Zacarías

Jeobá naʼni rí ma̱ʼkha̱a̱ du̱u̱n mu maxnúu ruʼwambiʼ,

ikhaa naxnún ruʼwa xúgíinʼ xa̱bu̱,

xúgíinʼ naxnún rí najma̱a̱ náa ku̱ba̱ʼ.

 2 Numuu rí xándú* bi̱ guáʼdiin náa guʼwún nithi rí minduwaʼ

ga̱jma̱a̱ xa̱bu̱ xawan niwasngájmún rí minduwaʼ.

Nuthi xnuʼndaa rí nda̱a̱ dí ejmaa

nunimíjna̱ muni̱i̱ a̱jkiu̱ún xa̱bu̱ mú ndawa̱a̱ tsáa eʼni̱i̱ a̱jkiu̱u̱n.

Ikha jngóo xa̱bu̱ majngruigu̱u̱n gi̱i̱ ñuʼún xóo mugu̱,

mumíniiʼ numuu rí ndawa̱a̱ baxtúu.

 3 Ra̱ʼkhá tháán kasngáñu̱ʼ ka̱ñu̱u̱n baxtúu,

mandi̱ʼi̱i̱n cuenta bi̱ kuya̱ edxu̱u̱ bi̱ nuni̱ ngíníi xa̱bu̱,*

numuu rí Jeobá bi̱ naʼtáñajúúnʼ ángeles ndaʼyoo xóo kúwá mugiu̱u̱, bi̱ kúwá náa goʼwóo Judá,

ma̱ngaa niʼni rí mani̱ndxu̱ún xóo wáyú bi̱ míjíinʼ bi̱ nagún muxmíjná.

 4 Náa ikhaa* na̱ʼkha̱ mbáa xa̱bu̱ bi̱ mbayá edxu̱u̱,*

náa ikhaa, na̱ʼkha̱ mbáa xa̱bu̱ ñajunʼ bi̱ mámbáñún,*

náa ikhaa, rígá xkamídá rí nuxmijná ga̱jma̱a̱,

náa ikhaa naguwáʼ xúgíinʼ bi̱ nduyáá xóo marigá ñajunʼ, mbóó ikhí guwáʼ xúgíinʼ.

 5 Mani̱ndxu̱ún xóo xa̱bu̱ xkujiinʼ

bi̱ nuxujmbari̱gu̱u̱n ku̱ba̱ʼ náa kamba̱a̱ índo̱ nuxmijná.

Muni̱ guerra, numuu rí Jeobá xtáa ga̱jma̱á nindxu̱ún,

ga̱jma̱a̱ bi̱ nudrúwíin wáyú magajnúu gamajkhún.

 6 Ma̱ni̱ rí magiʼdoo itháan numuu goʼwóo Judá

ga̱jma̱a̱ ma̱ni̱ kríya̱a̱ʼ goʼwóo José.

Ma̱ni̱ rí matangi̱ín,

numuu rí masngajmúún rí nagáwíinʼ a̱jkiu̱nʼ ka̱ñu̱u̱n,

mani̱ndxu̱u̱ rí asndu xóo ikhúún nditháan tániʼñúuʼ raʼndoʼ ka̱ñu̱u̱n,

numuu rí ikhúún nindxu̱ʼ Jeobá Dios ndrígu̱ún ga̱jma̱a̱ mariʼñúún.

 7 Xa̱bu̱ Efraín mani̱ndxu̱ún xóo xa̱bu̱ xkujiinʼ bi̱ tsémiñún,

ga̱jma̱a̱ a̱jkiu̱ún maxtáa gagi xóo índo̱ naʼwa̱a̱n vino.

E̱jñu̱ún mbuyáá rígi̱ ga̱jma̱a̱ makuwá gagi,

maʼdxuu a̱jkiu̱ún ga̱jma̱a̱ numuu Jeobá.

 8 ‹Majuiñún mu magímbíin,

numuu rí ma̱ni̱ káwíin ga̱jma̱a̱ maʼga̱nú maʼni mbaʼin,

ma̱ngaa maʼni mbaʼin má xúʼko̱.

 9 Maski má maxidiríʼiin xóo tsígáʼ náa majñu̱u̱ʼ xuajin,

marmáʼáan a̱jkiu̱ún kuyoʼ asndu náa mbaaʼ mitsínguánʼ,

ikhiin gajmiún e̱jñu̱ún muda̱a̱ tsiaki̱i̱ ga̱jma̱a̱ maguwáanʼ.

10 Maʼkháaʼla kagui̱i̱n asndu náa ku̱ba̱ʼ ndrígóo Egipto,

magímbíin asndu náa Asiria,

maʼgá kagui̱i̱n náa ku̱ba̱ʼ ndrígóo Galaad ga̱jma̱a̱ náa Líbano,

xáʼngo̱o̱ ikhí makuwá.

11 Makidaa náa lamáa* maʼni dí marigá gamiéjunʼ,

ga̱jma̱a̱ maʼni rí lamáa maʼbajxu̱u̱ gakhi̱i̱,

xúgíʼ iyaʼ dí rígá náa mañu Nilo mujndo̱o̱ʼ.

Rí niʼnimbamínáʼ Asiria magajtoo

ga̱jma̱a̱ ixi̱ ñajunʼ dí rígá náa Egipto maʼga̱a̱.

12 Ikhúún bi̱ nindxu̱ʼ Jeobá, ma̱ni̱ rí ikhiin maguáʼdáá itháan numún,

ga̱jma̱a̱ ikhiin mugríga̱a̱ mbiʼyuʼ›, eʼthí Jeobá”.