Ezequiel

33 Nigruígú ajngóo Jeobá. Niʼthúnʼ: 2 “A̱ʼdióo xa̱biya̱, arathún e̱jñu̱ún xa̱bu̱ xuajñaanʼ:

‹Á mu nakuʼmá mbá espada náa mbá xuajin, ga̱jma̱a̱ xúgíinʼ xa̱bu̱ xuajin bi̱ kúwá ikhí nugíiʼ mbáa xa̱bu̱ mu mayejngoo, 3 ga̱jma̱a̱ índo̱ ikhaa gáʼyoo dí na̱ʼkha̱ mbá espada náa xuajin mandiyuu chi̱ji̱ʼ ga̱jma̱a̱ maʼthúún xa̱bu̱ xuajin. 4 Á mu mbáa naʼdxawuun aʼwóo chi̱ji̱ʼ, mú tséʼnimbo̱o̱ ga̱jma̱a̱ na̱ʼkha̱nú mbá espada naxíyáa,* ikhaa má gágiʼdoo aʼkhúun á mu nakháñuu.* 5 Niʼdxawuun aʼwóo chi̱ji̱ʼ, mú táʼnimbo̱o̱. Ikhaa má gágiʼdoo aʼkhúun á mu nakháñuu.* Á mu naʼnimbo̱o̱ xákháñúu.

6 Á mu bi̱ nayejngoo ndaʼyoo na̱ʼkha̱ mbá espada, mú tséndiyuu chi̱ji̱ʼ, ga̱jma̱a̱ xa̱bu̱ tsédxawíín nimbá, tséyáá á mu na̱ʼkha̱ mbá espada ga̱jma̱a̱ nagudíin tikhuun dí ikhiin, xa̱bu̱ bi̱ gákháñún makhañún ga̱jma̱a̱ numuu aʼkhúún, mú eʼdiún manda̱ʼa̱a̱ bi̱ nayejngoo›.

7 Ikháán a̱ʼdióo xa̱biya̱, niʼgíinʼ mu matiejngoo náa goʼwóo Israel ga̱jma̱a̱ índo̱ gátadxawíín mbá ajngáa dí gátha̱, marathu̱u̱n ga̱jma̱a̱ numuʼ. 8 Á mu mbáa xa̱bu̱ ra̱májáanʼ na̱thu̱u̱n ‹Xa̱bu̱ ra̱májáanʼ, ¡makhañáaʼ!›, mú, á mu ikháán tsératháán xa̱bu̱ ra̱májáanʼ mu maniñuuʼ raʼni dí ra̱májánʼ, ikhaa makhañúu xóo mbáa xa̱bu̱ ra̱májáanʼ ga̱jma̱a̱ numuu aʼkhúun, mú eʼdiuu marumáá ikháán.* 9 Mú á mu ikháán naratamáʼáán xa̱bu̱ ra̱májáanʼ dí maniñuuʼ raʼni dí ra̱májánʼ, mú ikhaa tsíyoo gániñuuʼ raʼni dí ra̱májánʼ, makhañúu ga̱jma̱a̱ numuu aʼkhúun, mú ikháán makríña̱a̱nʼ.

10 Ga̱jma̱a̱ ikháán a̱ʼdióo xa̱biya̱, arathún bi̱ kúwá náa goʼwóo Israel: ‹Ikháanʼ ni̱tha̱la: “Nixujximíjna̱xu ga̱jma̱a̱ ndu̱ya̱a̱xu dí aʼkhúxu̱ mikiwu̱n, naʼni rí makáwábáanʼxu. Xú káʼnii lá gándoo xóó gákuwáanʼ rá.”› 11 Arathún: ‹“Xó má ikhúún gajkhun xtáá, eʼthí Tátá Jeobá bi̱ itháán mba̱a̱, tsédxu’ índo̱ nakháñuu mbáa xa̱bu̱ ra̱májáanʼ, mú nadxuʼ índo̱ mbáa xa̱bu̱ ra̱májáanʼ nariʼkhu̱u̱ dí naʼni ga̱jma̱a̱ naxtáa má xúʼko̱. Guniʼñááʼ ru̱ni̱ dí ra̱májánʼ, xúʼko̱, guniʼñááʼ. Ikháanʼ bi̱ kuwáanʼla náa goʼwóo Israel, náá numuu rí mbaʼyóoʼ makhañála rá.”›

