Zacarías
11 “Atarmbáʼtáá xkruguaaʼ Líbano,
mu mbá aguʼ mato̱ʼo̱o̱ matsikáa cedros ndrígáaʼ.
2 ¡Araxtaa ngíná enebro, numuu dí cedro ningajxi̱i̱,
ixi̱ mba̱ʼu̱ niguma gámbáa!
¡Gakuwáanʼla ngíná robles dí rígá náa Basán,
numuu rí xaxi̱ niguma gámbáa!
3 ¡Gudxawíín! Baxtúu kúwá ngíná,
numuu rí niguma gámbáa gamajkhu rí guáʼdáá.
¡Gudxawíín! León bi̱ gújkuíinʼ* nundxa̱ʼwa̱
numuu rí niguma gámbáa xaxi̱ dí rígá náa rawuunʼ mañu Jordán.
4 Rígi̱ rí naʼthí Jeobá Dios ndrígóʼ: ‹Atie̱wu̱u̱n mugu̱ bi̱ na̱jkha̱ kiʼdiin makhañún. 5 Bi̱ nutsi̱i̱n, nuradíin ga̱jma̱a̱ rígi̱ tséʼni maguaʼdáá aʼkhúún. Bi̱ nugujui̱i̱n nuthi: “Gaguma mba̱a̱ Jeobá numuu rí maʼgánú magúʼdoo wéñuuʼ”. Baxtúu bi̱ nuñewu̱u̱n na̱nguá egáwíinʼ a̱jkiu̱ún kuñún›.
6 ‹Numuu rí xátangu̱ún magáwíinʼ a̱jkiu̱nʼ ka̱ñu̱u̱n xa̱bu̱ xuajin, eʼthí Jeobá. Ikha jngóo ma̱ni̱ dí kanikhíín xa̱bu̱ mutañajumijná ga̱jma̱a̱ rey maʼtañájúúnʼ, muni̱ gámbáa ku̱ba̱ʼ ga̱jma̱a̱ nimbáa xáni̱ kríya̱a̱ʼ›”.
7 Nigíʼdu̱u̱ niñewu̱u̱n mugu̱ bi̱ na̱jkha̱ kiʼdiin makhañún, ni̱ni̱ ga̱jma̱a̱ numala ikháanʼ mugu̱ bi̱ kuwáanʼ ngíná. Ikha jngóo niguájtúun a̱jma̱ ragóti: Mbá nixna mbíʼyuu Májáanʼ a̱jkiu̱u̱n, i̱mba̱ nixna mbíʼyuu dí Naru̱wa̱a̱, ikhú nigíʼdu̱u̱ niñewu̱u̱n mugu̱. 8 Náa káaʼ mbá igu̱nʼ nixkúún ajtsíin baxtúu numuu rí nánguá eʼngo̱o̱ a̱jkiu̱nʼ eni̱, ikhiin mangiin nawiñu̱u̱nʼ kuyoʼ. 9 Ikha jngóo ni̱tha̱: “Ní xáña̱wu̱u̱n itháan. Bi̱ na̱jkha̱ rakháñuu, gakhañúu. Bi̱ kaʼyoo makhañúu, gakhañúu. Bi̱ xóó gáguanún, mámbáa gíkhu̱ xuyuuʼ ndxájuu”. 10 Ikhú niguájtúu̱n ragótiuʼ rí Májáanʼ a̱jkiu̱u̱n ga̱jma̱a̱ nixpígaʼ, xúʼko̱ ni̱ni̱ gámbáa rí nimbánúʼ gajmíʼ xúgíinʼ xa̱bu̱ xuajin. 11 Xúʼko̱ niguma gámbáa rí nimbánuu mbiʼi rúʼko̱, mugu̱ bi̱ kúwá ngíná bi̱ kúwá ruyoʼ ndiyáá rí nindxu̱u̱ ajngóo Jeobá.
12 Ikhú ni̱thu̱u̱n: “Á mu májánʼ e̱ya̱a̱la, gu̱ni̱ numuʼla, á mu na̱nguá, gaguanála ga̱jma̱a̱”. Ikhú nini̱ numuʼ* 30 mbújkha̱a̱ plata.
13 Nda̱wa̱á Jeobá niʼthúnʼ: “Atadama̱ʼa̱n náa gajti rí gíʼdoo numuu... mbújkha̱a̱ dí nixnuʼ rí nda̱a̱ kayuuʼ numuu”. Ikhú niguajtúun 30 mbújkha̱a̱ plata ga̱jma̱a̱ nidama̱ʼa̱a̱n náa kajti rí gíʼdoo numuu náa goʼwóo Jeobá.
14 Nda̱wa̱á nixpígaʼ rí maʼni raga̱jma̱ ragótiuʼ, dí Naru̱wa̱a̱, xúʼko̱ ni̱ni̱ rí Judá ga̱jma̱a̱ Israel ní xákúwá mbóó.
15 Jeobá niʼthúnʼ: “Dí xúgi̱ ada rí najmuu mbáa baxtúu bi̱ nda̱a̱ rí ejmaa. 16 Numuu rí maniʼñúuʼ dí magajnúu mbáa baxtúu náa xuajin. Xáñawu̱u̱n mugu̱ bi̱ na̱jkha̱ rakháñún, xáñíinʼ e̱jñu̱ún mugu̱ bi̱ nindáti̱gi̱i̱n ni má xáʼni thanún náa nigawúúnʼ ni má xáxniʼtsún bi̱ naʼngu̱u̱n má naguájun. Rí phú maʼni, mikhu̱u̱n mugu̱ bi̱ mbaʼwi̱i̱n. Magruigú tsújún.
17 ¡Gínáalá baxtiúʼ bi̱ nda̱a̱ dí ejmaa, bi̱ naniñúúnʼ mugu̱!
Mbá espada maʼni gawúunʼ ñawúunʼ ga̱jma̱a̱ iduu mújúunʼ.
Ñawúunʼ mujndooʼ mbá kayuuʼ
ga̱jma̱a̱ iduu mújúunʼ magugóo”.