Ezequiel

44 Nitanga̱a̱ ni̱jkha̱ kañún náa xkrugoo guʼwá dí rexa̱a̱ dí gíʼma xígií náa nagájnuu a̱jkha̱ʼ,* ndi̱yo̱o̱ dí xkrugua rúʼko̱ kúgoo. 2 Ikhú Jeobá niʼthúnʼ: “Xkrugua rígi̱ magugóo má xúʼko̱. Xámbaʼtoo ga̱jma̱a̱ nimbáa xa̱bu̱ numbaaʼ xáto̱ʼo̱o̱ ikhí, numuu dí Jeobá, Dios ndrígóo Israel nito̱ʼo̱o̱ ga̱jma̱a̱ ikhí, ikha jngóo magugóo má xúʼko̱. 3 Mú bi̱ kayá edxu̱u̱, ga̱jma̱a̱ numuu dí ikhaa kayá edxu̱u̱, ikhaa magi̱ʼi̱ ikhí mu mi̱khu̱ pan náa inuu Jeobá. Mato̱ʼo̱o̱ náa xkrugoo pórtico* ma̱ngaa ikhí má gágájnáa ga̱jma̱a̱”.

4 Nda̱wa̱á ni̱jkha̱ kañún náa xkrugua dí gíʼma xígií náa norte asndu náa inuu guʼwá. Índo̱ niye̱jxi̱, ndi̱yo̱o̱ dí agiuuʼ Jeobá nixpíbínʼ náa xúgíʼ goʼwóo Jeobá. Ikhú nismbatígo̱ʼ mbayííʼ. 5 Ikhú Jeobá niʼthúnʼ: “A̱ʼdióo xa̱biya̱, atagíʼ edxa̱a̱ʼ* ga̱jma̱a̱ atayáá, ma̱ngaa atadxawíín májánʼ xúgíʼ dí gátháanʼ ga̱jma̱a̱ numuu ikha ma̱ngaa ga̱jma̱a̱ numuu xtángoo dí rígá náa goʼwóʼ, ikhúún bi̱ nindxu̱ʼ Jeobá. Atayáá májánʼ náa dí natu̱ʼu̱u̱n ga̱jma̱a̱ náa guʼwá ma̱ngaa náa mbá xúgíʼ dí nagájni̱ín ga̱jma̱a̱. 6 Gíʼmaa dí marathu̱u̱n rígi̱ bi̱ tsénimbu̱u̱n bi̱ kúwá náa goʼwóo Israel: ‹Rígi̱ dí naʼthí Tátá Jeobá bi̱ itháán mba̱a̱: “Ikháanʼ bi̱ kuwáanʼla náa goʼwóo Israel, ¡ikhí rá!, guniʼñááʼ ru̱ni̱ mbá xúgíʼ dí tsaga. 7 Índo̱ ikháanʼla naguwáʼ kudiin náa goʼwóʼ xa̱bu̱ bi̱ naguwaáʼ bi̱ ra̱májáanʼ a̱jkiu̱ún ga̱jma̱a̱ bi̱ túthu xtóo xuyuuʼ tsáʼkhún, ikhiin nuni̱ gachíí goʼwóʼ. Ikháanʼla nuxnajxí pan ndrígóʼ, xtangún xujkhúʼ ma̱ngaa eʼdi, ga̱jma̱a̱ ikhú má nanújngurámala dí nimbánulú ga̱jma̱a̱ numuu mbá xúgíʼ dí tsaga dí nu̱nila. 8 Ikháanʼla na̱nguá niñewa̱a̱n tsigijñaʼ ndrígóʼ dí kaʼwu. Dí ni̱nila, ni̱xnajxún eʼwíinʼ muni̱ ñajunʼ dí gíʼmaa maguma náa goʼwóʼ”›.

9 ‹Rígi̱ dí naʼthí Tátá Jeobá bi̱ itháán mba̱a̱: “Nimbáa xa̱bu̱ na̱ʼkha̱á bi̱ xtáa náa Israel, bi̱ ra̱májáanʼ a̱jkiu̱u̱n ga̱jma̱a̱ bi̱ túthu xtóo xuyuuʼ tsáʼkhúun xándoo mato̱ʼo̱o̱ náa goʼwóʼ”›.

