Deuteronomio

22 Á mu nataxkama̱a̱ xediu̱u̱ o mugiu̱u̱ ndxájuaaʼ bi̱ nindáti̱ga̱a̱, xátani̱ asndu xóo rí táta̱ya̱a̱. Mbaʼyóoʼ midxu̱u̱ʼ jcháa náa bi̱ xujkiúu. 2 I̱ndó á mu ndxájuaaʼ xtáa mitsínguánʼ o na̱nguá etatsiniiʼ, mbaʼyóoʼ midxu̱u̱ʼ jcháa xujkhúʼ náa guʼwáaʼ ga̱jma̱a̱ maguanúu ga̱jma̱á nindxa̱a̱ʼ asndu índo̱ ndxájuaaʼ gáʼga gáyáaʼ. Ikhú maraxnia̱a̱ xujkiúu. 3 Mbaʼyóoʼ matani̱ má ikháá kayuuʼ ga̱jma̱a̱ búrriu̱u̱, xtíñuu o imbo̱o̱ dí gátígo̱o̱ ndxájuaaʼ dí ikháán gátaxkama̱a̱. Xátani̱ asndu xóo rí tsétayáá.

4 Á mu natayáá dí búrriu̱u̱ o xediu̱u̱ ndxájuaaʼ nimbíjxi̱i̱ náa kamba̱a̱, xátani̱ asndu xóo rí tsétayáá. Gíʼmaa matambáyíí mataxujxíi.

5 Mbáa a̱ʼgu̱ ragíʼmaa magíʼ xtíñuu xa̱biya̱, ni má xa̱biya̱ ragíʼmaa magíʼ xtíñuu a̱ʼgu̱. Numuu dí Jeobá nawi̱yu̱u̱ʼ kaʼyoo asndu tsáá bi̱ naʼni rúʼko̱.

6 Á mu náa kamba̱a̱ nataxkamaa mbá xájánʼ náa gajtiin e̱jín ñúʼún o xndú, tséʼniuu á mu grígu náa ixi̱ o gíʼ mbayííʼ ga̱jma̱a̱ rudún e̱jín ñúʼún kajua̱a̱nʼ ikhí, xádxuuʼ xtíin e̱jín ñúʼún ni má rudún. 7 Ma̱ndoo maguanáaʼ gajmiáanʼ e̱jín ñúʼún, mú atatsíñááʼ maʼga̱a̱ rudún. Atani̱ xígi̱ mu maraxtaa májánʼ ikháán ga̱jma̱a̱ maraxtaa mba̱yu̱u̱ʼ mbiʼi.

8 Á mu natani̱ mbá guʼwá, atrugumáʼá náa tsu̱du̱u̱. Mu xúʼko̱ ikháán gajmiáanʼ bi̱ kúwá náa guʼwáaʼ xáguáʼdáá aʼkhúún á mu mbáa gáxpatríguii ikhí ga̱jma̱a̱ nakháñúu.

9 Xátadu uva ndrígáaʼ ga̱jma̱a̱ i̱mba̱ enii tsígáʼ. Á mu natani̱, xúgíʼ dí gájma̱a̱ mbaʼyóoʼ maraxnajxí náa rí mikaʼwu.

10 Xátagíʼmaa maxnúu xku̱bi̱ mbáa xedi̱ ga̱jma̱a̱ mbáa búrru.

11 Xátaʼgíʼ xtíin dí niguma ga̱jma̱a̱ gúmá mugu̱ dí kanda̱wo̱o̱ʼ lino.

12 Mbaʼyóoʼ matani̱ yojoo nájkhu̱ níjniúu xtíin dí mataʼgíʼ.

13 Á mu mbáa xa̱biya̱ nanigúnʼ ga̱jma̱a̱ mbáa a̱ʼgu̱ ma̱ngaa nabóoʼ ga̱jma̱a̱, mú nda̱wa̱á nawi̱yu̱u̱ʼ kaʼyoo, 14 naʼthí dí raʼkhí ga̱jma̱a̱ numuu ga̱jma̱a̱ naʼni dí maʼchúu mbiʼyuu, naʼthí ‹Ikhúún ndiya̱a̱ a̱ʼgu̱ bugi̱, mú índo̱ nibo̱ʼ ga̱jmu̱ʼ ni̱jkhánú ndi̱yo̱o̱ dí nibóoʼ má ga̱jma̱a̱ xa̱bu̱›,* 15 ikhú anu̱u̱ ga̱jma̱a̱ ru̱dúu̱* dxáʼgú mbaʼyóoʼ maʼga kayóo mbá rí masngájma dí nindxu̱u̱ mbáa dxáʼgú bi̱ xóó tsébóoʼ ga̱jma̱a̱ nimbáa xa̱bu̱ náa inún bi̱ kuya̱ edxu̱u̱ náa riejuun xuajin. 16 Anu̱u̱ dxáʼgú gíʼmaa maʼthúún bi̱ kuya̱ edxu̱u̱: ‹Ikhúún nixniu̱u̱ wáxióʼ* xa̱bu̱ bugi̱ mu maʼni a̱ʼgiu̱u̱, mú ikhaa nawi̱yu̱u̱ʼ kaʼyoo, 17 dí xúgi̱ naʼthí dí raʼkhí ga̱jma̱a̱ numuu, naʼthí: “Ni̱jkhánú ndi̱yo̱o̱ dí wáxiaaʼ nibóoʼ má ga̱jma̱a̱ xa̱bu̱”. Gi̱i̱ rígá dí nasngájma rí wáxióʼ xóó tsébóoʼ ga̱jma̱a̱ xa̱bu̱›. Ikhú ikhiin muxtri̱ga̱ xtíin náa inún bi̱ kuya̱ edxu̱u̱ náa xuajin. 18 Bi̱ kuya̱ edxu̱u̱ náa xuajin murtuwiin xa̱biya̱ ga̱jma̱a̱ muxnáá. 19 Nda̱wa̱á muru̱maa mbá 100 siclos* ndrígóo plata ga̱jma̱a̱ muxna̱a̱ anu̱u̱ wáxá, numuu dí xa̱biya̱ niʼni gachúu mbiʼyuu mbáa dxáʼgú bi̱ xóó tsébóoʼ ga̱jma̱a̱ xa̱bu̱ náa Israel, ga̱jma̱a̱ ikhaa maʼni má xúʼko̱ a̱ʼgiu̱u̱. Ikhaa xándoo maniña̱a̱ʼ náa xúgíʼ mbiʼi dí gáxtáa.

