Ezequiel

45 ‹Índo̱ gúrui̱ʼta̱a̱ ku̱ba̱ʼ dí mundrigúu, guxna̱a̱ mbá chíʼgíiʼ* ku̱ba̱ʼ Jeobá ga̱jma̱a̱ ku̱ba̱ʼ rúʼko̱ gíʼmaa mani̱ndxu̱u̱ kaʼwu. Dí mbaʼ gíʼmaa maʼni 13 mil metro* ga̱jma̱a̱ dí ma̱ja̱nʼ maʼni 5 mil 200 metro.* Mbá xúgíʼ ku̱ba̱ʼ rúʼko̱ mani̱ndxu̱u̱ mbá ku̱ba̱ʼ kaʼwu. 2 Náa awúu̱n mbaaʼ rúʼko̱ marigá mbá mbaaʼ dí cuadrado dí mani̱ndxu̱u̱ mikaʼwu, maʼni 260 metro* dí mbaʼ ga̱jma̱a̱ xúʼko̱ má dí ma̱ja̱nʼ, ma̱ngaa náa mámbá níjniúu marigá mbá ku̱ba̱ʼ náa rígá rajxa̱, dí ma̱ja̱nʼ maʼni 25 metro.* 3 Mbaaʼ rúʼko̱, magiʼdoo 13 mil metro dí mbaʼ ga̱jma̱a̱ dí ma̱ja̱nʼ magiʼdoo 5 mil 200 metro, ikhí marigá guʼwá náa rí mbuyamajkuíí Dios, mbá rí phú mikaʼwu. 4 Mani̱ndxu̱u̱ mbá ku̱ba̱ʼ rí maʼni mikaʼwu, dí maʼni ku̱bu̱únʼ ndxajkun, bi̱ nuñajunʼ náa guʼwá rí nduyamajkuíí Dios, bi̱ nuxuʼmamijná ikhí mu muni̱ ñajuunʼ Jeobá. Mani̱ndxu̱u̱ mbá ku̱ba̱ʼ náa marigá guʼwún ga̱jma̱a̱ mbá ku̱ba̱ʼ rí mikaʼwu.

5 Náa makuwá levita, bi̱ nuñajunʼ náa guʼwá rí nduyamajkuíí Dios, marigá mbá ku̱ba̱ʼ rí magiʼdoo 13 mil metro dí mbaʼ ga̱jma̱a̱ dí ma̱ja̱nʼ magiʼdoo 5 mil 200 metro, ga̱jma̱a̱ maguaʼdáá mbá 20 cuarto náa dí muphiʼtsu.

6 Mbaʼyóoʼ mu̱xna̱ ku̱ba̱ʼ rí maʼni ku̱bo̱o̱ʼ xuajin, dí mbaʼ maʼni 13 mil metro (xó má ku̱ba̱ʼ rí mikaʼwu) ga̱jma̱a̱ dí ma̱ja̱nʼ maʼni 2 mil 600 metro.* Ku̱ba̱ʼ rígi̱ mani̱ndxu̱u̱ ku̱bu̱únʼ mbá xúgíinʼ bi̱ kúwá náa goʼwóo Israel.

7 Marigá mbá ku̱ba̱ʼ dí maʼni ku̱bo̱o̱ʼ bi̱ kayá edxu̱u̱ náa mbá nájma̱ níjniúu ku̱ba̱ʼ rí mikaʼwu ga̱jma̱a̱ náa ku̱bo̱o̱ʼ xuajin. Marigá náa níjniúu ku̱ba̱ʼ rí mikaʼwu ga̱jma̱a̱ náa níjniúu ku̱bo̱o̱ʼ xuajin. Maʼga̱ xígií náa narámaaʼ a̱jkha̱ʼ* ga̱jma̱a̱ martumuu xígií náa nagájnuu a̱jkha̱ʼ.* Dí mbaʼ ku̱ba̱ʼ rígi̱, náa narámaaʼ a̱jkha̱ʼ ga̱jma̱a̱ asndu náa nagájnuu a̱jkha̱ʼ, maʼni ikháá má mbaʼ xó má ku̱bo̱o̱ʼ xuajin chíʼgíiʼ* dí rígá níjniúu. 8 Ku̱ba̱ʼ rúʼko̱ mani̱ndxu̱u̱ ku̱ba̱ʼ ndrígóo náa Israel. Bi̱ kuya̱ edxu̱u̱ bi̱ ikhúún niraʼwi̱i̱n ni xátangi̱ín muni̱ ngíníi xa̱bu̱ xuajñunʼ ga̱jma̱a̱ muxnún ku̱ba̱ʼ rí xóó naguanúu bi̱ kúwá náa goʼwóo Israel xó má xuajin ma̱jkha̱ʼ náa kúwá›.