10 ‹Mú levitas bi̱ nitsíngu̱u̱nʼ náa ikhúún índo̱ israelitas nánguá ndiyáá dí mu̱ni̱ ga̱jma̱a̱ nini̱ tsíngumi̱jna̱ náa ikhúún mu mbuyamajkún xándú bi̱ xkawi̱i̱nʼ, ikhiin mumíniiʼ ga̱jma̱a̱ numuu rí nikiéʼkhúún. 11 Ikhiin muni̱ ñajunʼ náa goʼwóʼ, mu muñewa̱a̱n xkrugua ga̱jma̱a̱ muñejunʼ ikhí. Muradíin xujkhúʼ mu mixnájxi̱i̱n náa tsigijñaʼ dí nakarámáʼ, ma̱ngaa tsigijñaʼ ga̱jma̱a̱ numún xa̱bu̱ xuajin, makuwá ruñajunʼ náa inún xa̱bu̱ xuajin. 12 Ikhiin ndiyamajkhún xándú bi̱ xkawi̱i̱nʼ, ga̱jma̱a̱ ninindxu̱ún mbá dí niʼni majngrádíin ga̱jma̱a̱ muxudamíjna̱ aʼkhá bi̱ kúwá náa goʼwóo Israel, ikha jngóo nikujxí ñawúnʼ ga̱jma̱a̱ ni̱xna̱ ajngóʼ dí mugíʼníí, eʼthí Tátá Jeobá bi̱ itháán mba̱a̱, mumíniiʼ ga̱jma̱a̱ numuu dí raʼkhí nini̱. 13 Ni xúxuʼmamijná náa ikhúún mu muni̱ ñajunʼ xóo ndxajkun, ni má xúxuʼmamijná náa nimbá rí kiejuunʼ rí najmaa mu maguma ñajunʼ, mati̱ñu̱u̱nʼ gáʼni mbá xúgíʼ rí tsaga dí nini̱. 14 Mú marajkuáa ñawúúnʼ ñajunʼ dí naguma náa goʼwóʼ, mu xúʼko̱ muni̱ mbá xúgíʼ ñajunʼ dí naguma ikhí ga̱jma̱a̱ mbá xúgíʼ dí gíʼmaa maguma ikhí›.

15 ‹Ndxajkun levitas bi̱ naguwáʼ náa Sadoc, bi̱ ninimbaníí má xúʼko̱ ñajunʼ ndrígu̱ún náa goʼwóʼ índo̱ israelitas nánguá ndiyáá dí muni̱ ga̱jma̱a̱ nini̱ tsíngumi̱jna̱ náa ikhúún, ikhiin muxuʼmamijná mu muni̱ ñajunʼ ga̱jma̱a̱ makuwá náa inuʼ mu muxnajxi̱ xtangún xujkhúʼ ga̱jma̱a̱ eʼdi, eʼthí Tátá Jeobá bi̱ itháán mba̱a̱. 16 Ikhiin nindxu̱ún bi̱ matu̱ʼu̱u̱n náa goʼwóʼ, muxuʼmamijná náa mésoʼ muni̱ ñajunʼ ga̱jma̱a̱ munimbaníí ñajunʼ dí ikhúún gáxnu̱u̱n.

17 Índo̱ gátu̱ʼu̱u̱n náa xkrugua dí gíʼma náa rexo̱o̱ guʼwá dí awúún, gíʼmaa dí mugíʼ xtíin lino. Ragíʼmaa mugíʼ nimbá xtíin dí niguma ga̱jma̱a̱ mugu̱ índo̱ gúñejunʼ náa rexo̱o̱ guʼwá dí awúún o náa awúu̱n guʼwá. 18 Gíʼmaa mugri̱gu xtíin lino náa edxu̱ún ga̱jma̱a̱ jmawún dí majkhaʼ gíʼmaa mani̱ndxu̱u̱ lino. Ragíʼmaa mugíʼ nimbá dí maʼni maruñiiʼ. 19 Nákha xóó tségájni̱ín náa rexo̱o̱ guʼwá náa kúwá xa̱bu̱ xuajin, gíʼmaa dí muriya̱a̱ʼ xtíin dí niñejunʼ ga̱jma̱a̱, muniña̱a̱ʼ náa cuarto dí nuphiʼtsu náa dí nindxu̱u̱ mikaʼwu. Nda̱wa̱á mbaʼyóoʼ dí mugíiʼ i̱mba̱ xtíñún mu xúʼko̱ xúni̱ dí xa̱bu̱ xuajin mangiin mani̱ndxu̱ún mikaʼwiin. 20 Ragíʼmaa dí muda̱ tsaʼtsaʼ edxu̱ún ni má xúniña̱a̱n mbaʼya xtátsiu̱ún. Gíʼmaa dí murujturígú xtátsiu̱ún. 21 Ndxajkun ragíʼmaa muwa̱a̱n vino índo̱ gátu̱ʼu̱u̱n náa rexo̱o̱ guʼwá dí awúún. 22 Xáʼyóoʼ mbuya̱a̱ mbáa a̱ʼgú xuáʼa ni má mbáa a̱ʼgu̱ bi̱ niguanáa, mú ma̱ndoo mbuya̱a̱ dxáʼgú bi̱ xóó tsébóoʼ ga̱jma̱a̱ xa̱bu̱ bi̱ xtáa náa Israel o mbáa a̱ʼgiu̱u̱ ndxajkun bi̱ nikháñúu›.

