Timbá i̱yi̱i̱ʼ rí niʼnirámáʼ Juan

1 Bi̱ nixtáa asndu nákhá ginii,* bi̱ niʼdxawíín, bi̱ ndiʼyáá ga̱jma̱a̱ idulú, bi̱ niyejxi̱i̱lú ma̱ngaa bi̱ nixkajmaalú, ikhaa nindxu̱u̱ ajngáa, bi̱ naʼni rí makuwá xúgíinʼ 2 (xúʼko̱, rí makuwáanʼlu kámuu niwasgájmulú ga̱jma̱a̱ ndiʼyáá ma̱ngaa nuʼthálú ga̱jma̱a̱ numuu ikhaa, nuʼthá ga̱jma̱a̱ numuu rí makuwáanʼlu kámuu dí nixtáa ga̱jma̱a̱ Anu̱lú rí niwasngájmulú), 3 rí ndiya̱a̱ ga̱jma̱a̱ dí nidxáwinxu, kúwáanʼxu ru̱tala mangáanʼ, mu xúʼko̱ makuwáanʼla mbóó ga̱jma̱á nindxu̱xu. Ga̱jma̱a̱ ikháanʼ kuwáanʼxu mbóó gajmiúxu Anu̱lú ga̱jma̱a̱ Jesucristo bi̱ nindxu̱u̱ A̱ʼdióo. 4 Nuniráʼmáʼxu rígi̱ mu gagi dí kuaʼdááxu mani̱ndxu̱u̱ kájxi̱.

5 Rígi̱ nindxu̱u̱ ajngáa dí nidxáwinxu náa ikhaa ga̱jma̱a̱ kúwáanʼxu rutalaʼ: Dios nindxu̱u̱ aguʼ ga̱jma̱a̱ náa ikhaa nda̱a̱ nimbá dí mikrína. 6 Á mu nuʼthá “kuwáánʼ mbóó gajmiúlú ikhaa” mú jngruigulú má xúʼko̱ náa mikrína, kuwáanʼ ru̱ʼni̱ nduwaʼ ga̱jma̱a̱ tséʼnimbaníí dí gajkhun. 7 Á mu jngruigulú náa aguʼ xó má ikhaa xtáa náa aguʼ, kuwáánʼlú mbá jnduʼ xúgiáánʼ ga̱jma̱a̱ eʼdiuu Jesús bi̱ nindxu̱u̱ A̱ʼdióo naʼni kaʼwi̱i̱ aʼkhúlú.

8 Á mu nuʼthá “na̱nguá kuaʼdáá aʼkhá”, kuwáanʼ ru̱ʼni̱ nduwamíjná má ikháanʼlu ga̱jma̱a̱ dí gajkhun nda̱a̱ náa ikháanʼlu. 9 Á mu nuʼthá aʼkhúlú, ikhaa maʼni mba̱a̱ a̱jkiu̱u̱n kaʼyoo ga̱jma̱a̱ maʼni kaʼwi̱i̱ náa xúgíʼ dí raʼkhí ni̱ʼni̱, numuu rí ikhaa nindxu̱u̱ jmbii ga̱jma̱a̱ májáanʼ. 10 Á mu nuʼthá “túxuʼdámíjnáxu aʼkhá”, kuwáanʼ rusngajmá dí Dios nindxu̱u̱ minduwaaʼ ga̱jma̱a̱ nda̱a̱ ajngóo náa ikháanʼlu.