Isaías
10 ¡Ngíníi lá bi̱ nurawíi xtángoo mu muniu̱u̱n dí raʼkhí eʼwíinʼ,
bi̱ nuniraʼmáʼ má xúʼko̱ xtángoo mu muniu̱u̱n dí ra̱májánʼ eʼwíinʼ,
2 bi̱ nuni̱ gaʼduunʼ dí nunda̱ʼa̱ magumiin dí májánʼ bi̱ ngíníi,
bi̱ nuni̱ gaʼduunʼ dí munimbáníí numún bi̱ ndawa̱a̱ tsáa mambáñún náa xuajñunʼ,
xóo eni̱ ga̱jma̱a̱ dí naguanáa eniu̱ún gu̱ʼú xuáʼa
ga̱jma̱a̱ nurawíi dí guáʼdáá ejín wáʼa!*
3 Ndiéjunʼ gúnila ikháanʼ mbiʼi dí mixtanda̱ʼa̱a̱ cuenta,*
índo̱ gáʼkha̱ mitsínguánʼ dí maʼni gámbáanʼla rá.
Náá gúgayála mu mumbáyúmíjná,
ga̱jma̱a̱ náá gúniʼñááʼ dí kuaʼdáá rá.
4 Nda̱a̱ i̱mba̱ dí ma̱ndoo mu̱ni̱, i̱ndó muguaʼnduti̱ga̱ʼ náa majñu̱únʼ bi̱ na̱jkha̱ kiʼdiin
o majngutiga̱a̱n náa majñu̱únʼ xa̱bu̱ bi̱ nikháñún.
Ga̱jma̱a̱ numuu xúgíʼ rúʼko̱, dí nakásngañu̱u̱ʼ táwiji̱i̱,
fruíya̱ʼ má xúʼko̱ ñawúunʼ mu maxnún ga̱jma̱a̱.
5 “¡Gu̱ya̱a̱, asirio,
kayá xkuíyá náa ñawúunʼ mu masngájma dí nakásngañu̱ʼ!
Náa ñawúunʼ kayá ragóti dí masngájma rí nakiʼnún.
6 Makuʼmáa náa xuajin dí nikujximínáʼ náa Dios,*
náa mbá xuajin dí niʼni makiʼnún,
matañájuunʼ dí maguwíi ga̱jma̱a̱ maʼga kagu̱u̱ xúgíʼ dí niguanáa
ga̱jma̱a̱ makujmbiri̱go̱o̱ xóo xngaʼchaʼ náa kamba̱a̱.
7 Mú raʼkháa rúʼko̱ dí nandoo maʼni,
na̱nguá gíwánʼ náa a̱jkiu̱u̱n maʼni rúʼko̱,
numuu dí náa a̱jkiu̱u̱n gíwánʼ dí maʼni gámbáa,
dí maʼni gámbáa mbaʼa xuajin, raʼkháa kááʼ nguéjma̱.
8 Numuu dí ikhaa naʼthí:
‹Lá raʼkháa reyes nindxu̱ún mbá xúgíinʼ príncipes ndrígóʼ ráʼ.
9 Lá raʼkháa Calnó nindxu̱u̱ ikháá má xóo Carquemis ráʼ.
Lá raʼkháa Hamat nindxu̱u̱ ikháá má xóo Arpad ráʼ.
Lá raʼkháa Samaria nindxu̱u̱ ikháá má xóo Damasco ráʼ.
10 ¡Ñawúnʼ nigruiguíin má xa̱bu̱ ñajunʼ ndrígu̱ún dioses bi̱ nda̱a̱ dí ejmiin,
bi̱ guáʼdiin itháan xándú bi̱ nigumawíin ki xóo Jerusalén ga̱jma̱a̱ Samaria!