9 Rígi̱ dí naʼthí Tátá Jeobá bi̱ itháán mba̱a̱: ‹¡Bi̱ kuya̱ edxu̱u̱ náa Israel, ikhí rá!›.

‹Guniʼñááʼ ru̱ni̱ dí ra̱májánʼ ga̱jma̱a̱ guniʼñááʼ ru̱ni̱ ngíníi eʼwíinʼ, gu̱ni̱ rí májánʼ ga̱jma̱a̱ dí jmbu. Guniʼñááʼ rundrígú káñúnʼ xa̱bu̱ xuajñunʼ dí guáʼdáá, eʼthí Tátá Jeobá bi̱ itháán mba̱a̱. 10 Ga̱jmala mbá balanza, mbá efá* ga̱jma̱a̱ mbá bato* dí nagiéwan májánʼ. 11 Gíʼmaa marigá mbá awan kiejuunʼ dí mixtagiéwan ga̱jma̱a̱ mbá efá ga̱jma̱a̱ mbá bato. Mbá gu̱wa̱ʼ bato naʼni mbá homer,* ga̱jma̱a̱ xúʼko̱ má mbá gu̱wa̱ʼ efá naʼni mbá homer. Homer mani̱ndxu̱u̱ mbá awan dí mixtagiéwan ga̱jma̱a̱. 12 Mbá 20 guerás* maʼni mbá siclo.* Dí mbá 20 siclo ga̱jma̱a̱ na̱ʼkha̱a̱ i̱mbá 25 siclo ma̱ngaa na̱ʼkha̱a̱ i̱mbá 15 siclo maʼni̱i̱ mbá mina›.*

13 ‹Rígi̱ dí ikháanʼ gíʼmaa muxnala: Dí mámbá homer trigo, gíʼmaa muxnala mbá sexta parte dí mbá efá, dí mámbá homer cebada, gíʼmaa muxnala mbá sexta parte dí mbá efá. 14 Mu mixtagiéwan aceite majmaa bato mu mixtagiéwan ga̱jma̱a̱. Mbá gu̱wa̱ʼ bato naʼni mbá coro* ga̱jma̱a̱ mbá gu̱wa̱ʼ bato naʼni mbá homer. Numuu dí gu̱wa̱ʼ bato naʼni mbá homer. 15 Náa mbá 200 mugu̱ bi̱ guáʼdiin xa̱bu̱ Israel muríyaaʼ mu̱xna̱a̱ mbáwíí. Xúgíʼ rígi̱ majmaa mu mixnájxi̱ xóo tsigijñaʼ rí tsígáʼ, tsigijñaʼ dí nakarámáʼ ga̱jma̱a̱ tsigijñaʼ dí tsímáá* mu majngudi̱i̱ aʼkhúún xa̱bu̱ xuajin›, eʼthí Tátá Jeobá bi̱ itháán mba̱a̱.

16 ‹Mbá xúgíinʼ xa̱bu̱ bi̱ kúwá náa xuajin muxnáá rígi̱ bi̱ kayá edxu̱u̱ náa Israel. 17 Mú bi̱ kayá edxu̱u̱, maguwíi dí mixnájxi̱ xóo tsigijñaʼ dí nakarámáʼ, tsigijñaʼ rí tsígáʼ ga̱jma̱a̱ tsigijñaʼ dí magadirámuuʼ índo̱ narígá ndxa̱a̱, índo̱ nagi̱ʼi̱ gu̱nʼ rudiiʼ, mbiʼi sábado ga̱jma̱a̱ mbá xúgíʼ ndxa̱a̱ dí nuni̱ bi̱ kúwá náa goʼwóo Israel. Ikhaa maguwíi dí mixnájxi̱ xóo tsigijñaʼ ga̱jma̱a̱ numuu aʼkhá, tsigijñaʼ rí tsígáʼ, tsigijñaʼ dí nakarámáʼ ga̱jma̱a̱ tsigijñaʼ dí tsímáá mu maʼni jngudi̱i̱ aʼkhúún bi̱ kúwá náa goʼwóo Israel›.