12 Ikháán a̱ʼdióo xa̱biya̱, arathún rígi̱ e̱jñu̱ún xa̱bu̱ xuajñaanʼ: ‹Rí májánʼ dí naʼni xa̱bu̱ májáanʼ xáʼni kríya̱a̱ʼ índo̱ gákujximínáʼ, ni dí ra̱májánʼ dí naʼni xa̱bu̱ ra̱májáanʼ xáʼni majngrádaaʼ índo̱ gániñuuʼ raʼni dí ra̱májánʼ. Ga̱jma̱a̱ xúʼko̱ má mbáa xa̱bu̱ májáanʼ índo̱ gákiéʼkúun, ni xándoo maxtáa maski ajndu niʼni dí májánʼ. 13 Á mu ikhúún na̱thu̱u̱n mbáa xa̱bu̱ májáanʼ “Ikháán maraxtaa”, mú ikhaa naku̱mu̱u̱ kaʼyaminaʼ dí naʼni má rí májánʼ, ga̱jma̱a̱ ikhú naʼni dí ra̱májánʼ, nimbá rí májánʼ dí niʼni ni xármáʼáan a̱jkiu̱nʼ, ikhaa makhañúu ga̱jma̱a̱ numuu dí niʼni dí ra̱májánʼ.

14 Á mu ikhúún na̱thu̱u̱n xa̱bu̱ ra̱májáanʼ “Ikháán makhañáaʼ”, mú ikhaa naniñuuʼ raʼni aʼkhá ga̱jma̱a̱ naʼni rí májánʼ, 15 nartanga̱a̱ dí nixnáá mu maxnátiʼña rí gíʼdoo, ma̱ngaa nartanga̱a̱ dí niʼni kúwáʼ ga̱jma̱a̱ naʼnimbánuu xtángoo ndrígóʼ, ikhaa maxtáa má xúʼko̱, xákháñúu. 16 Ni xármáʼáan a̱jkiu̱nʼ gáʼni nimbá aʼkhá rí nikudaminaʼ. Ga̱jma̱a̱ numuu rí niʼni dí jmbu ma̱ngaa rí májánʼ, ikhaa maxtáa má xúʼko̱›.

17 Xa̱bu̱ xuajñaanʼ nithi ‹Ra̱májánʼ kambo̱o̱ Jeobá›, mú kambu̱ún ikhiin nindxu̱u̱ ra̱májánʼ.

18 Á mu mbáa xa̱bu̱ májáanʼ naniñuuʼ raʼni dí májánʼ ga̱jma̱a̱ naʼni dí ra̱májánʼ, makhañúu ga̱jma̱a̱ numuu rúʼko̱. 19 Á mu mbáa xa̱bu̱ ra̱májáanʼ naniñuuʼ raʼni dí ra̱májánʼ dí niʼni, nagíʼdu̱u̱ naʼni dí májánʼ ga̱jma̱a̱ dí nindxu̱u̱ jmbu, ikhaa maxtáa má xúʼko̱.

20 Mú ikháanʼla ni̱tha̱: ‹Ra̱májánʼ kambo̱o̱ Jeobá›. Ikhúún manimbánuu numuu mámbáa xó má naʼni, ikháanʼla bi̱ kuwáanʼ náa goʼwóo Israel”.

21 Nda̱wa̱á kayuuʼ, índo̱ niʼni 12 tsiguʼ dí ni̱jkha̱ kiʼdáanʼxu, dí gu̱wa̱ʼ gu̱nʼ dí witsu mbiʼi dí gu̱nʼ rúʼko̱, mbáa xa̱biya̱ bi̱ nikríya̱a̱ʼ náa Jerusalén ni̱ʼkha̱ gáʼyoʼ ga̱jma̱a̱ niʼthúnʼ: “¡Niguámbáa xuajin!”.

22 Mbá mbruʼun wapháá nákha xóó tséʼkha̱nú xa̱biya̱ bi̱ niʼni kríyamínáʼ, nirígá tsiaki̱i̱ ndrígóo Jeobá* náa ikhúún, ikhaa nirmbáʼtoo rawunʼ nákha xóó tséʼkha̱nú xa̱biya̱ rí i̱mba̱ néjtsuu. Ikha jngóo, paʼta rawunʼ niguanúu ga̱jma̱a̱ nánguá niguanúʼ chíjmáa.

23 Ikhú nigruígú ajngóo Jeobá. Niʼthúnʼ: 24 “A̱ʼdióo xa̱biya̱, xa̱bu̱ bi̱ kúwá náa xuajin rí niguámbáa rígi̱, kúwá ruthi ga̱jma̱a̱ numuu ku̱ba̱ʼ ndrígóo Israel: ‹Abrahán ninindxu̱u̱ mbáwíí xa̱bu̱, ga̱jma̱a̱ ikhaa ni̱jkha̱nú ninindxu̱u̱ ku̱bo̱o̱ʼ rígi̱. Mú ikháanʼxu̱ mbaʼáanʼ. Ga̱jma̱a̱ nikánúxu ku̱ba̱ʼ rígi̱ mu maʼni mbayuxu›.

