Joel
1 Rígi̱ nindxu̱u̱ ajngóo Jeobá dí nigruigú Joel* a̱ʼdióo Petuel:
2 “Xabuanii, gudxawíínla,
xúgiáanʼ ikháanʼ xa̱bu̱ bi̱ kuwáanʼ náa xuajin, guʼgíʼ edxala mudxawíín.
Lá nirígá mbá miʼtsú xóo rígi̱ mbiʼi rí ikháanʼ kuwáanʼ
o mbiʼi dí nikúwá wajin xiʼñála ráʼ.
3 Guthu̱u̱n e̱jña̱la,
ga̱jma̱a̱ e̱jña̱la guthúún e̱jñu̱ún,
e̱jñu̱ún ikhiin guthúún e̱jñu̱ún bi̱ makuwá nda̱wa̱á.
4 Rí niniñuuʼ tsíʼbu* bi̱ naʼni gámbáa, ni̱ʼkhu̱ tsíʼbu bi̱ gíʼdoo xniuunʼ,
rí niniñuuʼ tsíʼbu bi̱ gíʼdoo xniuunʼ, ni̱ʼkhu̱ tsíʼbu bi̱ nda̱a̱ xniuunʼ,
rí niniñuuʼ tsíʼbu bi̱ nda̱a̱ xniuunʼ, ni̱ʼkhu̱ tsíʼbu bi̱ na̱ʼkhu̱ xúgíʼ kayuuʼ.
5 ¡Ikháanʼla xa̱bu̱ najngi̱i̱n, guguajxu̱u̱nʼla ga̱jma̱a̱ gumbi̱ya̱ʼ!
Gagáwíinʼ a̱jkia̱la xúgiáanʼ ikháanʼ bi̱ nawanla vino,
numuu rí nándáa vino nuxi̱ʼ muwanla.
6 Numuu rí mbá xuajin dí gíʼdoo tsiaki̱i̱ ga̱jma̱a̱ ra̱ʼkhá tháán mbaʼin xa̱bi̱i̱ nitu̱ʼu̱u̱n náa xuajñunʼ.
Iñúúnʼ nindxu̱u̱ xóo iñuuʼ mbáa león ga̱jma̱a̱ itsu̱ rawúúnʼ nindxu̱u̱ xóo itsu̱ rawuunʼ mbáa león.
7 Nini̱ gámbúu̱n ixi̱ uva ndrígóʼ, i̱ndó xmindiuuʼ gíʼ niniña̱a̱nʼ ixi̱ higo ndrígóʼ.
Niriʼíí mbá kayuuʼ xtóo ga̱jma̱a̱ kaníí niniña̱a̱nʼ,
asndu tsaʼtsaʼ ñawúunʼ gíʼ nini̱i̱.
8 Gakuwáanʼla ngíná xóo mbáa ndxáʼgú bi̱ xóó tsébóoʼ ga̱jma̱a̱ xa̱bu̱, bi̱ nagíʼ xtíin mi̱du̱*
numuu rí nikháñúu dxámá bi̱ mbayáa.
9 Náa goʼwóo Jeobá nánguá ejkha̱ kiʼda itháan tsigijñaʼ rí tsígáʼ, ni má tsigijñaʼ dí nagadirámuuʼ.
Xa̱bi̱i̱ Jeobá bi̱ nindxu̱ún ndxajkun, kúwá ngíná.
10 Mbaaʼ niguma gámbáa, ku̱ba̱ʼ xtáa ngíná.
Tsígáʼ niguámbá, nándáa vino nuxi̱ʼ, niguámbá aceite.
11 Bi̱ nudu nánguá eyáá rí muni̱ ga̱jma̱a̱ bi̱ nudu uva kúwá ngíná
numuu rí nándáa trigo ni má cebada.
Nichúu xúgíʼ rí nijuiʼdu xanáá.
12 Ixi̱ uva nijndooʼ,
ixi̱ higo nijnduxtá.
Ixi̱ granada, palmera ga̱jma̱a̱ ixi̱ manzana,
xúgíʼ ixi̱ dí rígá xanáá nijndooʼ.
Gagi dí nirígá náa xuajin nigua̱jta̱a̱ majthi̱ʼ.
13 Ndxajkun, gaguʼwánla xtíin mi̱du̱* ga̱jma̱a̱ gakuwáanʼla ngíná.
Gagáwíinʼ a̱jkia̱la ikháanʼ bi̱ nuñejunʼ náa nakarámáʼ tsigijñaʼ.
Xa̱bi̱i̱ Dios ndrígóʼ, gata̱ʼa̱la ga̱jma̱a̱ kañiiʼ mbruʼun gúʼgíʼ xtíin mi̱du̱.
Numuu rí náa goʼwóo Dios ndrígala nánguá ejkha̱ kiʼda tsigijñaʼ rí tsígáʼ, ni má tsigijñaʼ dí nagadirámuuʼ.
14 Gutañájunʼ* rí murkueyimijná,* gugímbíin xa̱bu̱ mu mani̱ndxu̱u̱ mbá mbiʼi kiejuunʼ.
Gugímbíin bi̱ kuya̱ edxu̱u̱ ga̱jma̱a̱ xúgíinʼ xa̱bu̱ xuajin
náa goʼwóo Jeobá Dios ndrígala, gunda̱ʼa̱a̱ Jeobá rí mambáyala.
15 ¡Ra̱ʼkhá tháán gamíi gáʼni!
Numuu rí mbiʼi ndrígóo Jeobá gíʼ mijngii
bi̱ gíʼdoo xúgíʼ tsiaki̱i̱ ma̱ʼkha̱ ga̱jma̱a̱ maʼni gámbáa.
16 Lá raʼkháa ndi̱ya̱a̱xu̱ xóo nigajta káyuxu ganitsu ráʼ.
Lá raʼkháa niguámbáa gagi ga̱jma̱a̱ tsímáá dí rígá náa goʼwóo Dios ndrígúxu̱ ráʼ.
17 Tsígáʼ* rí nudu ga̱jma̱a̱ pala nijndooʼ.
Niguanájchíi xtagaʼu.
Niguma gámbáa xtagaʼu numuu rí nijndooʼ tsígáʼ.
18 ¡Asndu xujkhúʼ kúwá ngíná!
¡Gi̱i̱ ñuʼún, jnguʼwún xedi̱ numuu dí nda̱a̱ ra̱jxa̱!
Mugu̱ mangiin numíníiʼ ga̱jma̱a̱ numuu gamiéjunʼ.
19 Mú mandxa̱ʼwa̱a̱ ikháán Jeobá,
numuu rí aguʼ niʼni gámbáa ra̱jxa̱ dí rígá náa ku̱ba̱ʼ mijxooʼ,*
ga̱jma̱a̱ riʼyu̱u̱ aguʼ nitsikháa xúgíʼ ra̱jxa̱ dí rígá xanáá.
20 Asndu xujkhú xáná nduñáaʼ,
numuu rí nijndo̱o̱ʼ iyaʼ rí na̱jkha̱ kúʼúun
ga̱jma̱a̱ aguʼ nitsikháa mbaaʼ náa rígá ra̱jxa̱ náa ku̱ba̱ʼ mijxooʼ”.