Oseas
9 “Xáʼdxaaʼ Israel,
xáraxtaa gagi xóo eni̱ i̱ʼwáʼ xuajin.
Ga̱jma̱a̱ numuu rí nitagujuamínáʼ nitani̱ tsíngumínáʼ náa Dios ndrígáaʼ.
Nindaaʼ xtayáá mbújkha̱a̱ rí nadaaʼ mbáa a̱ʼgu̱ bi̱ nagujuamínáʼ náa xúgíʼ rí naxtujtsi̱i̱ tsígáʼ.
2 Xárígá ganitsu náa naxtujtsi̱i̱ tsígáʼ ni má náa nuxujmbi̱i̱ uva,
ga̱jma̱a̱ mbaʼyála vino nuxi̱ʼ.
3 Ni xákuwáanʼla itháán náa ku̱ba̱ʼ ndrígóo Jeobá,
matangáanʼla náa Egipto,
ga̱jma̱a̱ náa Asiria mu̱phu̱la rí tsaga.
4 Ni ma nánguá muxnajxi̱ vino dí nagadirámuuʼ xóo tsigijñaʼ náa Jeobá,
tsigijñaʼ ndrígala xánigu̱u̱ʼ.
Xóo pan rí naʼphu̱ xa̱bu̱ índo̱ nakháñuu mbáa,
xúgíinʼ bi̱ naʼphu̱ muni̱ tsagamijná.
Numuu rí pan ndrígu̱ún, i̱ndó mu̱phu̱ ikhiin,
mú xándoo mato̱ʼo̱o̱ náa goʼwóo Jeobá.
5 Ndiéjunʼ gúnila ikháanʼ mbiʼi rí magimbáanʼ,
náa mbiʼi rí maguma ndxa̱a̱ mu mbiʼyamajkuíí Jeobá rá.
6 ¡Gu̱ya̱a̱! Mbaʼyóoʼ magayála mu xáguma gámbáanʼ.
Egipto magímbáanʼla ga̱jma̱a̱ Menfis maʼdiáanʼla.
Xáná maruguarámuuʼ xúgíʼ rí mitsaanʼ* dí guáʼdáá
ga̱jma̱a̱ marigá tsuwanʼ náa guʼwá xtíin ndrígala.
7 Ma̱ʼkha̱ mbiʼi rí mixtanda̱ʼa̱a̱ cuenta,
ma̱ʼkha̱ mbiʼi rí mumíniiʼ,
Israel mbaʼyoo rígi̱.
Profeta mani̱ndxu̱u̱ xóo mbáa skágunʼ ga̱jma̱a̱ xa̱bu̱ bi̱ na̱jkha̱ ka̱yo̱o̱ ajngáa rí májánʼ maguajta skágui̱i̱nʼ,
numuu rí nikiéʼkháanʼ nindxu̱u̱ mba̱a̱ wéñuuʼ, ra̱ʼkhá tháán mba̱a̱ sia̱nʼ rígá náa ikháán”.
8 Dios ndrígóʼ nixtáa ga̱jma̱a̱ profeta ndrígóo Efraín.
Mú rí xúgi̱, xúgíʼ kambu̱ún profetas ndrígóo nindxu̱u̱ xóo tsáʼkhá dí naʼni mbáa xa̱bu̱ bi̱ naguguin ñu̱ʼu̱,
rígá sia̱nʼ náa goʼwóo Dios ndrígóo.
9 Niguma gachíin mbá kayuuʼ xó má mbiʼi ndrígóo Guibeá.
Ikhaa marmáʼáan a̱jkiu̱u̱n rí nikiéʼkhúún ga̱jma̱a̱ maʼni rí mumíniiʼ ga̱jma̱a̱ numuu aʼkhá rí nixudami̱jna̱.
10 “Nixkamaa Israel xóo uva náa ku̱ba̱ʼ mijxooʼ.*
Ndi̱ñu̱u̱n wajinʼ xiʼñúúnʼ xóo timbá higo rí naxná náa ixu̱u̱.
Mú ikhiin ninda̱ʼa̱a̱ Baal bi̱ nduyamajkuíí náa Peor mu mambáñún,
náa dios bi̱ naʼni rí marigá dí ma̱jti̱ʼ,
ga̱jma̱a̱ niguánú ninindxu̱ún xkawi̱i̱nʼ xó má bi̱ nandún kuyáá.
11 Gamajkhu ndrígóo Efraín na̱jkha̱ rijma̱a̱ xóo mbáa ñu̱ʼu̱,
nimbáa a̱ʼgu̱ xágiʼdaa ada̱, ni ma xáguewáan ada̱, ni má xúdewíin e̱ji̱n.
12 Maski asndu muni̱ mba̱ji̱i̱n e̱jñu̱ún,
marígú káñúnʼ asndu nimbáa xáguanúu,
xúʼko̱ ¡ngíníi lá ikhiin, índo̱ ikhúún gátsíngúunʼ náa ikhiin!
13 Efraín, juáʼan náa rígá rajxa̱, naʼni marmáʼáan a̱jkiu̱nʼ ka̱yo̱o̱ Tiro,
rí xúgi̱ Efraín maguwíin e̱ji̱i̱n mu muradíin”.
14 Jeobá, araxnún má rí kaʼyaaʼ maraxnu̱u̱n,
atatsíñááʼ dí murájki̱ín e̱jñu̱ún ga̱jma̱a̱ cháʼdún xájni̱ʼ yáʼdú.
15 “Xúgíʼ dí raʼkhí nini̱ nirígá náa Guilgal, ikha jngóo ikhí nigiʼdu̱ niwi̱yu̱ʼ ka̱ñu̱u̱n.
Maxkawíin náa goʼwóʼ ga̱jma̱a̱ numuu dí ra̱májánʼ nini̱.
Ni xándoʼ ka̱ñu̱u̱n itháán,
xúgíinʼ príncipes gújkhúʼ a̱jkiu̱ún.
16 Efraín maguma gámbáa.
Ajmu̱u̱ mujndooʼ ga̱jma̱a̱ ni xáxna xndúu.
Á mu nuguáʼdiin e̱ji̱n, ma̱ni̱ rí e̱jñu̱ún bi̱ nandún ku̱ñu̱u̱n makhañún”.
17 Dios ndrígóʼ xagruiguíin
numuu rí túdxawíín,
ga̱jma̱a̱ maguánú mani̱ndxu̱ún xa̱bu̱ bi̱ nagún rajnguʼwún náa i̱ʼwáʼ xuajin.