Ezequiel

48 “Xígi̱ kaʼnii mbiʼyuu xuajin majkhaʼ* dí nagi̱ʼdu̱u̱ xígií náa norte: Ku̱ba̱ʼ dí nigruigúu Dan, na̱jkha̱ mbá kamba̱a̱ dí na̱jkha̱ náa Hetlón, nanújngoo náa Lebó-Hamat* ga̱jma̱a̱ na̱jkha̱ náa jmbuu Hazar-Enán, nartumuu náa ndawaa Damasco xígií náa norte, náa níjniúu Hamat ga̱jma̱a̱ nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ* na̱jkha̱ gátumuu náa narámaaʼ a̱jkha̱ʼ.* 2 Ku̱ba̱ʼ dí nigruigúu Aser nartumuu náa ku̱ba̱ʼ dí nigruigúu Dan, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 3 Ku̱ba̱ʼ dí nigruigúu Neftalí nartumuu náa ku̱ba̱ʼ dí nigruigúu Aser, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 4 Ku̱ba̱ʼ dí nigruigúu Manasés nartumuu náa ku̱ba̱ʼ dí nigruigúu Neftalí, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 5 Ku̱ba̱ʼ dí nigruigúu Efraín nartumuu náa ku̱ba̱ʼ dí nigruigúu Manasés, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 6 Ku̱ba̱ʼ dí nigruigúu Rubén nartumuu náa ku̱ba̱ʼ dí nigruigúu Efraín, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 7 Ku̱ba̱ʼ dí nigruigúu Judá nartumuu náa ku̱ba̱ʼ dí nigruigúu Rubén, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 8 Nagi̱ʼdu̱u̱ náa ku̱ba̱ʼ dí nigruigúu Judá, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ, ku̱ba̱ʼ dí ikháanʼla gíʼmaa muniʼñááʼ mu makhánáá Dios, dí ma̱ja̱nʼ maʼni 13 mil metro,* dí mbaʼ maʼni ikháá má xóo mbi̱jua̱ ku̱ba̱ʼ dí nindrigúu i̱ʼwáʼ xuajin majkhaʼ, dí nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ ga̱jma̱a̱ na̱jkha̱ gátumuu náa narámaaʼ a̱jkha̱ʼ. Guʼwá náa rí nduyamajkuíí Dios gíʼmaa marigá náa ta̱pha̱ ku̱ba̱ʼ rúʼko̱.

9 Ku̱ba̱ʼ dí ikháanʼla muniʼñááʼ mbayá Jeobá, dí mbaʼ maʼni 13 mil metro ga̱jma̱a̱ dí ma̱ja̱nʼ ma’ni 5 mil 200 metro.* 10 Rígi̱ mani̱ndxu̱u̱ ku̱ba̱ʼ kaʼwu dí makánún ndxajkun: Rí mbaʼ xígií náa norte maʼni 13 mil metro, náa xígií narámaaʼ a̱jkha̱ʼ maʼni 5 mil 200 metro* ga̱jma̱a̱ xúʼko̱ má xígií náa nagájnuu a̱jkha̱ʼ, ma̱ngaa maʼni 13 mil metro* xígií náa sur. Guʼwá náa mbiʼyamajkuíí Jeobá gíʼmaa marigá náa ta̱pha̱ ku̱ba̱ʼ rúʼko̱. 11 Rígi̱ mani̱ndxu̱u̱ ku̱bu̱únʼ ndxajkun bi̱ niguma kaʼwi̱ín, bi̱ naguwáʼ náa Sadoc, bi̱ ninimbaníí ñajunʼ dí kajkuáa ñawúúnʼ náa ikhúún, bi̱ tágájnuriñu̱u̱nʼ índo̱ israelitas ga̱jma̱a̱ levitas nigájnuriñu̱u̱nʼ. 12 Ikhiin makánún mbá chíʼgíiʼ* ku̱ba̱ʼ rí niguanúu makhánáá Dios, ku̱ba̱ʼ rúʼko̱ mani̱ndxu̱u̱ mikaʼwu, mbañúúnʼ martumuu náa ku̱ba̱ʼ dí makánún levitas.

