Ezequiel

23 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, kúwi̱i̱n a̱jmi̱i̱n gu̱ʼu̱ bi̱ mbáwíí ru̱du̱ún.* 3 Nigi̱ʼdi̱i̱ nigujuamíjna̱ náa Egipto, asndu nákha waʼxaáʼ nigi̱ʼdi̱i̱ nigujuamíjna̱, ikhí xa̱bu̱ nixmindú cháʼdúún, ga̱jma̱a̱ nirugua̱ cháʼdúún. 4 Dxáʼgú bi̱ giʼnii mbiʼyuu Oholá* ga̱jma̱a̱ bi̱ gi̱ʼta̱ mbiʼyuu Oholibá.* Ikhiin niguánú ninindxu̱ún gu̱ʼwi̱ʼ ga̱jma̱a̱ niguáʼdiin jiámá ga̱jma̱a̱ wa̱ʼxa̱ʼ.* Mbiʼyuu Oholá nandoo gáʼthúu̱n Samaria ga̱jma̱a̱ mbiʼyuu Oholibá nandoo gáʼthúu̱n Jerusalén.

5 Oholá nigíʼdu̱u̱ nigujuamínáʼ nákha nindxu̱u̱ a̱ʼgiu̱ʼ. Ra̱ʼkhá tháán nigua̱ʼa̱ rí mabóoʼ gajmíi̱n ñawiin, xa̱bu̱ bi̱ kúwá mijngii, xa̱bu̱ asirios. 6 Ninindxu̱ún xa̱bu̱ ñajunʼ bi̱ kugíʼ xtíin dí azul ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún, xúgíinʼ nindxu̱ún jiámá bi̱ mitsiʼñíin bi̱ nudrúwíin wáyú. 7 Nigujuamínáʼ má xúʼko̱ gajmíi̱n xa̱bu̱ bi̱ guáʼdáá numún bi̱ kúwá náa Asiria, mbá xúgíinʼ, ga̱jma̱a̱ niʼni gachíminaʼ gajmíi̱n xándú xkawi̱i̱nʼ bi̱ guáʼdiin xa̱bu̱ bi̱ ikhaa ra̱ʼkhá tháán nindoo mabóoʼ gajmíi̱n. 8 Tániñuuʼ ragujuamínáʼ xó má niʼni náa Egipto. Numuu rí nákha ikhaa ninindxu̱u̱ dxáʼgú, xa̱bu̱ bi̱ kúwá ikhí nibúúnʼ gajmiún ikhaa. Nirugua̱ cháʼdúu ga̱jma̱a̱ nixidírámáá náa ikhaa dí ra̱ʼkhá tháán egua̱ʼa̱ rí mubúúnʼ gajmiún. 9 Nixnajxíi náa ñawiin bi̱ ra̱ʼkhá tháán nigua̱ʼa̱ rí mabóoʼ gajmíi̱n, xa̱bu̱ Asiria, xa̱bu̱ bi̱ ra̱ʼkhá tháán nindoo mabóoʼ gajmíi̱n. 10 Ikhiin nini̱ marigá pa̱jnu rí tsaʼtsaaʼ ga̱jma̱a̱ nirugui̱i̱n e̱ji̱i̱n jiámá ga̱jma̱a̱ wa̱ʼxa̱ʼ, ma̱ngaa niradíin ga̱jma̱a̱ espada. Niwán ri̱go̱o̱ dí raʼkhí ga̱jma̱a̱ numuu náa majñu̱únʼ gu̱ʼu̱, ga̱jma̱a̱ ikhiin nijmiuʼ mu ma̱ni̱ rí mamínuuʼ.

