Ezequiel

15 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, xú káʼnii nindxu̱u̱ ixu̱u̱ uva á mu naguma mbríguii ga̱jma̱a̱ i̱ʼwáʼ ixi̱ o ñawúunʼ ixi̱ dí rígá náa xaxi̱ rá. 3 Lá ma̱ndoo maguma ga̱jma̱a̱ mbá ñajunʼ xkuíyóo ixi̱ uva ráʼ. O lá najmún xa̱bu̱ mu muni̱ gancho náa mujngrigú dí guáʼdáá ráʼ. 4 Atayáá, xóo mbá ixi̱ dí najkuáa náa aguʼ mu mi̱kha, nakha mbájníí ga̱jma̱a̱ náa awúu̱n. Lá majmaa xóó mu maguma ga̱jma̱a̱ mbá ñajunʼ ráʼ. 5 Á mu dí nákha xóó tsékha nda̱a̱ dí ejmaa, ¡iwáá la xúgi̱ dí nikha rá!”.

6 “Ikha jngóo, rígi̱ dí naʼthí Tátá Jeobá bi̱ itháán mba̱a̱: ‹Xó má niniu̱u̱ ixi̱ uva náa majñu̱u̱ʼ ixi̱ dí rígá náa xaxi̱, dí nixna̱ mu mi̱kha, xúʼko̱ gániu̱u̱n xa̱bu̱ bi̱ kúwá náa Jerusalén. 7 Ni̱ni̱ rí mumíniiʼ. Nini̱ kawúmíjná náa aguʼ, mú aguʼ má gátsikhíin. Ikháanʼla mu̱ʼgua̱nú mbu̱ya̱a̱ dí ikhúún nindxu̱ʼ Jeobá índo̱ gáni̱ dí mumíniiʼ›”.

8 “‹Ma̱ni̱ dí ku̱ba̱ʼ maguanáa, numuu dí ikhiin táguájun jmbu›, eʼthí Tátá Jeobá bi̱ itháán mba̱a̱”.