Isaías
27 Mbiʼi rúʼko̱, Jeobá ga̱jma̱a̱ espada ndrígóo rí tsémigo̱o̱ʼ, dí mba̱a̱ ga̱jma̱a̱ dí gújkhúʼ,
matanga̱a̱ kayáa Leviatán,* a̱bu̱nʼ bi̱ naxmájtaminaʼ,
Leviatán, a̱bu̱nʼ bi̱ na̱jkha̱ mixngaa
ga̱jma̱a̱ maxíyáa xujkhúʼ mba̱a̱ bi̱ xtáa náa lamáa.*
2 Mbiʼi rúʼko̱, gu̱ni̱ ajmúú náa ikhaa:*
“¡Mbá mbaaʼ náa kiʼdu uva náa na̱ʼkha̱ vino!*
3 Ikhúún Jeobá, nañewu̱u̱n.
Nángi eʼni nagíyóoʼ.
Nañewu̱u̱n mbiʼíí mbruʼun
mu nimbáa nda̱a̱ rí gáʼniuu.
4 Na̱nguá ekásngañu̱ʼ.
Tsáá gáxmína̱ʼ ga̱jma̱á nindxu̱ʼ ga̱jma̱a̱ mbá xtájxu̱u̱ʼ iná tsuwanʼ ga̱jma̱a̱ iná dí xkawiʼ náa maxmína̱ʼ ga̱jmu̱ʼ rá.
Majngupríga̱ mbá xúgíʼ ga̱jma̱a̱ magídooʼ agiuuʼ mi̱kha.
5 Xa̱bu̱ buʼko̱ gambáyúminaʼ náa xuajñunʼ rí kúgumaʼá.
Gambajxíi ga̱jma̱á nindxu̱ʼ,
gambajxíi ga̱jma̱á nindxu̱ʼ”.
6 Náa mbiʼi rí na̱ʼkha̱, Jacob maxkrígú ajmu̱u̱,
Israel majmidi̱ riʼyu̱u̱ ga̱jma̱a̱ makráʼáan rudiuuʼ
ga̱jma̱a̱ majthíí náa tsu̱du̱u̱ ku̱ba̱ʼ rígi̱ dí gájma̱a̱.
7 Lá mbaʼyóoʼ dí mixnáá xkawiʼ kayuuʼ xáʼ.
Lá mbaʼyóoʼ dí ma̱ngaa muxiyáa xkawiʼ kayuuʼ xáʼ.
8 Ga̱jma̱a̱ mbá gitsaʼwá* rí naʼni mamiñún, matagi̱ʼda̱a̱ʼ ga̱jma̱a̱ʼ índo̱ gátaxkriya̱a̱ʼ.
Ikhaa maxkoo ga̱jma̱a̱ rí nakásngañu̱u̱ʼ, mbiʼi rí naxnúu giñánʼ dí na̱ʼkha̱ xígií náa nagájnuu a̱jkha̱ʼ.*
9 Xígi̱ kaʼnii gáguma kaʼwi̱i̱ dí nikiéʼkúun Jacob,
ga̱jma̱a̱ rígi̱ gárígá índo̱ gámbá ragajta̱a̱ aʼkhá dí niʼni.
Ikhaa maʼni dí mbá xúgíʼ itsí rí niguma ga̱jma̱a̱ náa dí najuixnájxi̱ tsigijñaʼ
maʼni̱i̱ i̱ndó idiuuʼ xóo itsí dí naguma ga̱jma̱a̱ idiʼ,
ga̱jma̱a̱ xáguanúu nimbá poste rí mitsúʼkháan,* ni má nímba̱ náa nakarámáʼ rí ndataun.
10 Xuajin dí kúgumaʼá maguaná jchíi,
mbaaʼ náa rígá ra̱jxa̱ maguanáa, ga̱jma̱a̱ maguanáa xóo ku̱ba̱ʼ mijxooʼ.*
Ikhí a̱ʼdá xédí mi̱khu̱ ra̱jxa̱ ga̱jma̱a̱ mabóoʼ
ga̱jma̱a̱ mi̱khu̱ ñawúunʼ ixi̱ dí rígá ikhí.
11 Índo̱ gújndooʼ ñawúunʼ
maguwáʼ gu̱ʼu̱ bi̱ muxmatri̱ya̱a̱ʼ asndu a̱jmu̱ú,
rúʼko̱ gúgíʼ ga̱jma̱a̱ aguʼ.
Numuu dí xuajin rígi̱ na̱nguá ekro̱ʼo̱o̱.
Ikha jngóo bi̱ Niʼnii xágáwíinʼ a̱jkiu̱u̱n kaʼñúún
ga̱jma̱a̱ bi̱ niʼniwíin xámbáñún.
12 Mbiʼi rúʼko̱ Jeobá maʼbatigúu xndúu ixi̱, magíʼdu̱u̱ náa mañu Éufrates asndu náa mata* ndrígóo Egipto, ga̱jma̱a̱ ikháanʼla maxtagímbáanʼla xa̱bu̱ xuajin Israel. 13 Mbiʼi rúʼko̱ maʼni dí mawáán chi̱ji̱ʼ dí mba̱a̱ ga̱jma̱a̱ bi̱ na̱jkha̱ rakháñún bi̱ kúwá náa ku̱ba̱ʼ Siria mangiin bi̱ nigadríʼiin náa ku̱ba̱ʼ ndrígóo Egipto, maguwáʼ ga̱jma̱a̱ musmbati̱gu̱u̱n náa inuu Jeobá, náa kúbá kaʼwu dí rígá náa Jerusalén.