11 Índo̱ giʼtio̱o̱ bi̱ mbiʼyuu Oholibá ndiʼyoo rígi̱, niʼni itháán xkawiʼ rí nagua̱ʼa̱ mabóoʼ ga̱jma̱a̱ itháán xkawiʼ nigujuamínáʼ ki xóo dí niʼni ndxájuu. 12 Ra̱ʼkhá tháán nigua̱ʼa̱ mabóoʼ gajmíi̱n xa̱bu̱ bi̱ kúwá mijngii náa xtáa, gajmíi̱n xa̱bu̱ Asiria, xa̱bu̱ ñajunʼ ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún bi̱ nugíʼ xtíin mitsaanʼ* ga̱jma̱a̱ nudrúwíin wáyú, mbá xúgíinʼ ikhiin nindxu̱ún jiámá bi̱ mitsiʼñíin. 13 Índo̱ ikhaa niʼni gachíminaʼ, ndi̱yo̱o̱ dí mbá nájmi̱i̱n mbíʼtháán eni̱. 14 Mú Oholibá nigujuamínáʼ itháán xkawiʼ. Ndiʼyoo xtiʼkúún xa̱bekha bi̱ nigumawíin náa pared, xtiʼkúún caldeos dí kiʼnííʼ ga̱jma̱a̱ color maña̱ʼ, 15 kajkuáa mbá cinturón náa smídún ga̱jma̱a̱ grígu mbá xtíin paska náa edxu̱ún, mbá xúgíinʼ ikhiin nakujmiin xóo soldado, dí nandoo gáʼthúu̱n xa̱bu̱ Babilonia, bi̱ nigumiin náa ku̱ba̱ʼ ndrígu̱ún caldeos. 16 Índo̱ ndiʼñún nigíʼdu̱u̱ nigua̱ʼa̱ mabóoʼ gajmíi̱n ga̱jma̱a̱ nikuʼmiin bi̱ magún kuñu̱u̱n ajngáa náa Caldea. 17 Ikha jngóo xa̱bu̱ Babilonia naguwáʼ má xúʼko̱ gúyáá ikhaa, mu mubúúnʼ gajmiún náa xia̱wuu, nini̱ gachíi ga̱jma̱a̱ rí nagua̱ʼa̱ mubúúnʼ.* Nda̱wa̱á dí niniñaminaʼ rí muni̱ gachíi, nitsínguminaʼ náa ikhiin, numuu dí niwi̱yu̱u̱ʼ eni̱.

18 Numuu rí nigujuamínáʼ má xúʼko̱ xkawiʼ kayuuʼ, niʼni rí makujmaa pa̱jnu rí tsaʼtsaaʼ, ikha jngóo ni̱ni̱ tsínguminaʼ náa ikhaa numuu rí niwi̱yu̱ʼ eʼni, xó má ni̱ni̱ tsínguminaʼ náa ndxájuu. 19 Ga̱jma̱a̱ Oholibá, narmáʼáan a̱jkiu̱u̱n xóo nigujuamínáʼ nákha ninindxu̱u̱ dxáʼgú, índo̱ nigujuamínáʼ náa ku̱ba̱ʼ ndrígóo Egipto, ikhaa nigujuamínáʼ itháán. 20 Ra̱ʼkhá tháán nigua̱ʼa̱ mabóoʼ gajmíi̱n ñawiin xóo eni̱ gu̱ʼú ñawúún xa̱bu̱ bi̱ guáʼdáá sngu̱ún xóo sngo̱o̱ búrru ga̱jma̱a̱ xóo sngu̱ún wáyú. 21 Ikháán nitayáaʼ matani̱ dí tsaga dí nitani̱ náa Egipto nákha dxáʼgú nindxa̱a̱ʼ, nákha nirugua̱ cháʼdáaʼ nákha xóó nimbáa tségugua.

22 Ikha jngóo ikháán Oholibá, rígi̱ dí naʼthí Tátá Jeobá bi̱ itháán mba̱a̱: ‹Atayáá, ma̱ni̱ rí makásgañúúnʼ ña̱waanʼ, bi̱ nitani̱ tsínguminaʼ náa ikhiin numuu rí niwiya̱a̱ʼ eni̱ ga̱jma̱a̱ ma̱ʼkhá kagui̱i̱n muni̱ ngínáá asndu náá: 23 Xa̱bu̱ Babilonia ga̱jma̱a̱ mbá xúgíinʼ xa̱bu̱ caldeo, xa̱bu̱ Pecod, xa̱bu̱ Soa ga̱jma̱a̱ xa̱bu̱ Coa, gajmiún mbá xúgíinʼ xa̱bu̱ Asiria. Mbá xúgíinʼ ikhiin nindxu̱ún jiámá bi̱ mitsiʼñíin, xa̱bu̱ ñajunʼ ga̱jma̱a̱ xa̱bu̱ ñajunʼ bi̱ raguáʼdáá wéñuuʼ numún, soldado ga̱jma̱a̱ xa̱bekha bi̱ kaxtaʼwíin, xúgíinʼ bi̱ nudrúwíin wáyú. 24 Muni̱ ngínáá ga̱jma̱a̱ xóo aʼwóo carro dí nuxmijná ga̱jma̱a̱, ma̱ngaa llántóo, ga̱jma̱a̱ mbaʼin soldado, majmúún escudo rí mba̱ʼu̱ ga̱jma̱a̱ rí majkhaʼ* ma̱ngaa casco. Muruguama̱ʼa̱a̱n náa mbájndi, ikhúún makuʼmíin rí munimbaníí numaaʼ, ga̱jma̱a̱ ikhiin munimbaníí numaaʼ xó má gáʼndún ikhiin. 25 Masngajmá rí nakásngañu̱ʼ etani̱ ga̱jma̱a̱ ikhiin muni̱ ngínáá ga̱jma̱a̱ rí nakásngáñu̱únʼ. Murujturígú rakháaʼ ga̱jma̱a̱ cháʼwáanʼ, ga̱jma̱a̱ bi̱ gáguanún náa ikháán makhañún ga̱jma̱a̱ espada. Magún kudiin ejña̱a̱nʼ jiámá ga̱jma̱a̱ wa̱ʼxa̱ʼ ga̱jma̱a̱ bi̱ gáguanún náa ikháán mikhiin. 26 Murawíi xtíñaaʼ ma̱ngaa maguanún ga̱jma̱a̱ xábiáaʼ dí mitsaanʼ. 27 Ma̱ni̱ gámbáa rí tsaga dí natani̱ ga̱jma̱a̱ rí natagujuamínáʼ, dí nitagíʼdi̱i̱ nitani̱ náa ku̱ba̱ʼ ndrígóo Egipto. Ni xátañu̱u̱n itháán ga̱jma̱a̱ ni xármáʼáan a̱jkia̱a̱nʼ gáʼni Egipto›.

