Génesis

1 Nákhá ginii kayuuʼ* Dios ni’ni mekhu ga̱jma̱a̱ ku̱ba̱ʼ.

2 Nákhá ginii náa numbaaʼ nda̱a̱ dí rígá kayuuʼ. I̱ndó iyaʼ ka̱jnu̱ʼ ga̱jma̱a̱ mikína kri̱ga̱, tsiaki̱i̱* ndrígóo Dios jngruigo̱o̱* gi̱i̱ ñuʼún náa tsu̱du̱u̱ iyaʼ.

3 Ikhú Dios niʼthí: “Gari̱gá aguʼ”. Ikha jngóo nirígá aguʼ. 4 Nda̱wa̱á Dios ndiʼyoo dí ra̱ʼkhá tháán májánʼ dí nimbiʼi aguʼ, ikha jngóo nirkuájíiʼ* aguʼ ga̱jma̱a̱ dí mikína. 5 Ikhú Dios niʼthí dí aguʼ magumbiʼyuu Mbiʼi ga̱jma̱a̱ dí mikína magumbiʼyuu Mbruʼun. Xúʼko̱ nirígá dí timbá mbiʼi.

6 Dios niʼthí mbu̱júu̱: “Garkuájimina̱a̱ʼ iyaʼ mu maʼni paʼta ta̱pha̱”.* 7 Ikhú Dios niruiʼta̱a̱ iyaʼ mu maʼni paʼta, mbá ta̱pha̱ niniñuuʼ mbayííʼ ga̱jma̱a̱ mbá ta̱pha̱ niʼni dí marigá rijma̱a̱. Xúʼko̱ kaʼnii nirígá. 8 Náa nimbaʼtoo, Dios nixnúu mbiʼyuu Mekhu. Niʼni wakíʼ, niʼni miʼcha̱. Xúʼko̱ nirígá dí maʼni a̱jma̱ mbiʼi.

9 Ikhú Dios niʼthí mbu̱júu̱: “Iyaʼ dí niguanúu mbayííʼ gagímbumina̱a̱ʼ mu mbayííʼ maʼni mijxooʼ”. Xúʼko̱ ni̱jkha̱nú nirígá. 10 Dios niʼthí rí Ku̱ba̱ʼ gágu mbiʼyuu náa niʼni̱i̱ mijxooʼ ga̱jma̱a̱ náa nigímbumina̱a̱ʼ iyaʼ magumbiʼyuu, Lamáa.* 11 Ikhú Dios niʼthí mbu̱júu̱: “Gakráʼáan* ra̱jxa̱ náa ku̱ba̱ʼ ga̱jma̱a̱ iná dí gíʼdoo tsígooʼ ma̱ngaa ixi̱ dí najma̱a̱ xndúu, xúgíʼ gáʼni xó má nindxu̱u̱ mámbá ixi̱, garigá xndúu ma̱ngaa gagiʼdoo tsígooʼ”. Xúʼko̱ ni̱jkha̱nú nirígá. 12 Náa ku̱ba̱ʼ nigíʼdu̱u̱ nikráʼáan ra̱jxa̱, iná ga̱jma̱a̱ tsígooʼ, ixi̱ dí naxná xndúu ga̱jma̱a̱ tsígooʼ, xúgíʼ xó má nindxu̱u̱ mámbá. Dios ndiʼyoo dí májánʼ nindxu̱u̱ rígi̱. 13 Niʼni wakíʼ ga̱jma̱a̱ niʼni miʼcha̱. Xúʼko̱ nirígá rí maʼni ajtsú mbiʼi.

14 Ikhú Dios niʼthí mbu̱júu̱: “Garigá dí mambiʼi náa ta̱pha̱ mekhu mu maʼni wájíiʼ* dí mbiʼi ga̱jma̱a̱ dí mbruʼun ma̱ngaa mu majmaa xóo tsinaʼ índo̱ naxtiʼkhu̱u̱ mbiʼi, tsiguʼ ga̱jma̱a̱ tiempo. 15 Majmaa xóo aguʼ náa ta̱pha̱ mekhu mu mambiʼi náa ku̱ba̱ʼ”. Xúʼko̱ má nirígá. 16 Ikhú Dios niʼni a̱jma̱ aguʼ: Rí itháan mba̱a̱ mu maxná agiuuʼ dí mbiʼi, dí chiʼgíiʼ* mu maxná agiuuʼ dí mbruʼun ma̱ngaa niʼnii a̱ʼgua̱a̱n. 17 Dios nigruigi̱i̱n náa xúgíʼ mekhu mu mambiʼiin náa tsu̱du̱u̱ ku̱ba̱ʼ, 18 mu mambiʼiin dí mbiʼi ga̱jma̱a̱ dí mbruʼun, Dios niʼni rígi̱ mu makujmaa índo̱ gáʼni mbiʼi ga̱jma̱a̱ mbruʼun. Dios ndiʼyoo dí májánʼ nindxu̱u̱ rígi̱. 19 Niʼni wakíʼ ga̱jma̱a̱ ni’ni miʼcha̱. Xúʼko̱ nirígá dí maʼni a̱jkhu̱ mbiʼi.

