Ezequiel

36 “Ikháán a̱ʼdióo xa̱biya̱, aratáríya̱ʼ dí magíʼnuu kúbá dí rígá náa Israel, arathún: ‹Ikháanʼla kúbá dí rígá náa Israel, gudxawíín ajngóo Jeobá. 2 Rígi̱ dí naʼthí Tátá Jeobá bi̱ itháán mba̱a̱: “Xa̱bu̱ sia̱nʼ ndrígala niʼthí rí magíʼnala: ‹¡Májánʼ! ¡Asndu náa rí itháán mitsídánʼ dí nirígá nákha wajyúuʼ ni̱jkha̱nú niʼni ndríguxu!›”›.

3 Ikha jngóo aratáríya̱ʼ: ‹Rígi̱ dí naʼthí Tátá Jeobá bi̱ itháán mba̱a̱: “Numuu dí ikhiin nini̱ gámbáa xuajñala ga̱jma̱a̱ nini̱ gínáanʼ asndu náá, mu xúʼko̱ ikháanʼla ga̱jma̱a̱ xúgíʼ dí guaʼdáá maʼga̱nú mani̱ndxu̱u̱ ndrígu̱ún bi̱ nikáwíin náa majñu̱únʼ xa̱bu̱ xuajin, ga̱jma̱a̱ numuu rí xa̱bu̱ nuthi má xúʼko̱ rí minduwaʼ ga̱jma̱a̱ numala, 4 ikha jngóo, ikháanʼla kúbá dí rígá náa Israel, ¡gudxawíín ajngóo Tátá Jeobá bi̱ itháán mba̱a̱! Rígi̱ dí naʼthúún Tátá Jeobá bi̱ itháán mba̱a̱, kúbá ga̱jma̱a̱ bíjní, náa na̱jkha̱ iyaʼ ga̱jma̱a̱ mata,* náa rí niguámbáa ga̱jma̱a̱ xuajin rí niguanáa dí bi̱ nikáwíin náa xuajin dí rígá mbájndi nirawíi dí rígá ikhí ga̱jma̱a̱ ninindxu̱u̱ mbá rí nutsijmaa, 5 rígi̱ dí naʼthúún Tátá Jeobá bi̱ itháán mba̱a̱: ‹Asndu nákásngañuʼ gátha ga̱jma̱a̱ numún bi̱ nikáwíin náa majñu̱únʼ xa̱bu̱ xuajin ma̱ngaa ga̱jma̱a̱ numún xúgíinʼ bi̱ kúwá náa Edom, ikhiin bi̱ asndu nadxún ga̱jma̱a̱ tséyamajkuíí, nuthi rí ku̱bo̱ʼ nindxu̱u̱ ndrígu̱ún ikhiin mu maguanún ga̱jma̱a̱ jmbaaʼ náa rígá rajxa̱ ga̱jma̱a̱ muda̱a̱ dí rígá ikhí›”›.

6 Ikha jngóo aratáríya̱ʼ dí magíʼnuu ku̱ba̱ʼ Israel ga̱jma̱a̱ arathún kúbá, bíjní, náa na̱jkha̱ kúʼúun iyaʼ ga̱jma̱a̱ mata: ‹Rígi̱ dí naʼthí Tátá Jeobá bi̱ itháán mba̱a̱: “¡Gu̱ya̱a̱! Xa̱bu̱ xuajin nini̱ majthiinʼ, ikha jngóo dí nakiʼnún ga̱jma̱a̱ nakásngáñu̱nʼ”›.