18 Rígi̱ dí naʼthí Tátá Jeobá bi̱ itháán mba̱a̱: ‹Índo̱ ndayáa timbá gu̱nʼ, timbá mbiʼi dí gu̱nʼ rúʼko̱, ayáa mbáa a̱ʼdá xédí bi̱ májáanʼ ga̱jma̱a̱ atani̱ kaʼwi̱i̱ aʼkhúun guʼwá náa rí nduyamajkuíí Dios. 19 Ndxajkun mbayá mbá chíʼgíiʼ eʼdiuu tsigijñaʼ ga̱jma̱a̱ numuu aʼkhá ga̱jma̱a̱ maxtájmuu náa xi̱gu̱u̱ guʼwá, náa mbá nájkhu̱ eskíniu̱u̱ náa najuixnájxi̱ tsigijñaʼ ga̱jma̱a̱ náa xi̱gu̱u̱ xkrugua dí rígá náa rexo̱o̱ dí awúún. 20 Xúʼko̱ má gátani̱ índo̱ gáʼni juwan mbiʼi dí gu̱nʼ rúʼko̱ ga̱jma̱a̱ numuu asndu tsáá má xa̱bíi̱ bi̱ gákudaminaʼ aʼkhá bi̱ tséʼni kiejuunʼ o ga̱jma̱a̱ numuu rí tséʼyoo, mbaʼyóoʼ dí mu̱ni̱ kaʼwi̱i̱ aʼkhúun guʼwá náa rí nduyamajkuíí Dios.

21 Náa timbá gu̱nʼ dí maʼni 14 mbiʼi náa gu̱nʼ rúʼko̱, mataniriya̱a̱ʼ ndxa̱a̱ Pascua. Mu̱phu̱ pan dí ragíʼdoo levadura mbá juwan mbiʼi. 22 Mbiʼi rúʼko̱, bi̱ kayá edxu̱u̱ maxniáa mbáa a̱ʼdá xédí xóo tsigijñaʼ ga̱jma̱a̱ numuu aʼkhúun, ma̱ngaa ga̱jma̱a̱ numún mbá xúgíinʼ xa̱bu̱. 23 Náa mbá juwan mbiʼi dí narígá ndxa̱a̱, náa mámbá mbiʼi rúʼko̱, maxníin xóo tsigijñaʼ gamajkhu dí nakarámáʼ náa inuu Jeobá mbá juwiin ejín xédí bi̱ míjíinʼ, mbá juwiin mugu̱ e̱jmba̱a̱ bi̱ míjíinʼ, ga̱jma̱a̱ maxniáa mbáa chivátu* xóo tsigijñaʼ ga̱jma̱a̱ numuu aʼkhá mámbá mbiʼi. 24 Ma̱ngaa maxná xóo tsigijñaʼ dí tsígáʼ, mbá efá dí mámbáa a̱ʼdá xédí ga̱jma̱a̱ mbá efá dí mámbáa mugu̱ e̱jmba̱a̱, ga̱jma̱a̱ maxná mbá ajtsú litro tikhu* aceite dí mámbá efá.

25 Índo̱ gáʼni juwan igu̱nʼ, magi̱ʼdu̱u̱ mbiʼi 15 ñajunʼ gu̱nʼ rúʼko̱, náa mbá juwan mbiʼi dí narígá ndxa̱a̱ maxná rígi̱: Tsigijñaʼ ga̱jma̱a̱ numuu aʼkhá, tsigijñaʼ dí nakarámáʼ, tsigijñaʼ dí tsígáʼ ga̱jma̱a̱ aceite›”.