Oseas
7 “Mámbá índo̱ nandoʼ ma̱ni̱ thanuu Israel,
nakujmaa pa̱jnu aʼkhúun Efraín
ga̱jma̱a̱ dí raʼkhí naʼni Samaria.
Numuu rí ikhiin nuni̱ nduwaʼ,
kuʼwáʼ natu̱ʼu̱u̱n náa guʼwá ga̱jma̱a̱ tikhuun nuni̱ kúʼwúnʼ xa̱bu̱ náa kamba̱a̱.
2 Mú ikhiin tsétháán a̱jkiu̱ún dí ikhúún marmáʼáan a̱jkiu̱nʼ gáʼni xúgíʼ dí raʼkhí nuni̱.
Xúgi̱, náa mbájndi̱i̱ ikhiin rígá xúgíʼ rí nuni̱,
rígá náa inuʼ ikhúún.
3 Ikhiin nuni̱ gadxíí a̱jkiu̱u̱n rey ga̱jma̱a̱ dí ra̱májánʼ nuni̱,
ma̱ngaa príncipes ga̱jma̱a̱ nduwaʼ rí nuni̱.
4 Xúgíinʼ ikhiin nuxudamíjna̱ aʼkhá gajmiún eʼwíinʼ,*
mijkhiin xó mbá horno rí naskámuu bi̱ naʼni pan,
bi̱ naniñuuʼ mi̱kha má xúʼko̱ índo̱ nagíʼdu̱u̱ naxmíndú xúwáʼ asndu índo̱ nakájxi̱i̱.
5 Mbiʼi rí nigu̱ma̱ ndxo̱o̱ rey ndrígulú, príncipes niʼniún nandii,
vino niʼni rí makasngañu̱únʼ.
Rey nimbájxu̱u̱ gajmíi̱n bi̱ nutsijma.
6 Xa̱bu̱ xuajin naguwáʼ kanuu, a̱jkiu̱ún mijkha xóo mbá horno.*
Bi̱ naʼni pan naʼgu kañiiʼ mbruʼun,
rí miʼcha̱, horno nakha má xúʼko̱ rí asndu naʼni riʼyu̱u̱ aguʼ.
7 Xúgíinʼ ikhiin mijkhiin xó mbá horno
naʼphu̱u̱n xa̱bu̱ ñajunʼ ndrígu̱ún.*
Xúgíinʼ reyes ndrígu̱ún nijngutíguíin,
nimbáa rí ikhiin na̱nguá nidxaʼwóʼ mu mambáyúu.
8 Efraín nandáwaminaʼ ga̱jma̱a̱ i̱ʼwáʼ xuajin.
Efraín nindxu̱u̱ xóo pan nijndi dí xóó tsértajxi̱.
9 Xa̱bu̱ bi̱ naguwaáʼ ninigámbúun tsiaki̱i̱ rí gíʼdoo, mú ikhaa tséʼyoo.
Xtátsiu̱u̱n rí gidiʼ niʼni̱i̱ miʼxá, mú ikhaa tséʼyoo.
10 Rí naʼnimbamínáʼ Israel nasngájma xú kaʼnii nindxu̱u̱,
mú ikhiin na̱nguá nitangiín náa Jeobá Dios ndrígu̱ún
ni má na̱nguá ndiyáaʼ maski má nirígá xúgíʼ rígi̱.
11 Efraín nindxu̱u̱ xóo mbáa paloma bi̱ nda̱a̱ rí eʼyoo, ndayóóʼ majmañuu mandxaʼwóo májánʼ edxu̱u̱.*
Nindxaʼóo Egipto ga̱jma̱a̱ niʼthúu̱n Asiria mu mambáyúu.
12 Gagún má náa gágún, ikhúún martiga̱ amaʼ náa ikhiin.
Ma̱ni̱ rí majngutíguíin xóo xujkhú xnaʼ bi̱ jngruigu̱u̱n rijma̱a̱.
Maxprígún xó má nijuiʼthá maguáʼníí xa̱bu̱ xuajñún.
13 ¡Gíníinla ikhiin, numuu rí nitsíngúunʼ náa ikhúún!
¡Ikhiin maguma gámbíin, numuu rí nixudamíjna̱ aʼkhá náa ikhúún!
Nixtáá xawii mu ma̱ni̱ káwíin, mú nithi rí minduwaʼ ga̱jma̱a̱ numuʼ.
14 Nákhá nindxa̱ʼo̱ʼ mu mambáñún na̱nguá nini̱ ga̱jma̱a̱ xúgíʼ a̱jkiu̱ún,
maski ajndu numíníiʼ jngútámíinʼ náa xia̱wún.
Nurujtumijná ga̱jma̱a̱ numuu tsígáʼ ma̱ngaa ga̱jma̱a̱ numuu vino rí nuxi̱ʼ.
Nuxujximíjna̱ náa inuʼ.
15 Ni̱xnu̱u̱ ikha ga̱jma̱a̱ ni̱xnu̱u̱ tsiaki̱i̱ ñawúnʼ,
mú nuxujximíjna̱ náa ikhúún ga̱jma̱a̱ nurawíi awan muni̱ dí ra̱májánʼ.
16 Niriʼkhu̱u̱ náa magún mú raʼkháa náa mbá rí itháán gíʼdoo numuu,*
rakáʼnii maku̱ma̱a̱ʼ xtañún, nindxu̱ún xóo mbá xkamídá rí xawaʼ.
Príncipes makhañún ga̱jma̱a̱ espada numuu rí najmún rajúún mu muthi numa.
Ikhaa rúʼko̱ numuu jngóo mutsijmiin náa ku̱ba̱ʼ ndrígóo Egipto”.