7 Ikha jngóo rígi̱ dí naʼthí Tátá Jeobá bi̱ itháán mba̱a̱: ‹Ikhúún mínuuʼ nakujxí ñawúnʼ ga̱jma̱a̱ na̱xna̱ ajngóʼ dí xuajin dí tri̱ga̱ mijngii marigá má xúʼko̱ majthi̱ʼ náa ikhiin. 8 Mú ikháanʼla kúbá dí rígá náa Israel, majuaʼwíi ñawánla ga̱jma̱a̱ ma̱jma̱a̱ náa ikháanʼ xndú rí mu̱phu̱ xa̱bu̱ xuajñunʼ Israel, numuu rí ikhiin gítháán má matangi̱ín. 9 Numuu rí ikhúún xtáá ga̱jma̱á nindxa̱la, madxawun rí gútala ga̱jma̱a̱ majuiʼdu náa ikháanʼla. 10 Ma̱ni̱ rí makuwá mbaʼin xa̱bu̱ náa goʼwóo Israel, mbá xúgíinʼ ikhiin, ga̱jma̱a̱ náa xuajin makuwá xa̱bu̱ ma̱ngaa maguma májáanʼ dí niguámbáa. 11 Xúʼko̱, ma̱ni̱ rí maʼni mbaʼáanʼ ga̱jma̱a̱ maguaʼdíin xujkiála, ikháanʼ maʼgua̱nú maʼni mbaʼáanʼ. Ma̱ni̱ rí makuwá xa̱bu̱ náa ikháanʼ xó má nákha ginii, ga̱jma̱a̱ ma̱ni̱ rí maguaʼdáá itháán ki xóo nákha ginii, ikháanʼ maʼgua̱nú mbuya̱a̱ dí ikhúún nindxu̱ʼ Jeobá. 12 Ma̱ni̱ dí xa̱bu̱ xuajñunʼ Israel magún kruámúnʼ náa ikháanʼla, ga̱jma̱a̱ ikháanʼla mani̱ndxa̱la mbañúúnʼ. Ikháanʼ mani̱ndxa̱la dí mundrigúu ikhiin ga̱jma̱a̱ nditháan xúrawí káyala ejñala›”.

13 “Rígi̱ dí naʼthí Tátá Jeobá bi̱ itháán mba̱a̱: ‹Numuu dí ikhiin nuthanʼ “Nindxa̱a̱ʼ mbá ku̱ba̱ʼ dí nagudíin xa̱bu̱ ga̱jma̱a̱ naradíin e̱jñu̱ún xa̱bu̱”›, 14 ‹ikha jngóo nánguá maradíin itháán xa̱bu̱ ni má xáradíin e̱jñu̱ún xa̱bu̱, eʼthí Tátá Jeobá bi̱ itháán mba̱a̱. 15 Ni xániʼñúuʼ dí mutha wéñaaʼ xa̱bu̱ xuajin, ga̱jma̱a̱ ni xáni̱ dí maʼngo̱o̱ a̱jkia̱a̱nʼ itháán dí nutsijmáán xa̱bu̱, ma̱ngaa ni xátangaán matani̱ dí majngrádiinʼ xa̱bu̱ xuajñaanʼ›, eʼthí Tátá Jeobá bi̱ itháán mba̱a̱”.

16 Nigruígú mbu̱júu̱ ajngóo Jeobá. Niʼthúnʼ: 17 “A̱ʼdióo xa̱biya̱, índo̱ bi̱ kúwá náa goʼwóo Israel nikúwá náa ku̱bu̱únʼ. Nini̱ tsagáá ga̱jma̱a̱ xóo nikúwá ma̱ngaa xóo nini̱. Rí xóo nini̱ tsagáá, ndi̱yo̱o̱ xóo índo̱ nagajtaa eʼdiuu mbáa a̱ʼgu̱. 18 Ikha jngóo nixidirámuuʼ náa ikhiin dí nakásngañu̱ʼ ga̱jma̱a̱ numuu eʼdi ga̱jma̱a̱ numuu eʼdi dí nixidíí náa ku̱ba̱ʼ ma̱ngaa índo̱ nini̱ tsagáá ku̱ba̱ʼ numuu rí ndiyamajkhún xándú bi̱ xkawi̱i̱nʼ. 19 Ikha jngóo ni̱ni̱ dí majuadríʼiin náa majñu̱únʼ xa̱bu̱ xuajin ga̱jma̱a̱ náa i̱ʼwáʼ xuajin. Ninimbánuu numún xó má nikúwá ga̱jma̱a̱ xóo nini̱. 20 Mú índo̱ niguáʼnú náa xuajin rúʼko̱, xa̱bu̱ bi̱ kúwá ikhí nini̱ tsagáá mbiʼyuʼ rí kaʼwu índo̱ nithi: ‹Bugi̱ nindxu̱ún xa̱bu̱ xuajñuu Jeobá, mú ndiyóoʼ magajnún náa ku̱bu̱únʼ›. 21 Ikha jngóo majmuʼ mbiʼyuʼ rí kaʼwu, rí nini̱ gachíí bi̱ kúwá náa goʼwóo Israel índo̱ nigún náa i̱ʼwáʼ xuajin”.

