Rí na̱jkha̱ inún Romanos

9 Na̱tha̱ rí gajkhun xóo mbáa xa̱bi̱i̱ Cristo; tséni ndúwaʼ, espíritu santo* naʼthúu̱n ku̱ma̱ ndrígóʼ rí ma̱tha̱ dí gajkhun 2 rí xtáá ngíná wéñuuʼ ga̱jma̱a̱ rí na̱ʼkhu̱ má xúʼko̱ a̱jkiu̱nʼ.* 3 Á mu nandoo, ikhúúnʼ maniʼñuuʼ ranindxu̱ʼ xa̱bi̱i̱ Cristo mu mani̱ndxu̱ʼ mbáa xa̱bu̱ ra̱májáanʼ, á mu xúʼko̱ ma̱ndoo mambáñún a̱ngui̱nʼ, ma̱ngaa bi̱ ka̱ñu̱u̱n, 4 bi̱ ni̱ndxu̱ún israelitas. Ikhiin kaʼñún maxtriguíin mu mani̱ndxu̱ún e̱ji̱i̱n Dios, ikhiin nijuixnún gamajkhu, ikhiin nimbánuu gajmíi̱n, ikhiin nijuixnún Xtángoo, ikhiin nikhánún rí muni̱ ñajuunʼ Dios, náa ikhiin mambanúu rí Dios nikudaminaʼ maʼni. 5 Ikhiin ni̱ndxu̱ún e̱jñún wajin xiʼñúlú ga̱jma̱a̱ náa ikhiin ni̱ʼkha̱ Cristo. Gaguma mba̱a̱ asndu kámuu mbiʼi Dios bi̱ itháan mba̱a̱ náa xúgíinʼ. Xúʼko̱ gáʼni.*

6 Raʼkháa ajngóo Dios támbánuu. Numuu dí raʼkháa xúgíinʼ e̱ji̱i̱n Israel ni̱ndxu̱ún xa̱bu̱ “Israel”. 7 Maski má xúgíinʼ ni̱ndxu̱ún e̱ji̱i̱n Abrahán mú Dios ndaʼyoo dí raʼkháa xúgíinʼ ni̱ndxu̱ún e̱ji̱i̱n ikhaa, xó má kiʼnirámáʼ: “Náa Isaac gáguwáʼ bi̱ mani̱ndxu̱ún ejña̱a̱nʼ”. 8 Rígi̱ nandoo gáʼthúu̱n dí raʼkháa xúgíinʼ e̱ji̱n bi̱ niguwáʼ náa Abrahán ni̱ndxu̱ún e̱ji̱i̱n Dios, mú bi̱ nigumiin náa nikudaminaʼ Dios buʼko̱ bi̱ phú ni̱ndxu̱ún e̱ji̱i̱n Abrahán. 9 Numuu dí rígi̱ rí nikudaminaʼ Dios: “Ikhaa má mbiʼi rígi̱ ma̱ʼkhá mbu̱júu̱ʼ ga̱jma̱a̱ Sara magiʼdaa mbáa ada̱”. 10 Raʼkháa i̱ndó mbiʼi rúʼko̱ nirígá, xúʼko̱ má nirígá ma̱ngaa índo̱ Rebeca nigiʼdiin cuateʼ,* e̱ji̱i̱n Isaac bi̱ ninindxu̱u̱ wajin xiʼñúlú. 11 Nákha e̱ji̱n buʼko̱ xóó tségumiin ni xóó tséni rí májánʼ ni má dí ra̱májánʼ, Dios niʼthí tsáá nindxu̱u̱ bi̱ garíya̱a̱ʼ, numuu rí Dios nda̱yáaʼ bi̱ ikhaa nandoo raʼkháa ga̱jma̱a̱ numuu ñajunʼ rí naʼni mbáa xa̱bu̱, 12 nijuiʼtháán Rebeca: “Rí bi̱ giʼnii mani̱ndxu̱u̱ ñumbáá ndrígóo bi̱ chíʼgíiʼ”. 13 Xó má naʼthí náa kiʼnirámáʼ: “Nindoʼ ka̱yo̱o̱ Jacob, mú táʼndoʼ ka̱yo̱o̱ Esaú”.

14 Lá kuwáánʼ ruʼthá rí Dios nindxu̱u̱ ra̱májáanʼ ráʼ. ¡Na̱nguá! 15 Numuu rí niʼthúu̱n Moisés: “Ma̱ni̱ mba̱a̱ a̱jkiu̱nʼ ka̱yo̱o̱, bi̱ ikhúúnʼ gáʼndoʼ mani mba̱a̱ a̱jkiu̱nʼ ka̱yo̱o̱, magáwíinʼ a̱jkiu̱nʼ ka̱yo̱o̱, bi̱ ikhúúnʼ gáʼndoʼ magáwíinʼ a̱jkiu̱nʼ ka̱yo̱o̱”. 16 Ikha jngóo, raʼkháa ga̱jma̱a̱ numuu rí nandoo mbáa xa̱bu̱ o ga̱jma̱a̱ tsiakii* rí naʼni, nindxu̱u̱ rí nandoo Dios, bi̱ nagáwíin a̱jkiu̱u̱n. 17 Numuu rí náa Kiʼniraʼmáʼ naʼthí rí Dios niʼthúu̱n faraón: “Niniʼñáʼ maraxtaa ga̱jma̱a̱ numuu rígi̱: Rí masngajmáaʼ tsiakii ndrígóʼ ma̱ngaa rí majuiʼthá mbiʼyuʼ náa xúgíʼ tsu̱du̱u̱ ku̱ba̱ʼ”. 18 Ikha jngóo, ikhaa nagáwíinʼ a̱jkiu̱u̱n kaʼyoo bi̱ ikhaa nandoo, mú naniñuuʼ maʼni gújkhúʼ a̱jkiu̱u̱n bi̱ ikhaa nandoo.

