Isaías
11 Xmindiuuʼ Jesé makráʼáan mbá rudiuuʼ,
ga̱jma̱a̱ mbá rudiuuʼ dí makráʼáan náa ajmu̱u̱ maxná xndúu.
2 Ga̱jma̱a̱ espíritu ndrígóo Jeobá marigá náa ikhaa,
magiʼdoo rí majmañuu ga̱jma̱a̱ dí makro̱ʼo̱o̱,
majmañuu maxná májánʼ consejo ga̱jma̱a̱ magiʼdoo tsiaki̱i̱,
magiʼdoo ku̱ma̱ ga̱jma̱a̱ magiʼdoo gamíi ndrígóo Jeobá.
3 Ga̱jma̱a̱ ikhaa maʼdxuu náa gamíi ndrígóo Jeobá.
Xáʼthí dí muguáʼníí i̱ndó ga̱jma̱a̱ numuu xóo kiejxu̱ún,
ni má xáxprígún i̱ndó ga̱jma̱a̱ numuu rí maʼdxawuun.
4 Maʼnimbánuu májánʼ numún bi̱ ngíníi*
ga̱jma̱a̱ maʼni rí jmbu índo̱ gáxprígún bi̱ guabiinʼ bi̱ kúwá náa tsu̱du̱u̱ ku̱ba̱ʼ.
Dí maʼthí* mani̱ndxu̱u̱ xóo xkuíyá dí maxnúu ga̱jma̱a̱ ku̱ba̱ʼ,
ga̱jma̱a̱ ajngáa dí maʼthí magudíin xa̱bu̱ ra̱míjíinʼ.
5 Dí májánʼ rí maʼni mani̱ndxu̱u̱ xóo cinturón dí kua̱ʼa̱n smídúu,
ga̱jma̱a̱ dí mawiji̱ jmbu náa Dios ma̱ngaa mani̱ndxu̱u̱ xóo cinturón dí kua̱ʼa̱n smídúu.
6 Lobo* maxtáa mbóó ga̱jma̱a̱ a̱ʼdá múgú,
mbóó gábóoʼ indiiʼ mixtíi* ga̱jma̱a̱ a̱ʼdá tsújtuunʼ,
ma̱ngaa a̱ʼdá xédí ga̱jma̱a̱ león* mangiin xujkhúʼ bi̱ mbaʼwi̱i̱n makuwá mbóó,*
ga̱jma̱a̱ mbáa ada̱ chíʼgíiʼ* maxnún ikha.
7 Xedi̱ ga̱jma̱a̱ osa muphiʼtsu mbóó
ga̱jma̱a̱ mbóó gákuíji̱i̱n e̱jñu̱ún.
León mi̱khu̱ ra̱jxa̱ xó má eʼni xedi̱.
8 Ada̱ bi̱ kaʼníí naʼxúuʼ maʼtsíin náa iñúuʼ a̱bu̱nʼ bi̱ maxíña̱a̱n,
ga̱jma̱a̱ mbáa ada̱ chíʼgíiʼ makumááʼ ñawúunʼ náa xújúunʼ a̱bu̱nʼ mbi̱i̱ʼ.
9 Xúni̱ gachíí, ni má xúni̱ gámbáa
náa mbá xúgíʼ kúbá kaʼwu ndrígóʼ,
numuu dí náa ku̱ba̱ʼ majnííʼ ku̱ma̱ ndrígóo Jeobá,
xó má iyaʼ kajnííʼ náa lamáa.*
10 Mbiʼi rúʼko̱, ajmu̱u̱ Jesé matujxu̱u̱ xóo mbá tsinaʼ mu mbuyáá* xa̱bu̱ xuajin.
Xa̱bu̱ xuajin magún náa ikhaa mu mbuyáʼ ikha,*
ga̱jma̱a̱ náa mbayáa jxu̱u̱ʼ marigá gamajkhu.
11 Mbiʼi rúʼko̱ Jeobá makrui̱ya̱ʼ mbu̱júu̱ ñawúunʼ dí maʼni raga̱jma̱ nuthu, mu marígúu xuajñuu dí xóó naguanúu náa ñawúunʼ Asiria, Egipto, Patrós, Cus, Elam, Sinar,* Hamat ga̱jma̱a̱ náa islas* dí rígá náa lamáa. 12 Makujxi̱ mbá tsinaʼ rí mbuyáá xa̱bu̱ xuajin ga̱jma̱a̱ magímbi̱ín xa̱bu̱ Israel bi̱ nigadríʼiin, ma̱ngaa magímbi̱ín xa̱bu̱ Judá bi̱ nigadríʼiin náa mbájndi tsu̱du̱u̱* ku̱ba̱ʼ.
13 Dí naxígúu Efraín mandáti̱ga̱a̱
ga̱jma̱a̱ bi̱ gúxmijná gajmiún Judá maguma gámbíin.
Efraín ni xáxígúu kaʼyoo Judá,
ni má Judá xáxmína̱ʼ ga̱jma̱a̱ Efraín.
14 Ga̱jma̱a̱ mangujxi̱i̱n majngutaʼmíinʼ náa bíjní dí gríguiin* filisteos, xígií náa narámaaʼ a̱jkha̱ʼ,*
mbá jnduʼ gúrawíi mbá xúgíʼ dí guáʼdáá xa̱bu̱ bi̱ kúwá xígií náa nagájnuu a̱jkha̱ʼ.*
Muxuaʼwíi ñawúúnʼ muxmijná gajmiún* Edom ga̱jma̱a̱ Moab,
ga̱jma̱a̱ xa̱bu̱ ammonitas munimbu̱u̱n kuñúún.
15 Jeobá makuíʼtáa* ñawúunʼ* lamáa dí rígá náa Egipto,
ga̱jma̱a̱ maʼni ngúʼwuun ñawúunʼ náa mañu Éufrates,
ga̱jma̱a̱ giñánʼ mijkha maxnúu* náa mbá juwan mata,
ga̱jma̱a̱ maʼni dí xa̱bu̱ makidiin kangrúʼúún raxtúún.*
16 Mu magún xa̱bu̱ xuajñuu bi̱ xóó gáguanún, marigá mbá kamba̱a̱ rí magajnúu náa Asiria,
xó má nirígá mbá kamba̱a̱ náa Israel mbiʼi dí nigájna̱a̱ náa ku̱ba̱ʼ ndrígóo Egipto.