Jueces

11 Jefté xa̱bu̱ bi̱ na̱ʼkha̱ náa Galaad nindxu̱u̱ mbáa soldado xkujiiʼ. A̱ʼdióo a̱ʼgú bi̱ nagujuamínáʼ, anu̱u̱* mbiʼyuu Galaad. 2 Mú a̱ʼgiu̱u̱* Galaad ma̱ngaa nigiʼdiin gajmíi̱n e̱ji̱n. Índo̱ ikhiin niganuu, ikhiin nixkriya̱a̱ʼ Jefté ga̱jma̱a̱ nitháán: “Nditháan rakáʼyaaʼ mbi̱ya̱a̱ herencia ikháán náa goʼwóo anu̱xu̱, numuu dí ikháán nindxa̱a̱ʼ a̱ʼdióo imba̱a̱ a̱ʼgu̱”. 3 Ikha jngóo Jefté nigájnuu náa kúwá a̱ngui̱i̱n nigáyúu, ga̱jma̱a̱ ni̱jkha̱ náa ku̱ba̱ʼ Tob. Ga̱jma̱a̱ mbá nguáthi̱i̱n xa̱bu̱ bi̱ nda̱a̱ rí eni̱ nigún gajmiún.

4 Táʼni mba̱yu̱u̱ʼ índo̱ ammonitas nigíʼdi̱i̱ nixmijná gajmiún israelitas. 5 Índo̱ ndiyáá rí ammonitas nuxmijná gajmiún xa̱bu̱ Israel, bi̱ kuya̱ edxu̱u̱ bi̱ kúwá náa Galaad mbá nacha̱ nigún náa ku̱ba̱ʼ Tob mu maguwáanʼ kuya̱a̱ Jefté. 6 Nitháán Jefté: “Aya̱a̱ʼ, nanduxu dí ma̱nindxa̱a̱ʼ bi̱ maʼtáñajúúnʼ soldado, mu maʼnguxu̱ muxmíjná gajmiúxu ammonitas”. 7 Mú Jefté niʼthúún xa̱bu̱ bi̱ kuya̱ edxu̱u̱ náa Galaad: “Lá raʼkháa ikháanʼ dí niwi̱yala kuyoʼ dí asndu nixkriñu̱u̱nʼ náa goʼwóo anu̱ʼ ráʼ. Ndíjkha dí naguwa̱ʼ gúʼñúúnʼla, xúgi̱ dí kuwáanʼla rumíniiʼ rá.” 8 Ikhú bi̱ kuya̱ edxu̱u̱ nitháán Jefté: “Ikhaa má rúʼko̱ numuu rí nagúwáʼxu gúyáaʼ. Á mu nadxaʼ ga̱jma̱á nindxu̱xu̱ ga̱jma̱a̱ nataxmína̱ʼ gajmiáanʼ ammonitas, mani̱ndxa̱a̱ʼ bi̱ mbayá edxu̱u̱ náa mbá xúgíinʼ xa̱bu̱ Galaad”. 9 Jefté niʼthúún bi̱ kuya̱ edxu̱u̱ náa Galaad: “Á mu najkua̱a̱ʼla kuñu̱u̱n mu maxmínaʼ gajmíʼ ammonitas ga̱jma̱a̱ Jeobá naʼni dí maʼngo̱ʼ magúdíin, mani̱ndxu̱ʼ bi̱ mbayá edxu̱u̱ náa ikháanʼla xúʼko̱ rá”. 10 Ikhú bi̱ kuya̱ edxu̱u̱ náa Galaad nitháán Jefté: “Jeobá gánindxu̱u̱ testigo* náa ikháánʼlú, á mu tsénixu dí rathá”. 11 Ikha jngóo Jefté ni̱jkha̱a̱ gajmíi̱n bi̱ kuya̱ edxu̱u̱ náa Galaad, ga̱jma̱a̱ xa̱bu̱ xuajin nigíiʼ mu mbayá edxu̱u̱ náa xuajin ga̱jma̱a̱ bi̱ maʼtáñajúúnʼ soldado, Jefté nitanga̱a̱ niʼthí náa Mizpá náa inuu Jeobá xúgíʼ rí niʼthí má.

12 Ikhú Jefté nikuʼmiin bi̱ magún kuñu̱u̱n ajngáa náa rey ndrígu̱ún ammonitas mu muthán: “Káʼni lá ninia̱a̱nʼ jngóo dí mi̱dxa̱ʼ gátaxmína̱ʼ náa ku̱bo̱ʼ rá.” 13 Ikhú rey ndrígu̱ún ammonitas niʼthúún bi̱ nikuʼmiin Jefté magún kuñu̱u̱n ajngáa: “Índo̱ Israel nigájna̱a̱ náa ku̱ba̱ʼ Egipto, nixtáa náa mbayuʼ, nagi̱ʼdu̱u̱ asndu náa mañu Arnón, asndu náa Jaboc ga̱jma̱a̱ nartumuu asndu náa mañu Jordán. Araxnáaʼ ga̱jma̱a̱ májánʼ mbayuʼ”. 14 Mú Jefté nitanga̱a̱ nikuʼmiin bi̱ magún kuñu̱u̱n ajngáa náa rey ndrígu̱ún ammonitas 15 mu muthán:

