Isaías
3 Numuu dí, ¡gu̱ya̱a̱la! Tátá bi̱ gajkhun, Jeobá bi̱ naʼtáñajúúnʼ ángeles,
magruigúu náa Jerusalén ga̱jma̱a̱ náa Judá xúgíʼ dí nambáñúún ga̱jma̱a̱,
xúgíʼ ganitsu ga̱jma̱a̱ iyaʼ,
2 xa̱bu̱ xkujiiʼ ga̱jma̱a̱ soldado,
bi̱ naʼnimbánuu xkujndu ga̱jma̱a̱ profeta,* xa̱bu̱ xawan ga̱jma̱a̱ xa̱bu̱ nikhi̱i̱,
3 bi̱ naʼtáñajúúnʼ mbá cincuenta, bi̱ kayá edxu̱u̱ ga̱jma̱a̱ bi̱ naxná consejo,
bi̱ najmañuu magia ga̱jma̱a̱ bi̱ naʼni brujo.
4 Ma̱ni̱ dí jiámá mani̱ndxu̱ún príncipes ndrígu̱ún,
ga̱jma̱a̱ xa̱bu̱ bi̱ tséyáá rí muni̱ mutañajúúnʼ.
5 Xa̱bu̱ muni̱ ngíníi eʼwíinʼ,
mámbáa maʼni ngínáa ndxájuu.
Dxámá maʼni ngínáa xa̱bu̱ nikhi̱i̱,
ga̱jma̱a̱ bi̱ nda̱a̱ dí nindxu̱u̱ matsíjmaa bi̱ nduyamajkuíí.
6 Mámbáa magutuwiin ndxájuu bi̱ xtáa náa goʼwóo anu̱u̱* ga̱jma̱a̱ maʼthúu̱n:
“Ikháán kaʼnii maraxna̱ ikha: Aratañájunxu ikháán.
Atie̱wa̱a̱n ikháán mbá ru̱tsu̱u̱ rígi̱ dí niguma gámbáa”.
7 Mú mbiʼi rúʼko̱, ikhaa maʼthí:
“Ikhúún xámbróʼoo xtíin náa dí nigawánla,*
ragúʼdoo ganitsu ni má xtíin náa goʼwóʼ.
Xúʼgiúunʼla dí matañájúúnʼ xa̱bu̱ xuajin”.
8 Numuu dí Jerusalén nixpátri̱ga̱a̱
ga̱jma̱a̱ Judá nixpátríguíi,
numuu dí nuthi ga̱jma̱a̱ dí nuni̱, tsénigu̱u̱ʼ Jeobá,
índo̱ kúwá náa inuu Dios tsénimbu̱u̱n.
9 Dí xóo nakujmaa inún naʼthí dí nini̱,
nuthi aʼkhá dí nini̱ xóo niʼni Sodoma,
ga̱jma̱a̱ tségíʼ dí murkaʼwumáʼán.
¡Ngíníi lá ikhiin, numuu dí ikhiin má nduyáʼ gamiéjunʼ dí maguáʼníí!
10 Guthu̱u̱nla bi̱ nuni̱ dí jmbu rí maguáʼníí dí májánʼ,
ikhiin muda̱a̱ʼ ga̱jma̱a̱ numuu dí nuni̱.*
11 ¡Ngínáa lá bi̱ ra̱májáanʼ!
Magíʼnuu gamiéjunʼ,
magíʼnuu xó má dí ikhaa niʼni ga̱jma̱a̱ ñawúunʼ.
12 Mú náa xuajñunʼ, bi̱ nuthúún xa̱bu̱ xóo muñajunʼ nuni̱ xó má eñún ikhiin,
ga̱jma̱a̱ gu̱ʼu̱ etañajúúnʼ.
Xuajñunʼ, bi̱ kuya̱ edxu̱u̱ náa ikháán nuni̱ rí xáta̱ya̱a̱ dí gátani̱
ga̱jma̱a̱ nuni̱ ngawa̱a̱n náa kamba̱a̱ʼ.
13 Jeobá nawi̱ji̱ mu makruigi̱i̱n,
nawi̱ji̱ mu maʼthí ndiéjunʼ gáguáʼníí xa̱bu̱ xuajin.