28 Numuu dí rígi̱ dí naʼthí Tátá Jeobá bi̱ itháán mba̱a̱: ‹Atayáá maxnajxíin náa bi̱ tsíyáaʼ gátañu̱u̱n, bi̱ nitani̱ tsínguminaʼ náa ikhiin numuu rí niwiya̱a̱ʼ eni̱. 29 Muni̱ ngínáá numuu rí nawiñu̱u̱nʼ kuyaaʼ ga̱jma̱a̱ magún kudúún xúgíʼ dí xtaʼdáá dí gakhi̱i̱ nitiejunʼ mu makhánáaʼ, tsaʼtsáánʼ gúniña̱a̱nʼ, nándáa xtíñaaʼ. Makujmaa pa̱jnu majthi̱ʼ rí natabáaʼ gajmiáanʼ, rí tsaga dí natani̱ ga̱jma̱a̱ rí natagujuamínáʼ makujmaa pa̱jnu. 30 Magíʼnáaʼ rígi̱ numuu dí nijngruiga̱a̱ʼ náa kidxúúnʼ xa̱bu̱ xuajin xóo mbáa a̱ʼgu̱ bi̱ nagujuamínáʼ, numuu rí nitani̱ gachíminaʼ gajmiáanʼ xándiu̱ún bi̱ xkawi̱i̱nʼ. 31 Nitani̱ xó má niʼni ndxájuaaʼ, ga̱jma̱a̱ ikhúún maxna̱a̱ʼ copa ndrígóo›.

32 Rígi̱ dí naʼthí Tátá Jeobá bi̱ itháán mba̱a̱:

“Numuu dí ikhúún ni̱tha̱”, eʼthí Tátá Jeobá bi̱ itháán mba̱a̱›.

35 Ikha jngóo rígi̱ dí naʼthí Tátá Jeobá bi̱ itháán mba̱a̱: ‹Numuu rí nimbumaaʼ xtayoʼ ga̱jma̱a̱ nánguá eyaaʼ gátayo̱ʼ mbá kayuuʼ, matamíniiʼ ga̱jma̱a̱ numuu rí tsaga dí nitani̱ ma̱ngaa rí natagujuamínáʼ›”.

