Isaías
51 Gudxawunʼla, ikháanʼ bi̱ nunimíjna̱ mu̱ni̱ rí májánʼ,
ikháanʼla bi̱ nduʼyáaʼ Jeobá.
Garmáʼáan a̱jkia̱la eʼni itsí náa niwiʼtá ríguáanʼla,
ga̱jma̱a̱ iñáʼ náa nigájnala.
Numuu dí nákha ikhúún ni̱thu̱u̱n kaʼníí mbáwíí,
ni̱ni̱ tsajkurámaaʼ ga̱jma̱a̱ ni̱ni̱ rí maʼni mbaʼin.
3 Numuu dí Jeobá maʼni rí maʼni̱i̱ a̱jkiu̱u̱n Sion.
Maʼni májáanʼ* xúgíʼ rí niguma gámbáa,
ga̱jma̱a̱ maʼni rí ku̱ba̱ʼ mijxooʼ* dí rígá ikhí mani̱ndxu̱u̱ xóo Edén
ga̱jma̱a̱ xkua̱ mijxooʼ xóo jardín* ndrígóo Jeobá.
Ikhí marigá dí tsímáá ga̱jma̱a̱ dí gagi,
muwáán ajngáa dí nuxna̱a̱ núma̱aʼ ga̱jma̱a̱ muwáán ajmúú.
4 Atagíʼ edxa̱a̱ʼ matadxawíín xuajñunʼ,
atadxawunʼ xuajñunʼ.
Numuu dí náa ikhúún magajnúu mbá xtángoo,
ga̱jma̱a̱ ma̱ni̱ marigá dí májánʼ xóo mbá aguʼ náa xa̱bu̱ xuajin.
5 Dí májánʼ rí na̱ni̱ na̱ʼkha̱ mijngii.
Na̱ʼkha̱ mijngii dí ma̱ni̱ kríña̱a̱nʼ,
ikhúún mínu̱u̱ʼ* maniu̱u̱ dí májánʼ xa̱bu̱ xuajin.
Bi̱ kúwá náa islas* muguáʼthúnʼ,
ga̱jma̱a̱ muguáʼthi̱i̱n tsiaki̱i̱ ndrígóʼ.
6 Guxujxíi e̱dxa̱laʼ, guyejxi̱ra̱ʼa̱n mekhuíí,
ga̱jma̱a̱ guyejxi̱rigú náa ku̱ba̱ʼ.
Numuu dí mekhu mandáti̱ga̱a̱ xóo gúní,
ku̱ba̱ʼ miʼguuʼ xóo eguuʼ mbá xtíin,
ga̱jma̱a̱ xa̱bu̱ bi̱ kúwá ikhí makhañún xóo ñu̱ju̱n.
Mú dí ma̱ni̱ káwáanʼla mbajyúuʼ asndu kámuu,
ga̱jma̱a̱ dí májánʼ rí na̱ni̱, nditháan xámbáa.
7 Gudxawunʼla ikháanʼ bi̱ nuniʼnúuʼ dí májánʼ,
xa̱bu̱ xuajin bi̱ guáʼdáá xtángoo* ndrígóʼ náa a̱jkiu̱ún.
Xámíñálá gáʼni dí nutsijma xa̱bu̱ numbaaʼ,
ga̱jma̱a̱ dí nundxa̱ʼwa̱jmáanʼla xáʼni dí maguáʼáanʼla.
8 Numuu dí mbáa ruxi* gíkhúun, xóo e̱ʼkhu̱ mbá xtíin,
ruxi bi̱ na̱ʼkhu̱ xtíin* mikhu̱u̱n xóo e̱ʼkhu̱ mbá xtíin dí mugu̱.
Mú dí májánʼ rí na̱ni̱ mbajyúuʼ asndu kámuu,
ga̱jma̱a̱ dí ma̱ni̱ káwíin xa̱bu̱ mbajyúuʼ náa mbá xúgíinʼ xa̱bu̱ bi̱ gáguwáʼ rágúunʼ rakúwíin”.
9 ¡Arajxu̱u̱nʼ! ¡Arajxu̱u̱nʼ! ¡Atasngájma tsiaki̱i̱ ndrígáaʼ,
ñawúunʼ Jeobá!
Arajxu̱u̱nʼ xó má nitani̱ nákhá niguwáʼ rágúunʼ rakúwá xa̱bu̱ nákhá wájyúuʼ.
Lá raʼkháa ikháán nitaxpíguii Rahab* ráʼ.
Lá raʼkháa ikháán nitaxkruaʼa jngayii xujkhúʼ mba̱a̱ bi̱ xtáa náa lamáa* ráʼ.
10 Lá raʼkháa ikháán nitani̱ mujndooʼ lamáa, iyaʼ dí ra̱ʼkhá tháán mi̱jnu̱ʼ ráʼ.
Lá raʼkháa ikháán nitani̱ dí náa lamáa dí ra̱ʼkhá tháán mi̱jnu̱ʼ maʼga mbá kamba̱a̱ náa makidiin bi̱ nijuiʼtsiwíin ráʼ.
11 Bi̱ niʼni káwíin Jeobá matangi̱ín.
Maguwáanʼ rundxa̱ʼwa̱ gagi náa Sion,
asndu kámuu gákuwá gagi.
Maʼdxúún ga̱jma̱a̱ makuwá gagi,
dí ngíná ga̱jma̱a̱ rí nutsiná mandáti̱ga̱a̱.
