Rí niʼnirámáʼ Lucas

7 Índo̱ niguámbóo niʼthún xa̱bu̱ xúgíʼ rígi̱, nito̱ʼo̱o̱ náa xuajen Capernaúm. 2 Ikhí xtáa mbáa bi̱ naʼtáñajúúnʼ soldados ga̱jma̱a̱ ikhaa gíʼdaa mbáa ñumbáá bi̱ nandoo kaʼyoo, mú ñumbáá buʼko̱ néʼngo̱o̱ kri̱ga̱a̱ eʼni nandii. 3 Índo̱ niʼdxawuun ga̱jma̱a̱ numuu Jesús, nikuʼmiin tikhuun xa̱bu̱ ede̱ bi̱ ni̱ndxu̱ún judíos mu magún gútháán rí ma̱ʼkha̱ gáʼni thanuu ñumbáá ndrígóo. 4 Ikhiin nigún náa xtáa Jesús ga̱jma̱a̱ nigíʼdi̱i̱ nitakáñíí má xúʼko̱, nitháán: “Xa̱bu̱ bugi̱ kaʼyoo rí matambáyíí, 5 numuu rí nandoo kaʼñún xa̱bu̱ xuajñuxu ga̱jma̱a̱ ikhaa niʼni mbá guʼwá náa mbuyamajkuííxu Dios”. 6 Ikhú Jesús ni̱jkha̱ gajmíi̱n, índo̱ inu maʼga̱nú náa guʼwá, bi̱ naʼtáñajúúnʼ soldados nikuʼmiin tikhuun bi̱ nambájxu̱u̱ gajmíi̱n mu muthán: “Tátá, xátani̱ gajmáminaʼ midxa̱ʼnú numuu dí rakáʼyoʼ mata̱ʼa̱a̱ʼ náa goʼwóʼ. 7 Ikha jngóo má táʼgá gáyaaʼ mínu̱u̱ʼ, ma̱ʼdu̱ má dí i̱ndó marata ga̱jma̱a̱ ikhaa maʼni̱i̱ a̱jkiu̱u̱n. 8 Numuu rí mangúún nanimbo̱ʼ rí nutañajunʼ ma̱ngaa gúʼdiin soldados bi̱ natañájúúnʼ. Índo̱ mbáa na̱thu̱u̱n ‹¡Ayuʼ!› ikhaa na̱jkha̱, ga̱jma̱a̱ índo̱ i̱mba̱a̱ na̱thu̱u̱n ‹¡Aye̱!› ikhaa na̱ʼkha̱, ga̱jma̱a̱ índo̱ na̱thu̱u̱n ñumbáá ndrígóʼ ‹¡Atani̱ rígi̱!› ikhaa naʼni”. 9 Índo̱ Jesús niʼdxuun rígi̱ niguanúu tsiánguá, ikhú niʼthún bi̱ nagún kidxuuʼ: “Na̱tala gajkhun rí táxkamaa nimbáa náa Israel bi̱ gíʼdoo mbá fe mba̱a̱ xóo xa̱bu̱ bugi̱”. 10 Índo̱ bi̱ kaxúʼmiin nitangiín guʼwáá, ikhú ndiyáá rí niʼni̱i̱ a̱jkiu̱u̱n ñumbáá.