11 Lá xáʼngo̱ʼ gáni̱ ga̱jmu̱ʼ ma̱ngaa Jerusalén gajmíi̱n xándiúu̱
xó má niniu̱u̱ Samaria gajmíi̱n xándiúu̱ bi̱ nda̱a̱ dí ejmiin ráʼ.›
12 Índo̱ Jeobá gámbóo raʼni ñajunʼ ndrígóo náa kúbá Sion ga̱jma̱a̱ náa Jerusalén, maʼni dí mamínuuʼ rey ndrígóo Asiria ga̱jma̱a̱ numuu dí náa a̱jkiu̱u̱n nda̱a̱ gamajkuu, ma̱ngaa naʼnimbamínáʼ wéñuuʼ índo̱ nayejxi̱. 13 Numuu dí ikhaa naʼthí:
‹Ma̱ni̱ xúgíʼ rígi̱ ga̱jma̱a̱ tsiaki̱i̱ dí gíʼdoo ñawúnʼ
ga̱jma̱a̱ ku̱ma̱ dí gúʼdoo, numuu dí najmañuʼ.
Ma̱ni̱ jngudi̱i̱ xúgíʼ ndawaa dí rígá náa xuajin,
magúwíi dí gíʼdoo numuu dí guáʼdáá
ga̱jma̱a̱ matañájúúnʼ xa̱biu̱ún xóo eʼni mbáa soldado xkujiiʼ.
14 Xóo eʼni mbáa xa̱bu̱ bi̱ nakudaaʼ ñawúunʼ náa xájánʼ,
ñawúnʼ maguanúu ga̱jma̱a̱ xúgíʼ dí guáʼdáá xa̱bu̱ xuajin,
xóo mbáa bi̱ nagujxi̱i̱ xndú dí naguanáa.
¡Ikhúún maguanúʼ ga̱jma̱a̱ xúgíʼ ku̱ba̱ʼ!
Nimbáa xáʼba̱a̱n xpíjpiúu ni má xákuajan xúrawuunʼ, ni xáʼni pío›”.
15 Lá ma̱ndoo dí hacha maʼnimbamínáʼ náa bi̱ najmuu marujtu ga̱jma̱a̱ ráʼ.
Lá ma̱ndoo dí sierra maku̱mu̱u̱ dí itháan gíʼdoo numuu ki xóo bi̱ najmuu ráʼ.
Lá maʼngo̱o̱ mbá ragóti maʼbajngayii bi̱ nakujxi̱i̱ ráʼ.
Lá ma̱ndoo mbá xkuíyá makujxi̱ mbá dí raʼkháa ixi̱ ráʼ.
16 Ikha jngóo, Tátá bi̱ gajkhun, Jeobá bi̱ naʼtáñajúúnʼ ángeles,
i̱ndó i̱tsu̱ún gániñúúnʼ xa̱bi̱i̱ bi̱ guáʼdáá xuñúúnʼ,*
Asiria ni xákujximínáʼ, numuu dí mikha̱a̱.
17 Agiuuʼ Israel maʼga̱nú mani̱ndxu̱u̱ xóo mbá aguʼ dí nakha,
ga̱jma̱a̱ bi̱ Kaʼwii, nindxu̱u̱ xóo riʼyu̱u̱ aguʼ,
mi̱kha ga̱jma̱a̱ matsikhá iná xkawiʼ ma̱ngaa tsuwanʼ dí rígá náa ikhaa, kááʼ mbóó mbiʼi gáʼni rígi̱.
18 Maʼni gámbáa mbá kayuuʼ mbá xúgíʼ rí mitsaanʼ* dí rígá náa xaxi̱ ga̱jma̱a̱ náa huértóo,
mani̱ndxu̱u̱ xóo mbáa xa̱bu̱ bi̱ naʼniuu nandii bi̱ na̱jkha̱ rakáguabaaʼ.
19 Kááʼ nguéjma̱ ixi̱ dí gáguanúu náa xaxi̱ ndrígóo,
rí asndu mbáa ada̱ maʼngo̱o̱ maguxnuu.
20 Mbiʼi rúʼko̱ bi̱ gáguanún náa Israel
ga̱jma̱a̱ bi̱ maguma káwíin náa goʼwóo Jacob,
ni xúmbayúmíjná náa bi̱ nixnún,
mumbayumíjná náa Jeobá bi̱ Kaʼwii náa Israel,
mani̱ndxu̱ún jmbiin náa ikhaa.
21 Kááʼ nguéjmi̱i̱n bi̱ naguwáʼ náa Jacob,
matangi̱ín náa Dios bi̱ gíʼdoo Tsiaki̱i̱.
