Génesis

38 Nákha mbiʼi rúʼko̱, Judá niniñúúnʼ a̱ngui̱i̱n ga̱jma̱a̱ nigíʼ guʼwá xtíin ndrígóo náa mijngii xtáa mbáa xa̱bu̱ adulamita bi̱ mbiʼyuu Hirá. 2 Ikhí Judá ndiʼyoo mbáa wáxióo xa̱bu̱ cananeo bi̱ mbiʼyuu Súa, bi̱ ndiyáa ga̱jma̱a̱ bi̱ nibóo̱ʼ ga̱jma̱a̱. 3 Ikhaa niguewáan mbáa ada̱.* Nda̱wa̱á nigiʼdaa mbáa dxámá, bi̱ nixná mbiʼyuu Er. 4 Nda̱wa̱á nigiʼdaa i̱mba̱a̱ ada̱ bi̱ nixná mbiʼyuu Onán. 5 Ikhaa nitanga̱a̱ nigiʼdaa i̱mba̱a̱ ada̱ bi̱ nixná mbiʼyuu Selá. Judá xtáa náa Aczib índo̱ a̱ʼgiu̱u̱ nigiʼdaa ada̱ bugi̱.

6 Nda̱wa̱á, Judá nixniúu mbayáa a̱ʼgu̱ bi̱ mbiʼyuu Tamar. A̱ʼdióo bi̱ giʼnii bi̱ mbiʼyuu Er. 7 Jeobá tséniguuʼ xóo nindxu̱u̱ Er, a̱ʼdióo Judá bi̱ giʼnii. Ikha jngóo Jeobá niʼni rí makhañúu. 8 Ga̱jma̱a̱ numuu xúgíʼ rígi̱, Judá niʼthúu̱n Onán: “Ayáa a̱ʼgiu̱u̱ ndxájuaaʼ bi̱ nikháñuu. Atabáaʼ ga̱jma̱ʼ, mu xúʼko̱ ikhaa magiʼdiin e̱ji̱n ga̱jma̱a̱ numaaʼ ikháán”. 9 Mú Onán ndaʼyoo dí e̱ji̱n bi̱ gágiʼdiin xánindxu̱ún e̱ji̱i̱n ikhaa. Ikha jngóo, índo̱ nabóoʼ ga̱jma̱a̱ a̱ʼgiu̱u̱ ndxájuu, nixídíí mbayííʼ iyaʼ tsígooʼ mu xúʼko̱ xáxniúu e̱ji̱n ndxájuu. 10 Mú dí naʼni, nindxu̱u̱ raʼkhí náa iduu Jeobá. Ikha jngóo, niʼni rí mákháñuu. 11 Ikhú Judá niʼthúu̱n Tamar bi̱ nindxu̱u̱ guʼgiúunʼ: “Gaguanáa náa goʼwóo ana̱a̱ʼ* ga̱jma̱a̱ ganindxa̱a̱ʼ má xúʼko̱ xóo a̱ʼgú xuáʼa̱ asndu índo̱ gíkhi̱i̱ a̱ʼdióʼ Selá”. Numuu dí nindxa̱ʼwáminaʼ: “Ra̱ʼkhá lá ikhaa makhañúu xó má a̱ngui̱i̱n”. Ikha jngóo Tamar ni̱jkha̱a̱ ga̱jma̱a̱ niguanúu náa goʼwóo anu̱u̱.

12 Tiempo nda̱wa̱á índo̱ nikháñuu a̱ʼgiu̱u̱ Judá, wáxióo Súa. Índo̱ Judá nánguá nixtáa ngíná, ni̱jkha̱ ga̱jma̱a̱ Hirá xa̱bu̱ adulamita bi̱ nambáxu̱u̱ ga̱jma̱a̱ náa kúwá rudu̱u̱n mugiu̱u̱ bi̱ kúwá náa Timná. 13 Ikhú mbáa niʼthúu̱n Tamar: “Jmégia̱a̱ʼ xtáa ratsimuu náa Timná mu maʼdu̱u̱n mugiu̱u̱”. 14 Ikhú ikhaa niríyáaʼ xtíñuu dí a̱ʼgú xuáʼa̱, ga̱jma̱a̱ nigrigu mbá xtíin náa edxu̱u̱ dí nirugoo ga̱jma̱a̱ inuu ga̱jma̱a̱ nigi̱ʼi̱ náa riejun xuajin Enaim, náa kamba̱a̱ dí na̱jkha̱ náa Timná. Niʼni rígi̱ numuu dí Selá nikhi̱i̱ má mu xóó tséxniúu mbayáa.