“Xígi̱ eʼthí Jefté: ‹Xa̱bu̱ Israel na̱nguá nikúwá náa ku̱bu̱únʼ moabitas, ni má náa ku̱bu̱únʼ ammonitas. 16 Índo̱ israelitas nigájni̱ín náa Egipto, nigún náa ku̱ba̱ʼ mijxooʼ* asndu náa lamáa Maña̱ʼ,* ga̱jma̱a̱ niguánú asndu náa Cadés. 17 Ikhú xa̱bu̱ Israel nixuʼmiin bi̱ magún kuñu̱u̱n ajngáa náa rey ndrígóo Edom, mu muthán “mbá péñu,* atatsíñuxu manújnguxu̱ náa mbayaaʼ”. Mú rey ndrígóo Edom táʼdxawún ga̱jma̱a̱ xúʼko̱ má ninda̱ʼa̱a̱ rey ndrígóo Moab. Xúʼko̱ má niʼni ma̱ngaa, tániñúnʼ manújngún. Ikha jngóo xa̱bu̱ Israel niguanún má náa Cadés. 18 Índo̱ nigún náa ku̱ba̱ʼ mijxooʼ ninújngún ga̱jma̱a̱ náa ndawaa ku̱ba̱ʼ Edom, ga̱jma̱a̱ náa ku̱ba̱ʼ Moab. Nigún ga̱jma̱a̱ xígií náa nagájnuu a̱jkha̱ʼ,* náa ku̱ba̱ʼ Moab ga̱jma̱a̱ nigi̱ʼi̱i̱n náa ku̱ba̱ʼ Arnón. Mú tátu̱ʼu̱u̱n náa ku̱ba̱ʼ Moab, numuu dí náa Arnón ikhí nartumuu ku̱ba̱ʼ Moab.

19 Nda̱wa̱á xa̱bu̱ Israel nixuʼmiin bi̱ magún kuñu̱u̱n ajngáa náa Sehón rey ndrígu̱ún amorreos, bi̱ niʼtáñajunʼ náa Hesbón, mu munda̱ʼa̱a̱ “Mbá péñu, atatsíñuxu̱ manújnguxu̱ náa ku̱ba̱a̱ʼ mu muʼguánúxu náa najkuáxu”. 20 Mú Sehón niʼni a̱jma̱ a̱jkiu̱u̱n kaʼñún israelitas ga̱jma̱a̱ tániñúnʼ manújngún náa mbayuuʼ. Ikhaa nigímbíin mbá xúgíinʼ xa̱bi̱i̱, ga̱jma̱a̱ nigi̱ʼi̱i̱n náa Jáhaz mu maxmínaʼ gajmíi̱n xa̱bu̱ Israel. 21 Índo̱ ndiʼyoo rígi̱ Jeobá, Dios ndrígóo Israel. Nixnájxi̱i̱ Sehón ga̱jma̱a̱ xuajñuu náa ñawúúnʼ israelitas. Nini̱ gámbíin amorreos ga̱jma̱a̱ nindrigúu ku̱ba̱ʼ náa nikúwá náa mbaaʼ rúʼko̱. 22 Xígi̱ kaʼnii nindrigúu xúgíʼ mbañúúnʼ amorreos, nagi̱ʼdu̱u̱ náa Arnón asndu náa Jaboc, ga̱jma̱a̱ nagi̱ʼdu̱u̱ náa ku̱ba̱ʼ mijxooʼ asndu náa mañu Jordán.

23 Jeobá, Dios ndrígóo Israel, nixkawíin xúgíinʼ amorreos náa inún israelitas. Ga̱jma̱a̱ dí xúgi̱ ikháán nandaaʼ mataxkawíin xáʼ. 24 Lá tséʼngo̱o̱ maraxtaa ga̱jma̱a̱ xúgíʼ rí dios ndrígáaʼ Kemós naxnáaʼ ráʼ. Mangáanʼxu muxkriya̱a̱ʼ asndu tsáá bi̱ Jeobá Dios ndrígúxu̱ nixkriya̱a̱ʼ náa inuxu̱ʼ. 25 Lá itháan májánʼ tani̱ ikháán ki xóo Balac a̱ʼdióo Zipor rey ndrígóo Moab ráʼ. Lá nigi̱ʼdu̱u̱ gajmíi̱n israelitas ikhaa xáʼ. O nixmínaʼ gajmíi̱n dxe̱ʼ. 26 Xa̱bu̱ Israel nikúwá mbá 300 tsiguʼ náa Hesbón ga̱jma̱a̱ náa xuajin dí rígá mijngii. Ma̱ngaa náa Aroer ga̱jma̱a̱ xúgíʼ xuajin dí rígá mijngii. Ma̱ngaa xúgíʼ xuajin dí rígá náa rawuunʼ Arnón. Ndíjkha rí túnimi̱jna̱ mundrígúu xúgíʼ xuajin rúʼko̱ nákhá ikhú rá. 27 Ikhúún tákiéʼkhúnʼ náa inaaʼ. Raʼkhí tani̱ dí xtaa rataxmína̱ʼ ga̱jma̱á nindxu̱ʼ. Jeobá gánindxu̱u̱ bi̱ maʼnimbánuu xkujndu, ikhaa gáʼnimbánuu numún israelitas gajmiún ammonitas dí mbiʼi xúgi̱›”.

