Oseas
13 “Mámbá índo̱ Efraín naʼthí, xa̱bu̱ naguíʼiin,
ikhaa nigiʼdoo numuu náa Israel.
Mú ga̱jma̱a̱ numuu Baal, ikhaa nigiʼdoo aʼkhúun ga̱jma̱a̱ nikháñúu.
2 Rí xúgi̱ nuxudamíjna̱ itháán aʼkhá
ga̱jma̱a̱ plata rí guáʼdáá nuni̱i̱ xándú rí ajua̱nʼ
asndu májánʼ eni̱i̱ xándú, xúgíinʼ ikhiin nindxu̱ún mbá ñajunʼ rí naʼni mbáa bi̱ naʼni ñajunʼ mitsaanʼ.*
Nuthi: ‹Xa̱bu̱ bi̱ nuxnajxi̱ tsigijñaʼ gu̱phu̱ rawúúnʼ e̱jín xédí›.
3 Ikha jngóo mani̱ndxu̱ún xóo rujmbaaʼ dí miʼcha̱,
xóo xuájyaʼ rí nagijxi̱i̱ iyu̱u̱ rí miʼcha̱,
xóo náskhoo tsígáʼ dí naxtutsi̱i̱ rí na̱jkha̱ kayóo giñámbiʼ,
xóo gúní rí nagájnuu náa tsu̱du̱u̱ guʼwá.
4 Asndu nákhá náa ku̱ba̱ʼ ndrígóo Egipto ikhúún nindxu̱ʼ Jeobá Dios ndrígáaʼ,
na̱nguá nitatsiniiʼ i̱mba̱a̱ Dios,
i̱ndó ikhúún nindxu̱ʼ bi̱ maʼni kríña̱a̱nʼ, ndawa̱a̱ imba̱a̱.
5 Niniʼnííʼ náa ku̱ba̱ʼ mijxooʼ* náa nda̱a̱ iyaʼ.
6 Ikhiin nigiʼmún eʼni ra̱jxa̱ dí rígá náa kúwá,
nigiʼmún ga̱jma̱a̱ a̱jkiu̱ún niʼnimbamínáʼ.
Ikha jngóo nimbumún kuyoʼ.
7 Maʼgánú mani̱ndxu̱ʼ náa ikhiin xóo mbáa león gújkuiiʼ,
xóo mbáa indiiʼ mixtíi* bi̱ jngruigo̱o̱ náa kamba̱a̱.
8 Maʼgá náa ikhiin xóo mbáa osa bi̱ ni’ni mbátígi̱i̱n e̱ji̱i̱n
maxkuʼturiya̱ʼ tso̱xthúún.*
Ikhí má gíʼkhúún xó má eʼni mbáa león,
mbáa xujkhú xáná marujkhuiin.
9 Maʼni gámbáan ikháán Israel,
numuu rí nitaxújximinaʼ náa ikhúún, náa bi̱ nambáyaaʼ.
10 Náá ni̱jkha̱ rey ndrígáaʼ mu maʼni kríña̱a̱nʼ náa xúgíʼ xuajñaanʼ rá.
Náá nigún bi̱ nutañajuaanʼ* bi̱ ikháán nitando̱ʼo̱ʼ índo̱ niratá,
‹Araxniúnʼ mbáa rey ga̱jma̱a̱ príncipes›.
11 Índo̱ nikiʼnún nixnia̱a̱ʼ mbáa rey,
ga̱jma̱a̱ índo̱ gákasngañu̱ʼ marígú káyáaʼ.
12 Nixtagijxi̱i̱ rí nikiéʼkúun Efraín,
xúʼko̱ má aʼkhá rí nikudaminaʼ.
13 Ikhaa maxnúu ga̱ʼkhu̱ xó mbáa a̱ʼgu̱ bi̱ nacho̱o̱ magiʼdaa a̱ʼdióo.
Mú nindxu̱u̱ mbáa ada̱ bi̱ tséjmañuu,
índo̱ na̱jkha̱nú mbiʼi rí maxtáa, tsíyoo gágumaa.
14 Ikhúún ma̱ni̱ káwíin náa Iñá wajinʼ,*
xúʼko̱ má náa rí nakháñún.
Wajinʼ náá ni̱jkha̱ tsiaki̱i̱ ndrígáaʼ* rí naʼni marigá tsingíná rá.
Iñá wajinʼ, náá ni̱jkha̱ tsiaki̱i̱ ndrígáaʼ rí natani̱ gámbáa ga̱jma̱a̱ rá.
Ní xásngajmá rí nagáwíinʼ a̱jkiu̱nʼ.
15 Maski má ikhaa najmi̱di̱ riʼyu̱u̱ náa majñu̱u̱ʼ e̱ʼi̱n,
ma̱ʼkha̱ mbá giñánʼ náa nagájnuu a̱jkha̱ʼ,* giñánʼ ndrígóo Jeobá,
na̱ʼkha̱ náa ku̱ba̱ʼ mijxooʼ mu margu̱jdo̱o̱ puzu ga̱jma̱a̱ ma̱mbá iyaʼ rí na̱ʼkha̱ náa iduu.
Maʼga kagu̱u̱ xúgíʼ rí mitsaanʼ, xúgíʼ rí gíʼdoo numuu.
16 Samaria magiʼdoo aʼkhúun, numuu rí nikujximínáʼ náa inuu Dios ndrígóo.
Makhañún ga̱jma̱a̱ espada,
e̱ji̱i̱n maxtujkuri̱gi̱i̱n
gu̱ʼu̱ bi̱ kuda ewíin e̱ji̱n* bi̱ kúwá ikhí, ta̱phi̱i̱n gúrujtu ngañiin”.