Isaías
21 Rígi̱ dí nijuiʼthá magíʼnuu ku̱ba̱ʼ mijxooʼ* dí rígá náa lamáa:*
Na̱ʼkha̱ xóo giñámbiʼ dí na̱ʼkha̱ xígií náa sur,
dí na̱ʼkha̱ náa ku̱ba̱ʼ mijxooʼ náa mbá ku̱ba̱ʼ rí gamíi.
2 Niwasngájmuʼ mba̱yo̱o̱ mbá* rí gamíi,
xuajin rí naʼninduwiinʼ eʼwíinʼ, naʼninduwaʼ
ga̱jma̱a̱ xuajin dí naʼni gámbáa, xtáa raʼni gámbáa.
¡Elam, atatsimaaʼ! ¡Media, atani̱ gámbáa!
Ma̱ni̱ gámbáa mbá xúgíʼ dí ikhaa* niʼni mumíniiʼ xa̱bu̱.
3 Ikha jngóo xtáá ngíná.*
Na̱ʼkha̱ mbiʼi rí mikhu̱u̱n,
xóo e̱ʼkhui̱i̱ mbáa a̱ʼgu̱ bi̱ nagiʼdaa a̱ʼdióo.
Na̱nguá edxuu a̱jkiu̱nʼ madxun,
rí najnga̱a̱ edxu̱ʼ tséniñuʼ mayejxi̱.
4 Nánguá ñajuunʼ májánʼ a̱jkiu̱nʼ, asndu nagúʼwúún rí namíñúʼ.
Mbruʼun dí ra̱ʼkhá tháán gúʼthu̱u̱n naʼni magúʼwúún.
5 ¡Gutsiji mesa ga̱jma̱a̱ gu̱ni̱ ratháá náa matri̱gáanʼla!
¡Gupiʼtsu ga̱jma̱a̱ guwanla!
¡Atujxa̱la príncipes, guxna̱a̱* aceite escudo!
6 Numuu dí rígi̱ dí niʼthúnʼ Jeobá:
“Ayuʼ, atatsriguii mbáa bi̱ nayejngoo mu maʼthí dí gáʼyoo”.
7 Ga̱jma̱a̱ ikhaa ndiʼyoo mbá carro dí nuxmijná ga̱jma̱a̱ dí nuxmajtaa a̱jmi̱i̱n wáyú,
mbá carro dí nuxmijná ga̱jma̱a̱ dí nuxmajtaa búrru,
mbá carro dí nuxmijná ga̱jma̱a̱ dí nuxmajtaa camello.
Niyejngoo tsu̱ma̱á ga̱jma̱a̱ niyejxi̱ májánʼ.
8 Ikhú nindxa̱ʼwá xóo endxa̱ʼwá mbáa león:
“Jeobá, náa torre dí nuyejngoo frúwan mámbá mbiʼi
ga̱jma̱a̱ gúju̱n náa kaʼyoʼ mayejngoo mámbá mbruʼun.
9 Gu̱ya̱a̱ dí e̱ʼkha̱ a̱ʼkhu̱:
¡Xa̱bu̱ trámiinʼ náa carro dí nuxmijná ga̱jma̱a̱ dí nuxmajtaa a̱jmi̱i̱n wáyú!”.
Ikhú nindxa̱ʼwá xígu ga̱jma̱a̱ niʼthí:
“¡Niguámbáa! ¡Niguámbáa Babilonia!
¡Nijkúmiguiin mbayííʼ xúgíʼ xándú bi̱ nigumawíin dí guáʼdiin!”.
10 Ngínáa lá xuajñunʼ dí nixujmbiri̱ga̱ xóo trigo,
rí najma̱a̱ náa* mbayuʼ,
ni̱tala dí nidxawuun niʼthí Jeobá bi̱ naʼtáñajúúnʼ ángeles, Dios ndrígóo Israel.
11 Rígi̱ dí nijuiʼthá magíʼnuu Dumá:*
Xtáa tsáa nandxaʼwájmún asndu náa Seír:
“Ikháán bi̱ natiejngoo, nguáthá xóó mba̱yu̱u̱ʼ eyóoʼ majtsi rá.
Bi̱ natiejngoo, nguáthá xóó mba̱yu̱u̱ʼ eyóoʼ majtsi rá.”
12 Bi̱ nayejngoo naʼthí:
“Na̱ʼkha̱ rajtsi, ga̱jma̱a̱ na̱ʼkha̱ raʼni kína.
Á mu nandala murajxi̱, gurajxi̱.
¡Gaguwa̱ʼla mbu̱júu̱!”.
13 Rígi̱ dí nijuiʼthá magíʼnuu xkua̱ mijxooʼ:
Náa xaxi̱ dí rígá náa xkua̱ mijxooʼ ikháanʼ munuʼla mbruʼun,
xa̱bu̱ nagún kamba̱a̱ bi̱ naguwáʼ náa Dedán.
14 Gaʼguala ga̱jma̱a̱ guyéʼgua iyaʼ maga̱a̱n bi̱ nakándawuuʼ,
xa̱bu̱ bi̱ kúwá náa ku̱ba̱ʼ Temá,
ga̱jma̱a̱ guyéʼgua dí mi̱khu̱ bi̱ nagáyúu.
15 Numuu dí ikhiin nigáñún eʼni espada, espada dí na̱nguá juáʼan náa xtóo,
xkamídá dí rígá xawii ga̱jma̱a̱ dí ra̱májánʼ dí narígá náa nuxmijná.
16 Numuu dí rígi̱ dí Jeobá niʼthúnʼ: “Índo̱ gáʼni mbá tsiguʼ, xóo tsiguʼ dí nañajunʼ mbáa xa̱bu̱ mu madaaʼ bi̱ nutiʼñáá,* xúgíʼ gamajkhu dí gíʼdoo Quedar maʼga̱nú mambáa. 17 Káaʼ nguéjmi̱i̱n bi̱ najmañún najmún xkamídá gáguanún náa soldado bi̱ kúwá náa Quedar, numuu dí Jeobá, Dios ndrígóo Israel niʼthí dí xígi̱ gárígá”.