Oseas
10 “Israel nindxu̱u̱ mbá ixu̱u̱ uva dí na̱jkha̱ rámbáa* ga̱jma̱a̱ naxná xndúu.
Índo̱ naxná itháan xndúu, itháan mbaʼa náa mikarámáʼ tsigijñaʼ eʼni,
índo̱ itháan májánʼ ejma̱a̱ xndúu náa ku̱ba̱ʼ, itháan májánʼ eʼni poste rí mitsúʼkháan.*
2 A̱jkiu̱u̱n gíʼdoo a̱jma̱ inuu,
rí xúgi̱ majuiʼthá rí guáʼdáá aʼkhúún.
Mbáa maxpígúu náa nakarámáʼ tsigijñaʼ ga̱jma̱a̱ maʼni gámbáa poste rí mitsúʼkháan ndrígu̱ún.
3 Rí xúgi̱ muthi: ‹Na̱nguá guáʼdálu mbáa rey numuu rí támíñúlú kuʼyáá Jeobá.
Ndiéjunʼ gáʼngo̱o̱ gaʼni mbáa rey ga̱jma̱a̱ numulúʼ rá.›
4 Ajngáa rí nuthi ragíʼdoo numuu, nuni̱ nduwaʼ rí nuxudamíjna̱ muni̱ ga̱jma̱a̱ nuxna ajngún,
ikha jngóo dí ra̱májánʼ rí nakráʼáan nindxu̱u̱ xóo iná mbi̱i̱ʼ náa riyooʼ xku̱bi̱.
5 Xa̱bu̱ Samaria mamiñún kuyáá xándú bi̱ nindxu̱u̱ xóo a̱ʼdá xédí bi̱ xtáa náa Bet-Aven.
Xa̱bu̱ xuajñuu makuwá ngíná ga̱jma̱a̱ numuu ikhaa,
mangiin ndxajkun bi̱ nduyamajkhún dioses bi̱ ragájkhun, nadxún kuyáá ikhaa ga̱jma̱a̱ nuxnáá gamajkhu,
numuu rí maʼgá kiʼyáa mitsínguánʼ náa ikhiin.
6 Maʼga kiʼyáa náa Asiria xóo mbá regalo rí majuixnáá mbáa rey.
Efraín magajnúu gamajkuu
ma̱ngaa Israel maguma majthi̱i̱ʼ ga̱jma̱a̱ numuu rí niʼnimbo̱o̱ consejo dí ra̱májánʼ.
7 Samaria ga̱jma̱a̱ rey ndrígóo maguma gámbíin,*
xóo mbá ñawúunʼ ixi̱ rí kua̱ʼa̱n náa awúu̱n iyaʼ.
8 Náa mbaaʼ rí nduyamajkhún xándú dí rígá náa Bet-Aven ga̱jma̱a̱ aʼkhá ndrígóo Israel maguma gámbáa.
Tsuwanʼ ga̱jma̱a̱ iná dí gíʼdoo tsuñuuʼ makráʼáan náa nakarámáʼ tsigijñaʼ.
Xa̱bu̱ muthán kúbá ‹¡Atruguaruwáanʼxu!›
ga̱jma̱a̱ bíjní muthán ‹¡Atarkaʼwáanʼxu!›.
9 Ikháán Israel, nitani̱ má xúʼko̱ aʼkhá asndu mbiʼi ndrígóo Guibeá.
Nikuwáanʼla má xúʼko̱ runi̱ aʼkhá ikhí.
Guerra dí nirígá náa Guibeá táʼni gámbíin mbá kayuuʼ bi̱ ra̱míjíinʼ.
10 Ma̱ngaa maxprígún asndu índo̱ má gáʼndoʼ ikhúún.
Magimbíin xa̱bu̱ muni̱ gajmiún ikhiin
rí nikiéʼkúún xa̱bu̱ xuajin Israel maxtuʼwarámáʼ náa rexu̱ún xóo mbá yugo.
11 Efraín nindxu̱u̱ mbáa a̱ʼdá xédí e̱ʼgú bi̱ nijuiʼsngáá, nanigu̱u̱ʼ makujmbi̱i̱ tsígáʼ,
ikha jngóo ni̱ni̱ mba̱a̱ a̱jkiu̱nʼ ka̱yo̱o̱ rexo̱o̱ rí mitsiʼyá.
Rí xúgi̱ ma̱ni̱ rí mbáa magrigu tsu̱du̱u̱ Efraín maʼga.
Judá maxnúu xku̱bi̱, Jacob maʼni rí ku̱ba̱ʼ maʼni̱i̱ xkua̱.
12 Gu̱du rí jmbu xóo mbá tsígáʼ náa ikháanʼla ga̱jma̱a̱ gurajxi̱i̱ ngajua rí tsétumuu.*
Guxna̱a̱ xku̱bi̱ náa ku̱ba̱ʼ rí ma̱ndoo ma̱jma̱a̱ májánʼ,
nákhá xóo rígá mbiʼi rí ma̱ndoo mbuʼyáaʼ Jeobá,
asndu índo̱ ikhaa gáʼkha̱ ga̱jma̱a̱ maʼsngála rí jmbu.
13 Mú ikháanʼla nixku̱bi̱ náa dí ra̱májánʼ,
nirajxi̱i̱la dí ra̱májánʼ
ma̱ngaa niphula xndúu rí nijma̱a̱ náa rí minduwaʼ,
numuu rí i̱ndó niku̱ma̱a̱ʼ xtayaminaʼ ikháán índo̱ nitani̱ rí nandaʼ
ma̱ngaa niku̱ma̱a̱ʼ xtañún xa̱bia̱a̱ʼ bi̱ xkujiinʼ.
14 Matujxu̱u̱n xa̱bu̱ ga̱jma̱a̱ numuu xuajñaanʼ,
ga̱jma̱a̱ xúgíʼ xuajin ndrígáaʼ rí kúgumaʼá maguma gámbáa,
xó má Salmán niʼni gámbóo goʼwóo Arbel
mbiʼi rí nigiʼdu̱u̱n, índo̱ gu̱ʼu̱ gajmiún e̱jñu̱ún nirujkuiin.
15 Rúʼko̱ rí magíʼnaa ikháán Betel, ga̱jma̱a̱ numuu xúgíʼ dí ra̱májánʼ nitani̱.
Índo̱ gájtsiri̱ga̱, rey ndrígóo Israel maguma gámbáa* má tsiaki̱i̱”.