11 Nda̱wa̱á dí nirígá rígi̱, Jesús ni̱jkha̱ gajmíi̱n xa̱bi̱i̱ náa xuajen rí mbiʼyuu Naín, ma̱ngaa mbaʼin xa̱bu̱ nigún kidxuuʼ. 12 Índo̱ na̱jkha̱ mato̱ʼo̱o̱ náa xuajen, ikhú ndiʼyoo rí nagájnún kuya̱a̱ mbáa bi̱ nikháñuu, nindxu̱u̱ a̱ʼdióo* mbáa a̱ʼgú xuáʼa̱. Ga̱jma̱a̱ mbaʼin xa̱bu̱ xuajen ejkha̱ gajmíi̱n. 13 Índo̱ Jesús ndiʼyoo a̱ʼgu̱, nigáwiinʼ a̱jkiu̱u̱n kaʼyoo ga̱jma̱a̱ niʼthúu̱n: “Ní xátambi̱ya̱ʼ rá.” 14 Ikhú ni̱jkha̱ kanuu náa xiawoo rí kaʼmáaʼ ga̱jma̱a̱ bi̱ nagún kuya̱a̱ niguájun, ikhú niʼthí: “Dxámá, ikháán etha̱n’: ¡Arajxu̱nʼ!”. 15 Ikhú dxámá bi̱ nikháñuu, nitu̱jxu̱u̱ nigi̱ʼi̱ ga̱jma̱a̱ nigriya̱a̱ʼ aʼwóo, ikhú Jesús nixniáa ru̱dúu̱. 16 Mbá xúgíinʼ xa̱bu̱ niguanún tsiánguá ga̱jma̱a̱ nigíʼdi̱i̱ nixnáá gamajkhu Dios, nithi: “Mbáa profeta* ni̱ʼkha̱ náa ikháanʼlu”, ga̱jma̱a̱ “Dios nirmáʼáan a̱jkiu̱u̱n kaʼyoo xuajñuu”. 17 Niwán ri̱go̱o̱ ga̱jma̱a̱ numuu náa xúgíʼ Judea ga̱jma̱a̱ náa i̱ʼwáʼ xuajen.

18 Ikhú xa̱bi̱i̱ Juan nigúun gútháán xúgíʼ rígi̱. 19 Ikhú Juan nindxaʼwún a̱jmi̱i̱n xa̱bi̱i̱, ga̱jma̱a̱ nikuʼmiin murajxi̱i̱ Jesús: “Lá ikháán nindxa̱a̱ʼ bi̱ ma̱ʼkha̱ o muguáʼthi̱i̱nxu i̱mba̱a̱ dxe̱ʼ.” 20 Índo̱ niguánú náa xtáa Jesús, nitháán: “Juan bi̱ nakumíinʼ iyááʼ xa̱bu̱ nikuʼmáanʼxu magúwaʼ gúrajxa̱a̱ʼ á mu ikháán nindxa̱a̱ʼ bi̱ ma̱ʼkha̱ o muguáʼthi̱i̱nxu i̱mba̱a̱”. 21 Mbiʼi rúʼko̱ niʼni thanún mbaʼin xa̱bu̱ bi̱ guáʼdáá mixtiʼkhu enii nandii mbiiʼ ga̱jma̱a̱ bi̱ guáʼdiin giñán xkawi̱i̱nʼ,* ma̱ngaa nimbáʼta̱a̱ idún mbaʼin bi̱ tsíkruigu̱u̱n. 22 Ikhú niʼthún: “Aʼgua̱a̱ʼ gútha̱a̱n Juan rí ndi̱ya̱a̱ ga̱jma̱a̱ nidxawíín, rí xúgi̱ bi̱ tsíkruigu̱u̱n, nakrui̱gu̱u̱n. Bi̱ gúʼxíinʼ nandoo nagún, bi̱ tsédxuun nudxuun, bi̱ guáʼdáá nandii lepra naguma thanún, bi̱ nikháñun nagabi̱ín* ga̱jma̱a̱ bi̱ migíníi najuiʼthún ajngáa rí májánʼ. 23 Gagi xtáa xa̱bu̱ bi̱ tséʼni a̱jma̱ a̱jkiu̱u̱n maʼnimbo̱o̱ kaʼyoʼ”.

