Isaías
41 “Xa̱bu̱ bi̱ kúwá náa islas,* wíí gúnila ga̱jma̱a̱ gudxawunʼ,
xuajin mba̱ʼu̱ guda̱a̱ tsiaki̱i̱.
Guxuʼmamijná ga̱jma̱a̱ ikhú gútha̱.
Gagimbáanʼlú mu muxnájxi̱i̱ cuenta.
2 Tsáá niʼni dí ma̱ʼkha̱ mbáa xígií náa nagájnuu a̱jkha̱ʼ* rá.
nindxaʼóo asndu náa xtáa mu ma̱ʼkha̱ maʼni marigá dí májánʼ,
mu mixnájxi̱ xuajin mba̱ʼu̱ náa ñawúunʼ
ga̱jma̱a̱ maʼngo̱o̱ maʼni gajmíi̱n reyes.
Tsáá eʼni dí maʼni̱i̱ i̱ndó idiúnʼ ga̱jma̱a̱ espádóo,
ma̱ngaa naxídiríʼiin ga̱jma̱a̱ xkamídooʼ xóo náska dí na̱jkha̱ kayóo giñánʼ rá.
3 Ikhaa na̱jkha̱ raxkhúún, na̱jkha̱ raxkhúún má xúʼko̱,
ndawa̱a̱ tsáa mawi̱ji̱ jthu̱u̱n, na̱jkha̱ náa kamba̱a̱ rí xóó tséjkha̱.
4 Tsáá niʼni rígi̱,
dí nandxaʼwún xa̱bu̱ bi̱ naguwáʼ ragúunʼ rakúwá asndu nákha ginii rá.
Ikhúún, Jeobá, nindxu̱ʼ bi̱ Ginii
ga̱jma̱a̱ náa bi̱ iwáá kayuuʼ ikháá má nindxu̱ʼ”.
5 Xa̱bu̱ bi̱ kúwá náa islas ndiyáá ga̱jma̱a̱ nimíñúún.
Bi̱ kúwá náa naguámbári̱go̱o̱ ku̱ba̱ʼ nigi̱ʼdi̱i̱ niguíʼiin.
Nagimbíi̱n ga̱jma̱a̱ nagún.
6 Mámbáa nambáyúu ndxájuu
ga̱jma̱a̱ naʼthúu̱n: “Gakhi̱i̱ a̱jkia̱a̱nʼ gátani̱”.
7 Xúʼko̱ eʼni bi̱ najmañuu nañajunʼ májánʼ, naxnúu tsiaki̱i̱ bi̱ nañejuunʼ ajua̱nʼ,
bi̱ naru̱jtsi̱ ajua̱nʼ ga̱jma̱a̱ martillo
naxnúu tsiaki̱i̱ bi̱ naguwíi ajua̱nʼ.
Naʼthí ga̱jma̱a̱ numuu dí natsikáʼmuu: “Májánʼ niguanúu”.
Nda̱wa̱á nudujmaa xándú ga̱jma̱a̱ clavo mu xáxpátríguíi.
8 “Mú ikháán Israel, nindxa̱a̱ʼ xa̱bi̱ʼ,
ikháán Jacob, bi̱ niraʼwi̱i̱,
bi̱ na̱ʼkha̱ náa Abrahán bi̱ nambájxu̱ʼ ga̱jmu̱ʼ,
9 ikháán bi̱ ni̱ʼkhá ka̱ña̱a̱n asndu náa naguámbári̱go̱o̱ ku̱ba̱ʼ,
ga̱jma̱a̱ ikháán bi̱ nindxa̱ʼwa̱a̱ʼ asndu náa itháan mitsínguánʼ.
Ni̱tha̱a̱nʼ: ‹Ikháán nindxa̱a̱ʼ xa̱bi̱ʼ,
niraʼwi̱i̱n ga̱jma̱a̱ nditháan tániʼñáaʼ.
10 Xámíñáaʼ, numuu dí xtáá ga̱jma̱á nindxa̱a̱ʼ.
Xáxmiéjuaanʼ,* numuu dí ikhúún nindxu̱ʼ Dios ndrígáaʼ.
