Ezequiel

47 Ikhú ni̱jkha̱ kañún mbu̱júu̱ náa riejuun guʼwá rí nduyamajkuíí Dios, ndi̱yo̱o̱ dí nagájnuu iyaʼ náa agoo riejuun guʼwá dí na̱jkha̱ xígií náa nagájnuu a̱jkha̱ʼ,* numuu dí rawuunʼ* guʼwá naʼni inuu xígií náa nagájnuu a̱jkha̱ʼ. Iyaʼ nagájnuu náa agoo guʼwá náa níjñú májáanʼ ga̱jma̱a̱ nanújngoo náa níjniúu* dí najuixnájxi̱ tsigijñaʼ.

2 Nda̱wa̱á nigájnáa kañún náa xkrugua dí gíʼma xígií náa norte, ni̱jkha̱ kañún asndu náa xkrugua dí gíʼmaa rexa̱a̱ dí naʼni inuu xígií náa nagájnuu a̱jkha̱ʼ, ga̱jma̱a̱ ndi̱yo̱o̱ dí nagájnuu chíʼgíiʼ* iyaʼ náa ñawún májáanʼ.

3 Índo̱ xa̱biya̱ nigájnuu xígií náa nagájnuu a̱jkha̱ʼ kayá mbá ñuñuu dí nagiéwan ga̱jma̱a̱, ikhú nigiéwan náa naʼni 500 metro* dí mbaʼ ga̱jma̱a̱ niʼthúnʼ dí makidún náa iyaʼ, iyaʼ ni̱jkha̱nú náa iduu rajkúʼ.

4 Nda̱wa̱á nigiéwan náa naʼni 500 metro* dí mbaʼ ga̱jma̱a̱ niʼthúnʼ dí makidún náa iyaʼ, iyaʼ ni̱jkha̱nú asndu náa ragómiúʼ.

Nda̱wa̱á nigiéwan náa naʼni 500 metro* dí mbaʼ ga̱jma̱a̱ niʼthúnʼ dí makidún, iyaʼ ni̱jkha̱nú asndu náa smídúʼ.

5 Índo̱ nigiéwan náa naʼni 500 metro,* ra̱ʼkhá tháán mi̱jnu̱ʼ iyaʼ dí asndu nánguá niʼngo̱ʼ gákidún ga̱jma̱a̱ rajkúʼ, numuu dí iyaʼ ra̱ʼkhá tháán mi̱jnu̱ʼ ikha jngóo ndiyóoʼ dí maʼgá náa inuu iyaʼ, nindxu̱u̱ mbá mañu dí rakáʼnii makidán ga̱jma̱a̱ rajkuáaʼ.

6 Ikhaa nirajxu̱ʼ: “A̱ʼdióo xa̱biya̱, lá nitayáá rígi̱ ráʼ.”

Ikhú niʼniuʼ dí maʼkháaʼ kruígo̱ʼ náa rawuunʼ mañu. 7 Índo̱ nitangu̱ún ndi̱yo̱o̱ dí rígá wéñuuʼ ixi̱ náa mbá nájma̱ rawuunʼ mañu. 8 Nda̱wa̱á ikhaa niʼthúnʼ: “Iyaʼ rígi̱ na̱jkha̱ xígií náa nagájnuu a̱jkha̱ʼ, nagajtaa náa Arabá* ga̱jma̱a̱ na̱jkha̱núu náa lamáa.* Índo̱ iyaʼ rígi̱ na̱jkha̱núu náa lamáa, iyaʼ lamáa maʼni̱i̱ mitaun. 9 Náa gánújngoo iyaʼ makuwá mbaʼin bi̱ nduya. Ra̱ʼkhá tháán mbaʼin e̱gi̱ʼ gákúwá, numuu dí ikhí gánújngoo iyaʼ. Iyaʼ lamáa maʼni̱i̱ mitaun ga̱jma̱a̱ náa gánújngoo mañu ma̱ndoo marigá xúgíʼ.

10 Bi̱ nurawíin e̱gi̱ʼ maguanún náa rawuunʼ mañu, mugi̱ʼdi̱i̱ náa En-Guedí asndu náa En-Eglaim, ikhí marigá mbá náa murgujndo̱o̱ʼ amúúnʼ bi̱ nurawíin e̱gi̱ʼ. Ra̱ʼkhá tháán mbaʼin e̱gi̱ʼ gákúwíin, makuwíin xúgíinʼ enii e̱gi̱ʼ, xóo e̱gi̱ʼ bi̱ kúwá náa lamáa Mba̱a̱.*

11 Marigá na̱ma̱ʼ ga̱jma̱a̱ laguna, mú ikhaa xáʼni̱i̱ mitaun, maʼni má xúʼko̱ miríná.

12 Náa mbá nájma̱ rawuunʼ mañu mba̱ja̱a̱ mbá xúgíʼ enii ixi̱ dí naxná xndú taun.* Xújnduxtá inúu ga̱jma̱a̱ maxná má xúʼko̱ xndúu. Mámbá igu̱nʼ maxná i̱ʼwáʼ xndúu, numuu rí iyaʼ dí nagíyóo nagájnuu náa guʼwá rí nduyamajkuíí Dios. Xndúu majmaa mu mu̱phu̱ ga̱jma̱a̱ inúu majmaa mu maʼni̱i̱ a̱jkiu̱ún xa̱bu̱”.