24 Índo̱ nigúun xa̱bi̱i̱ Juan, Jesús nigíʼdu̱u̱ niʼthún xa̱bu̱ ga̱jma̱a̱ numuu Juan: “Dí nijkua gúya̱a̱ náa ku̱ba̱ʼ mijxooʼ rá. Lá mbá e̱ʼe̱n* rí naʼbajngaa giñánʼ ráʼ. 25 Mú, dí nijkua gúya̱a̱la. Lá mbáa xa̱bu̱ bi̱ kagúwunʼ xtíin májánʼ* ráʼ. ¡Bi̱ kugíʼ xtíin májánʼ guáʼdáá xúgíʼ rí mitsaanʼ ga̱jma̱a̱ kúwá náa guʼwún reyes! 26 Mú, tsáá nijkua gúya̱a̱. Mbáa profeta ráʼ. Xúʼko̱, ikhúúnʼ na̱tala rí nindxu̱u̱ itháan ki xóo mbáa profeta. 27 Ikhaa bi̱ nijuiʼthá ga̱jma̱a̱ numuu: ‹¡Makuʼmáa maʼga ginii bi̱ majngrui̱go̱o̱ kagu̱u̱ ajngóʼ, ga̱jma̱a̱ ikhaa maʼga raríyaʼ kamba̱a̱ náa mi̱dxu̱ʼ!›. 28 Na̱tala gajkhun rí Juan bi̱ nakumíinʼ iyááʼ xa̱bu̱, nindxu̱u̱ itháan mba̱a̱ ki xóo xúgíinʼ xa̱bu̱ numbaaʼ.* Mú bi̱ itháan chíʼgíiʼ náa naʼtáñajunʼ Xa̱bu̱ Ñajunʼ ndrígóo Dios* bi̱ xtáa mekhuíí, itháan mba̱a̱ ki xóo ikhaa”. 29 Índo̱ xúgíinʼ xa̱bu̱ ga̱jma̱a̱ bi̱ nuruma mbújkho̱o̱ guʼwá ñajunʼ nidxawíín rígi̱, nithi rí Dios nindxu̱u̱ májáanʼ, numuu rí Juan nikumíinʼ iyááʼ. 30 Mú fariseos gajmiún bi̱ nuniʼnuuʼ májánʼ Xtángoo, táʼndún gúni̱ rí Dios nandoo numuu dí túniñami̱jna̱ rí Juan makumíinʼ iyááʼ.

31 Jesús niʼthí xóó: “Tsíín lá gándoo gánimbríguin gajmiún xa̱bu̱ bi̱ kúwá xúgi̱ rá. Xú káʼnii ni̱ndxu̱ún xá. 32 Ni̱ndxu̱ún xóo e̱ji̱n bi̱ trigi̱i̱n náa xuáá, bi̱ nutún a̱ngiu̱ún: ‹Nidi̱i̱xu* mú ikháanʼ túsiala. Ninixu ajmúú gíná, mú ikháanʼla túmbi̱ya̱ʼ›. 33 Numuu rí índo̱ Juan ni̱ʼkha̱, tákuiʼtsu ga̱jma̱a̱ tágáan vino mú ikháanʼ ni̱tala: ‹Gíʼdaa giñán xkawi̱i̱ʼ›. 34 Ni̱ʼkha̱nú A̱ʼdióo xa̱biya̱, bi̱ nakuiʼtsu ga̱jma̱a̱ bi̱ naʼga̱a̱n vino, ga̱jma̱a̱ ikháanʼ nutala: ‹Mbáa xa̱biya̱ bi̱ nakuiʼtsu egoo ga̱jma̱a̱ mbáa bi̱ naʼga̱a̱n wéñuuʼ vino, bi̱ nambájxu̱u̱ gajmíi̱n bi̱ nuruma mbújkho̱o̱ guʼwá ñajunʼ, mangiin xa̱bu̱ aʼkhá›. 35 Asndu xú káʼnii má, mú ku̱ma̱ nakujmaa ga̱jma̱a̱ xúgíʼ rí naguma”.