14 Jeobá mandxaʼwún mu mandi̱ʼi̱ín cuenta bi̱ kuya̱ edxu̱u̱ ga̱jma̱a̱ príncipes bi̱ kúwá náa xuajñuu.
“Ikháanʼla nitsikha̱a̱ náa kiʼdu uva,
ga̱jma̱a̱ kuaʼdáá náa guʼwála dí ni̱ni̱ kuʼwúún xa̱bu̱ ngíníi.
15 Ndíjkha dí nuxujmbíriga̱a̱ xuajñunʼ
ga̱jma̱a̱ nuxuʼdátíga̱ inún bi̱ ngíníi náa yujndaʼ rá.”
Eʼthí Tátá bi̱ itháán mba̱a̱, Jeobá bi̱ naʼtáñajúúnʼ ángeles.
16 Jeobá naʼthí: “Numuu dí waʼxiinʼ Sion nuni̱ mbaʼumíjna̱
ga̱jma̱a̱ asndu mbi̱jua̱ aphúún jngruigu̱u̱n,
nurajmiin idún egún, nuni̱ xiaʼwun, asndu mañuu egún,
mu muni̱ dí mawán xábí dí jngrígú náa rajkhúún,
17 Jeobá maʼni rí makráʼáan ska* náa edxu̱ún waʼxiinʼ Sion,
ga̱jma̱a̱ Jeobá maʼni rí xágúgoo xkídúnʼ.
18 Mbiʼi rúʼko̱, Jeobá marígúu dí mitsiʼñíin, xábí dí jngrígú náa rajkhúún,
dí najmún magiwa̱nʼ edxu̱ún ga̱jma̱a̱ xábí dí xóo mbá xíʼtáa gu̱nʼ kaʼnii,
19 xábí, ajua̱nʼ dí natra̱ʼa̱ ñawúúnʼ ga̱jma̱a̱ xtíin dí nagúgoo ga̱jma̱a̱ edxu̱ún,
20 dí nuni̱ maʼni mitsiʼyáa ga̱jma̱a̱ edxu̱ún, cadena dí kajti náa rajkhúún, ga̱jma̱a̱ xtíin dí kua̱ʼa̱n tsu̱xtu̱ún,
náa kajni̱ʼ perfume ga̱jma̱a̱ amuleto,*
21 anillo ga̱jma̱a̱ xábí dí natra̱ʼa̱ rakhúún,
22 vestido dí nugíʼ índo̱ naʼni ndxa̱a̱ kiejuunʼ, xtíin rí nugíʼ mbájníí ga̱jma̱a̱ xtíin dí wajpha, ma̱ngaa murriún dí mitsaanʼ,*
23 niwanʼ dí nurajtuun ga̱jma̱a̱ ñawúúnʼ, xtíin dí lino,*
xtíin dí nagiwa̱nʼ náa edxu̱ún, ga̱jma̱a̱ xtíin dí nagúgoo ga̱jma̱a̱ edxu̱ún.
24 Ikhaa dí majmúún aceite rí ndataun, maʼni ndaska,
ikhaa dí majmúún cinturón, majmúún ñuñuu,
ikhaa dí muxtigúu mitsaanʼ edxu̱ún, maʼga tátsiu̱ún,
ikhaa dí mugíʼ xtíin mitsaanʼ, mugíʼ xtíin mi̱du̱,*
ikhaa dí maʼni mitsiʼñíin, muguaʼdáá mbá tsinaʼ dí nagiʼma ga̱jma̱a̱ ajua̱nʼ mijkha.
25 Xa̱bia̱a̱ʼ makhañún ga̱jma̱a̱ espada,
ga̱jma̱a̱ soldado ndrígáaʼ bi̱ xkujiinʼ makhañún náa nuxmijná.
26 Riejuun xuajin makuwá ngíná ga̱jma̱a̱ magáwíinʼ a̱jkiu̱ún,
ga̱jma̱a̱ xuajin rígi̱ nindxu̱u̱ xóo mbáa a̱ʼgu̱ bi̱ magi̱ʼi̱ ngíná mbáwíí”.