Amós
8 Rígi̱ nindxu̱u̱ rí nisngájmuʼ Tátá Jeobá bi̱ itháán mba̱a̱. Ndi̱yo̱o̱ mbá canasta náa gajti xndú taun rí najma̱a̱ ruʼphu. 2 Ikhú niʼthí: “Amós ndiéjunʼ tayáá rá.” Ikhúún niriʼñuu “Mbá canasta náa gajti xndú taun rí najma̱a̱ ruʼphu”. Ikhú Jeobá niʼthúnʼ: “Ni̱jkha̱nú mbiʼi rí maguma gámbáa xuajñunʼ Israel. Ní xátangu̱ún ma̱ni̱ mba̱a̱ a̱jkiu̱nʼ ka̱ñu̱u̱n. 3 ‹Mbiʼi rúʼko̱, ajmúú rí nuni̱ náa guʼwá rí nduyamajkuíí Dios mani̱ndxu̱u̱ gitsaʼwáskha, eʼthí Tátá Jeobá bi̱ itháán mba̱a̱. Asndu náá kadiinʼ bi̱ nikháñún. ¡Wíí gáʼni!›.
4 Gudxawíín rígi̱ ikháanʼla bi̱ nu̱ni̱ rí mumíniiʼ xa̱bu̱ ngíníi
bi̱ nu̱ni̱ dí xa̱bu̱ guabiinʼ bi̱ kúwá náa xuajin xágájnuu májánʼ rí nuni̱,
5 ikháanʼ bi̱ nu̱ta̱: ‹Nguáná gámbá ndxo̱o̱ gu̱nʼ rudiiʼ mu ma̱ndoo mugu̱jua̱ tsígáʼ rá.
Nguáná gámbáa sábado mu ma̱ndoo murawíi tsígáʼ mugujua rá.
Mu xúʼko̱ muʼni̱i̱ chíʼgíiʼ* efá*
ga̱jma̱a̱ muxujxíi numuu*
muʼni rí balanza xágiéwan májánʼ ga̱jma̱a̱ xúʼko̱ muʼni nduwaʼ.
6 Xúʼko̱ ma̱ndoo muʼtsi̱i̱ bi̱ ndayóoʼ ga̱jma̱a̱ plata
bi̱ ngínáa muʼtsi̱i̱ ga̱jma̱a̱ mbá edi̱i̱ raxtá,*
ma̱ngaa mu mugu̱jua̱ tsígáʼ dí nánguá ejmaa›.
7 Jeobá nixná ajngóo ga̱jma̱a̱ numuu rí nakuximínáʼ Jacob:
‹Nimbá míʼtsú xámbumuʼ ka̱yo̱o̱ rí nini̱.
8 Ga̱jma̱a̱ numuu rúʼko̱, xuajin maʼba̱a̱n
xúgíinʼ xa̱bu̱ makuwá ngíná.
Mani̱ndxu̱u̱ xóo índo̱ naʼni mba̱a̱ mañu Nilo,
xóo mañu Nilo ndrígóo Egipto ginii maʼni mba̱a̱ nda̱wa̱á magajta̱a̱›.
9 ‹Mbiʼi rúʼko̱, eʼthí Tátá Jeobá bi̱ itháán mba̱a̱,
ma̱ni̱ rí tu̱mba̱a̱ mbiʼi marámáaʼ a̱jkha̱ʼ,
ga̱jma̱a̱ mbóo mbiʼi rí gíʼ a̱jkha̱ʼ ma̱ni̱ rí ku̱ba̱ʼ maʼni mikína.
10 Ní xúni̱ riya̱a̱ʼ itháán ndxa̱a̱ náa makuwá gagi ma̱ni̱ rí makuwá ngíná,
xúgíʼ ajmúú rí nuni̱ mani̱ndxu̱u̱ ajmúú ngíná.
Ma̱ni̱ rí muruʼwa̱a̱ smídún ga̱jma̱a̱ xtíin mi̱du̱* ma̱ngaa muda̱ edxu̱ún.
Ma̱ni̱ rí makuwá ngíná xó má índo̱ nakháñuu mbáa aʼdiún bi̱ mbáwíí,
nda̱wa̱á kayuuʼ mani̱ndxu̱u̱ mbá mbiʼi miʼkhu̱u̱n›.
11 ‹Gu̱ya̱a̱, na̱ʼkha̱ mbiʼi, eʼthí Tátá Jeobá bi̱ itháán mba̱a̱,
rí makuʼmá mbá ewiʼ náa xuajin
raʼkháa rí xa̱bu̱ maxkidxu̱u̱ ni má rí makándawúúnʼ,
mani̱ndxu̱u̱ rí maʼndún mudxawíín ajngóo Jeobá.
12 Asndu naguíʼiin gágún náa mbá lamáa asndu náa imbo̱o̱ lamáa
náa norte asndu náa nagájnuu a̱jkha̱ʼ.*
Magún gi̱i̱ ñuʼún ruyáʼ ajngóo Jeobá, mú xáxkamaa.
13 Mbiʼi rúʼko̱ makamindún wa̱ʼxa̱ʼ* bi̱ mitsiʼñíin bi̱ xóó tsébúúnʼ gajmiún xa̱bu̱,
xúʼko̱ má jiámá ga̱jma̱a̱ numuu rí nakándawúúnʼ.
14 Bi̱ nuxna ajngún ga̱jma̱a̱ numuu aʼkhá rí nikudaminaʼ Samaria ga̱jma̱a̱ nuthi,
“¡Xó má gajkhun dí xtáa dios ndrígáaʼ Dan!”
ga̱jma̱a̱ “¡Xó má gajkhun rígá kambo̱o̱ Beer-Seba!”,
ikhiin majnguti̱gi̱i̱n ga̱jma̱a̱ xátangi̱ín maguajxúún›”.