22 “Ikha jngóo arathún rígi̱ bi̱ kúwá náa goʼwóo Israel: ‹Rígi̱ dí naʼthí Tátá Jeobá bi̱ itháán mba̱a̱: “Tséni̱ ga̱jma̱a̱ numala ikháanʼ bi̱ kuwáanʼ náa goʼwóo Israel, na̱ni̱ ga̱jma̱a̱ numuu mbiʼyuʼ rí kaʼwu rí ikháanʼ ni̱ni̱ gachíí náa majñu̱únʼ xa̱bu̱ xuajin dí nijkuala”›. 23 ‹Ma̱ni̱ kaʼwi̱i̱ mbiʼyuʼ rí mba̱a̱ dí ikháanʼla ni̱ni̱ gachíí náa majñu̱únʼ xa̱bu̱ xuajin, ga̱jma̱a̱ xa̱bu̱ buʼko̱ maguánú mbuyáá dí ikhúún nindxu̱ʼ Jeobá índo̱ gáni̱ kaʼwi̱i̱ mbiʼyuʼ náa majñala, ga̱jma̱a̱ ikhiin mbuyáá, eʼthí Tátá Jeobá bi̱ itháán mba̱a̱. 24 Magúwáanʼla náa majñu̱únʼ xa̱bu̱ xuajin, magímbáanʼla náa mbá xúgíʼ ku̱ba̱ʼ ga̱jma̱a̱ maʼgáaʼ kaguánʼla náa ku̱ba̱la. 25 Maxíjñáanʼla ga̱jma̱a̱ iyaʼ rí kaʼwu, ga̱jma̱a̱ ma̱ni̱ kaʼwáanʼla, ma̱ni̱ kaʼwáanʼla náa xúgíʼ rí niguma tsagáanʼla ga̱jma̱a̱ ma̱ni̱ kaʼwáanʼla mu xúyamajkhún xándú bi̱ xkawi̱i̱nʼ. 26 Maxnala mbá a̱jkia̱la rí nuxi̱ʼ ga̱jma̱a̱ magíwánʼ náa ikháanʼla mbá rí nuxi̱ʼ mbá rí maxkajxáanʼla mu̱ni̱. Maríyaaʼ náa ikháanʼ a̱jkia̱la dí itsí ga̱jma̱a̱ maxnala mbá a̱jkia̱la dí xuwiʼ.* 27 Ma̱ni̱ dí marigá tsiaki̱i̱ ndrígóʼ náa ikháanʼla, ga̱jma̱a̱ ma̱ni̱ rí munimbáníí ikha ndrígóʼ ga̱jma̱a̱ ikháanʼ munimbala xtángoo ndrígóʼ ma̱ngaa munimbáníí. 28 Ikháanʼ makuwáanʼ náa ku̱ba̱ʼ rí nixnu̱u̱n wajin xiʼñála. Ikháanʼ mani̱ndxa̱la xuajñunʼ ga̱jma̱a̱ ikhúún mani̱ndxu̱ʼ Dios ndrígala›.