19 Mú ikháán marathu̱nʼ: “Náá numuu rí Dios xóó naxkamaa aʼkhúún xa̱bu̱ rá. Lá maxtáa mbáa bi̱ mawiji̱ jtu̱u̱n rí nandoo maʼni Dios ráʼ.” 20 Ikháán rí nindxa̱a̱ʼ xa̱bu̱ numbaaʼ, náá numuu rí xúʼko̱ triʼñáá Dios rá. Lá ma̱ndoo mbá rí niguma maʼthúu̱n bi̱ niʼnii “náá numuu rí xúʼko̱ nitaniu̱u̱n rá.” 21 Lá bi̱ naʼni daan xándoo majmuu ikha̱á má ku̱ba̱ʼ maʼni mbá rayaʼ dí majmaa mbóo mbiʼi kiejuunʼ* ga̱jma̱a̱ i̱mba̱ rayaʼ dí majmaa xúgíʼ mbiʼi ráʼ.* 22 Xúʼko̱ má, maski má Dios nindoo masngájma rí nakásngañuuʼ ga̱jma̱a̱ nindoo masngájma tsiakii ndrígóo mú nigi̱ʼthu̱u̱n, ga̱jma̱a̱ niʼngo̱o̱ a̱jkiu̱u̱n kaʼyoo rayaʼ rí tséguíi dí niguma mu maguma gámbáa. 23 Mu masngájmún rí ikhaa ni̱ndxu̱u̱ itháan mba̱a̱ náa xa̱bu̱ bi̱ ikhaa má nigáwíin a̱jkiu̱u̱n kaʼñún* ma̱ngaa dí mundrigú rí ikhaa niʼthí maxnún dí niʼni mújúunʼ mu maxnún ikhiin, 24 xóo muʼthá, ikháanʼlú, bi̱ nindxa̱ʼwúlu raʼkháa i̱ndó náa xa̱bu̱ judíos, ma̱ngaa náa xa̱bu̱ bi̱ kúwá náa numbaaʼ. 25 Xó má ikhaa naʼthí náa niʼnirámáʼ Oseas: “Ma̱ta̱ rí nindxu̱u̱ xuajñunʼ mbá xuajen dí raʼkháa xuajñunʼ ga̱jma̱a̱ maʼndoʼ ka̱yo̱o̱ mbáa bi̱ táʼndoʼ ka̱yo̱o̱. 26 Náa mbaaʼ rí nijuiʼthá ‹ikháanʼla na̱nguá nindxa̱la xuajñunʼ›, ikhí majuiʼthá rí ni̱ndxu̱ún e̱ji̱i̱n Dios bi̱ ndaʼya”.

27 Ma̱ngaa Isaías niʼthí ga̱jma̱a̱ numuu Israel: “Maski ajndu e̱ji̱i̱n Israel mani̱ndxu̱ún mbaʼin wéñuuʼ xóo jui̱ʼi̱ dí rígá náa lamáa, mú mbá nguáti̱i̱n bi̱ gákáwíin. 28 Jeobá* mandi̱ʼi̱i̱n cuenta mbá xúgíinʼ ga̱jma̱a̱ mbá nacha̱* xa̱bu̱ bi̱ kúwá náa tsu̱du̱u̱ ku̱ba̱ʼ”. 29 Xó má niʼtáriyaʼ Isaías: “Rí á mu Jeobá* bi̱ naʼtáñajunʼ mekhuíí na̱nguá niniñúúnʼ e̱ji̱i̱n, ikháanʼ muʼguanulú manindxu̱lú xóo Sodoma ga̱jma̱a̱ mambríguánʼ gajmiúlú xóo Gomorra”.

30 Mú ndiéjunʼ gúʼtá rá. Rí xa̱bu̱ numbaaʼ bi̱ tséyáʼ rí jmbu, niguáʼdáá rí jmbu, jmbu rígi̱ na̱ʼkha̱ numuu rí niguáʼdáá fe. 31 Mú Israel, maski má ndiyáʼ mbá xtángoo rí jmbu, mú na̱nguá nixkamaa xtángoo rúʼko̱. 32 Náá numuu rá. Numuu rí ikhiin na̱nguá ndiyáaʼ ga̱jma̱a̱ fe, i̱ndó ga̱jma̱a̱ rí nuni̱. Nijngrádiinʼ ga̱jma̱a̱ “itsí rí naʼni majngrádiinʼ”; 33 xó má naʼthí náa kiʼnirámáʼ: “¡Gu̱ya̱a̱la! Náa Sion nagrígu mbá itsí rí naʼni majngrádáánʼ ga̱jma̱a̱ mbá itsí rí naʼni ngawúúnʼ xa̱bu̱, mú bi̱ gágiʼdoo fe náa ikhaa xájmáa a̱jkiu̱u̱n”.