28 Mú rey ndrígu̱ún ammonitas táʼdxawun ajngáa dí niʼthí Jefté.

29 Ikhú espíritu santo* ndrígóo Jeobá ni̱ʼkha̱ náa Jefté ga̱jma̱a̱ ikhaa ninújngoo náa Galaad ga̱jma̱a̱ náa ku̱bo̱o̱ʼ Manasés mu maʼga náa Mizpé náa ku̱ba̱ʼ Galaad. Ikhí nigájnuu mu maʼga gáxmína̱ʼ gajmíi̱n ammonitas.

30 Jefté nikudaminaʼ maʼni rígi̱ náa Jeobá: “Á mu natani̱ dí maʼngo̱ʼ maxmínaʼ gajmíʼ ammonitas, 31 bi̱ gagájnuu náa riejuun goʼwóʼ mu magruigún índo̱ gátangu̱ún rí niʼngo̱ʼ nixmínaʼ gajmíʼ ammonitas. Maxnia̱a̱ʼ ikháán Jeobá, maxnajxíi xóo tsigijñaʼ dí nakarámáʼ”.*

32 Jefté ni̱jkha̱ gáxmína̱ʼ gajmíi̱n ammonitas, ga̱jma̱a̱ Jeobá nixnájxi̱i̱n náa ñawúunʼ. 33 Ikhaa ni̱jkha̱ ragudíin náa Aroer, asndu náa Minit, nito̱ʼo̱o̱ náa mbá 20 xuajin ga̱jma̱a̱ asndu náa Abel-Keramim, raʼkhá tháán mbaʼin xa̱bu̱ nikháñún. Xígi̱ kaʼnii niʼni dí israelitas nitañajúúnʼ ammonitas.

34 Índo̱ Jefté nitanga̱a̱ náa goʼwóo, náa Mizpá, ¡wáxióo* nigájnuu gágruiguíi, na̱ʼdu̱u̱ pandereta ga̱jma̱a̱ naʼtsia! Mbáwíí má xúʼko̱ wáxióo gíʼdaa. Ragíʼdaa imba̱a̱ a̱ʼdióo dxámá ni má dxáʼgú. 35 Índo̱ ndiʼyoo, nixkuʼtu xtíñuu ga̱jma̱a̱ niʼthúu̱n: “¡Gínáálá ikháán wáxió’!* Nagáwíin’ a̱jkiu̱nʼ numuu dí ikháán nikuʼmáán mi̱dxu̱ʼ mitsínguánʼ. Rígá mbá dí nikuʼdáminaʼ* ma̱ni̱ náa Jeobá. Ga̱jma̱a̱ dí xúgi̱ xándoo matangu̱ún skidiʼ”.

36 Mú ikhaa niʼthúu̱n: “Anu̱ʼ, á mu rígá mbá dí nitaxúdaminaʼ náa Jeobá, ndayóoʼ rí matani̱ ga̱jma̱á nindxu̱ʼ xó má rí nitaxúdaminaʼ. Numuu dí Jeobá niʼni gámbíin ammonitas, xa̱bu̱ sia̱nʼ ndrígáaʼ”. 37 Ma̱ngaa niʼthúu̱n anu̱u̱: “Rígá káaʼ mbóó dí nandoʼ manda̱ʼa̱a̱: Atatsíñuʼ maʼgá a̱jma̱ igu̱nʼ náa kúbá. Atatsíñuʼ maʼgá gajmíʼ bi̱ nambájxu̱ʼ gajmíʼ mu mambi̱ya̱ʼ numuu dí xánujúnʼ”.*

38 “Ma̱ndoo má mi̱dxu̱ʼ”, niʼthúu̱n. Niniñuuʼ maʼga a̱jma̱ igu̱nʼ. Ga̱jma̱a̱ ikhaa ni̱jkha̱ gajmíi̱n wa̱ʼxa̱ʼ bi̱ nambájxu̱u̱ gajmíi̱n náa kúbá gámbi̱ya̱ʼ numuu dí xánújúnʼ. 39 Índo̱ niʼni a̱jma̱ igu̱nʼ, ikhaa nitanga̱a̱ náa goʼwóo anu̱u̱. Ikhú Jefté niʼnimbánuu rí nikudaminaʼ. Dxáʼgú nditháan tábóoʼ ga̱jma̱a̱ nimbáa xa̱bu̱, ikha jngóo náa Israel niguʼwún muni̱ rígi̱: 40 Xúgíʼ tsiguʼ, wa̱ʼxa̱ʼ bi̱ kúwá náa Israel nagún ruxnáá tsiaki̱i̱ wáxióo Jefté, bi̱ nindxu̱u̱ galaadita, a̱jkhu̱ mbiʼi egún rí mbá tsiguʼ.