Isaías
1 Rígi̱ nindxu̱u̱ dí niwasngájmáá* Isaías* a̱ʼdióo Amoz ga̱jma̱a̱ numuu dí magíʼnuu Judá ga̱jma̱a̱ Jerusalén náa mbiʼi dí nixtáa Uzías, Jotán, Acaz ga̱jma̱a̱ Ezequías, reyes bi̱ nikúwá náa Judá:
2 Gudxawíín mekhu ga̱jma̱a̱ atagíʼ edxa̱a̱ʼ matadxawíín ku̱ba̱ʼ,
numuu dí Jeobá niʼthí:
“Ni̱ni̱ mbáji̱i̱n ga̱jma̱a̱ nisngúún e̱ji̱n,
mú ikhiin nixujximíjna̱ náa inuʼ.
3 Xedi̱ naniniiʼ májánʼ bi̱ nañewu̱u̱n,
ga̱jma̱a̱ búrru naninuuʼ náa nuphiʼtsu muʼúún xujkiúu bi̱ nañewu̱u̱n,
mú Israel na̱nguá eninúúnʼ,
xa̱bu̱ xuajñunʼ nuni̱ rí na̱nguá eyáá”.
4 ¡Ngínáa lá xuajin dí naʼni aʼkhá,
xuajin dí ra̱ʼkhá tháán gíʼdoo aʼkhúun,
xa̱bu̱ ra̱míjíinʼ, e̱ji̱n bi̱ nichíin!
Niniña̱a̱nʼ Jeobá,
táguáʼdáá gamajkhún náa inuu Dios bi̱ Kaʼwii náa Israel,
niniña̱a̱nʼ Dios.
5 Náá xóó gándoo majuixnála á mu dí nuxujxímíjnala má xúʼko̱ rá.
Nigawúunʼ mbá xúgíʼ e̱dxa̱la
ga̱jma̱a̱ mbá xúgíʼ a̱jkia̱la gíʼdoo nandii.
6 Nigawúunʼ mbá xúgíʼ xuyala, nagi̱ʼdu̱u̱ náa rajkuála asndu náa e̱dxa̱la, nándáa nditháan dí májánʼ,
nigawánla, maxaʼ xúgíʼ xuyala ga̱jma̱a̱ nikájtu rambujya̱ʼ rí tima...,
na̱nguá niguma thanáá, tágúu aceite ni má táxtambróʼoo xtíin.
7 Niguanáa ku̱bala, nikha̱a̱ xuajñala.
Ndu̱ya̱a̱la xígi̱ xóo xa̱bu̱ bi̱ naguwaáʼ na̱ʼphu̱ xúgíʼ dí rígá náa xuajñala.
Nindxu̱u̱ asndu xóo dí ku̱ba̱ʼ náa rí xa̱bu̱ bi̱ naguwaáʼ nagún kudúún xúgíʼ.
8 Niniña̱a̱nʼ wáxióo* Sion, xóo mbá guʼwá xtúguá náa kiʼdu uva,
xóo mbá guʼwá xtúguá náa mbá mbaaʼ dí kiʼdu pepino,
xóo mbá xuajin dí kúgumaʼá eni̱ xa̱bu̱ sia̱nʼ.
9 Á mu dí Jeobá bi̱ naʼtáñajúúnʼ ángeles na̱nguá niniñúúnʼ nguéjmi̱i̱n bi̱ nikáwíin náa ikháánʼlú,
muʼgua̱nú manindxu̱lú xóo Sodoma
ga̱jma̱a̱ makujmáánʼlú xóo Gomorra.
10 Gudxawíínla ajngóo Jeobá xa̱bu̱ ñajunʼ bi̱ ra̱míjíinʼ bi̱ kúwá náa Sodoma.
Xa̱bu̱ Gomorra guʼgíʼ e̱dxa̱la mudxawíín xtángoo* ndrígóo Dios ndrígúxu̱.
11 “Náá gájmuʼ tsigijñaʼ mbaʼa dí nuxnajxíla rá.”, eʼthí Jeobá.
“Niskoʼ eʼni tsigijñaʼ dí nutsikarámáʼ índo̱ nuxnajxíin mugu̱ e̱jmba̱a̱, ga̱jma̱a̱ xtangún xujkhúʼ bi̱ nuphiʼtsu májánʼ,
ga̱jma̱a̱ nánguá eʼni maʼdxuʼ eʼdiún e̱jín xédí, e̱jín múgú ni má tsu̱jtuunʼ.
12 Ikháanʼ naguwa̱ʼla gúxnajxími̱jna̱ náa ikhúún,
mú tsáá lá ninda̱ʼa̱la mu̱ni̱ rúʼko̱,
dí mujngapríga̱ xúʼko̱ kaʼnii náa rexo̱o̱ goʼwóʼ rá.
13 Guniʼñááʼ raguwa̱ʼ kudala tsigijñaʼ dí tsígáʼ dí ragíʼdoo numuu.
Nawi̱yu̱ʼ eʼni rí ndataun rí nutsikala.
Ndxa̱a̱ índo̱ nagi̱ʼi̱ gu̱nʼ rudiiʼ, mbiʼi sábado, dí nagimbáanʼla...,
nánguá eʼngo̱ʼ eni̱la rí nu̱ni̱ magia, ga̱jma̱a̱ ikhú má nagimbáanʼla mbiʼi kiejuunʼ.
14 Nawi̱yu̱ʼ eʼni ndxo̱o̱ gu̱nʼ rudiiʼ dí nu̱nila ga̱jma̱a̱ i̱ʼwáʼ ndxa̱a̱,
ki̱wu̱n e̱yo̱o̱ ikhúún,
néʼngo̱ʼ eʼni ndxa̱a̱ rí nu̱nila.