20 Ikhú Dios niʼthí mbu̱júu̱: “Gakuwá mbaʼin xujkhúʼ náa iyaʼ, xujkhúʼ bi̱ guáʼdáá xniúúʼ gajngruigu̱u̱n rijma̱a̱ náa tsu̱du̱u̱ ku̱ba̱ʼ náa ta̱pho̱o̱ mekhu”. 21 Ikhú Dios niʼnii xujkhúʼ mbaʼwi̱i̱n bi̱ kúwá náa lamáa ga̱jma̱a̱ xúgíinʼ xujkhúʼ bi̱ nduya bi̱ nagún mbá jnduʼ náa awúu̱n iyaʼ xó má nindxu̱ún mámbíin, ma̱ngaa xúgíinʼ xujkhúʼ bi̱ guáʼdáá xniúúʼ bi̱ nagún rijma̱a̱ xó má nindxu̱ún mámbíin. Dios ndiʼyoo dí májánʼ nindxu̱u̱ rígi̱. 22 Ikhú Dios niʼni tsajkurámíinʼ ga̱jma̱a̱ niʼthí: “Gawiʼthúún, gaʼni mbaʼin ga̱jma̱a̱ gajthíin náa lamáa. Xúʼko̱ má xujkhúʼ bi̱ jngruigu̱u̱n rijma̱a̱, gaʼni mbaʼin náa tsu̱du̱u̱ ku̱ba̱ʼ”. 23 Niʼni wakíʼ ga̱jma̱a̱ ni’ni miʼcha̱. Xúʼko̱ nirígá dí maʼni witsu mbiʼi.

24 Ikhú Dios niʼthí mbu̱júu̱: “Gakuwá xujkhúʼ bi̱ nduya náa tsu̱du̱u̱ ku̱ba̱ʼ xó má nindxu̱ún mámbíin, xujkhúʼ kraʼdiin, xujkhúʼ bi̱ nuxmajtamijná* ga̱jma̱a̱ xujkhú xáná xó má nindxu̱ún mámbíin”. Xúʼko̱ ni̱jkha̱nú nirígá. 25 Ikhú Dios niʼnii xujkhú xáná xó má nindxu̱ún mámbíin, xujkhúʼ kraʼdiin xó má nindxu̱ún mámbíin, xujkhúʼ bi̱ nuxmajtamijná xó má nindxu̱ún mámbíin. Dios ndiʼyoo dí májánʼ nindxu̱u̱ rígi̱.

26 Ikhú Dios niʼthí mbu̱júu̱: “Gu̱ʼni̱i̱ xa̱bu̱ numbaaʼ xó má kaʼniááʼlú ga̱jma̱a̱ xó má nindxu̱lú, gaʼtáñájúúnʼ e̱gi̱ʼ bi̱ kúwá náa lamáa, xujkhúʼ bi̱ guáʼdáá xniúúʼ bi̱ nagún rijma̱a̱, xujkhúʼ kraʼdiin ga̱jma̱a̱ xujkhúʼ bi̱ nuxmajtamijná ma̱ngaa guñewa̱a̱n ku̱ba̱ʼ”. 27 Ikhú Dios niʼnii xa̱bu̱ numbaaʼ xó má kaʼnii ikhaa. Niʼnii xa̱biya̱ ga̱jma̱a̱ a̱ʼgu̱. Xó má kaʼnii nindxu̱u̱ Dios, xúʼko̱ kaʼnii niʼnii. 28 Ikhú Dios niʼni tsajkurámíinʼ ga̱jma̱a̱ niʼthún: “Gaguaʼdiin mbaʼin e̱jñala, gaʼni mbaʼáanʼla, gakuwáanʼla náa xúgíʼ tsu̱du̱u̱ ku̱ba̱ʼ, ku̱ba̱ʼ gaʼni ndrígala ikháanʼ* ma̱ngaa gutañájúúnʼ e̱gi̱ʼ bi̱ kúwá náa lamáa, xujkhúʼ bi̱ guáʼdáá xniúúʼ bi̱ nagún rijma̱a̱ ga̱jma̱a̱ xúgíinʼ xujkhúʼ nduya bi̱ numbañimijna̱ náa tsu̱du̱u̱ ku̱ba̱ʼ”.

29 Ikhú Dios niʼthí mbu̱júu̱: “Ma̱xnala xóo ganitsu, xúgíʼ iná maxaʼ dí naxná tsígooʼ ga̱jma̱a̱ xúgíʼ ixi̱ rí naxná xndúu dí gíʼdoo itsúu dí rígá náa tsu̱du̱u̱ ku̱ba̱ʼ. 30 Xúʼko̱ má xujkhú xáná ma̱ngaa, xúgíinʼ xujkhúʼ bi̱ guáʼdáá xniúúʼ bi̱ nagún rijma̱a̱ ga̱jma̱a̱ xúgíinʼ bi̱ numbañimijna̱ náa ku̱ba̱ʼ, xúgíinʼ bi̱ nduya, maxnu̱u̱ iná maxaʼ rí mu̱phu̱”. Xúʼko̱ má nirígá.

31 Nda̱wa̱á dí nirígá rígi̱, Dios ndiʼyoo dí ra̱ʼkhá tháán májánʼ nindxu̱u̱ xúgíʼ dí niʼniwíi.* Niʼni wakíʼ ga̱jma̱a̱ niʼni miʼcha̱. Xúʼko̱ nirígá dí maʼni majun mbiʼi.