23 ‹Gíʼmaa dí muthún xa̱bu̱ xuajñunʼ xóo mixtiʼkhu nindxu̱u̱ dí kaʼwu ga̱jma̱a̱ dí na̱nguá kaʼwu. Ma̱ngaa gíʼmaa musngúún xóo mixtiʼkhu nindxu̱u̱ dí kaʼwu ga̱jma̱a̱ dí tsaga. 24 Gíʼmaa dí matri̱gi̱i̱n mu munimbaníí xkujndu ndrígu̱ún xa̱bu̱, munimbaníí xó má ikhúún nandoʼ. Gíʼmaa dí munimbu̱ún xtángoo ga̱jma̱a̱ ikha dí naʼthí ga̱jma̱a̱ numuu ndxa̱a̱ ndrígóʼ, ma̱ngaa muni̱ kaʼwi̱i̱ mbiʼi sábado ndrígóʼ. 25 Ragíʼmaa muxuʼmamijná náa xa̱bu̱ bi̱ nikháñúu, á mu dí nuxuʼmamijná maʼni mitsagiin. Mú ma̱ndoo muxuʼmamijná náa anu̱ún,* náa ru̱du̱ún,* náa ndxájúún o gi̱ʼtiu̱ún, náa aʼdiún dxámá o dxáʼgú, náa mbáa ndxájúún o gi̱ʼtiu̱ún dxáʼgú bi̱ xóó tsénújúnʼ. 26 Nda̱wa̱á dí ndxajkun gáʼni kaʼwumina̱a̱ʼ ndayóoʼ dí magiʼthu̱u̱n mbá xmáná. 27 Mbiʼi dí gáto̱ʼo̱o̱ náa dí mikaʼwu, náa rexo̱o̱ guʼwá dí awúún mu maʼni ñajunʼ náa dí mikaʼwu, gíʼmaa dí maxnájxi̱ tsigijñaʼ ga̱jma̱a̱ numuu aʼkhúun›, eʼthí Tátá Jeobá bi̱ itháán mba̱a̱.

28 ‹Rígi̱ nindxu̱u̱ dí magruigúu: Ikhúún nindxu̱ʼ dí magruigúu. Xúxna̱a̱ nimbá ku̱ba̱ʼ náa Israel, numuu dí ikhúún nindxu̱ʼ dí magruigúu. 29 Ikhiin nindxu̱ún bi̱ mu̱phu̱ tsigijñaʼ dí tsígáʼ, tsigijñaʼ ga̱jma̱a̱ numuu aʼkhá, tsigijñaʼ ga̱jma̱a̱ numuu dí nakiéʼkúún, mbá xúgíʼ dí gájuixnájxi̱ náa Dios ndrígóo Israel mani̱ndxu̱u̱ ndrígu̱ún ikhiin. 30 Gíʼmaa muxnajxí dí nijma̱a̱ ginii kayuuʼ dí ni̱dula dí itháan májánʼ, mbá xúgíʼ dí gúxna̱ mani̱ndxu̱u̱ ndrígu̱ún ndxajkun. Gíʼmaa dí muxnu̱u̱n ndxajkun timbá harina dí nigájnáa dí kaʼníí gíʼdoo xtíxúu. Ga̱jma̱a̱ numuu dí mu̱nila xígi̱ kaʼnii, maguma tsajkurámiinʼ bi̱ kúwá náa guʼwála. 31 Ndxajkun ragíʼmaa mu̱phi̱i̱ ñu̱ʼu̱, ni má mbáa xujkhúʼ bi̱ ndiya̱a̱ bi̱ nikháñúu má o mbáa xujkhúʼ bi̱ nixíyáa mbáa xujkhú xáná›.