25 Ikha jngóo arathún: ‹Rígi̱ dí naʼthí Tátá Jeobá bi̱ itháán mba̱a̱: “Ikháanʼla kuwáanʼ ruphu̱ xuwiʼ dí gíʼdoo eʼdiuu ga̱jma̱a̱ nakumalaʼ kuñu̱u̱n xándú xkawi̱i̱nʼ bi̱ kuaʼdiin ga̱jma̱a̱ nuxidíí má xúʼko̱ eʼdi. Ikha jngóo náá numuu rí maʼni kubala ikháanʼ rígi̱ rá. 26 Nikumala ku̱ya̱a̱ espada ndrígala ga̱jma̱a̱ nixnajxímíjna̱ mu̱ni̱ rí itháán mitsaga ga̱jma̱a̱ mbá xúgiáanʼla nixuʼdámíjná aʼkhá gajmiála* guʼñu̱ún xa̱bu̱ numbaaʼ gajmiála. Ikha jngóo náá numuu rí maʼni kubala ikháanʼ rígi̱ rá.”›

27 Gíʼmaa dí marathu̱u̱n rígi̱: ‹Rígi̱ dí naʼthí Tátá Jeobá bi̱ itháán mba̱a̱: “Xó má ikhúún gajkhun xtáá, bi̱ kúwíin náa xuajin rí niguámbáa makhañún ga̱jma̱a̱ espada, bi̱ kúwíin náa xanáá muphu̱u̱n xujkhú xáná, bi̱ kúwíin náa tsíñu ga̱jma̱a̱ náa dí rakáʼnii mi̱dxu̱ʼ makhañún ga̱jma̱a̱ nandii. 28 Ma̱ni̱ dí ku̱ba̱ʼ rígi̱ maguanáa xóo mbá ku̱ba̱ʼ mijxooʼ* rí niguanáa mbá kayuuʼ ga̱jma̱a̱ ma̱ni̱ gámbóʼ rí naʼnimbamínáʼ. Ma̱ngaa kúbá dí rígá náa Israel maguanáa, nimbáa xánújngoo ikhí. 29 Ga̱jma̱a̱ maguánú mbuyáá dí ikhúún nindxu̱ʼ Jeobá, índo̱ gáni̱ rí ku̱ba̱ʼ rígi̱ mani̱ndxu̱u̱ mbá ku̱ba̱ʼ mijxooʼ rí niguanáa mbá kayuuʼ ga̱jma̱a̱ numuu xúgíʼ enii rí xkawiʼ dí nini̱ bi̱ nikúwá ikhí”›.

30 Mú ikháán a̱ʼdióo xa̱biya̱, xa̱bu̱ xuajñaanʼ wájun náa xtájtsí ga̱jma̱a̱ náa xkrugoo guʼwá ruthi ga̱jma̱a̱ numaaʼ. Nutamijná kaníkiin, mámbáa naʼthúu̱n ndxájuu: ‹Aguwaʼla ga̱jma̱a̱ guʼdxawíín ajngáa rí na̱ʼkha̱ náa Jeobá›. 31 Magimbíin mbaʼin mu mutrigi̱i̱n náa inaaʼ, xó má gúni̱ xa̱bu̱ xuajñunʼ, mudxawíín dí gárata, mú xúnimbaníí. Numuu rí nuthíí rí májánʼ ga̱jma̱a̱ numaaʼ, mú náa a̱jkiu̱ún nandún rí muguaʼdáá. 32 Ikháán nindxa̱a̱ʼ náa ikhiin xóo mbá ajmúú mitsaanʼ* náa naʼthí xóo mbáa xa̱biya̱ ga̱jma̱a̱ a̱ʼgu̱ nandún kuyamijná, nuni̱ ajmúú ga̱jma̱a̱ mbá aʼwá mitsaanʼ ma̱ngaa dí nudi̱i̱ ga̱jma̱a̱ mbá ajua̱nʼ dí gíʼdoo cuérdóo. Mudxawíín dí gárata̱, mú nimbáa xágíʼ maʼni. 33 Ga̱jma̱a̱ índo̱ gámbánúu, numuu rí gajkhun mambanúu, ikhú maguánú mbuyáá dí nixtáa mbáa profeta* náa ikhiin”.