29 ‹Ma̱ni̱ káwáanʼla náa xúgíʼ rí mitsaga. Mandxa̱ʼo̱o̱ trigo ga̱jma̱a̱ ma̱ni̱ dí marigá mbaʼa, ni xákuʼmá ewiʼ náa ikháanʼla. 30 Ma̱ni̱ dí marigá mbaʼa xndúu ixi̱ ga̱jma̱a̱ rí najma̱a̱ xanáá, mu xúʼko̱ ikháanʼla xumíniiʼ ga̱jma̱a̱ rí ma̱jti̱ʼ índo̱ gáʼniala ewiʼ náa majñu̱únʼ xa̱bu̱ xuajin. 31 Ikhú marmáʼáan a̱jkia̱la gáʼni dí raʼkhí dí ni̱nila ga̱jma̱a̱ xóo nikuwáanʼla, dí tánindxu̱u̱ májánʼ, mawi̱yala gáʼni dí nikiéʼkala ga̱jma̱a̱ dí xkawiʼ dí ni̱nila. 32 Gu̱ya̱a̱la rígi̱: Tséni̱ ga̱jma̱a̱ numala ikháanʼ, eʼthí Tátá Jeobá bi̱ itháán mba̱a̱. Nandoʼ dí mati̱ya̱la ga̱jma̱a̱ magajnúu majkuala ga̱jma̱a̱ numuu xóo nindxa̱la, ikháanʼla bi̱ kuwáanʼ náa goʼwóo Israel›.

33 Rígi̱ dí naʼthí Tátá Jeobá bi̱ itháán mba̱a̱: ‹Mbiʼi dí ma̱ni̱ kaʼwi̱i̱ náa xúgíʼ dí nikiéʼkala, ma̱ni̱ dí náa xuajin makuwá xa̱bu̱ ga̱jma̱a̱ dí náa niguámbáa maguma májáanʼ. 34 Majuiʼdu náa ku̱ba̱ʼ rí niguanáa, náa rí niguanáa mu xúgíinʼ bi̱ gánújngún ikhí mbuyáá. 35 Ga̱jma̱a̱ xa̱bu̱ muthi: “Ku̱ba̱ʼ rí niguanáa ni̱jkha̱nú ninindxu̱u̱ xóo jardín* dí rígá náa Edén, náa xuajin dí niguámbáa, rí niguanáa ga̱jma̱a̱ rí nijmigu̱u̱, rí xúgi̱ nindxu̱u̱ xuajin dí kúgumaʼá ga̱jma̱a̱ kúwá xa̱bu̱”. 36 Ga̱jma̱a̱ xa̱bu̱ xuajin bi̱ niguanún bi̱ kúwá mbájndi náa ikháanʼla maguánú mbuyáá dí ikhúún, Jeobá, ni̱ni̱ májáanʼ rí niguma gámbáa ga̱jma̱a̱ nidu̱u̱ náa mbaaʼ rí niguanáa. Ikhúún, Jeobá, ni̱tha̱ rígi̱ ga̱jma̱a̱ ni̱ni̱›.

37 Rígi̱ dí naʼthí Tátá Jeobá bi̱ itháán mba̱a̱: ‹Ma̱ngaa maniʼñuuʼ dí bi̱ kúwá náa goʼwóo Israel mundo̱ʼo̱ʼ rí ma̱ni̱ rígi̱ ga̱jma̱a̱ numún: Ma̱ni̱ rí makuwá mbaʼin xa̱bu̱ náa xuajñún xóo mbaʼin mugu̱. 38 Ikhú ikháanʼla muʼgua̱nú mani̱ndxa̱la xóo mugiu̱ún bi̱ kaʼwiin, xóo mugu̱ bi̱ kúwá náa Jerusalén índo̱ naʼni ndxa̱a̱: Majtíin mugiu̱ún xa̱bu̱ náa xuajin dí niguámbáa, ga̱jma̱a̱ ikháanʼla muʼgua̱nú mbuya̱a̱ dí ikhúún nindxu̱ʼ Jeobá›”.