Ezequiel

17 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, aratá mbá adivinanza ga̱jma̱a̱ mbá ajngáa xkri̱da,* ga̱jma̱a̱ numuu goʼwóo Israel. 3 Marata̱: ‹Rígi̱ dí naʼthí Tátá Jeobá bi̱ itháán mba̱a̱: “Bi̱yú bi̱ ra̱ʼkhá tháán mba̱a̱, bi̱ mba̱ʼu̱ xpíjpiúu, mbi̱jua̱ xniuuʼ, ra̱ʼkhá tháán mi̱du̱ xniuuʼ ga̱jma̱a̱ gíʼdoo mbaʼa color, ni̱ʼkha̱ náa Líbano ga̱jma̱a̱ nirígú rudiuuʼ ixi̱ cedro. 4 Nixpígurígú rudiuuʼ rí itháán mitsídánʼ ga̱jma̱a̱ ni̱jkha̱ kayóo náa ku̱bu̱únʼ xa̱bu̱ bi̱ nugujua̱,* ga̱jma̱a̱ niʼdu náa xuajñún xa̱bu̱ bi̱ nugujua̱. 5 Nda̱wa̱á niguajtuun tsígáʼ dí rígá náa ku̱ba̱ʼ ga̱jma̱a̱ niʼdu náa mbá ku̱ba̱ʼ rí najma̱a̱. Niʼdu xóo najuiʼdu ixi̱ sauce náa rawuunʼ iyaʼ dí gíʼdoo jxu̱u̱ʼ. 6 Nikráʼáan mbá ixu̱u̱ uva rí táʼya ga̱jma̱a̱ nitri̱go̱o̱ ñawúunʼ. Náa ikhaa má ejkha̱a̱ ñawúunʼ ga̱jma̱a̱ náa wíji̱, ikhí má exkuaʼán ajmu̱u̱. Xúʼko̱ ninindxu̱u̱ mbá ixu̱u̱ uva rí nikráʼáan rudiuuʼ ga̱jma̱a̱ nigu ñawúunʼ.

7 Ga̱jma̱a̱ ni̱ʼkha̱ imba̱a̱ bi̱yú, bi̱ mbi̱jua̱ xpíjpiúu ga̱jma̱a̱ ra̱ʼkhá tháán mba̱ʼu̱ xniuuʼ. Ikhú ixu̱u̱ uva asndu nadxuu nixkra̱ʼa̱ ajmu̱u̱ náa ikhaa, ni̱jkha̱ mitsínguánʼ ajmu̱u̱ náa mbaaʼ dí wíji̱ ga̱jma̱a̱ ni̱jkha̱ ñawúunʼ náa bi̱yú mu ikhaa maxíjyooʼ. 8 Nijuiʼdu má náa mbaaʼ dí májánʼ, náa mijngii iyaʼ dí gíʼdoo jxu̱u̱ʼ, mu xúʼko̱ magu̱ ñawúunʼ ga̱jma̱a̱ maxná xndúu ma̱ngaa mani̱ndxu̱u̱ mbá ixu̱u̱ uva dí ra̱ʼkhá tháán mba̱a̱”›.

9 Marata̱: ‹Rígi̱ dí naʼthí Tátá Jeobá bi̱ itháán mba̱a̱: “Lá mawi̱ji̱ má xúʼko̱ ráʼ. Lá xúruburiya̱ʼ ajmu̱u̱ ga̱jma̱a̱ muni̱ rí xndúu mi̱ga ga̱jma̱a̱ rudiuuʼ mujndooʼ ráʼ. Mujndooʼ rí asndu xáʼyóoʼ mbáa xa̱bu̱ xkujiiʼ ni mbaʼin xa̱bu̱ mu muxmatri̱ya̱ʼ asndu a̱jmu̱ú. 10 Maski ajndu mudu i̱mba̱ níʼkhá, lá mawi̱ji̱ má xúʼko̱ ráʼ. Lá xújndooʼ mbá kayuuʼ gáʼni giñánʼ índo̱ gáxnúu rí na̱ʼkha̱ xígií náa nagájnuu a̱jkha̱ʼ* ráʼ. Mujndooʼ ku̱ba̱ʼ náa rí nikráʼáan”›”.

