱jma̱a̱ margujndooʼ mbaaʼ náa na̱jnu̱ma̱ʼa̱n iyaʼ náa rígá e̱ʼi̱n.
16 Ma̱xna̱ ikhúún bi̱ tsékruigu̱u̱n mu magún náa kamba̱a̱ dí tséniʼnuuʼ
ga̱jma̱a̱ ma̱ni̱ dí mujngriga̱ náa kamba̱a̱ dí tséniʼnuuʼ.
Ma̱ni̱ dí kína náa nagún mambiʼi
ga̱jma̱a̱ ma̱ni̱i̱ xkua̱ náa mbaaʼ dí na̱nguá mbáníí.
Rígi̱ dí ma̱ni̱ ga̱jma̱a̱ numún, xániʼñúúnʼ”.
17 Bi̱ nakumu̱ún kuñún xándú bi̱ nigumawíin
mutsudiin rí magúun ga̱jma̱a̱ maguma majti̱i̱nʼ,
bi̱ nuthúún xtiʼkhuu rí niguma ga̱jma̱a̱ ajua̱nʼ* “Ikháanʼ nindxa̱la dioses ndrígúxu̱”.
18 Gudxa̱wíín, ikháanʼla bi̱ tsédxawíín,
guye̱jxi̱ ga̱jma̱a̱ gu̱ya̱a̱, ikháanʼ bi̱ tsíkrui̱gala.
19 Tsáá lá tsíkruigo̱o̱ xóo xa̱bi̱ʼ rá.
Tsáá lá bi̱ itháan tséʼdxawun xóo bi̱ nakuʼmáa maʼga kayóo ajngáa rá.
Tsáá lá bi̱ itháan tsíkruigo̱o̱ xóo bi̱ niguma tsajkurámaaʼ rá.
Tsáá lá itháan tsíkruigo̱o̱ xóo xa̱bi̱i̱ Jeobá rá.
20 Rígá mbaʼa dí natayáá, mú tsítagíʼ edxa̱a̱ʼ.
Paʼta cháʼwáanʼ, mú tsétadxawíín.
21 Ga̱jma̱a̱ numuu dí naʼni rí májánʼ,
Jeobá ndiʼyoo dí májánʼ maʼni dí xtángoo magiʼdoo numuu ga̱jma̱a̱ mani̱ndxu̱u̱ mitsaanʼ.*
22 Mú náa xuajin rígi̱, nirawíi xúgíʼ dí gíʼdoo ga̱jma̱a̱ nini̱ kuʼwááʼ,
xúgíinʼ ikhiin nijthiin náa iñáʼ ga̱jma̱a̱ gajchún náa guʼwá e̱jua̱nʼ.
Nigún kudúún xúgíʼ rí guáʼdáá dí asndu táxtáa nimbáa bi̱ mambáñún,
ga̱jma̱a̱ nigún kudiin rí asndu nimbáa táʼthí “¡Gaguwa̱a̱ʼ kudiin!”.
23 Tsáá mbáa dí ikháanʼla gáʼdxawun rígi̱ rá.
Tsáá gágíʼ edxu̱u̱ mandxaʼwáminaʼ dí marigá nda̱wa̱á índo̱ gáʼdxuun rá.
24 Tsáá nixnájxi̱i̱ Jacob xóo dí niguanáa
ga̱jma̱a̱ Israel náa ñawúúnʼ kuʼwáʼ rá.
Lá raʼkháa Jeobá, náa bi̱ nixudamíjna̱ aʼkhá xáʼ.
Ikhiin nini̱ gaʼduunʼ dí majngruigu̱u̱n náa kambo̱o̱
ga̱jma̱a̱ táʼndún gúnimbu̱u̱n xtángoo ndrígóo.
25 Ikha jngóo nixídirámuuʼ má xúʼko̱ dí nakásngañu̱u̱ʼ náa ikhiin,
nikiʼnáa kaʼñún ga̱jma̱a̱ niʼni dí mumíniiʼ náa guerra,
nitsikhá mbájndi náa ikhiin, mú túnimbu̱u̱n kuyáá.
Nikhiin, mú túgíiʼ a̱jkiu̱ún.