13 Xígií náa norte, náa ku̱ba̱ʼ dí nindrigúu ndxajkun, levitas makánún mbá ku̱ba̱ʼ rí maʼni 13 mil metro dí mbaʼ ga̱jma̱a̱ dí ma̱ja̱nʼ magiʼdoo 5 mil 200 metro. (Dí mbaʼ maʼni 13 mil metro ga̱jma̱a̱ dí ma̱ja̱nʼ magiʼdoo 5 mil 200 metro). 14 Ragíʼmaa maxtagujua̱, maxtiʼkuraʼáá o makhánáá i̱mba̱a̱ ku̱ba̱ʼ rígi̱, ku̱ba̱ʼ rígi̱ ra̱ʼkhá tháán májánʼ numuu dí mikaʼwu eʼyoo Jeobá.

15 Ku̱ba̱ʼ dí xóó naguanúu, dí ma̱ja̱nʼ maʼni 2 mil 600 metro,* ga̱jma̱a̱ dí mbaʼ maʼni 13 mil metro, ku̱ba̱ʼ rúʼko̱ mani̱ndxu̱u̱ ku̱bo̱o̱ʼ xuajin, ikhí marigá guʼwá ga̱jma̱a̱ mbaaʼ náa marigá rajxa̱. Xuajin marigá náa ta̱pho̱o̱ ku̱ba̱ʼ rúʼko̱. 16 Xígi̱ kaʼnii mba̱a̱ xuajin: Xígií náa norte maʼni 2 mil 300 metro* ga̱jma̱a̱ xúʼko̱ má xígií náa sur ma̱ngaa, xígií náa nagájnuu a̱jkha̱ʼ maʼni 2 mil 300 metro* ga̱jma̱a̱ xúʼko̱ má xígií náa narámaaʼ a̱jkha̱ʼ ma̱ngaa. 17 Mbaaʼ náa rígá rajxa̱ náa xuajin maʼni 130 metro* xígií náa norte xúʼko̱ má náa sur ma̱ngaa, xígií náa nagájnuu a̱jkha̱ʼ maʼni 130 metro* ga̱jma̱a̱ xúʼko̱ má xígií náa narámaaʼ a̱jkha̱ʼ ma̱ngaa.

18 Dí mbaʼ ku̱ba̱ʼ dí xóó naguanúu naʼni xóo mbaʼ ku̱ba̱ʼ dí mikaʼwu: Gíʼdoo 5 mil 200 metro xígií náa nagájnuu a̱jkha̱ʼ ga̱jma̱a̱ xúʼko̱ má náa xígií narámaaʼ a̱jkha̱ʼ. Dí mbaʼ maʼga gátumuu asndu náa ku̱ba̱ʼ rí mikaʼwu, dí gájma̱a̱ náa ku̱ba̱ʼ mu̱phu̱ xa̱bu̱ bi̱ nuñajunʼ náa xuajin. 19 Mudu xa̱bu̱ bi̱ nuñajunʼ náa xuajin, bi̱ maguwáʼ náa xúgíʼ xuajin majkhaʼ dí rígá náa Israel.

20 Dí mbá kañiiʼ ku̱ba̱ʼ nindxu̱u̱ xóo mbá cuadrado, náa mámbá níjniúu maʼni 13 mil metro. Gíʼmaa maguanúu xóo ku̱ba̱ʼ mikaʼwu ga̱jma̱a̱ ku̱bo̱o̱ʼ xuajin.

21 Ku̱ba̱ʼ dí maguanúu náa mbá nájma̱ níjniúu ga̱jma̱a̱ náa níjniúu ku̱bo̱o̱ʼ xuajin mani̱ndxu̱u̱ ku̱bo̱o̱ʼ bi̱ kayá edxu̱u̱. Marigá náa níjniúu ndawaa dí naguanúu xígií náa nagájnuu a̱jkha̱ʼ ga̱jma̱a̱ xígií náa narámaaʼ a̱jkha̱ʼ náa ku̱ba̱ʼ rúʼko̱, maʼni 13 mil metro. Ndawoo ku̱bo̱o̱ʼ bi̱ kayá edxu̱u̱ ga̱jma̱a̱ ndawoo ku̱bu̱únʼ bi̱ mbá a̱jma̱ xuajin ma̱jkha̱ʼ maʼni mbiʼtháán. Ku̱ba̱ʼ mikaʼwu ga̱jma̱a̱ guʼwá náa rí nduyamajkuíí Dios marigá náa tapo̱o̱ ku̱ba̱ʼ rúʼko̱.