Ikhúún maxna̱a̱ʼ tsiaki̱i̱. Xúʼko̱, ikhúún mambáyaaʼ.
Majngutúwíín ga̱jma̱a̱ ñawún mújúnʼ dí naʼni rí májánʼ›.
11 ¡Atayáá! Xúgíinʼ bi̱ nakásngañu̱u̱ʼ kuyaaʼ maguma majti̱i̱nʼ ga̱jma̱a̱ magajnúu majkhún.
Bi̱ nuxmijná ga̱jma̱á nindxa̱a̱ʼ maguma gámbíin mbá kayuuʼ ga̱jma̱a̱ mandáti̱gi̱i̱n.
12 Mataʼñíinʼ bi̱ nuxmijná ga̱jma̱á nindxa̱a̱ʼ, mú xátaxkamiin.
Xa̱bekha bi̱ nuxmijná ga̱jma̱á nindxa̱a̱ʼ maguánú mani̱ndxu̱ún xóo mbá rí nda̱a̱, mbá dí na̱nguá rígá.
13 Numuu dí ikhúún nindxu̱ʼ Jeobá Dios ndrígáaʼ, kuajtúun ñawún májáanʼ,
ikhúún nindxu̱ʼ bi̱ naʼtháanʼ: ‹Xámíñáaʼ. Ikhúún mambáyaaʼ›.
14 Xámíñáaʼ, Jacob ñu̱u̱ chíʼgíiʼ,*
xuajñunʼ Israel, ikhúún mambáyaaʼ”, eʼthí Jeobá, bi̱ Niʼtsiríña̱a̱nʼ, bi̱ Kaʼwii náa Israel.
15 “¡Atayáá! Ni̱ni̱ dí ikháán mani̱ndxa̱a̱ʼ xóo mbá xajpa dí najui̱ʼnu̱ ga̱jma̱a̱ tsígáʼ,
mbá xajpa nuxi̱ʼ dí gíʼdoo iñuuʼ dí xíníʼ.
Mataxujmbiríga̱ kúbá ga̱jma̱a̱ matani̱ gámbáa,
matani̱ dí bíjní maʼni̱i̱ i̱ndó idiuuʼ.
16 Mataxi̱díí ga̱jma̱a̱ giñánʼ maʼga kagu̱u̱,
mbá giñámbiʼ maʼni dí magadiráʼa.
Ikháán maʼdxaaʼ ga̱jma̱a̱ numuu Jeobá,
asndu gagi gárata ga̱jma̱a̱ numuu bi̱ Kaʼwii náa Israel”.
17 “Bi̱ nda̱ñúunʼ ga̱jma̱a̱ bi̱ ngíníi jngruigu̱u̱n ruyáʼ iyaʼ, mú nda̱a̱.
Nujndooʼ raju̱ún numuu dí nakándawúnʼ.
Ikhúún Jeobá, ma̱riʼñún.
Ikhúún bi̱ nindxu̱ʼ Dios ndrígóo Israel, xániʼñúnʼ.
18 Ma̱ni̱ dí mandijuíi iyaʼ náa bíjní tsaʼtsaʼ
ga̱jma̱a̱ ma̱ni̱ dí marigá iduu iyaʼ náa xkua̱.
Ma̱ni̱ dí ku̱ba̱ʼ mijxooʼ* maʼga̱nú mani̱ndxu̱u̱ xóo mbaaʼ náa na̱jnu̱ma̱ʼa̱n iyaʼ náa rígá e̱ʼi̱n,*
ku̱ba̱ʼ náa nda̱a̱ iyaʼ ma̱ni̱ dí marigá iduu iyaʼ.
19 Náa ku̱ba̱ʼ mijxooʼ ma̱du ixi̱ cedros,
acacias, mirtos ga̱jma̱a̱ xti̱ʼkha̱.