11 Nigruígú mbu̱júu̱ ajngóo Jeobá. Niʼthúnʼ: 12 “Mbá péñu,* arathún rígi̱ xa̱bu̱ bi̱ tsénimbu̱u̱n: ‹Lá tséya̱a̱la ndiéjunʼ eyoo gáʼthúu̱n rígi̱ ráʼ.› Arathún: ‹Gu̱ya̱a̱la rey ndrígóo Babilonia ni̱ʼkha̱ náa Jerusalén, ni̱jkha̱ kayáa rey ga̱jma̱a̱ príncipes, ni̱jkha̱ kagui̱i̱n náa xtáa ikhaa, náa Babilonia. 13 Ma̱ngaa ni̱jkha̱ kayáa mbáa* bi̱ xtáa náa goʼwóo rey, nimbánuminaʼ ga̱jma̱a̱ ikhaa ga̱jma̱a̱ niʼniuu rí maxná ajngóo. Ikhú ni̱jkha̱ kagui̱i̱n xa̱bekha bi̱ guáʼdáá numún bi̱ kúwá náa xuajin rúʼko̱ 14 mu xúʼko̱ rí naʼtáñajunʼ maguma majti̱i̱, xáʼngo̱o̱ maʼtáñajunʼ mbu̱júu̱, i̱ndó á mu xa̱bu̱ xuajin munimbaníí náa rí nixná ajngóo, xúʼko̱ dí ma̱ndoo maʼtáñajunʼ xóó. 15 Ikhú rey ndrígóo Judá* nikujximínáʼ náa rey ndrígóo Babilonia,* índo̱ nikuʼmiin xa̱bu̱ bi̱ magún kuñu̱u̱n ajngáa náa Egipto mu muxniáá wáyú ga̱jma̱a̱ mbaʼin soldado. Lá magajnúu májánʼ dí maʼni xáʼ. Lá maʼngo̱o̱ maʼni kríyamínáʼ náa rí maniu̱u̱ rígi̱ xáʼ. Lá majmaa majkumígaʼ náa rí nimbánúún ga̱jma̱a̱ maʼngo̱o̱ maʼni kríyamínáʼ xáʼ.›

16 ‹“Xó má ikhúún gajkhun xtáá, eʼthí Tátá Jeobá bi̱ itháán mba̱a̱: Rey ndrígóo Judá makhañúu náa Babilonia, náa xtáa rey bi̱ nigíiʼ mu mani̱ndxu̱u̱ rey, ga̱jma̱a̱ numuu rí táʼnimbánuu ajngóo ma̱ngaa náa rí nikudaminaʼ maʼni. 17 Soldado bi̱ ra̱ʼkhá tháán mbaʼin bi̱ gíʼdiin faraón, xáʼngu̱u̱n gúxmijná índo̱ gági̱ʼdu̱u̱n, índo̱ gúxujxi̱ rí matu̱ʼu̱u̱n ga̱jma̱a̱, ma̱ngaa índo̱ gúni̱ xtájtsí mu muradíin mbaʼin xa̱bu̱. 18 Ikhaa táʼnimbánuu náa rí nikudaminaʼ ga̱jma̱a̱ nijkumigaʼ náa rí nimbánúún. Maski ajndu nixná ajngóo,* ikhaa niʼni xúgíʼ rígi̱. Ikha jngóo xákríya̱a̱ʼ”›.

19 ‹Ikha jngóo rígi̱ dí naʼthí Tátá Jeobá bi̱ itháán mba̱a̱: “Xó má ikhúún gajkhun xtáá, ma̱ni̱ rí mumíniiʼ ga̱jma̱a̱ numuu rí túyamajkuíí náa dí ni̱xna̱ ajngóʼ ga̱jma̱a̱ nixpi̱ga̱ʼ náa rí nimbánuʼ gajmíʼ. 20 Madataʼmáʼ amuʼ náa tsu̱du̱u̱, magúguáa ga̱jma̱a̱ amaʼ dí nagúguíin ga̱jma̱a̱ xujkhúʼ. Maʼgá ka̱ya̱a̱ náa Babilonia ga̱jma̱a̱ ikhí gánimbánuu numuu, ga̱jma̱a̱ numuu rí táwi̱ji̱ jmbu. 21 Xúgíinʼ soldádiu̱u̱ bi̱ nijnguʼúún ragáñúún makhañún ga̱jma̱a̱ espada ga̱jma̱a̱ bi̱ gáguanún majuadríʼiin asndu náá.* Ikhú ikháanʼ mbuya̱a̱ rí ikhúún Jeobá, nindxu̱ʼ bi̱ ni̱tha̱ rígi̱”›.

22 ‹Rígi̱ dí naʼthí Tátá Jeobá bi̱ itháán mba̱a̱: “Marígú rudiuuʼ ixi̱ cedro náa rí itháán mitsídánʼ ga̱jma̱a̱ madu̱u̱, marígú rudiuuʼ ñawúunʼ ixu̱u̱ ga̱jma̱a̱ ikhúún madu̱u̱ náa mbá kúbá rí itháán mitsídánʼ. 23 Madu̱u̱ náa mbá kúbá mitsídánʼ dí rígá náa Israel, ga̱jma̱a̱ ñawúunʼ maʼni mba̱ʼu̱, maxná xndúu ga̱jma̱a̱ mani̱ndxu̱u̱ mbá ixi̱ cedro dí ra̱ʼkhá tháán mba̱a̱. Ga̱jma̱a̱ mbá xúgíinʼ enii ñu̱ʼu̱ makuwá náa agoo ga̱jma̱a̱ makuwá náa xkamijxoo ñawúunʼ. 24 Ga̱jma̱a̱ mbá xúgíʼ enii ixi̱ dí rígá xanáá, mbuyáá rí ikhúún Jeobá ni̱ni̱ rí ixi̱ dí mitsídánʼ maguma májti̱i̱ʼ ga̱jma̱a̱ maguma mba̱a̱ ixi̱ dí chíʼgíiʼ,* ixi̱ dí maxaʼ ni̱ni̱ dí mujndooʼ ga̱jma̱a̱ ixi̱ dí nijndooʼ ni̱ni̱ dí maxná riʼyu̱u̱. Ikhúún Jeobá nitha̱ rígi̱ ga̱jma̱a̱ ni̱ni̱”›”.