22 Ku̱bu̱únʼ levitas ga̱jma̱a̱ ku̱bo̱o̱ʼ xuajin marigá náa ta̱pho̱o̱ ku̱bo̱o̱ʼ bi̱ kayá edxu̱u̱. Ku̱bo̱o̱ʼ bi̱ kayá edxu̱u̱ martumuu náa ndawoo Judá ga̱jma̱a̱ náa ndawoo Benjamín.

23 Ku̱ba̱ʼ rí nida̱a̱ʼ i̱ʼwáʼ xuajin majkhaʼ, ku̱ba̱ʼ rí ndiyáa Benjamín nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu asndu náa ndawaa dí rígá xígií náa narámaaʼ a̱jkha̱ʼ. 24 Ku̱ba̱ʼ dí nigruigúu Simeón nartumuu náa ku̱ba̱ʼ dí nigruigúu Benjamín, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 25 Ku̱ba̱ʼ dí nigruigúu Isacar nartumuu náa ku̱ba̱ʼ dí nigruigúu Simeón, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 26 Ku̱ba̱ʼ dí nigruigúu Zabulón nartumuu náa ku̱ba̱ʼ dí nigruigúu Isacar, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 27 Ku̱ba̱ʼ dí nigruigúu Gad nartumuu náa ku̱ba̱ʼ dí nigruigúu Zabulón, nagi̱ʼdu̱u̱ náa ndawaa dí rígá xígií náa nagájnuu a̱jkha̱ʼ na̱jkha̱ gátumuu náa narámaaʼ a̱jkha̱ʼ. 28 Ndawaa dí rígá xígií náa sur, dí kri̱ga̱ náa ndawoo Gad, nagi̱ʼdu̱u̱ náa Tamar nanújngoo náa iyaʼ dí rígá náa Meribat-Cadés, na̱jkha̱nú náa Mata,* ga̱jma̱a̱ ikhí najkha̱a̱ xígií náa lamáa Mba̱a̱.*

29 Ku̱ba̱ʼ rúʼko̱ dí ikháanʼla murui̱ʼta̱a̱ xóo herencia, muda̱a̱ xuajin majkhaʼ dí rígá náa Israel, ga̱jma̱a̱ rúʼko̱ dí mbayáa mámbáa dí ikhiin”, eʼthí Tátá Jeobá bi̱ itháán mba̱a̱.

30 “Rígi̱ gánindxu̱u̱ riejuun xuajin: Magi̱ʼdu̱u̱ xígií náa norte rí maʼni 2 mil 300 metro* dí mbaʼ.

31 Náa xkrugoo xuajin matima mbiʼyuu xuajin majkhaʼ dí rígá náa Israel. Marigá mbá ajtsú xkrugua xígií náa norte: Mbá maʼni xkrugoo Rubén, mbá maʼni xkrugoo Judá ga̱jma̱a̱ i̱mba̱ maʼni xkrugoo Leví.

32 Xígií náa nagájnuu a̱jkha̱ʼ maʼni 2 mil 300 metro, ga̱jma̱a̱ ikhí marigá mbá ajtsú xkrugua: Mbá maʼni xkrugoo José, mbá maʼni xkrugoo Benjamín ga̱jma̱a̱ i̱mba̱ maʼni xkrugoo Dan.

33 Xígií náa sur maʼni 2 mil 300 metro, ga̱jma̱a̱ ikhí marigá mbá ajtsú xkrugua: Mbá maʼni xkrugoo Simeón, mbá maʼni xkrugoo Isacar ga̱jma̱a̱ i̱mba̱ maʼni xkrugoo Zabulón.

34 Xígií náa narámaaʼ a̱jkha̱ʼ maʼni 2 mil 300 metro, ga̱jma̱a̱ ikhí marigá mbá ajtsú xkrugua: Mbá maʼni xkrugoo Gad, mbá maʼni xkrugoo Aser ga̱jma̱a̱ i̱mba̱ maʼni xkrugoo Neftalí.

35 Dí mbájndi xuajin maʼni 9 mil 200 metro.* Asndu nákha mbiʼi rúʼko̱, xígi̱ kaʼnii gáʼni mbiʼyuu xuajin: Jeobá xtáa ikhí”.