20 Á mu gajkhun nindxu̱u̱ dí nixrui̱ga̱a̱, ga̱jma̱a̱ nda̱a̱ nimbá náa nasngájma rí nindxu̱u̱ mbáa dxáʼgú bi̱ xóó tsébóoʼ ga̱jma̱a̱ xa̱bu̱, 21 mbaʼyóoʼ muriya̱a̱ʼ dxáʼgú náa riejuun goʼwóo anu̱u̱, ga̱jma̱a̱ xa̱bu̱ xuajin muxnáá ga̱jma̱a̱ itsí asndu makhañúu, numuu dí niʼni mbá dí ma̱jti̱ʼ wéñuuʼ náa Israel índo̱ nibóoʼ ga̱jma̱a̱ xa̱bu̱* náa goʼwóo anu̱u̱. Xúʼko̱ matrígúu dí raʼkhí náa majña̱a̱ʼ ikháán.

22 Á mu nuxkamaa mbáa xa̱biya̱ bi̱ nabóoʼ ga̱jma̱a̱ a̱ʼgiu̱u̱ i̱mba̱a̱ xa̱bu̱, nájmi̱i̱n mbaʼyóoʼ makhañún, xó má xa̱biya̱ xúʼko̱ má a̱ʼgu̱. Mu xúʼko̱ matrígúu dí raʼkhí náa Israel.

23 Á mu mbáa dxáʼgú bi̱ xóó tsébóoʼ ga̱jma̱a̱ xa̱bu̱ inu manújunʼ, mú naxkamaa i̱mba̱a̱ xa̱bu̱ náa xuajin nabóoʼ ga̱jma̱a̱, 24 ikháanʼla gíʼmaa murawíin mbá nájmi̱i̱n náa riejuun xuajin, muxnu̱u̱n ga̱jma̱a̱ itsí asndu makhañún, makhañúu dxáʼgú numuu dí tándxaʼwá náa xuajin mu mixtambáyíí, xa̱biya̱ makhañúu numuu dí niríya̱ʼ majkhuu a̱ʼgiu̱u̱ xa̱bu̱ numbaaʼ ga̱jma̱a̱. Xúʼko̱ matrígúu dí raʼkhí náa majña̱a̱ʼ ikháán.

25 Á mu mbáa xa̱bu̱ naxkamaa náa xanáá mbáa dxáʼgú bi̱ inu manújunʼ naʼniuu tsiaki̱i̱ mu mabóoʼ ga̱jma̱a̱, i̱ndó mbaʼyóoʼ makhañúu xa̱biya̱ bi̱ nibóoʼ ga̱jma̱a̱, 26 dxáʼgú nda̱a̱ dí gúni̱i̱. Ikhaa na̱nguá nikudaminaʼ aʼkhá dí kaʼyoo makhañúu. Índo̱ narígá rígi̱ nindxu̱u̱ ikháá xó má índo̱ mbáa xa̱biya̱ naxnúu xa̱bu̱ numbaaʼ ga̱jma̱a̱ rí asndu naxíyáa. 27 Numuu dí ikhaa nixkamaa náa xanáá ga̱jma̱a̱ dxáʼgú bi̱ inu manújunʼ nindxa̱ʼwá, mú ndawa̱a̱ nimbáa bi̱ ma̱ndoo mambáyúu.

28 Á mu mbáa xa̱bu̱ naxkamaa mbáa dxáʼgú bi̱ xóó tsébóoʼ ga̱jma̱a̱ nimbáa xa̱bu̱ ni má na̱nguá xtáa manújunʼ, naguajtuwiin nabóoʼ ga̱jma̱a̱, mú mbáa ndiʼñún, 29 xa̱bu̱ bi̱ nibóoʼ ga̱jma̱a̱ ikhaa mbaʼyóoʼ maxnúu mbá 50 siclos ndrígóo plata anu̱u̱ dxáʼgú, ga̱jma̱a̱ ikhaa maʼga̱nú mani̱ndxu̱u̱ a̱ʼgiu̱u̱. Numuu dí ikhaa niríya̱ʼ majkhuu, xándoo maniña̱a̱ʼ náa xúgíʼ mbiʼi dí gáxtáa.

30 Nimbáa xa̱biya̱ xándoo mbayáa a̱ʼgiu̱u̱ anu̱u̱, mu xúʼko̱ xáríya̱ʼ majkhuu anu̱u̱.