22 Maski ajndu xuajñanʼ, Israel,
nindxu̱ún mbaʼin xóo jui̱ʼi̱ dí rígá náa rawuunʼ lamáa,*
kááʼ nguéjmi̱i̱n dí ikhiin matangi̱ín.
Numuu dí nijuiʼthá má dí maguma gámbíin
ga̱jma̱a̱ dí mumíniiʼ xó má gíʼmaa, majngutaʼmáa náa tsu̱du̱ún xóo iyaʼ dí najnííʼ.
23 Xúʼko̱, dí niraʼwíí maʼni gámbíin Tátá bi̱ itháán mba̱a̱, Jeobá bi̱ naʼtáñajúúnʼ ángeles,
mambanúu náa mbá xúgíʼ xuajin.
24 Ikha jngóo rígi̱ dí naʼthí Tátá bi̱ itháán mba̱a̱, Jeobá bi̱ naʼtáñajúúnʼ ángeles: “Xuajñunʼ bi̱ xtaa náa Sion, xámíñáaʼ gáʼni asirio, bi̱ nixnáaʼ ga̱jma̱a̱ xkuíyá ga̱jma̱a̱ bi̱ nikujxi̱ ragótiu̱u̱ náa ikháán, xó má niʼni Egipto. 25 Numuu dí nánguá má mba̱yu̱u̱ʼ mambáa dí nakiʼnún, ga̱jma̱a̱ dí nakásngañu̱ʼ matanga̱a̱ náa ikhiin mu maʼni gámbíin. 26 Jeobá bi̱ naʼtáñajúúnʼ ángeles majmuu mbá ñuñuu mu maxpájtii ga̱jma̱a̱, xó má niʼniuu Madián náa tsíñu Oreb. Ma̱ngaa ragótiu̱u̱ makuxi̱ náa lamáa ga̱jma̱a̱ ikhaa makujxi̱i̱ xó má niʼniuu Egipto.
27 Mbiʼi rúʼko̱ magajta̱a̱ dí nitámáʼ náa xpajpaaʼ,
ga̱jma̱a̱ yugo dí kaʼmáʼ náa rexa̱a̱ʼ,
yugo majmigaʼ gáʼni aceite”.
28 Ikhaa ni̱ʼkha̱ náa Ayat,
ninújngoo náa Migrón,
náa Micmash niniñuuʼ dí gíʼdoo.
29 Nikidiin náa nanújngúún ga̱jma̱a̱ xa̱bu̱,
náa Gueba niguanún ninuʼ mbruʼun,
Ramá niguáʼaan, Guibeá náa xuajñuu Saúl nigáyúu.
30 ¡Atatsaʼwá ga̱jma̱a̱ xúgíʼ tsiaki̱i̱ ndrígáaʼ wáxióo* Galim!
¡Atagíʼ edxa̱a̱ʼ matadxawíín Laisa!
¡Ngínáá lá ikháán Anatot!
31 Madmená nigájnuu ragáyúu.
Xa̱bu̱ bi̱ kúwá náa Guebim nduyáʼ náa mumbayumíjná.
32 Mbiʼi rúʼko̱ mawi̱ji̱ náa Nob.
Nakujxi̱ puñete mu maʼni míñúu kúbá ndrígóo wáxióo Sion,
bíjní dí rígá náa Jerusalén.
33 ¡Gu̱ya̱a̱! Tátá bi̱ gajkhun, Jeobá bi̱ naʼtáñajúúnʼ ángeles,
xtáa rarujtu ñawúunʼ ixi̱ dí naʼni mawán gakhi̱i̱ wéñuuʼ,
ixi̱ rí mitsídánʼ najui̱ʼdi̱i̱,
ga̱jma̱a̱ ixi̱ dí mbi̱jua̱ nuturígú.
34 Ikhaa maʼni gámbóo mbá xúgíʼ iná xtáʼdu̱u̱ dí rígá náa xaxi̱ ga̱jma̱a̱ hacha,
ga̱jma̱a̱ mbá xúgíʼ ixi̱ Líbano marujtu mbáa bi̱ gíʼdoo tsiaki̱i̱.