Isaías
8 Jeobá niʼthúnʼ: “Ayá mbá xajpa paska ga̱jma̱a̱ ataniraʼmáʼ májánʼ ikhí:* ‹Maher-Salal-Has-Baz›.* 2 Nandoʼ dí a̱jmi̱i̱n testigos jmbiin muniraʼmáʼ dí niʼni ginún náa nitaniraʼmáʼ: Ikhaa nindxu̱u̱ ndxajkun Urías ga̱jma̱a̱ Zacarías a̱ʼdióo Jeberekías”.
3 Ikhú nibo̱ʼ ga̱jmu̱ʼ* profetisa,* ikhaa niguewáan mbáa ada̱* ga̱jma̱a̱ nigiʼdaa mbáa dxámá. Jeobá niʼthúnʼ: “Araxná mbiʼíí Maher-Salal-Has-Baz, 4 numuu dí nákha ada̱ xóó tséʼthí ‹papá›, ‹mamá›, maʼga kiʼda mbá xúgíʼ dí rígá náa Damasco ga̱jma̱a̱ dí maguanáa náa Samaria maʼga kiʼda náa inuu rey ndrígóo Asiria”.
5 Mbu̱júu̱ niʼthúnʼ Jeobá. Niʼthí:
6 “Numuu dí xa̱bu̱ xuajin rígi̱ nini̱ gaʼduunʼ iyaʼ rí tséʼba̱a̱n dí rígá náa Siloé*
ga̱jma̱a̱ nadxún kuyáá Rezín ga̱jma̱a̱ a̱ʼdióo Remalías,
7 ikha jngóo, ¡atayáá!, Jeobá ma̱ʼkha̱ kayóo náa ikhiin
iyaʼ rí gíʼdoo jxu̱u̱ʼ ga̱jma̱a̱ mañu Éufrates dí mba̱a̱,
rey ndrígóo Asiria ga̱jma̱a̱ mbá xúgíʼ tsiaki̱i̱ ndrígóo.
Ikhaa matsimuu náa mbá xúgíʼ dí na̱ʼkha̱ iyaʼ,
manújngoo ragu̱ xúgíʼ náa na̱jkha̱ kúʼúun iyaʼ
8 mato̱ʼo̱o̱ náa mbaaʼ Judá.
Maʼni majnííʼ iyaʼ náa Judá, makidaa ga̱jma̱a̱ makráʼáan iyaʼ asndu náa aphuu.
¡Xpíjpiúu dí juáʼwíi marugoo náa mbá xúgíʼ ku̱ba̱a̱ʼ,
Emmanuel!”.*
9 Ikháanʼla xuajin, gu̱ni̱ ngínáa, mú maguma gámbáanʼla.
¡Gudxawíín, xúgiáanʼ ikháanʼla, bi̱ kuwáanʼla náa mbaaʼ mitsínguánʼ!
¡Gu̱ni̱ratamijná mu dí muxmijná,* mú maguma gámbáanʼla!
¡Gu̱ni̱ratamijná mu dí muxmijná, mú maguma gámbáanʼla!
10 ¡Guríya̱ʼ mbá awan, mú xáʼga̱nú marigá!
¡Gu̱tha̱ má dí eyala, mú xágájnuu májánʼ,
numuu rí Dios xtáa ga̱jma̱á nindxu̱xu̱!*
11 Ñawúunʼ Jeobá dí gíʼdoo tsiaki̱i̱ nirígá náa ikhúún, índo̱ niʼthúnʼ dí xáni̱ xó má eni̱ xa̱bu̱ xuajin rígi̱:
12 “¡Xúta̱a̱nla awan dí xa̱bu̱ xuajin rígi̱ nutháán awan!
Xámíñála gáʼni dí ikhiin namíñúún kuyáá,
xáguáʼáanʼla náa inuu rúʼko̱.
13 Jeobá bi̱ naʼtáñajúúnʼ ángeles..., ikhaa gíʼmaa mbu̱ya̱a̱ dí nindxu̱u̱ kaʼwii,
ikhaa gíʼmaa mamiñála ku̱ya̱a̱
ga̱jma̱a̱ ikhaa gíʼmaa maʼni dí maguáʼáanʼla”.
14 Ikhaa mani̱ndxu̱u̱ xóo mbá náa rí mitsúʼkháan,
mú ma̱ngaa nindxu̱u̱ xóo mbá itsí náa masmbujmaaʼ*
ga̱jma̱a̱ mbá itsí dí naʼni majngrádáánʼ
mbá nájma̱ guʼwá dí rígá náa Israel,
nindxu̱u̱ mbá tsáʼkhá ga̱jma̱a̱ mbá ñuñuu
náa xa̱bu̱ bi̱ kúwíin náa Jerusalén.
15 Mbaʼin majngrádiinʼ, majnguti̱gi̱i̱n ga̱jma̱a̱ majmiguiin,
majngutíguíin náa tsáʼkhá ga̱jma̱a̱ maxtugui̱i̱n.
16 ¡Atambújxi̱ i̱yi̱i̱ʼ náa nigumarámáʼ,
atagíʼmááʼ sello xtángoo* náa majñu̱únʼ bi̱ xtáá gajmíʼ!
17 Ra̱ʼkhá tháán gúʼthu̱u̱n Jeobá, bi̱ xtáa rarkaʼwu inuu náa goʼwóo Jacob, náa ikhaa gágúʼthu̱u̱n.
18 ¡Gu̱ya̱a̱! Ikhúún gajmíʼ e̱ji̱n bi̱ Jeobá nixniúʼ nindxu̱xu̱ xóo tsinaʼ ga̱jma̱a̱ milagro náa Israel, dí na̱ʼkha̱ náa Jeobá bi̱ naʼtáñajúúnʼ ángeles, bi̱ xtáa náa kúbá Sion.
19 Á mu kúwá bi̱ nu̱tala “Aʼgua gajmiála bi̱ nurajxu̱u̱n wajinʼ, ga̱jma̱a̱ bi̱ nuni̱ xawan bi̱ nuthi ngu̱ʼwa̱ ga̱jma̱a̱ asndu mañu̱ú ethi”, lá raʼkháa itháan májánʼ gáʼni dí mbá xuajin marajxu̱u̱ Dios ndrígóo ráʼ. Lá gíʼmaa murajxu̱u̱n bi̱ nikháñún dí mumbañún bi̱ nduya ráʼ. 20 ¡Dí gíʼmaa muni̱ nindxu̱u̱ dí mbuyáʼ náa xtángoo ga̱jma̱a̱ náa i̱yi̱i̱ʼ dí nigumarámáʼ!
Índo̱ tséthí xó má ajngáa rígi̱, ráguáʼdáá aguʼ.* 21 Mámbáa dí ikhiin manújngoo náa ku̱ba̱ʼ ngíná inuu ga̱jma̱a̱ maxkidxu̱u̱, ga̱jma̱a̱ numuu dí naxkidxu̱u̱ ga̱jma̱a̱ nakiʼnáa, mayejxiraʼan rijma̱a̱ maʼtátsríguíi rey ndrígóo ga̱jma̱a̱ Dios ndrígóo. 22 Nda̱wa̱á mayejxi̱ náa ku̱ba̱ʼ, i̱ndó tsingíná gáʼyoo ga̱jma̱a̱ mikína, ndájkua̱ ga̱jma̱a̱ mbiʼi mingíjyúuʼ, mikína ga̱jma̱a̱ nda̱a̱ aguʼ.