15 Ga̱jma̱a̱ índo̱ ikháanʼ nuxuáʼwíi ñawánla,
narkaʼwu iduʼ náa ikháanʼla.
Maski ajndu mbaʼa nuthu etajkáanla,
ikhúún tsédxawun,
numuu dí kajnííʼ eʼdi náa ñawánla.
16 Gu̱nala, gu̱ni̱ kaʼwumijnáa,
guyejxíngaa náa iduʼ xúgíʼ dí ra̱májánʼ dí nu̱nila,
guniʼñááʼ ru̱ni̱ dí ra̱májánʼ.
17 Gajmañala mu̱ni̱ dí májánʼ, guʼyáʼ dí jmbu,
guxpríguíí bi̱ naʼni ngíníi eʼwíinʼ,
gumbáñún e̱jín wáʼa*
ga̱jma̱a̱ gumbáñún gu̱ʼú xuáʼa”.
18 “Aguwaʼla ga̱jma̱a̱ guʼnimbáníí numulú”, eʼthí Jeobá.
“Tséʼniuu á mu aʼkhála niʼni̱i̱ maña̱ʼ xngeʼdi
maʼni̱i̱ miʼxídiʼ xóo idiʼ,
tséʼniuu á mu niʼni̱i̱ maña̱ʼ xóo xtíin dí maña̱ʼ xngeʼdi,
maʼni̱i̱ xóo mugu̱.
19 Á mu dí ikháanʼ nandala mudxawíín,
mu̱phula xúgíʼ dí májánʼ dí rígá náa ku̱ba̱ʼ.
20 Mú, á mu tsíyala gúdxawíín ga̱jma̱a̱ nuxujxímíjnala,
mikuala espada, numuu dí Jeobá má niʼthí rígi̱”.
21 ¡Atayáá xú káʼnii xuajin dí jmbu nigutajxi̱i̱ mbáa a̱ʼgu̱ bi̱ nagujuamínáʼ!
Ikhí nirígá dí májánʼ,
dí jmbu nirígá ikhí,
mú dí xúgi̱, i̱ndó xa̱bu̱ bi̱ nuradíin a̱ngiu̱ún kúwá.
22 Plata ndrígáaʼ niʼni tsaga
ga̱jma̱a̱ cerveza* ndrígáaʼ ninda̱wa̱a̱ʼ iyaʼ.
23 Príncipes ndrígáaʼ gújkhúʼ a̱jkiu̱ún ga̱jma̱a̱ nambájxu̱u̱n gajmiún kuʼwáʼ.
Mbá xúgíinʼ ikhiin nanigu̱u̱nʼ mundrigú regalo ga̱jma̱a̱ guáʼthi̱i̱n dí mudaaʼ.
Tséni̱i̱ dí májánʼ a̱ʼdá wáʼa,
ga̱jma̱a̱ nditháan tsénimbaníí májánʼ numuu a̱ʼgú xuáʼa.
24 Ikha jngóo Tátá bi̱ gajkhun, Jeobá bi̱ naʼtáñajúúnʼ ángeles,
bi̱ gíʼdoo tsiaki̱i̱ náa Israel, naʼthí:
“¡Ikhí rá! Ma̱ni̱ kríyamínáʼ náa xa̱bu̱ sia̱nʼ ndrígóʼ
ga̱jma̱a̱ matangu̱ún kagui̱i̱n xa̱bu̱ sia̱nʼ ndrígóʼ.
25 Matangu̱ún ka̱ña̱a̱n ga̱jma̱a̱ ñawúnʼ,
ma̱ni̱ kaʼwi̱i̱ ga̱jma̱a̱ xábú dí tsagán
ga̱jma̱a̱ magruígúu xúgíʼ dí tsaga náa ikháán.
26 Ma̱ni̱ dí matanga̱án maraʼdiin bi̱ nunimbaníí xkujndu, xó má nákha ginii
ga̱jma̱a̱ bi̱ nuxna consejo, xó má nákha ginii.
Nda̱wa̱á magumbiʼyaaʼ Xuajin dí naʼni dí májánʼ* náa iduu Dios, Xuajin dí nawi̱ji̱ jmbu* náa inuu Dios.
27 Sion maguma kríyaaʼ ga̱jma̱a̱ dí májánʼ,
ga̱jma̱a̱ xa̱bu̱ bi̱ kúwá ikhí matangi̱ín índo̱ gáguma dí jmbu.
28 Bi̱ tsénimbu̱u̱n ga̱jma̱a̱ bi̱ nuni̱ aʼkhá mbá míʼtsúú gáguma gámbíin mbá xúgíinʼ,
ga̱jma̱a̱ bi̱ nuniña̱a̱nʼ Jeobá maguma gámbíin.
29 Numuu dí ikhiin mati̱ñu̱u̱nʼ gáʼni ixi̱ mba̱ʼu̱ dí ikháanʼ nindala muguaʼdáá,
ga̱jma̱a̱ ikháanʼ mati̱ya̱la gáʼni jardín* dí niraʼwi̱i̱la.
30 Numuu dí ikháanʼ muʼgua̱nú mani̱ndxa̱la xóo mbá ixi̱ mba̱a̱ dí nujnduxtáa inúu,
ga̱jma̱a̱ xóo mbá jardín rí tséjnu̱ʼ iyaʼ.
31 Xa̱bu̱ xkujiiʼ maʼga̱nú mani̱ndxu̱u̱ xóo ra̱jxa̱ nijndooʼ,
ga̱jma̱a̱ ñajunʼ rí naʼni xóo rí mataskamáá aguʼ,
mbá nacha̱ gíkhiin mbá nájmi̱i̱n,
ga̱jma̱a̱ nimbáa xáʼngo̱o̱ gándijyuuʼ”.