36 Mbáa fariseo bi̱ mbiʼyuu Simón niʼnikáñuu rí maʼga gákuiʼtsu ga̱jma̱a̱ náa goʼwóo. Ikhú Jesús ni̱jkha̱ náa goʼwóo fariseo ga̱jma̱a̱ nigi̱ʼi̱ náa mesa. 37 Ikhú mbáa a̱ʼgu̱ bi̱ najmaʼniiʼ náa xuajen xóo bi̱ nagujuamínáʼ,* niʼdxawuun rí Jesús xtáa rakuiʼtsu náa goʼwóo fariseo, ga̱jma̱a̱ kayá ni̱jkha̱ mbá ru̱jtu̱ itsí alabastro rí kajni̱ʼ aceite rí ndataun. 38 Ikhú ni̱ʼkha̱nú náa Jesús ga̱jma̱a̱ nimbi̱ya̱ʼ náa rajkúu, nigíʼdu̱u̱ nirmajan rajkúu ga̱jma̱a̱ iyooʼ iduu ma̱ngaa nikúdíi ga̱jma̱a̱ xtátsiu̱u̱n. Ma̱ngaa nixnúu beso náa rajkúu ga̱jma̱a̱ nixtájmuu aceite rí ndataun. 39 Índo̱ fariseo bi̱ niʼthúu̱n maʼga náa goʼwóo ndiʼyoo rígi̱, ikhú nindxa̱ʼwáminaʼ: “Á mu xa̱bu̱ bugi̱ gajkhun rí nindxu̱u̱ profeta, mbaʼyoo dí a̱ʼgu̱ bi̱ nagujuamínáʼ nindxu̱u̱ bi̱ xtáa raxkajmaa”. 40 Mú índo̱ Jesús ndiʼyoo rígi̱, ikhú niʼthúu̱n: “Simón, gúʼdoo mbá rí matha̱nʼ”. Ikhú Simón niriʼña: “¡Arathúnʼ Maestro!”.

41 “A̱jmi̱i̱n xa̱bu̱ gíʼmiin náa inuu xa̱bu̱ bi̱ naxnátiʼña mbújkha̱a̱, mbáa gíʼmaa 500 denarios* ga̱jma̱a̱ i̱mba̱a̱ gíʼmaa 50. 42 Numuu rí na̱nguá guáʼdáá rí muni̱ numa̱a̱ ga̱jma̱a̱, ikha jngóo niʼni mba̱a̱ a̱jkiu̱u̱n kaʼñún mbá nájmi̱i̱n. Tsáá dí ikhiin gáʼndoo kaʼyoo itháan xá.” 43 Ikhú Simón niʼthí: “Ikhúúnʼ naku̱mu̱ʼ rí bi̱ gíʼmaa itháan mitsídánʼ”. Ikhú Jesús niʼthí: “Májánʼ nitri̱ʼña̱a̱”. 44 Ikhú nitangayii ndiʼyoo a̱ʼgu̱ ga̱jma̱a̱ niʼthúu̱n Simón: “Natayáá a̱ʼgu̱ bugi̱ ráʼ. Ni̱ʼkhá náa guʼwáaʼ ga̱jma̱a̱ táraxnuʼ iyaʼ mu majña̱a̱n rajkúʼ, mú ikhaa nirmajan rajkúʼ ga̱jma̱a̱ iyooʼ iduu ma̱ngaa nirgujndo̱o̱ʼ ga̱jma̱a̱ xtátsiu̱u̱n. 45 Ikháán táraxnuʼ mbá beso, mú a̱ʼgu̱ bugi̱ tséniñuuʼ raxnúu beso rajkúʼ asndu nákha ni̱ʼkhánú. 46 Táraxna̱a̱ aceite náa edxu̱ʼ, mú a̱ʼgu̱ bugi̱ nixtrámuuʼ aceite rí ndataun náa rajkúʼ. 47 Ikha jngóo natha̱a̱nʼ rí aʼkhúun a̱ʼgu̱ bugi̱ maski ajndu mba̱a̱ wéñuuʼ, nijngudi̱i̱ má, numuu rí nigiʼdoo wéñuuʼ ngajua. Mú bi̱ ragíʼdoo wéñuuʼ ngajua, na̱nguá má eni̱ mba̱a̱ a̱jkiu̱ún kuyáá wéñuuʼ”. 48 Ikhú niʼthúu̱n a̱ʼgu̱: “Nijngudi̱i̱ má aʼkháanʼ”. 49 Bi̱ tri̱gi̱i̱n gajmiún náa mesa nitimijná: “Tsáá xa̱bíi bugi̱ rí asndu aʼkhá eʼni jngudi̱i̱ rá.” 50 Mú ikhaa niʼthúu̱n a̱ʼgu̱: “Fe rí xtaʼdáá niʼni kríña̱a̱nʼ, ayu̱u̱ʼ tsímáá rá”.