15 Índo̱ Judá ndiʼyoo, mbá nacha̱ nidxaʼwáminaʼ dí nindxu̱u̱ mbáa a̱ʼgu̱ bi̱ nagujuamínáʼ, numuu dí Tamar nigrigu mbá xtíin náa edxu̱u̱ dí nirugoo ga̱jma̱a̱ inuu. 16 Ikhú, niríyamina’ náa kamba̱a̱, ga̱jma̱a̱ ni̱jkha̱ náa ikhaa, numuu dí na̱nguá ndiʼyoo á mu nindxu̱u̱ guʼgiúunʼ, ga̱jma̱a̱ nindo̱ʼo̱o̱: “Atabáaʼ ga̱jma̱á ni̱ndxu̱ʼ, mbá péñu”.* Ikhaa niriʼña̱a̱: “Ndiéjunʼ gáraxnuʼ mu mabo̱ʼ ga̱jma̱á nindxa̱a̱ʼ rá.” 17 “Makuʼmáanʼ mbáa a̱ʼdá tsújtuunʼ bi̱ kúʼdaa, niʼthí ikhaa”. Ga̱jma̱a̱ Tamar niriʼña̱a̱: “Ndiéjunʼ gatatsiʼñáʼ mu mba̱yo̱o̱ rí gajkhun dí mataxuʼnguáanʼ xá.” 18 Ikhaa niraxu̱u̱: “Ndiéjunʼ eyaaʼ maniʼñúuʼ rá.” Ikhú Tamar niʼthí: “Anillo dí naraxnáá ga̱jma̱a̱ sello ga̱jma̱a̱ cuerda ndrígóo ma̱ngaa ragótia̱a̱ʼ dí jchá náa ñawáanʼ”. Ikha jngóo ikhaa nixnúu, nibóo̱ʼ ga̱jma̱a̱ Tamar ikhú niguewáan ada̱. 19 Nda̱wa̱á, ikhaa ni̱tu̱xi̱i̱ ga̱jma̱a̱ ni̱jkha̱a̱, nirígúu xtíin dí grígú edxu̱u̱ ga̱jma̱a̱ nigíiʼ xtíñúun dí a̱ʼgú xuáʼa̱.

20 Judá nikunguaanʼ bi̱ nambáxu̱u̱ ga̱jma̱a̱, xa̱bu̱ adulamita, mu maʼga kayáa mbáa a̱ʼdá tsújtuunʼ mu xúʼko̱ maxnáa rí niguanúu náa a̱ʼgu̱, mú ikhaa táxkamaa. 21 Ikhaa nirajxu̱u̱n xa̱bu̱ bi̱ kúwá náa xuajin rúʼko̱: “Náa xtáa a̱ʼgu̱ bi̱ nagujuamínáʼ* bi̱ gíʼ náa kamba̱a̱ rí nanújngoo náa Enaim rá.” Ikhiin nithi: “Nimbá miʼtsú táxtáa mbáa a̱ʼgu̱ bi̱ nagujuamínáʼ gi̱i̱”. 22 Nda̱wa̱á, ikhaa nitanga̱a̱ náa Judá ga̱jma̱a̱ niʼthúu̱n: “Na̱nguá nixkamaa. Xa̱bekha bi̱ kúwíin náa xuajin rúʼko̱ nithun’: ‹Gi̱i̱ nda̱wa̱a̱ nimbáa a̱ʼgu̱ bi̱ nagujuamínáʼ›”. 23 Judá niʼthí: “Gáguanúu má ga̱jma̱a̱ xúgíʼ dí ni̱xnu̱u̱, raʼkháa gáʼni dí mutsijmánʼlú. Mú ikhúún nikuʼmaa má a̱ʼdá tsújtuunʼ náa ikhaa mú ikháán na̱nguá nitaxkamaa”.

24 Ajtsú igu̱nʼ nda̱wa̱á nitháán Judá: “Guʼgiáanʼ Tamar nigujuamínáʼ. Ga̱jma̱a̱ numuu rí nigujuamínáʼ kaguewáan mbáa ada̱”.* Ikhú Judá niʼthí: “Guxkri̱ya̱a̱ʼla rexa̱a̱ ga̱jma̱a̱ gutsika̱a̱”. 25 Índo̱ kúwá ruxkriya̱a̱ʼ, ikhaa nikuʼma ajngáa rígi̱ náa jmégiu̱u̱: “Xa̱biya̱ bi̱ niʼni dí maguewáan ada̱ ndrígóo rígi̱”. Niʼthí xóó: “Mbá péñu, atayáá tsáa ndrígóo anillo rí najuixnáá ga̱jma̱a̱ sello ga̱jma̱a̱ cuerda ma̱ngaa ixi̱ ragóti”. 26 Índo̱ Judá ndiʼyoo dí nixná ga̱jma̱a̱ niʼthí: “Ikhaa nda̱a̱ aʼkhúun numuu dí ikhúún táxniu̱u̱ a̱ʼdióʼ Selá”. Nda̱wa̱á nánguá niguta̱nga̱a̱ mabóoʼ ga̱jma̱a̱ ikhaa.

27 Índo̱ ni̱jkha̱nú mbiʼi rí magiʼdaa ada̱, ikhú ndiʼyoo dí kagui̱i̱n kuateʼ. 28 Índo̱ ikhaa xtáa raʼnii ada̱, mbáa rí ikhaa nikruíyaʼ ñawúunʼ. Ga̱jma̱a̱ mbá nacha̱ partera niroʼóo gúmá dí maña̱ʼ xngeʼdi náa ñawúunʼ ga̱jma̱a̱ niʼthí: “Bigi̱ nixtáa ginii”. 29 Mú ikhaa nitanga̱a̱ nikuda̱a̱ʼ ñawúunʼ, ikhú nigájnuu ndxájuu. Ikha jngóo partera niʼthí: “¡Nitani̱ gawíínʼ rudáaʼ”!. Ikha jngóo nixná mbiʼyuu Pérez.* 30 Nda̱wa̱á nigájnuu i̱mba̱a̱ bi̱ kaxtoʼóo gúmá dí maña̱ʼ xngeʼdi náa ñawúunʼ. Ikhaa nixná mbiʼyuu Zérah.