36 Ikhú Jeobá niʼthúnʼ: “A̱ʼdióo xa̱biya̱, marata̱ dí magíʼnuu Oholá ma̱ngaa Oholibá ga̱jma̱a̱ matasngajmún kaʼwu rí tsaga dí nini̱ xáʼ. 37 Táguájun jmbu náa ikhúún ga̱jma̱a̱ nixidíí eʼdi. Raʼkháa i̱ndó nini̱ aʼkhá índo̱ ndiyamajkhún xándú bi̱ xkawi̱i̱nʼ, ma̱ngaa nitsikhi̱i̱n* e̱ji̱nʼ bi̱ niguáʼdiin xóo ganitsu náa xándiu̱ún. 38 Ma̱ngaa niniuʼ rígi̱: Nini̱ gachíí náa guʼwá rí nduyamajkhuʼ mbiʼi rúʼko̱, ga̱jma̱a̱ túyamajkuíí sábado ndrígóʼ. 39 Ikháá má mbiʼi rúʼko̱, índo̱ niguámbúun niradíin e̱jñu̱ún, nixnajxi̱i̱n xóo tsigijñaʼ náa xándiu̱ún bi̱ tsagiin, niguwáʼ náa goʼwóʼ mu muni̱ gachíí. Rígi̱ dí ikhiin nini̱ náa awúu̱n goʼwóʼ. 40 Asndu nixuʼmaa mbáa bi̱ ma̱ʼkha̱ kayóo ajngáa, mu xa̱bu̱ bi̱ kúwá mitsínguánʼ maguwáʼ. Índo̱ ikhiin kúwá raguwáʼ kamba̱a̱, ikháán nina, nitaníiʼ idaaʼ ga̱jma̱a̱ nitani̱ tsiʼyáminaʼ ga̱jma̱a̱ xábiáaʼ rí mitsaanʼ. 41 Ga̱jma̱a̱ niraʼwún náa mbá xílí rí mitsaanʼ ga̱jma̱a̱ wíji̱ mbá mesa náa inaaʼ, náa nitasrigu rí ndataun ga̱jma̱a̱ aceitiuʼ. 42 Nawáán naguwáʼ mbaʼin xa̱bu̱ bi̱ nda̱a̱ rí xmiéjúúnʼ ga̱jma̱a̱ ikhí naguwáʼ xa̱bu̱ najngi̱i̱n, bi̱ naguwáʼ xígií náa ku̱ba̱ʼ mijxooʼ.* Ikhiin nindra̱ʼa̱ náa ñawúúnʼ gu̱ʼu̱ xábí ga̱jma̱a̱ nidra̱ma̱ʼ corona dí mitsaanʼ náa edxu̱ún.

43 Ikhú ni̱tha̱ ga̱jma̱a̱ numuu bi̱ nagaaʼ dí nakudaminaʼ aʼkhá gajmíi̱n eʼwíinʼ: ‹Dí xúgi̱ magujuamínáʼ má xúʼko̱›. 44 Ikha jngóo nigún má xúʼko̱ náa ikhaa, xóo eʼni mbáa bi̱ na̱jkha̱ gáʼyoo a̱ʼgu̱ bi̱ nagujuamínáʼ. Xúʼko̱ kaʼnii nigún gútsijníí Oholá ga̱jma̱a̱ Oholibá, gu̱ʼu̱ bi̱ nuni̱ rí tsaga. 45 Mú xa̱bu̱ míjíinʼ muthi dí magíʼnuu ga̱jma̱a̱ numuu dí nakudaminaʼ aʼkhá gajmíi̱n eʼwíinʼ ma̱ngaa ga̱jma̱a̱ numuu dí naxídíí eʼdi, numuu dí ikhiin nindxu̱ún gu̱ʼu̱ bi̱ nuxudamíjna̱ aʼkhá gajmiún eʼwíinʼ ga̱jma̱a̱ nuxidíí eʼdi.

46 Numuu dí rígi̱ dí naʼthí Tátá Jeobá bi̱ itháán mba̱a̱: ‹Ma̱ʼkha̱ kiʼdiin mbaʼin soldado náa ikhiin mu muni̱ rí mumíniiʼ, ma̱ngaa mu muni̱ rí mani̱ndxu̱ún mbá rí maʼni maxuʼwúúnʼ eʼwíinʼ ga̱jma̱a̱ mbá rí magún kudúún. 47 Soldado muxnúún ga̱jma̱a̱ itsí ma̱ngaa muradíin ga̱jma̱a̱ espada. Muradíin e̱jñu̱ún jiámá ga̱jma̱a̱ wa̱ʼxa̱ʼ ga̱jma̱a̱ mutsikha̱a̱ guʼwún. 48 Ma̱ni̱ gámbáa dí tsaga rí naguma náa xuajin mu xúʼko̱ mbuyáá mbá xúgíinʼ gu̱ʼu̱ ga̱jma̱a̱ xúyaridáá rí tsaga rí nu̱nila ikháanʼ. 49 Ikhiin muni̱ rí mumíniiʼla ga̱jma̱a̱ numuu rí tsaga rí nu̱nila, ma̱ngaa ga̱jma̱a̱ numuu aʼkhá rí ni̱nila gajmiála xándú bi̱ xkawi̱i̱nʼ. Ga̱jma̱a̱ ikháanʼla muʼgua̱nú mbu̱ya̱a̱ dí ikhúún nindxu̱ʼ Tátá Jeobá bi̱ itháán mba̱a̱›”.