Náa xkua̱ mijxooʼ ma̱du ixi̱ enebros,
ga̱jma̱a̱ fresnos ma̱ngaa cipreses,
20 mu xúgíinʼ xa̱bu̱ mbuyáá,
mugíʼ edxu̱ún ga̱jma̱a̱ makru̱ʼu̱u̱n
dí ñawúunʼ Jeobá niʼni rígi̱
ga̱jma̱a̱ dí bi̱ Kaʼwii náa Israel niʼniwíi”.
21 “Gu̱tha̱ náá numuu dí xúʼko̱ e̱tala”, eʼthí Jeobá.
“Gu̱tha̱ ndiéjunʼ dí nandala mu̱tha̱”, eʼthí Rey ndrígóo Jacob.
22 “Gu̱tha̱la dí nasngájma ga̱jma̱a̱ gu̱thu̱xu ndiéjunʼ gárígá.
Gu̱thu̱xu dí nirígá nákha ginii,
mu xúʼko̱ mundxaʼwamíjna̱xu ga̱jma̱a̱ mbu̱ya̱a̱xu xóo gámbá.
O gu̱thu̱xu ndiéjunʼ dí na̱ʼkha̱ marigá.
23 Gu̱thu̱xu ndiéjunʼ gárígá nda̱wa̱á,
mu xúʼko̱ mbu̱ya̱a̱xu dí ikháanʼ nindxa̱la dioses.
Xúʼko̱, gu̱ni̱la mbá rí májánʼ o mbá dí ra̱májánʼ,
mu xúʼko̱ índo̱ gúya̱a̱xu maʼñuxu tsiánguá.
24 ¡Gu̱ya̱a̱la! Ikháanʼ nindxa̱la mbá dí nda̱a̱
ga̱jma̱a̱ dí naʼngala nu̱ni̱ nda̱a̱ dí ejmaa.
Asndu tsáa bi̱ naraʼwáanʼla mu mbaʼyamajkuala tsíñún gúyáá.
25 Ni̱ni̱ dí ma̱ʼkha̱ mbáa asndu xígií náa norte,
mbáa bi̱ na̱ʼkha̱ náa nagájnuu a̱jkha̱ʼ bi̱ maʼthí mbiʼyuʼ.
Ikhaa makujmbirigi̱i̱n xa̱bu̱ ñajunʼ* xóo ku̱ba̱ʼ,
xóo eʼni mbáa bi̱ naʼni daan bi̱ nakujmbi̱i̱ ku̱ba̱ʼ xtiʼtiʼ.
26 Tsáá niʼthí rígi̱ asndu nákha nigi̱ʼdu̱u̱ mu ma̱ndoo mbuʼyáá rá.
Tsáá niʼthí asndu nákha wajyúuʼ mu ma̱ndoo muʼthá ‹Gajkhun dí naʼthí› xá.
Xúʼko̱, ¡ndawa̱a̱ tsáa niʼtaríya̱ʼ!
¡Ndawa̱a̱ tsáa niʼthí!
¡Nimbáa táʼdxawun dí ikháanʼla ni̱tha̱!”.
27 Ikhúún ninindxu̱ʼ ginún bi̱ ni̱thu̱u̱n Sion “¡Atayáá! ¡Gi̱i̱ kúwá!”,
ga̱jma̱a̱ makuʼmáa mbáa bi̱ maʼga kayóo ajngáa dí májánʼ náa Jerusalén.
28 Niyejxi̱ má xúʼko̱, mú ndawa̱a̱ nimbáa,
ndawa̱a̱ nimbáa náa majñu̱únʼ ikhiin bi̱ ma̱ndoo maxná mbá consejo.
Ninda̱ʼa̱ má xúʼko̱ mu muriʼñuʼ.
29 ¡Atayáá! Xúgíinʼ ikhiin nindxu̱ún xóo mbá dí na̱nguá rígá.
Ñajunʼ ndrígu̱ún nda̱a̱ dí ejmaa.
Xtiʼkúún dí niguma ga̱jma̱a̱ ajua̱nʼ* nindxu̱u̱ xóo giñánʼ, mbá dí nda̱a̱.