13 Rígi̱ dí naʼthí Tátá Jeobá bi̱ itháán mba̱a̱: “Rígi̱ nindxu̱u̱ ku̱ba̱ʼ dí ikháanʼla muxuíʼtáa xóo herencia dí muda̱a̱ bi̱ mbá 12 xuajin majkhaʼ* dí rígá náa Israel, ga̱jma̱a̱ José magruigúu a̱jma̱ mbaaʼ. 14 Ikháanʼ mundrígúu ga̱jma̱a̱ mbiʼtháá ku̱ba̱ʼ gúdáala. Nixna̱ ajngóʼ náa wajin xiʼñála dí maxnu̱u̱n ku̱ba̱ʼ rígi̱, ikha jngóo dí xúgi̱ guruiʼtamíjna̱a̱ mu muda̱a̱ xóo herencia.

15 Rígi̱ gánindxu̱u̱ ndawoo ku̱ba̱ʼ dí rígá xígií náa níjniúu norte: Maʼga náa lamáa Mba̱a̱, manújngoo náa kamba̱a̱ dí na̱jkha̱ náa Hetlón, maʼga má xúʼko̱ náa Zedad, 16 Hamat, Berotá ga̱jma̱a̱ Sibraim dí rígá náa majñu̱u̱ʼ mbaaʼ Damasco ga̱jma̱a̱ náa mbaaʼ Hamat, maʼga má xúʼko̱ asndu náa Hazer-Haticón, rí na̱jkha̱ gártumuu náa Haurán. 17 Ikha jngóo ndawaa magi̱ʼdu̱u̱ náa lamáa maʼga má xúʼko̱ asndu náa Hazar-Enón, manújngoo náa ndawaa Damasco, xígií náa norte, maʼga gártumuu asndu náa Hamat. Rígi̱ gánindxu̱u̱ ndawaa dí marigá náa norte.

18 Ndawaa dí marigá xígií náa níjniúu nagájnuu a̱jkha̱ʼ manújngoo náa majñu̱u̱ʼ Haurán ga̱jma̱a̱ Damasco, manújngoo náa mbá kua̱ʼa̱a̱n mbayuuʼ mañu Jordán, náa majñu̱u̱ʼ Galaad ga̱jma̱a̱ náa ku̱ba̱ʼ ndrígóo Israel. Gugíʼdi̱i̱ mugiéwan náa ndawaa norte asndu náa lamáa dí rígá náa xígií nagájnuu a̱jkha̱ʼ.* Rígi̱ gánindxu̱u̱ ndawaa dí marigá xígií náa nagájnuu a̱jkha̱ʼ.

19 Ndawaa dí marigá náa sur maʼga náa Tamar asndu maʼga̱nú náa Meribat-Cadés, dí ikhí maʼga náa Mata* asndu maʼga̱nú náa lamáa Mba̱a̱. Rígi̱ gánindxu̱u̱ ndawaa dí marigá náa sur.

20 Ndawaa dí marigá xígií náa narámaaʼ a̱jkha̱ʼ* náa rígá lamáa Mba̱a̱, magi̱ʼdu̱u̱ náa ndawaa sur, maʼga má xúʼko̱ ndawaa rígi̱ asndu martumuu náa Lebó-Hamat.* Rígi̱ gánindxu̱u̱ ndawaa dí marigá náa narámaaʼ a̱jkha̱ʼ”.

21 “Muruiʼtamíjna̱a̱ ku̱ba̱ʼ rígi̱, mu muda̱a̱ bi̱ mbá 12 xuajin majkhaʼ dí rígá náa Israel. 22 Gurui̱ʼta̱a̱ ku̱ba̱ʼ xóo herencia mu muda̱a̱la, xúʼko̱ má gúdáa mangiin xa̱bu̱ naguwaáʼ bi̱ kuwáanʼ gajmiála, bi̱ niguáʼdiin e̱jñu̱ún índo̱ nikúwá náa majñala. Ikhiin mangiin gíʼmaa mbu̱ñu̱u̱n xóo israelitas. Mundrigúu gajmiála mbá herencia dí rígá náa majñu̱u̱ʼ xuajin majkhaʼ ndrígóo Israel. 23 Gíʼmaa dí muxna̱a̱la mbá herencia xa̱bu̱ na̱ʼkha̱á náa mbaaʼ dí kaʼyoo xuajin chíʼgíiʼ náa ni̱jkha̱ gáxtáa”, eʼthí Tátá Jeobá bi̱ itháán mba̱a̱.