12 “Ikhúún mínu̱u̱ʼ na̱ni̱ rí maʼni̱i̱ a̱jkia̱la.
Náá numuu dí gíʼmaa mamiñála gáʼni mbáa xa̱bu̱ numbaaʼ bi̱ makhañúu,
mbáa a̱ʼdióo xa̱biya̱ bi̱ nindxu̱u̱ xóo iná maxaʼ rí nujnduxtáa rá.
13 Náá numuu dí nimbumaaʼ xtayáá Jeobá, bi̱ niʼníí,
bi̱ niʼni mekhu ga̱jma̱a̱ bi̱ nigíʼ ku̱ba̱ʼ rá.
Mbá xúgíʼ mbiʼi nimíñáaʼ eʼni rí nakásngañu̱u̱ʼ bi̱ naʼni ngínáá,*
asndu xóo rí ikhaa maʼngo̱o̱ maʼni gámbáan.
Náá ni̱jkha̱ xúgi̱ rí nakásngañu̱u̱ʼ bi̱ naʼni ngínáá rá.
14 Bi̱ na̱ʼkha̱ ndijtsu̱ún ga̱jma̱a̱ bi̱ kaxtuʼúún ga̱jma̱a̱ cadena, gítháán maguma káwíin,
xákháñún ga̱jma̱a̱ xájthiin náa iñáʼ,
ni má xáʼñúuʼ ganitsu.
15 Mú ikhúún nindxu̱ʼ Jeobá Dios ndrígáaʼ,
bi̱ naʼni rí maʼbajxi̱ lamáa ga̱jma̱a̱ bi̱ naʼni rí mandxa̱ʼwá iyaʼ rí naʼbajxu̱u̱,
Jeobá bi̱ naʼtáñajúúnʼ ángeles, xúʼko̱ mbiʼyuʼ.
16 Magídáʼ ajngóʼ náa rawaanʼ
ga̱jma̱a̱ maruguaruwi̱i̱n ga̱jma̱a̱ ndájkhoo ñawúnʼ
mu ma̱ni̱ mekhu ga̱jma̱a̱ maʼgíʼ ku̱ba̱ʼ
ga̱jma̱a̱ mu mathu̱u̱n Sion: ‹Ikháán nindxa̱a̱ʼ xuajñunʼ›.
17 ¡Arajxu̱u̱nʼ! ¡Arajxu̱u̱nʼ! Atujxa̱a̱ʼ Jerusalén,
ikháán dí nigi̱i̱n náa ñawúunʼ Jeobá dí kajni̱ʼ náa copa rí nakásngañu̱u̱ʼ.
Nigi̱i̱n dí kajni̱ʼ náa copa rí naʼwa̱a̱n ga̱jma̱a̱ vino,
nig̱i̱i̱n mbá xúgíʼ rí kajni̱ʼ náa copa rí naʼni maguíʼiin.
18 Nimbáa a̱ʼdióo bi̱ nigiʼdaa ndawa̱a̱ ikhí mu maxnúu ikha,
ga̱jma̱a̱ nimbáa a̱ʼdióo bi̱ ikhaa niʼni mbája̱a̱ táguájthun ñawúunʼ.
19 Mbá nájma̱ rígi̱ nijngutaʼmáanʼ náa tsu̱da̱a̱ʼ.
Tsáá gágáwíinʼ a̱jkiu̱u̱n kaʼyaaʼ rá.
¡Maguma gámbáan, magajta káyáaʼ rí xtaʼdáá, maʼniaaʼ ewiʼ, maguwáʼ muxmijná ga̱jma̱á nindxa̱a̱ʼ!
Tsáá gáʼni rí maʼni̱i̱ a̱jkia̱a̱nʼ rá.
20 E̱jña̱a̱ʼ nikámíndún.*
Jngútigi̱i̱n náa eskíniúu* kamba̱a̱
xóo mugu̱ xáná bi̱ kajchún náa amaʼ.
Nirígá rígi̱ numuu dí Jeobá ra̱ʼkhá tháán ekiʼnáa kaʼñún ga̱jma̱a̱ niʼni rí mumíniiʼ wéñuuʼ”.
21 Atadxawíín rígi̱ mbá péñu,
a̱ʼgu̱ bi̱ namínuuʼ ga̱jma̱a̱ najnga̱a̱, maski ajndu raʼkháa vino nigi̱i̱n.
22 Rígi̱ dí naʼthí Tátá Jeobá Dios ndrígáaʼ, bi̱ nambáyúu xuajñuu:
“¡Atayáá! Marígúu copa náa ñawáanʼ dí naʼni maguáʼán,
copa rí naʼwa̱a̱n ga̱jma̱a̱ vino, náa kajni̱ʼ rí nakásngañu̱ʼ.
Ni xátangaán migi̱i̱n.
23 Makuʼdáaʼ náa ñawúúnʼ bi̱ nini̱ ngínáá,
bi̱ nithaanʼ ‹¡Araʼnduti̱ga̱ mu muʼguá kruámúxu̱ tsu̱da̱a̱ʼ!›,
xúʼko̱ niʼni dí tsu̱da̱a̱ʼ maʼni xóo mbayííʼ,
xóo mbá kamba̱a̱ náa ikhiin ma̱ndoo magún kruámúnʼ”.